KO SĒNESI 11
11
Ko e Taua ‘o Pāpilone
1PEA na‘e ngutu taha pē ‘a e fonua kotoa, mo lea taha. 2Pea ‘i he faifai pea nau fononga mei hahake, pea nau ‘ilo ha toafa ‘i he fonua ko Saina; ‘o nau nofo ai. 3Pea nau fepehē‘aki; ‘Ē, tau ngaohi maka ‘umea mu‘a, ‘o mātu‘aki ta‘o ke moho. Pea nau maka ‘aki ‘a e maka ‘umea, mo nau lahe ‘aki ‘a e kelepulu. 4Pea nau pehē, ‘Ē, tau langa mu‘a ha‘atau kolo, mo ha taua ke tau ki langi, pea tau ‘ai ke ‘iloa hotau hingoa, na‘a tau movete ‘i he funga ‘o māmani.
5Pea hā‘ele hifo ‘a Sihova ke ‘afio‘i ‘a e kolo mo e taua na‘e langa ‘e he ha‘a ‘Ātama. 6Pea folofola ‘a Sihova: Vakai, ko e kakai pē taha kinautolu, pea lea taha; pea ko ‘enau kamata pē ē; pea ka hili ‘eni tala‘ehai ‘e mata‘ofi kinautolu mei ha me‘a ange te nau fakakaukau ke fai. 7‘Ē, tau ō hifo mu‘a, ‘o veuveuki ‘enau lea ke ‘oua te nau fe‘iloaki lea. 8Pea na‘e veteki kinautolu ‘e Sihova mei he potu ko ia ke nofo‘i ‘a e fonua kotoa; pea na‘a nau tuku ‘a e langa ‘o e kolo. 9Ko hono ‘uhinga ia na‘e fakahingoa ai ia ko Pēpeli (ko Maveuveu);#11.9 Pāpilone; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e maveuveu; pe fetuiaki. koe‘uhi ko e potu ia na‘e veuveuki ai ‘e Sihova ‘a e lea ‘a māmani, pea ko e potu ia na‘e vetekina mei ai ‘a e kakai ‘e Sihova ke nofo‘i ‘a e fonua kotoa.
Ko e Hako ‘o Semí
(1 Kal 1.24-27)
10Ko e tohi eni ‘o e hako ‘o Semi: Kuo fe‘unga ‘a Semi mo e ta‘u ‘e teau pea ne ma‘u ha foha ko ‘Afakisate ‘i hono ua ‘o e ta‘u hili ‘a e Lōmaki; 11pea mo‘ui atu ‘a Semi hili ‘ene ma‘u ‘a ‘Afakisate ko e ta‘u ‘e nimangeau, pea ne ma‘u mo ha ngaahi foha mo ha ngaahi ‘ōfefine.
12Pea ko ‘Afakisate ne mo‘ui ia ko e ta‘u ‘e teau mo e ta‘u ‘e tolungofulu mā nima, pea ne ma‘u ha foha ko Sala: 13pea mo‘ui atu ‘a ‘Afakisate hili ‘ene ma‘u ‘a Sala ko e ta‘u ‘e fāngeau mo e ta‘u ‘e tolu; pea ne ma‘u mo ha ngaahi foha mo ha ngaahi ‘ōfefine.
14Pea ko Sala ne mo‘ui ia ko e ta‘u ‘e teau mo e ta‘u ‘e tolungofulu, pea ne ma‘u ha foha ko Hepelū; 15pea mo‘ui atu ‘a Sala hili ‘ene ma‘u ‘a Hepelū ko e ta‘u ‘e tolungeau mo e ta‘u ‘e tolu; pea ne ma‘u mo ha ngaahi foha mo ha ngaahi ‘ōfefine.
16Pea kuo mo‘ui ‘a Hepelū ko e ta‘u ‘e teau mo e ta‘u ‘e tolungofulu mā fā, pea ne ma‘u ha foha ko Pēleki; 17pea mo‘ui atu ‘a Hepelū hili ‘ene ma‘u ‘a Pēleki ko e ta‘u ‘e uangeau mo e ta‘u ‘e fitungofulu; pea ne ma‘u mo ha ngaahi foha mo ha ngaahi ‘ōfefine.
18Pea kuo mo‘ui ‘a Pēleki ko e ta‘u ‘e teau mo e ta‘u ‘e tolungofulu, pea ne ma‘u ha foha ko Le‘u: 19pea mo‘ui atu ‘a Pēleki hili ene ma‘u ‘a Le‘u ko e ta‘u ‘e uangeau mo e ta‘u ‘e hiva, pea ne ma‘u mo ha ngaahi foha mo ha ngaahi ‘ōfefine.
20Pea kuo mo‘ui ‘a Le‘u ko e ta‘u ‘e teau mo e ta‘u ‘e tolungofulu mā ua, pea ne ma‘u ha foha ko Sēluki: 21pea mo‘ui atu ‘a Le‘u hili ‘ene ma‘u ‘a Sēluki ko e ta‘u ‘e uangeau mo e ta‘u ‘e fitu pea ne ma‘u mo ha ngaahi foha mo ha ngaahi ‘ōfefine.
22Pea kuo mo‘ui ‘a Sēluki ko e ta‘u ‘e teau mo e ta‘u ‘e tolungofulu, pea ne ma‘u ha foha ko Nēhoa: 23pea mo‘ui atu ‘a Sēluki hili ‘ene ma‘u ‘a Nēhoa ko e ta‘u ‘e uangeau; pea ne ma‘u mo ha ngaahi foha mo ha ngaahi ‘ōfefine.
24Pea kuo mo‘ui ‘a Nēhoa ko e ta‘u ‘e fitungofulu mā hiva pea ne ma‘u ha foha ko Tela; 25pea mo‘ui atu ‘a Nēhoa hili ‘ene ma‘u ‘a Tela ko e ta‘u ‘e teau mo e ta‘u ‘e hongofulu mā hiva; pea ne ma‘u mo ha ngaahi foha mo ha ngaahi ‘ōfefine.
26Pea kuo mo‘ui ‘a Tela ko e ta‘u ‘e fitungofulu pea ai ‘ene fānau, ko ‘Epalame, mo Nēhoa, pea mo Hēlani.
Ko e Hako ‘o Telá
27Ko e tohi eni ‘o e hako ‘o Tela. Na‘e ma‘u fānau ‘a Tela, ko ‘Epalame, mo Nēhoa, mo Hēlani; pea ma‘u ‘e Hēlani ha foha ko Lote. 28Pea na‘e motu‘a pekia ‘a Hēlani ‘ia Tela ko ‘ene tamai ‘i he fonua na‘e fanau‘i ai ia, ‘a ia ko ‘Ua ‘o e kau Kalitia. 29Pea na‘e fakauaifi ‘a ‘Epalame mo Nēhoa: ko e hingoa ‘o e uaifi ‘o ‘Epalame ko Sēlai; pea ko e hingoa ‘o e uaifi ‘o Nēhoa ko Milika; ko e ‘ōfefine ia ‘o Hēlani, ‘a ia ko e tamai ‘a Milika, mo e tamai ‘a ‘Īsika. 30Pea ko Sēlai na‘e pa‘a; na‘e ‘ikai ha‘ane tama.
31Pea ‘ave ‘e Tela ‘a hono foha ko ‘Epalame, mo hono mokopuna ko Lote, ko e foha ‘o Hēlani, pea mo Sēlai ko hono ‘ōfefine he ko e uaifi ‘o hono foha ko ‘Epalame; pea na‘a nau ‘alu fakataha mei ‘Ua ‘o e kau Kalitia ko ‘enau fononga ki he fonua ko Kēnani; pea nau a‘u ki Kālana ‘o nofo ai. 32Pea ko e motu‘a ‘o Tela ko e ta‘u ‘e uangeau mo e ta‘u ‘e nima; pea pekia ‘a Tela ‘i Kālana.
Obecnie wybrane:
KO SĒNESI 11: TMB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tongan Moulton Bible © Bible Society of the South Pacific, 2011.
