Sione 4
4
1Ko ia ʻi he meaʻi ʻe Si̇̄sū kuo fanongo ʻa e kau Fālesi̇́ ʻi he faka‘au ke tokolahi ange ʻa e kau ako ‘okú ne ma‘u mo papitaisó, ‘ia Sioné: 2Neongo ko hono moʻoni̇́, naʻe ʻikai papitaiso ʻe Si̇̄sū ia ha taha, ka ko ʻene kau akó pē. 3Naʻá ne mavahe atu mei Siutea, ʻo ne toe ʻalu atu ki Kāleli.
Ko Si̇̄sū mo e Fefine Samēlia
4Pea na‘e pau ke ne fononga ʻo fou atu ‘i Samēlia. 5Ko ia, naʻá ne aʻu atu ki ha kolo ʻo Samēlia ʻoku ʻiloa ko Saika, ʻa ia ‘oku ofi atu ki he konga kelekele na‘e ‘oange ‘e Sēkope maʻa hono foha ko Siosifá. 6Pea na‘e kei tu‘u ai ha vaitupu na‘e keli ‘e Sēkopé. Pea koeʻuhi̇̄ kuo ongosia ʻa Si̇̄sū mei̇ he fonongá, naʻá ne ta‘utu hifo ai pē he ve‘e vaitupú, fe‘unga ʻeni̇́ kuo ho‘atā mālie. 7Mo e haʻu ha fefine Samēlia ke ʻutu vai.
Pea folofola ʻa Sisu kiate ia; ‟ʻOmai muʻa ha ku inu.”
8He kuo ʻalu atu ʻene kau akó ki he koló, ke fakatau mai haʻanau meʻakai.
9Ka naʻe pehē ange ‘e he fefine Samēliá kiate ia: ‟Ko e Siu koe ka ko e fefine Samēlia au. ʻOku anga fēfē hoʻo kole mai ke ʻoatu hao inú?” (He na‘e ‘ikai ke feʻofofani ʻa e kakai Siú mo e kakai Samēliá.)
10Pea tali ‘e Si̇̄sū, ʻo ne pehē kiate ia: ‟Kapau naʻá ke ‘ilo‘i ʻa e meʻaʻofa ʻa e ‘Otuá, pea mo e toko taha ‘oku lea atu kiate koe; ‟ʻOmi ha ku inú,” pehē kuó ke kole ‘e koe kiate ia, pea te ne ‘oatu ma‘au ha vai moʻui.”
11Pea pehē ange ʻe he fefiné kiate ia: ‟ʻEiki, ʻoku ʻikai haʻo meʻaʻutuvai, pea ʻoku loloto fau ʻa e vaitupú, ka ko hoʻo vai moʻui ʻaʻau mei fē? 12ʻOkú ke lahi koā koe ʻi heʻemau kui ko Sēkopé, ʻa ia naʻá ne foaki mai maʻa mautolu ʻa e vaitupú, pea naʻá ne inu mei ai mo ʻene fānaú mo ʻene fanga manú?”
13Pea tali ‘e Si̇̄sū, ʻo ne folofola kiate ia: ‟Ko ia kotoa pē ‘e inu mei̇́ he vai ko eni̇́, te ne toe fieinua. 14Ka ʻoka ai ha taha ‘e inu mei̇́ he vai te u ‘oange kiate iá, he‘ikai ke toe fieinua ia ‘o ta‘engata, ka ko e vai te u ʻoange maʻaná, ʻe hoko ia ‘i heʻene moʻui̇́, ko e matavai ʻe tafe mālohi maʻu pē ʻo aʻu ki he mo‘ui ta‘engatá.”
15Pea pehē ange ‘e he fefiné kiate ia: ‟ʻEiki, ‘omai muʻa ma‘aku ʻa e vai ko iā, koeʻuhi̇̄ ke ʻoua te u toe fieinua, pē te u toe hela mai ki heni ke ʻutu ange.”
16Pea ne folofola kiate ia: ‟‘Alu ‘o ui mai ho husepāniti̇́ pea mo ōmai ki heni.”
17Pea tali ʻe he fefiné ʻo ne pehē kiate ia: ‟‘Oku ‘ikai ha ku husepāniti.”
Pea folofola ʻa Si̇̄sū kiate ia: ‟‘Oku mo‘oni ‘aupito ho‘o lau ʻoku ‘ikai hao mali̇́. 18He kuo tuʻo nima hoʻo maʻu husepāniti, pea ko e tangata ʻokú ke lolotonga nonofo mo iá, ‘oku ‘ikai ko ho mali ia. ‘Oku mo‘oni ‘aupito ho‘o lau ko iā.”
19Pea pehē ange ‘e he fefiné kiate ia: ‟ʻEiki, ʻoku hangehangē kiate au ko ha palōfita koe! 20Ko ‘emau ngaahi kui̇́, na‘e fai ʻenau lotú ʻi he mo‘unga ko eni̇́. Ka ko kimoutolu, ‘oku mou lau, ko Selusalema ʻa e feitu‘u totonu ke fai ki ai ʻa e lotú.”
21Pea folofola ʻa Si̇̄sū kiate ia: ‟Fefine, tui mai kiate au, he ʻoku vave mai ha taimi ʻa ia ‘e ‘ikai kei fai ʻa e lotu ki he Tamai̇́ ʻi he mo‘unga ko eni̇́, pē ko Selusalema. 22Ko kimoutolú, ʻoku mou lotu ki he meʻa ‘oku ‘ikai te mou ‘ilo moʻoni ki ai. Ka ko kimautolú, ‘oku mau lotu ki he meʻa ʻoku maʻu ʻilo lelei ki ai, he ko e fakamo‘ui̇́, ʻoku haʻu mei̇́ he kakai Siú. 23Ka ʻoku vave mai ha taimi, ʻa ʻeni kuo hokosia he taimi ni̇́, ʻa ia ko kinautolu ʻoku lotu moʻoni ki he Tamai̇́, ʻe fai ʻi laumālie mo moʻoni ʻenau lotú, he ʻoku kumi ʻe he Tamai̇́ foki ki he faʻahinga ʻe fai pehē ʻenau lotuhū kiate iá. 24Ko e ‘Otuá ko e Laumālie, pea ko kinautolu ʻoku lotu kiate iá, kuo pau ke fai ʻi he laumālié mo e moʻoní ʻenau lotuhuú.”
25Pea pehē ange ‘e he fefiné kiate ia: ‟‘Oku ou ‘ilo ‘oku hoko mai ʻa e Mi̇̄saiá, ʻa ē ‘oku ui ko e Kalaisi̇́; Pea ʻoka hokomai ʻa e Toko Taha ko iá, te ne toki fakahā kiate kimautolu ʻa e meʻa kotoa pē.”
26Pea folofola ʻa Si̇̄sū kiate ia: ‟Ko au ia, ʻa ʻeni ‘oku lolotonga talanoa mo koé.”
27Pea fe‘unga iá mo e aʻu mai ʻene kau akó, ‘o nau ‘ohovale he‘enau sio ‘okú ne talanoa mo ha fefine. Ka na‘e ‘ikai ha taha te ne ʻeke ange pē ko e hā ʻa e meʻa naʻá ne tokanga ki ai̇́, pea ko e hā ʻa e ‘uhinga ʻene talanoa mo iá.
28Ko ia, naʻe tuku pē ai ‘e he fefiné ʻene meʻaʻutuvai̇́, ka ne foki ki he koló ‘o tala holo ki he kakai̇́: 29‟Mou ōmi angē ‘o mamata ki he tangata, ʻa ia kuó ne fakamatala mai kiate au, ʻa e kotoa ʻo e ngaahi meʻa kuo u fai̇́. ʻOku ʻikai nai ko e Mi̇̄saiá ʻeni?” 30Pea ʻalu atu ʻa e kakai̇́ mei he koló, ʻo nau ōatu kiate ia.
31Kae lolotonga iá, naʻe fakakolekole ‘e he kau akó ʻa Si̇̄sū, ʻo pehē: ‟Tangata‘eiki, ‘ofa mai ‘o ma‘u ha me‘atokoni!”
32Ka naʻá ne pehē kiate kinautolu: ‟‘Oku ‘i ai ‘eku me‘atokoni ʻa ia ‘oku ‘ikai ha‘amou ‘ilo ki ai.”
33Ko ia, naʻe fepehēʻaki ‘e he kau akó: ‟Na‘e ‘oange nai ‘e ha taha ha‘ane me‘atokoni?”
34Pea folofola ʻa Si̇̄sū kiate kinautolu: ‟Ko ‘eku me‘atokoni̇́, ko e fai ʻa e finangalo ‘o e Toko Taha naʻá ne fekau mai aú peá ke fakakakato ʻene ngaahi ngāué. 35ʻIkai ʻoku mou faʻa pehē: ‛‘Oku toe pē ʻa e māhina ‘e fā pea fai ʻa e ututaʻu uité?’ Ko ʻeni ʻoku ou tala kiate kimoutolu, mou hanga ʻo mamata atu ki he ngaahi ngoueʻangá, he kuo ‘osi motu‘a lelei ʻa e uité mo fe‘unga ke toli leva! 36Ko e tokotaha ʻokú ne toli ʻa e uité, kuó ne ʻosi maʻu ʻa e totongi̇́, pea ʻokú ne tānaki ʻa e fuá, ki he moʻui taʻengatá, koe‘uhi̇̄ ke fakafiefia fakataha ai ʻa e kau ngoue uité mo e kau toli uité. 37He ‘oku toki mo‘oni̇ ʻa e laú, ʻi he meʻa ni, ‘Oku tō ‘e ha ni‘ihi, kae utu ‘e ha ni‘ihi kehe. 38Naʻá ku fekau atu kimoutolu ke mou ō ‘o toli ha ngaahi ngoue‘anga na‘e ‘ikai te mou fakaongosia ai. Ko ha niʻihi kehe na‘e fakaongosia ai̇́, ka mou ōatu kimoutolu ‘o ma‘u fiefia ʻi heʻenau fakaongosiá.”
39Pea naʻe tui kiate ia ha kau Samēlia tokolahi mei̇́ he kolo ko iā koe‘uhi̇̄ ko e lea ʻa e fefiné ʻo ne talalotoʻaki, ʻo pehē: ‟Naʻá ne fakamatalamai kiate au ʻa e meʻa kotoa pē kuo u fai.” 40Ko ia, ʻi he omi leva kiate ia ʻa e kakai ʻo Samēliá, naʻa nau kole ange kia Si̇̄sū ke ne nofo pē mu‘a ai mo kinautolu. Ko ia, naʻá ne nofo ai ‘i ha ʻaho ‘e ua.
41Pea tokolahi foki mo ha kakai kehe naʻe tui kia Si̇̄sū koe‘uhi̇̄ ko ‘ene folofolá. 42Pea nau talaange ki he fefiné, ʻo pehē: ‟‘Oku ‘ikai te mau kei tui ʻo tuʻunga he me‘a naʻá ke talamai̇́. He kuo mau fanongo tonu kiate ia, pea kuo mau ‘ilo pau, ʻoku mo‘oni pē, ko ʻeni ia ʻa e Fakamo‘ui ‘o māmani̇́.”
Ko e Fakamo‘ui ‘e Si̇̄sū ʻa e Foha ‘o ha Tangata Ngāue Fakapuleʻanga
(Mātiu 8:5-13; Luke 7:1-10)
43Pea hili ha ʻaho ʻe ua mei ai pea naʻe toki mavahe mei ai, ‘o ‘alu ki Kāleli. 44Ko Si̇̄sū pē foki naʻá ne lau ʻo pehē: ‟ʻoku ʻikai ha palōfita ‘e faka‘apa‘apa‘i ‘i hono kolo tupu‘angá.”
45Ko ia, ʻi heʻene a‘u atu ki Kāleli̇́, naʻe talitali lelei ia ‘e he kau Kāleli̇́, he kuo nau mamata ki he ngaahi meʻa lahi naʻá ne fai ʻi Selusalema lolotonga ʻa e Kātoanga Pāsová, he naʻa nau ʻi ai foki mo kinautolu.
46Pea toe ʻalu ia ki Kena ʻi Kāleli̇́, ʻa e kolo ia naʻá ne liliu ai ʻa e vai̇́ ko e uainé.
Pea na‘e nofo ai ha tangata ko e matāpule ʻa e tuʻi̇́, ʻa ia na‘e puke hano fohá ‘i Kāpaneume. 47Pea ʻi heʻene fanongo kuo a‘u mai ʻa Si̇̄sū ki Kāleli mei Siuteá, naʻá ne ʻalu atu leva kiate ia ‘o kole ke ne ʻalu hifo mu‘a ‘o faito‘o hono fohá, he kuo mei mate. 48Ka naʻe pehēange ‘e Si̇̄sū kiate ia: ‟Kapau naʻe ʻikai te mou mamata ki he maná pea mo e me‘a fakaofó, ʻe ʻikai ʻaupito te mou tui.”
49Pea lea kiate ia ʻe he matāpule ʻa e tuʻi̇́: ‟ʻEiki, meʻa mai muʻa, telia naʻa mate ʻeku tamasiʻi̇́.”
50Pea folofola ʻa Si̇̄sū kiate ia: ‟‘Alu pē koe, he kuo mo‘ui ho fohá!”
Na‘e tui ʻa e tangatá ki he folofola naʻe fai ʻe Si̇̄sū kiate ia, pea naʻe ‘alu. 51Pea lolotonga ʻene kei fononga atú, kuo fakafetaulaki mai ʻene kau ngāué ʻo fakahā ange, ʻo pehē: ‟Kuo mo‘ui ho fohá!”
52Pea ʻi he fehu‘i ange ʻe he tangatá pē na‘e mo‘ui fakakū hono fohá, naʻa nau talaange: ‟Na‘e mahu‘i hono mofi̇́, he taimi tahá ‘aneafi.” 53Pea ʻiloʻi leva ‘e he tangatá, ko e taimi pē ia na‘e folofola ange ai ʻa Si̇̄sū: ‟Kuo mo‘ui ho fohá.” Ko ia, naʻá ne mātuʻaki tui kiate ia mo hono fāmili̇́ kātoa.
54Ko e mana hono ua ia naʻe fai ʻe Si̇̄sū, hili ‘ene hiki mei Siutea ki Kāleli̇́.
Obecnie wybrane:
Sione 4: TCNT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tongan Contemporary New Testament © Bible Society of the South Pacific, 2011.
