‘Apositoló 1
1
1‘E TIOFILUSI,#Luk 1.1-4 ko e ‘uluaki tohi na‘a ku fai, ko e fakamatala ki he ngaahi me‘a kehekehe na‘e fua fai mo ako‘aki ‘e Sīsū, 2‘o a‘u ki he ‘aho ko ia na‘a ne tuku ‘i he Laumālie Mā‘oni‘oni ‘ene ngaahi fekau ki he kau ‘Aposetolo kuo ne fili, pea ‘ave ai ia ki ‘olunga. 3Ko kinautolu ia foki na‘a ne fakahā ia ki ai hili hono feia: pea lahi mo mahino ‘ene ngaahi fakamo‘oni kuo ne mo‘ui: he na‘a ne hā kiate kinautolu, ‘o ‘aho fāngofulu, mo ne lea ki he ngaahi me‘a na‘e kau ki he Pule‘anga ‘o e ‘Otua. 4Pea na‘a ne kai mo kinautolu,#1.4 na‘á ne… kinautolu; pe na‘a nau fakataha, pe lolotonga ‘ene nofo mo kinautolú. ‘o ne tu‘utu‘uni ai ke ‘oua te nau hiki mei Selusalema, kae talitali ki he tala‘ofa ‘a e Tamai, ‘A ia (na‘a ne me‘a mai) na‘a mou fanongo ki ai ‘iate au.#Luk 24.49 5He na‘e papitaiso vai pē ‘e Sione; ka ‘e papitaiso kimoutolu ‘aki ‘a e Laumālie Mā‘oni‘oni hili ‘a e ngaahi ‘aho si‘i.#Māt 3.11; Ma‘ake 1.8; Luk 3.16; Sioné 1.33
Ko e Hā‘ele Hake ‘a Sīsū ki Langí
6Ko ia, ‘i he‘enau fakataha mo ia, na‘a nau fehu‘i kiate ia, ‘o pehē, ‘Eiki, ko ho‘o toe fakaato ‘i he taimi ni ‘a e pule‘anga ma‘a ‘Isileli?
7Pea ne folofola kiate kinautolu, ‘Oku ‘ikai ‘amoutolu ke ‘ilo ‘a e ngaahi taimi mo e ngaahi kuonga, ‘a ia kuo ta‘ofi ‘e he Tamai ki he‘ene fa‘iteliha ‘a‘ana. 8Ka te mou ma‘u pē ha mālohi, ‘oka hifo ‘a e Laumālie Mā‘oni‘oni kiate kimoutolu: pea te mou hoko ko ‘eku kau fakamo‘oni, ‘o ‘ikai ‘i Selusalema pē, ka ‘i Siutea kātoa, mo Samēlia, ‘io, ‘o a‘u ki he ngata‘anga ‘o māmani.#Māt 28.19; Ma‘ake 16.15; Luk 24.47-48 9Pea ‘i he‘ene folofola pehē, Lolotonga ‘enau siofia ia, na‘e ‘ave ia ki ‘olunga; pea na‘e kilala hake ia ‘e ha ‘ao, ‘o fakapuli meiate kinautolu.#Ma‘ake 16.19; Luk 24.50-51
10Pea ‘i he‘enau mo‘u sio fakamama‘u ki he langi, lolotonga ‘ene hā‘ele, pea tā kuo tu‘u mai kiate kinautolu ha ongo tangata kofu hinehina. 11Pea na‘a na pehē, ‘A e tu‘unga mātu‘a Kāleli, ko e hā ‘oku mou tutu‘u ai, ‘o sio pehē ki langi? Ko e Sīsū ko ia ‘a ia kuo ‘ohake meiate kimoutolu ki he langi, te ne toe ha‘u; pea ‘e hangē tofu pē hono anga pea mo ‘ene hā‘ele ki langi kuo mou mamata ki ai.
Ko ha Fetongi ‘o Siutasi
12Pea nau toki foki ki Selusalema, mei he mo‘unga ‘oku ui ko ‘Ōlive, ‘a ia ‘oku ofi ki Selusalema ngofua ke ‘alu ki ai ‘i he Sāpate. 13Pea kuo nau hū ki kolo, na‘a nau ‘alu hake ki he loki ‘i ‘olunga ‘a ia na‘a nau ma‘unganofo ki ai–‘a Pita mo Sione mo Sēmisi mo ‘Anitelū, ‘a Filipe mo Tōmasi, ‘a Pātolomiu mo Mātiu, ‘a Sēmisi ko e foha ‘o ‘Alefiusi, mo Saimone ‘o e kautaha Mamahi‘ifonua, pea mo Siutasi ko e foha ‘o Sēmisi.#Māt 10.2-4; Ma‘ake 3.16-19; Luk 6.14-16 14Ko kinautolu ni kotoa pē na‘a nau faka‘utumauku ‘enau lotu ‘o loto taha; pea ai mo ha kau fefine, kae‘uma‘ā ‘a Mele ko e fa‘ē ‘a Sīsū, pea mo hono ngaahi tokoua.
15Pea lolotonga ‘i he ngaahi ‘aho ko ia na‘e tu‘u hake ‘a Pita ‘i he ha‘oha‘onga ‘o e kāinga: (na‘e ‘i ai mo e ngaahi hingoa tokolahi, ko e kakai kuo fakataha ki he potu ko ia, fe‘unga nai mo e toko teau mo e toko uofulu): pea pehē ‘e ia, 16‘E Kāinga, na‘e pau ke hoko ‘a e folofola, ‘a ia ne sinaki folofola‘aki ‘e he Laumālie Mā‘oni‘oni ‘i he fofonga ‘o Tēvita, ‘o kau kia Siutasi, ‘a e toko taha na‘a ne hoko ko e takihala ki he kakai na‘e puke ‘a Sīsū. 17He ne ‘osi lau ia mo kitautolu, pea ne tō kiate ia ‘a e lakanga ni.
18(Pea ko e siana ko ia na‘a ne ma‘u ha ‘api ‘aki ‘a e totongi ‘o ‘ene kākā; ‘o ne tō ‘o pāfua, pea mafahi hono fatu, pea fu‘u malingi kitu‘a hono to‘oto‘onga.#Māt 27.3-8 19Pea na‘e faifai pea ‘ilo ki ai ‘a e kakai kotoa pē na‘e nofo ‘i Selusalema; ko ia na‘e hingoa ai ‘a e ‘api ko ia ‘i he‘enau lea ko ‘Akeletama, ‘a ia ‘oku tatau mo e ‘Api-‘o-fakapō.)
20He kuo tohi ‘i he tohi Saame,#Saame 69.25; 109.8 Ke lala ‘ene loto‘ā, pea ke mole ‘a ia na‘e nofo ki ai, pea ke ma‘u ‘e ha taha kehe ‘ene lakanga le‘o.
21Ko ia, ‘oku totonu ke fokotu‘u ha taha ‘i he kau tangata kuo kau mo kitautolu, lolotonga ‘a e felemofafo ‘a e ‘Eiki Ko Sīsū ‘iate kitautolu, 22‘o fai mei he Papitaiso ‘a Sione#1.21-22 mei… Sione; pe mei hono papitaiso ‘e Sioné. ‘o a‘u ki he ‘aho ‘o hono ‘ohake meiate kitautolu–‘io, ke ai ha toko taha ‘i he kakai ni ke ne hoko ko e fakamo‘oni ‘o ‘ene toetu‘u, fakataha mo kimautolu.
23Pea nau tu‘utu‘uni ha toko ua; ko Siosifa na‘e ui ko Pāsapa, ‘a ia na‘e fakahingoa foki ko Siusitasa, pea mo Mataiasi. 24Pea nau hū ‘o pehē, ‘Eiki, ko koe ia ‘oku tokaima‘ananga ki ai ‘a e loto ‘o e kakai fuli pē; ke ke fakahā pe ko e fē ha taha ‘i he ongo me‘a ni kuo ke fili, 25ke ma‘u ‘a e potungāue faka‘aposetolo ni ‘a ia ne laka mei ai ‘a Siutasi ke ‘alu ki hono potu ‘o‘ona. 26Pea nau talotalo ma‘anaua; pea tonu kia Mataiasi: pea na‘e fakahoko ia ‘e he fakataha ki he kau hongofulu-mā-taha ‘aposetolo.
Obecnie wybrane:
‘Apositoló 1: TMB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tongan Moulton Bible © Bible Society of the South Pacific, 2011.
