Kĩambĩrĩria 2
2
1Ũguo nĩguo thĩ na igũrũ na indo ciothe iria irĩ kuo ciarĩĩkirie kũũmbwo. 2#Ahib 4.4,10 #Tha 20.11 Naguo mũthenya wa mũgwanja Ngai agĩkorwo arĩĩkĩĩtie wĩra ũrĩa aarutaga, agĩkĩhuurũka. 3Agĩkĩraathima mũthenya wa mũgwanja na akĩwamũra, nĩ amu mũthenya ũcio nĩguo aahuurũkire, arĩĩkia wĩra wake wa ũũmbi. 4Ũguo nĩguo igũrũ na thĩ ciombirwo.
Mũgũnda wa Edeni
Hĩndĩ ĩrĩa MWATHANI Ngai oombire thĩ na igũrũ#2.4 MWATHANI: Thĩinĩ wa Maandĩko Matheru ma Ahibirania, rĩĩtwa rĩĩrĩ nĩ “Yahweh”. Maandĩkoinĩ maingĩ Matheru rĩĩtwa rĩĩrĩ rĩkoreetwo rĩkĩrugũrwo “Jehova”. Maandĩkoinĩ maya rĩrugũrĩĩtwo MWATHANI na ndemwa nene, ta ũrĩa rĩrugũrĩĩtwo Maandĩkoinĩ Matheru na rũthiomi rwa Kĩngeretha., 5gũtiarĩ mĩmera na gũtiarĩ mbegũ ciamereete thĩ, amu MWATHANI Ngai ndoirĩĩtie mbura, na gũtiarĩ mũndũ wa kũrĩma. 6No rĩĩrĩ, maaĩ nĩmoimaga na thĩ makaihũgia thĩ.
7 #
1Akor 15.45
Naake MWATHANI Ngai akĩoya tĩĩri kuuma thĩ, akĩũmba mũndũ na tĩĩri ũcio; akĩmũhuuhĩra mĩhũũmũ ya muoyo maniũrũinĩ, naake mũndũ ũcio agĩtuĩka kĩũmbe kĩ muoyo.
8MWATHANI Ngai agĩcooka agĩthondeka mũgũnda thĩinĩ wa Edeni, mwena wa na irathĩro, akĩiga mũndũ ũcio oombĩĩte kuo. 9#Kũg 2.7; 22.2,14 Agĩtũma mĩtĩ mĩthaka ya mĩthemba yothe ĩkũre kuo, na ĩciarage matunda meega. Na rĩĩrĩ, gatagatĩ ka mũgũnda ũcio nĩhaarĩ mũtĩ wa muoyo na mũtĩ wa kũmenyithania wega na ũũru.
10Ningĩ mũgũndainĩ ũcio nĩkwarĩ rũũĩ rwathereraga rũkaũhe maaĩ, na rwoima nja ya Edeni rũgaatũkana rũgatuĩka njũũĩ inya. 11Rũũĩ rwa mbere rwĩtagwo Pishoni, na rũthereraga rũgathiũrũrũka bũrũri wothe wa Havila. 12(Kũu nĩkũrĩ thahabu ĩrĩa njega, maguta manungi wega matoonekaga kaingĩ, o na tũhiga twa goro.) 13Rũũĩ rwa keerĩ rwĩtagwo Gihoni, naruo rũthiũrũrũkĩirie bũrũri wothe wa Ethiopia. 14Rũũĩ rwa gatatũ rwĩtagwo Tigiri, na rũthereire mwena wa na irathĩro wa Asiria. Naruo rũũĩ rwa kana nĩ Farati.
15MWATHANI Ngai akĩiga mũndũ ũcio mũgũndainĩ wa Edeni nĩguo aũrĩmage na aũikaragie. 16Agĩkĩmwĩra atĩrĩ, “No ũrĩe matunda ma mĩtĩ yothe ĩrĩa ĩrĩ mũgũnda, 17tiga o matunda ma mũtĩ ũrĩa ũmenyithanagia wega na ũũru. Ndũkaanarĩe itunda rĩa mũtĩ ũcio, ũngĩkaarĩrĩa, ũgaakua o mũthenya ũcio.”
18Ningĩ MWATHANI Ngai akiuga atĩrĩ, “Ti wega mũndũ ũyũ aikarage arĩ wiki. Nĩngũmũũmbĩra mũmũteithia ũrĩa maaganĩrĩirwo.” 19Agĩkĩoya tĩĩri kuuma thĩ akĩũmba nyamũ ciothe na nyoni ciothe, agĩcireehe harĩ mũndũ ũcio oone ũrĩa egũcitua marĩĩtwa, na ũguo nĩguo nyamũ ciothe ciaheirwo marĩĩtwa. 20Mũndũ ũcio agĩtua nyoni ciothe na nyamũ ciothe marĩĩtwa; nowe ndagĩire na mũmũteithia ũmwagĩrĩire.
21MWATHANI Ngai nĩagĩtũmire mũndũ mũrũme ũcio akome toro mũnene, na e toro, Ngai akĩruta rũbaru rũmwe rwake, agĩcooka agĩtumania nyama icio, 22akĩũmba mũtumia kuuma rũbaruinĩ rũu, akĩmũtwara harĩ mũndũ mũrũme. 23Naake mũndũ mũrũme ũcio akiuga atĩrĩ,
“Rĩu-rĩ, ũyũ nĩ ihĩndĩ riumĩĩte mahĩndĩinĩ maakwa,
na nĩ nyama ciumĩĩte nyamainĩ ciakwa.
Arĩĩtagwo mũtumia,
nĩ tondũ arutĩĩtwo harĩ mũndũ mũrũme.”
24 #
Mat 19.5; Mar 10.7-8; 1Akor 6.16; Aef 5.31 Kwoguo mũndũ mũrũme arĩtigaga ithe na nyina akanyiitana na mũtumia wake, nao magatuĩka ũmwe.
25Mũndũ mũrũme ũcio na mũtumia wake maarĩ njaga, no matiaiguaga thoni.
Obecnie wybrane:
Kĩambĩrĩria 2: GKN
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Gikuyu Common Language Bible with DC © Bible Society of Kenya, 2014, 2018.
