LUKE 14
14
Isu’n Damlo a Sukdamna
1Chun, Chawlhni’n Pharisaite laka lawiupa khat ina an ne dingin a chieh a: mipite chun Isu chuh a en thim zing u a. 2Chun, ngaitie, zie tak achun mi khat, a khut a keng vum a damlo hi, Isu kawmah a hung a, 3Isu’n Danthuzikte leh Pharisaite kawm achun, “Chawlhni a sukdam a thieng hi, thieng lo?” ti’n a dawng a. 4Himahleh, bangmah cha a gen puou hi. Isu’n damlo pa chu a tu a, a hihdam ta a, tichun, a sawl dawk ta a. 5Tichun, a kawm u ah, “Nang haw laka kuo ahi na sabiltung uh ahim na bâwngchal uh ahim chu chawlhni’n tuikul ah kie ta leh, Chawlhni’n le kuo a zuk dawk lo a um ding?” a ti a. 6Himahleh, zie thu chule a dâwng thei kit zel puou hi.
Kingaihniemna
7Chun, a mi chielteu in, chutphah phapen a tel u chuh Isu’n a mu a, tichun, zie tehkal thu hi a kawm u ah a gen ta a: 8“Kichênna a guolvakna an ne dinga, kuo ahim in a hun chiel tieng leh, chutphah phapen ah chu ki’n. Khutilochun, nang sanga mi pawimawh zaw a na chiel khan tin,#Tch 25.6-7 9tichun, na nih u a hun chiel pa chu hung intin, na kawmah, ‘Zie pa chutna ding hin awt ah,’ hung ti’n a. Khutichun, nang chu zakcha takin um in na tin, chutphah phalo pên ah chu kha’n la. 10Zie sang chun, chiela na um phat leh, chieh inla, chutphah niem pên ah va chu’n; tichun, a hun chiel pa chuh hung intin, na kawmah, ‘Zawlpa, hung dawk inla, chutphah pha deuh ah hung chu zaw’n,’ hung ti’na. Khutichun, na an ûmpihte lak achun limbawl in um inla. 11Kingaisang ta chuh niem intin, kingainiem taphawtte chuh limbawl in um un au,” a ti a.
12Isu’n mi chiel pa kawma chun le, “Sun ahim, zan ahim a guolvakna na siem tieng leh, na guolte ahim, na suohpihpa ahim, na inkawte ahim, na inveng mi hausate ahim chiel ki’n; khutilo chun hun chiel thuk kit untin, na thilhih chuh hun din kit khel khel un au. 13Guol na vak tieng leh, neilahte piensuolte, kêngbâite, mitdûkte, chiel zaw’n; 14Ziete haw chun ditna ding ahun neih loh ziekun, vangsak in um inla. Mi phate, thihna apat a a thawh kit niu chu leh Pathien in hun din kit ding ahi ngâl a,” a ti a.
Guolvakna apat Tehkalna
(Mat 22.1-10)
15Chun, dawhkan a ankuong a ûmpihteu laka khatin zie chuh a zak in, Isu kawmah, “Pathien gama guolvakna a tel dingte chuh a hamphau hi,” a ti a. 16Chun, amah chun a kawmah, “Mi kuo a him in guolvakna nasatak a siem a, zie a ding chun mi tamtak a chiel a. 17Tichun, a nek phat a hih phet chun, a mi chielte kawmah, ‘Hung un, tuhin bangakai hih zawh ahi tai,’ ti dingin a suokte a sawl a. 18Himahleh, a bawn u chun bang ahim khat paulap a siem chiet tau a. A masapen pa chun a suokpa kawm achun, ‘Lo ka chaw a, a entha a ka chieh a ngai hi, ei lungsiet inla, ei awnsak hâm heh,’ a ti a. 19Khat chun, ‘Bâwngchal tuok nga ka chaw a, a patepa chieh ding ka hi, ei ngaithiem hâm hen,’ a ti a. 20A dang khat chun, ‘Zi ka nei ta a, zieziekchun, ka hung thei puoi,’ a ti a. 21Tichun, suokpa chuh a kilehkit a, zie thu haw cheng chuh, a pu chuh a va hilh ta a. A pu chuh a lungna mah mah a, a suokpa kawm achun ‘Kin takin chieh inla, khawlai leh ning tin achun chieh inla, chagah te, piensuolte, mitdûk te, kêngbâi te taka hin hun puilut hâm ah,’ a ti a. 22A suokpa chun a kawmah, ‘Hepu, na tih guol chun ka hih ta a, himahleh mun chuh a âwng nalai zing hi,’ a ti a. 23Ziephet chun, a pu chun a suokpa kawm achun, ‘Pawt inla, lamtuongpi leh daipâm haw achun le chieh inla, ka In dim na’n mi hun thêm lut hâm ah. 24Ka hilh na hii, ka mi chielte khat chan le, ka guolvakna an ne puo’n au,’” a ti a.
Nungzui Hihna Mantam Dan
(Mat 10.37-38)
25Chun, mipi nasatak in amah chuh a zui u a, chun, amah chuh a kiheia, a kawm u ah, 26“Kuole, ka kawma hung chun, a pa te, a nute, a zite, a chate, a suohpih te, a suohpihnute, leh amah hinna nasan le a hawt loh chun, ka nungzui hi thei puo’n a. 27Kuole, amah kross pua ei zui lo chuh ka nungzui hi thei puo’n a.
28“Na lak u a kuo’nle.insang sak guo leu chin, a masapen in, chu zet a, sak zawhna kham sum na neih leh na neih loh uh, hisap phawt a, a man ding zat sut lo a kuo a um ding? 29Khutilochun, suong phut zo zet in, sa zo ta kileh, a en ta’n, 30‘Zie pa hin In a gel pan na’n, a sa zo thei ta lo ahi,’ ti’n hun nuihsan un au. 31Chun, leng kuo ahim khat, leng dang, amah do dinga mi singnih tawh hungte do dingin kisa ta leh, mi singkhat tawh a nan ngam ding leh a nan ngam loh ding, kuo a chu zet a ngaihtuoh masa lo a um ding? 32Khutichu ahih loh bêk leh, leng dang chu gamla taka a um lai ngêi in, kichamna thutiem ngên dingin palai sawl ina. 33Khutibang mah chun, nang u lak ah, kuole, a neih chengcheng taihsan lo taphawt chuh, ka nungzui hi thei puo’n a.
Chi Mattakloh
(Mat 5.13; Mrk 9.50)
34“Chi hi a phai, himahlele, chi le a alna a beih tâk chun, bangin a hih al kit ta ding u? 35Leia dingin le pha puo’n tin, leining dingin le mat theih diek puo’n a; paih dawk ding chauh hi’n a. Kuole, zakna dinga bil nei chun zau hen!” a ti a.
Obecnie wybrane:
LUKE 14: GANGBSI
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
