THILSIEMBUL 7
7
Tuisanglet Thu
1Chun, Lalpa’n Noah kawm achun, “Nang leh na inkuonpihte chengcheng chuh lawng achun lut un; nang chuh tulai khanga mite lak ahin ka mitmuh in mi diktat na hi tih ka hun hêi” 2Sa thieng tincheng lak ah a chal leh a nu tuok sagih zelin, sa thienglo lak ah, a chal leh a nu, tuok khat zelin; 3chung leng vachate lak ah, a nu leh a chal tuok sagih zelin; lei chung pumpi a chi suoh dinga hinsuoh dingin na kawma na puih ding ahi. 4Chun, ni sagih a um nalai a, zie nung chuleh lei chung ahin ni sawmli leh zan sawmli sung guoh zuk sak ing ka ting; leichung a ka thilhing siem tincheng hi sumangthai ing ka, a ti a. 5Tichun Noah chun Lalpa’n a kawma thu a piek bang tak chun ahih ta a.
6Chun, Leia tui a hung let lai chun Noah chuh kum zagup mi ahi a. 7Tui a let ding ziekin Noah chuh lawng achun a lut a; a chapate leh a zi leh a chapate zite le a lut u a.#Mat 24.38, 39; Luk 17.27 8Chun, Pathien in Noah kawma thu a piek bang khan sa thieng laka leh sa thienglo laka le, chung leng vacha lak ale, lei a bawkvaka chieh tincheng lak ale 9anu leh achal, a tuok tuok in, Noah kawmah lawng achun a lut tau hi. 10Chun, ni sagih nung chun lei ahin tuisang a hung let ta a. 11Noah chuh kum zagup a hih kum, a tha nihna ni sawm leh sagih ni chun, zie ni ngêi chun tui thuk lientak tak nak haw chengcheng chuh ahung puok zak a, van tukvanhaw le a hung kihawng ta a.#2 Pet 3.6 12Ni sawmli leh zan sawmli sung chuh lei ahin guohpi a zu ta a. 13Zie ni ngêi chun Noah leh a zi, a chapate Shem, Ham leh Japheth leh a ziteu chu tawh lawng achun a lut u a; 14Gamsa chitin cheng amau haw chi bang zelin, gan guol tincheng amau haw chi bang zelin, ganhing leia bawkvak tincheng amau haw chi bang zelin, vacha tincheng amau haw chi umdan bang zelin, tha nei chitin amau a chi bang zel in a lut u a. 15Tichun Phehlevo nei cheng leh a naka hinna hu nei taphawt chuh a kawp kawp in Noah kawma lawng sung achun a lut tau a. 16Chun, Pathien in a kawm u a thu a piek guolin Phehlevo nei chengcheng laka anu leh achal zelin a lut u a; chun Lalpa’n amah chuh a khakkhum ta a. 17Chun, Tui chuh lei ahin ni sawmli sung cheng a let a; tui chuh a hung khang a, lawng chuh a lap kâng a, lei chunglam ah a lap kâng ta a. 18Tui chuh leichung ahin a um zeizui zieng ta a, nasatak in a hung khang ta a, lawng chuh tui chung achun a kilap to zel a. 19Tichun, tui chuh lei chung ahin akiting zeizui zieng ta a; leichung a tâng sang chengcheng chuh achup suok vek ta a. 20Chun, tui chuh tângsip sang haw chengcheng chung ale a khangto nalai a, tawng sawm leh nga hiela thuk in tânghaw chuh achup suok kêi ta a. 21Tichun, phehlevo nei, lei chunga tawithei chengcheng, vachate, gamsate, ganhing lei a bawkvaka chieh cheng leh mihiemte chuh a thi vek tau a. 22Tichun, leichung hul a cheng, a nak u a hinna hu neita phawt chuh a thi suok tau hi. 23Tichun, lei chunga thilhing tincheng, mihing leh ganguol, leia bawkvakte chung leng vachate cheng tawh sukmang in a um tau a; Noah leh lawng a a kawma um haw chauh chuh a suokcha tau hi. 24Tichun, tui chuh ni zakhat leh sawmnga sung cheng chuh lei ahin a um zeizui mai ta a.
Obecnie wybrane:
THILSIEMBUL 7: GANGBSI
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
