KO SĒNESI 15
15
Ko e Kovinānite ‘a e ‘O tuá mo ‘Epalame
1HILI ‘a e ngaahi me‘a ko ia na‘e hoko ‘a e folofola ‘a Sihova kia ‘Epalame ‘i ha vīsone, ‘o pehē, ‘Epalame, ‘oua na‘a ke manavasi‘i: ko au ko ho‘o pā, ‘e lahi ‘aupito ho‘o totongi.#15.1 ‘e lahi… totongí: ‘Oku hiki ‘e he ni‘ihi: mo ho‘o totongi lahi ‘aupito.
2Pea pehē ‘e ‘Epalame ‘Ēī Sihova, ko e hā te ke ‘omi? he ko ‘eku hiki pa‘a eni, pea ko e matāpule ‘o hoku ‘api ko e tama Tāmasikusi#15.2 pea ko e matāpule… Tāmasikusi; ‘Oku ‘ikai mahino hono faka-Hepeluú. ko ‘Eliesa. 3Na‘e pehē foki ‘e ‘Epalame, Ko eni kuo ‘ikai te ke ‘omi haku hako: pea vakai ko e tokotaha ‘i hoku kau nofo‘anga te ne ‘ea kiate au.
4Pea ‘iloange na‘e hoko kiate ia ‘a e folofola ‘a Sihova, ‘o pehē, ‘Oku ‘ikai ko eni ia te ne ‘ea kiate koe; kaekehe, ko e tokotaha ‘e ha‘u mei ho mānava, ko ia ia te ne ‘ea kiate koe. 5Pea ne taki ia kitu‘a, ‘o ne me‘a mai, Hanga hake ā ki langi, pea lau ‘a e ngaahi fetu‘u pe te ke lava hono lau: pea ne folofola kiate ia, ‘E pehē ho hako.#Lom 4.18; Hep 11.12
6Pea ne tui kia Sihova: pea ne lau ia ma‘ane mā‘oni‘oni.#Lom 4.3; Kal 3.6; Sēm 2.23
7Pea ne folofola kiate ia, Ko Sihova au, ko au na‘a ku ‘omi koe mei ‘Ua ‘o e kau Kalitia ke ‘atu ‘a e fonua ni mo‘ao tofi‘a.
8Pea pehē ‘e ia, ‘Ēī Sihova, te u ‘ilo ‘i he hā te u ma‘u ia?
9Pea ne folofola mai, ‘Omi ma‘aku ha pulu fefine ‘oku tolu ta‘u, mo ha kosi fefine ‘oku tolu ta‘u, mo ha sipi tangata ‘oku tolu ta‘u, mo ha kulukulu mo ha lupe mui. 10Pea ne ‘omi ma‘a ‘Ene ‘Afio ‘a e ngaahi me‘a ko ia kotoa; pea ne fahi ua kinautolu, ‘o tuku fakafeangai ‘a e ngaahi fa‘ahi; ka ko e ongo manupuna na‘e ‘ikai te ne fahi‘i. 11Pea ‘i he hifo mai ‘a e fanga manupuna ke kai ‘a e ngaahi konga manu, na‘e fakahe‘e kinautolu ‘e ‘Epalame.
12Pea ‘i he hifo ‘a e la‘ā na‘e tō ha mohe ma‘u kia ‘Epalame; pea ‘iloange na‘a ne vavana, he hoko ha po‘uli kehe kiate ia.#Siope 4.13,14 13Pea ne folofola kia ‘Epalame, Ke ke mātu‘aki ‘ilo ‘e nofo muli ‘a ho hako ‘i ha fonua ‘oku ‘ikai ‘onautolu; pea te nau ngāue ki he kakai ko ia; ‘a ia te nau ngaohikovi‘i kinautolu ‘o fāngeau ta‘u:#‘Eki 1.1-14; Ngā 7.6 14ko ia foki ko e kakai te nau ngāue ki ai te u fakamāu‘i ia ‘e au, pea hili ia te nau ‘alu atu mo e koloa lahi.#‘Eki 12.40-41; Ngā 7.7 15Ka ko koe te ke ‘alu fiemālie pē ki ho‘o ngaahi kui, ‘e tanu koe kuo ke toulekeleka ‘aupito. 16Pea ‘i hono fā ‘o e to‘utangata te nau foki mai: he kuo te‘eki ke lato ‘a e kovi ‘a e ha‘a ‘Āmoli.
17Pea faifai pea tō ‘a e la‘ā, pea po‘uli matolu; pea ‘iloange ko ha ‘ōvani ‘oku kohu mo ha ulo‘i afi ‘oku hā‘ele atu ‘i he vaha‘a ‘o e ngaahi konga manu ko ia. 18‘I he taimi ko ia na‘e fai fuakava ‘e Sihova mo ‘Epalame, ‘o pehē, Kuo u ‘atu ki ho hako ‘a e fonua, ko eni, mei he vaitafe ‘o ‘Isipite ‘o a‘u ki he vaitafe lahi ko ‘Eufaletesi;#Ngā 7.5 19‘a e ha‘a Keini, mo e ha‘a Kēnasi, mo e ha‘a Katemoni, 20mo e ha‘a Heti, mo e ha‘a Pēlisi, mo e ha‘a Lifaimi, 21mo e ha‘a ‘Āmoli, mo e ha‘a Kēnani, mo e ha‘a Kilikesa, mo e ha‘a Siepusi.
Obecnie wybrane:
KO SĒNESI 15: TMB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tongan Moulton Bible © Bible Society of the South Pacific, 2011.
