Sioné 9
9
Ko e Faka‘ā ‘e Sīsū ha Tangata Na‘e Fanau‘i Kui
1Pea ‘i he‘ene ‘alu ange, na‘a ne ‘ilo ha tangata na‘e kui, ‘a ia na‘e fanau‘i ‘oku pehē. 2Pea fehu‘i kiate ia ‘e he‘ene kau ako, ‘o pehē, Lāpai, ko hai ne angahala, ‘a e siana ni, pe ko ‘ene mātu‘a, ‘o tupu ai hono fanau‘i kui?
3Pea tali ‘e Sīsū, Na‘e ‘ikai ko e angahala ‘a e siana ni, pe ko ‘ene mātu‘a: ka koe‘uhi ke fakae‘a ‘iate ia ‘a e ngaahi ngāue ‘a e ‘Otua. 4Kuo pau ke tau fai ‘a e ngāue ‘a‘ana ma‘ane fekau mai au lolotonga ‘oku ‘aho: ‘oku ‘unu mai ‘a e pō, ‘a ia ‘e ‘ikai lava ai ‘e ha taha ke ngāue. 5Ka u ka ‘i māmani, ko e maama au ‘a māmani.#Māt 5.14; Sioné 8.12
6Pea ‘i he‘ene lea pehē, na‘a ne ‘a‘anu ki he kelekele, ‘o ne ngaohi ‘aki ‘a e fāvai ha me‘i pelepela, mo ne pani ‘aki ‘ene pelepela ‘a e ongo fo‘i mata, 7‘o ne folofola kiate ia, Mole pē ‘o fufulu ‘i he vai ko Sailoame, (‘a ia ko hono hiki, Ko e fekaua). Ko ia na‘a ne ‘alu ‘o fufulu, ‘o ne ha‘u kuo ‘ā.
8Ko ia ko hono ngaahi kaungā ‘api, pea mo e kakai na‘e fa‘a tokanga mu‘a kiate ia, ko e toko taha na‘e mo‘ui kole pē, na‘a nau pehē, ‘Ikai ko e siana ‘eni na‘e nofo hē, ‘o hanganaki kole?
9Na‘e pehē ‘e ha ni‘ihi, Ko eni ia; pea pehē ha ni‘ihi, ‘Oku ‘ikai, ka ‘oku ne hangē pē ko ia: ka ka pehē ‘e ia, Ko au ia.
10Pea nau pehē ange, Na‘e faka‘ā fēfē ho mata?
11Pea tali ‘e ia, Ko e tangata ‘oku ui ko Sīsū, na‘a ne ngaohi ha pelepela, ‘o ne pani ‘aki hoku ongo mata ni, mo ne pehē mai, Mole pē ki Sailoame ‘o fufulu: ko ia na‘a ku ‘alu ‘o fufulu, pea u ‘a hake.
12Pea nau pehē ki ai, Kofa‘ā ‘a e tangata ko ia?
Pea ne pehē, ‘Oku ‘ikai te u ‘ilo.
Ko Hono Faka‘eke‘eke ‘e he Kau Fālesí ‘a e ‘Ā ‘a e Tangata Kuí
13Pea nau taki ia ki he kau Fālesi, ‘a e tangata na‘e kui mu‘a. 14Pea tā ko e Sāpate ‘a e ‘aho ne ngaohi ai ‘e Sīsū ‘a e pelepela, mo ne faka‘ā hono mata. 15Ko ia na‘e toe fehu‘i kiate ia ‘e he kau Fālesi foki, pe na‘e fēfē ‘ene ‘ā hake. Pea ne pehē kiate kinautolu, Na‘a ne ‘ai ha pelepela ki hoku poko‘i mata ni, pea u fufulu, pea u ‘ā.
16Pea lea ai ha ni‘ihi ‘o e kau Fālesi, ‘o pehē, Tala‘ehai ko ha tangata ia mei he ‘Otua: he ‘oku ‘ikai te ne tauhi ‘a e Sāpate.
Ka ka pehē ‘e ha ni‘ihi, ‘O lava fēfē ‘e ha tangata ‘oku angahala ke fai ha ala mana pehē? Pea na‘e hoko ha mavahevahe ‘iate kinautolu.
17Pea nau toe lea ai ki he motu‘a na‘e kui, Ko e hā ha‘o poa ‘a‘au ki he tangata na, he‘ene faka‘ā ho mata?
Pea ne pehē, Ko e palōfita ia.
18Ko ia ko ha‘a Siu na‘e ‘ikai te nau tui ne kui ‘a e tangata, pea toe ‘ā, kae‘oua ke nau ui ange ‘a e mātu‘a ‘a e tangata kuo faka‘ā; 19Mo nau ‘eke kiate kinaua, ‘o pehē, Ko eni ho‘omo tama, ‘a e toko taha ‘oku mo pehē na‘e fanau‘i kui? pea ‘oku fakafēfē ai ‘ene ‘ā ni?
20Pea na‘e tali ‘e he‘ene mātu‘a ‘o na pehē, ‘Oku ma ‘ilo ko e siana ni ko homa ‘uhiki, pea na‘e fanau‘i kui: 21ka ‘oku ‘ikai te ma lave‘i pē ko ‘ene ‘ā ni ‘i he hā; pea ‘oku ‘ikai te ma lave‘i ‘e kimaua pē ko hai ne faka‘ā hono mata. Mou ‘eke kiate ia; kuo ne tangata, te ne tali ‘e ia ma‘ana. 22Na‘e lea pehē ‘ene mātu‘a ko ‘ena manavahē ki ha‘a Siu; he kuo ‘osi tu‘utu‘uni ‘e ha‘a Siu, ka ‘ilonga ha taha te ne fakamo‘oni ko e Mīsaia ‘a Sīsū, ‘e hifo ia mei he falelotu. 23Ko hono ‘uhinga e ‘o e pehē ‘e he‘ene mātu‘a, Kuo tangata ia: mou fai kiate ia ho‘omou ‘eke.
24Ko ia na‘a nau ui ange ‘a e tangata na‘e kui, ko hono tu‘o ua, ‘o nau pehē ki ai, Ke ke ‘a‘apa ki he ‘Otua: ‘oku mau ‘ilo ‘e kimautolu ko e tangata ni ko e angahala.
25Pea tali ai ‘a e siana, Ko e me‘a ki ha‘ane angahala, ‘oku ‘ikai te u ‘ilo ha me‘a ki ai: ko e me‘a pē taha ‘oku ou ‘ilo, ko e kui au ka ‘oku ou ‘ā ni.
26Pea nau pehē ai kiate ia, Ko e hā ‘a e me‘a na‘a ne fai kiate koe? na‘e fēfē ‘ene faka‘ā ho mata na?
27Pea ne tali kiate kinautolu, Kuo ‘osi ‘eku tala kiate kimoutolu, pea na‘e ‘ikai te mou tokanga: ko e hā ‘oku mou toe fie fanongo ai ki ai? na‘a ‘oku mou fie ului ki he‘ene kau ako ‘a kimoutolu foki?
28Pea nau ngaohi ia, ‘o nau pehē, Ko koe pē ko e ako ‘a e siana na; ka ko kimautolu ko e kau ako ‘a Mōsese. 29‘Oku mau ‘ilo kuo folofola ‘e he ‘Otua kia Mōsese: ka ko e siana na, ‘oku ‘ikai te mau ‘ilo pē ‘oku mei fē ia.
30Pea tali ‘a e tangata, ‘o ne pehē kiate kinautolu, ‘Io, ko ia; tā ko e toki me‘a tofo ‘eni! ‘a e ‘ikai ‘ilo ‘e kimoutolu pē ‘oku mei fē ia; ‘osi, ko eni kuo ne faka‘ā hoku poko‘i mata ni! 31‘Oku tau lāu‘ilo, ko e ‘Otua ‘oku ‘ikai te ne tali ha kakai ‘oku angahala: kae ‘ilonga ‘a ia ‘oku ‘a‘apa ki he ‘Otua, mo fai hono finangalo, ‘oku ne talia ha toko taha pehē. 32Talu mei mu‘a ‘i mu‘a kuo te‘eki ke talanoa‘ia ‘o pehē, kuo faka‘ā ‘e ha taha ‘a e mata ‘o ha toko taha ne fanau‘i kui. 33Ka ne ‘ikai ko e toko taha ia mei he ‘Otua, ne ‘ikai te ne lava ha momo‘i me‘a.
34Pea nau tali kiate ia, Ko e koto tupu angahala koe, pea ko ho‘o hanga e ‘o ako mai kiate kimautolu? Pea nau kapusi ia ki tua‘ā.
Ko e Kui Fakalaumālie
35Pea na‘e fanongo ‘e Sīsū kuo nau kapusi ia ki tua‘ā; pea ne kumi ki ai, ‘o ne pehē ange, ‘Oku ke tui ki he Fanautama ‘a Tangata?
36Pea tali ‘e he siana, Pea ko hai ia, ‘Eiki, ka u tui ki ai?
37Pea folofola ‘a Sīsū, ‘ē, kuo ke mamata kiate ia, pea ko ia ia ‘oku talanoa mo koe.
38Pea pehē ‘e ia, ‘Eiki, ‘oku ou tui pē. Pea ne hū kiate ia.
39Pea folofola ‘e Sīsū, Ko ‘eku ha‘u ‘aku ki māmani, pea iku ai ‘a e fakamaau ki ha tu‘utu‘uni, ‘o pehē, Ke ‘ilonga ‘a kinautolu ‘oku ‘ikai ‘ā ke nau ‘ā; pea ‘ilonga ‘a kinautolu ‘oku ‘ā tokua, pea nau hoko ‘o kui.
40Pea fanongo ki he me‘a ko ia ‘e kinautolu ‘o e kau Fālesi na‘e ‘iate ia, pea nau pehē ki ai, Ta ‘apē ‘oku kui mo kimautolu foki, ‘o?
41Pea folofola ‘a Sīsū kiate kinautolu, Ka ne mou kui, pehē ‘oku ‘ikai ha‘amou angahala: ka ko eni ‘oku mou pehē, ‘Oku mau ‘ā; tā ‘oku nofo ma‘u ho‘omou angahala.
Obecnie wybrane:
Sioné 9: TMB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tongan Moulton Bible © Bible Society of the South Pacific, 2011.
