Mātiu 4
4
Ko e ʻAhiʻahiʻi ‘o Si̇̄sū ʻe he Tēvoló
(Ma‘ake 1:12,13; Luke 4:1-13)
1Pea toki taki atu ‘e he Laumālié ʻa Si̇̄sū ki he toafá ke ʻahiʻahiʻi ai ia ‘e he tēvoló. 2Pea hili ʻa e ‘aukai ‘a Si̇̄sū ‘o ‘aho ‘e fāngofulu mo e pō ‘e fāngofulú, kuó ne fiekaia ‘aupito. 3Pea haʻu ʻa e tēvoló ‘o talaange kia Si̇̄sū: ‟Kapau ko e ‘Alo koe ‘o e ‘Otuá, pea ke lea ki he ngaahi fo‘i maká ni ke hoko ko e ngaahi foʻi mā.” 4Kae tali ‘e Si̇̄sū, ʻo ne pehē: ‟Kuo tohi ʻi he Tohitapú, ‛‘Oku ‘ikai moʻui ha taha ‘i he maá pē, ka ko e ngaahi fo‘i folofola kotoa pē mei he fofonga ʻo e ‘Otuá.’ ”
5Pea toe taki atu ‘e he tēvoló ‘a Si̇̄sū ki Selusalema ‘o ne fokotuʻu ia ‘i he tumutumu ‘o e Temipalé. 6Pea ne pehē ange kia Si̇̄sū, ‟Kapau ko e ‘Alo koe ‘o e ‘Otuá peá ke hopo ki lalo. He kuo tohi ‘i he Tohitapú, ‛‘E tuʻutuʻuni ‘e he ‘Otuá ki heʻene kau ‘āngeló ʻa e me‘a ke nau fai kiate koé, pea te nau hapo koe na‘á lavea ho vaʻé ‘i he maká.’ ” 7Pea talaange ‘e Si̇̄sū kiate ia: ‟Kuo tohi mo ʻeni foki ‘i he Tohitapú, ‛ʻOua te ke ʻahiʻahiʻi ‘a e ‘Eiki̇́ ko ho ‘Otuá!’ ”
8Pea toe taki hake ‘e he tēvoló ‘a Si̇̄sū ki ha funga moʻunga mā‘olunga ‘aupito, ‘o ne faka‘ali‘ali ange ki ai, ‘a e ngaahi pule‘anga kotoa pē ‘o māmani̇́, mo honau fakaʻofoʻofá. 9Peá ne toki pehē ange: ‟Ko e ngaahi me‘a kotoa ko ʻeni̇́ ‘e ‘atu ma‘au ‘okapau te ke tūʻulutui hifo ‘o lotu mai kiate au.” 10Pea toki tala ange ‘e Si̇̄sū ki ai: ‟Mavahe meiate au Sētane! He kuo tohi ‘i he Tohitapú, ‘Ko e ‘Eiki̇́ ko ho ‘Otuá pē te ke lotu ki ai̇́, pea ko ia toko taha pē te ke fai ki ai hoʻo huú!’ ”
11Pea toki tukuange leva ‘e he tēvoló ‘a Si̇̄sū, pea ʻiloange! Naʻe omi ʻa e kau ‘āngeló ‘o tauhi kiate ia.
Ko e Kamata Ngāue ‘a Si̇̄sū ‘i Kāleli
(Ma‘ake 1:14,15; Luke 4:14,15)
12Pea ʻi he fanongo ‘a Si̇̄sū kuo tuku pili̇̄sone ‘a Sioné, naʻá ne foki hake ki Kāleli. 13Ko ia, na‘e ‘ikai ke ne toe nofo ‘i Nāsaleti, ka naʻá ne hiki ki Kāpaneume, ‘a ē ‘oku tuʻu ‘i he veʻe matātahi̇́ ‘i he vahefonua ʻo Sepulone mo Nafitalai̇́. 14Pea na‘e fakamo‘oni ai ʻa e lau ʻa e palōfita ko ‘Aiseá:
15‟ʻA e fonua ʻo Sepulone mo Nafitalai̇́,
‘Akimoutolu ‘oku nofo he matātahi̇́ mo Tuʻa-Soatani̇́.
‘A e tukui kolo ‘o Kāleli, ʻo e Senitailé.
16Ko e kakai ʻoku nofo ʻi he fakapoʻuli,
ʻE hulungia kinautolu ‘e ha maama lahi.”
17Talu mei he taimi ko iá, mo e kamata malanga ‘a Si̇̄sū ki he kakai̇́: ‟Mou tafoki ki he ‘Otuá, he kuo vave ke hoko mai ‘a e Pule‘anga ‘o Hēvani̇́.”
Ko e fili ‘e Si̇̄sū ha Kau Toutai ‘e Toko Fā
(Ma‘ake 1:16-20; Luke 5:1-11)
18Pea lolotonga ‘a e fononga atu ‘a Si̇̄sū ‘i he matātahi ʻo e Tahi Kāleli̇́, na‘á ne fakatokanga‘i ha ongo tautehina, ko Saimone (na‘e ui ko Pitá) mo hono tokouá, ko ‘Anitelū, ‘okú na li̇̄ kupenga ʻi tahi, he ko e ongo tangata toutai kinaua. 19Pea pehē ‘e Si̇̄sū kiate kinaua: ‟Mo muimui mai ke tau ō, pea te u ngaohi kimoua ko e ongo toutai tangata.” 20Peá na tuku leva hona kupengá ka na muimui kinaua ʻia Si̇̄sū.
21Pea toe tahataha atu ‘a Si̇̄sū peá ne toe fakatokanga‘i mo ha ongo tautehina, ko Sēmisi mo Sione hona hingoá, ‘oku fai ‘ena monomono kupenga mo ‘ena tangata‘eiki̇́ ‘i ha vaka. Ko e hingoa ‘o ‘ena tangata‘eiki̇́ ko Sēpeti. Pea ui kinaua ‘e Si̇̄sū. 22Peá na tuku leva ‘ena tangata‘eiki̇́ mo e vaká, ka na muimui kinaua kia Si̇̄sū.
Ko e Faiako, Malanga mo e Fakamo‘ui Mahaki ‘a Si̇̄sū
(Luke 6:17-19)
23Pea ‘alu takai ‘a Si̇̄sū ‘i Kāleli kātoa ‘o faiako ‘i honau ngaahi falelotú mo malanga‘i ‘a e ongoongo lelei ‘o e Pule‘angá. Peá ne fakamo‘ui ʻa e kakai na‘e mo‘ua ‘i he ngaahi mahaki̇́ mo e ngaahi faingataʻa kehekehe. 24Pea mafola atu ai ‘a e ongoongo ‘o Si̇̄suú ki he feituʻu kotoa ‘o Si̇̄liá. Pea ko e kakai kotoa na‘e ‘i ai haʻanau alanga mahaki pē faingata‘ā‘ia; ko e ni‘ihi, kuo maʻu ‘e ha fanga tēvoló; ko e ni‘ihi, kuo ‘āveá. Pea ko e ni‘ihi na‘e mamateá, pea na‘e fakamo‘ui kotoa kinautolu ‘e Si̇̄sū.
25Pea na‘e muimui fononga ‘ia Si̇̄sū ha fuʻu kakai tokolahi mei Kāleli, mo Tikapolisi, mo Selusalema; mei Siutea, pea mo Tu‘a-Soatani.
Obecnie wybrane:
Mātiu 4: TCNT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tongan Contemporary New Testament © Bible Society of the South Pacific, 2011.
