ᐅᐸᓓᑭᔅ ᒫᕐᒃ 4
4
ᐅᓴᓶᐱᓂᑫᐤ ᓈᔅᐸᑐᐌᐎ ᐋᑕᓗᑳᓐ
(ᒫᑎᐤ 13:1–9; ᓘᒃ 8:4–8)
1ᒥᓇ ᒫᑲ ᑮ ᒫᒋ ᑭᔅᑭᓄᐊᒫᑫᐤ ᑭᔑᐙᒃ ᑭᒋᑲᒦᒃ: ᑮ ᒪᐗᓴᑯᓈᑎᑯ ᒫᑲ ᓈᔅᐱᒡ ᒥᔮᒪᐎᒥᒉᑎᓕᒋ ᐃᓕᓕᐗ, ᑳ ᐅᒋ ᐳᓯᑦ ᓈᐱᒀᓂᒃ, ᐁᑯᑕ ᒫᑲ ᐁᐱᑦ ᑭᒋᑲᒦᒃ; ᒥᓯᐌ ᒫᑲ ᒥᔮᒪᐎᒥᒉᑎᒋᒃ ᑮ ᐃᑖᐗᒃ ᔑᔓᒡ ᑭᒋᑲᒦᒃ ᒧᔅᑐᔅᑲᒥᒃ᙮ 2ᒥᒉᑦ ᑫᒀᓇ ᒫᑲ ᑮ ᑭᔅᑭᓄᐊᒪᐌᐤ ᓇᔅᐱᑐᐌᐎ ᐋᑕᓗᑳᓂᒃ, ᑮ ᐃᑌᐤ ᒫᑲ ᐅ ᑭᔅᑭᓄᐊᒫᑫᐎᓂᒃ,
3ᓇᑐᑕᒧᒃ; ᒫᑎᑲ, ᐅᐗᓴᓶᐱᓂᑫᐤ ᑮ ᐗᓚᐎᐤ ᑭᒋ ᐗᓴᓶᐱᓂᑫᑦ: 4ᑮ ᐃᑭᓐ ᒫᑲ, ᐁ ᐊᑎ ᐗᓴᓶᐱᓂᑫᑦ, ᐋᑎᑦ ᑮ ᐸᑭᑎᓋ ᐅᐱᒣ ᒣᔅᑲᓈᒃ, ᐱᓓᓯᐗᒃ ᒫᑲ ᑮ ᐯᒋ ᑭᑖᐗᒃ᙮ 5ᐊᑎᑦ ᒫᑲ ᑮ ᐸᑭᑎᓋ ᐁ ᐊᓯᓂᐗᔅᑲᒥᑳᒃ, ᐃᑕ ᐁᑳ ᒥᔅᑕᐃ ᐊᔅᑭᐗᒃ, ᑣᔦᒃ ᒫᑲ ᑮ ᓵᑭᓂᑖᐎᑭᓋ, ᐁᑳ ᐁ ᑭᔅᐸᑳᒃ ᐊᔅᑭ: 6ᒫᑲ ᐃᔅᐱ ᐱᓯᒻ ᑳ ᓵᑯᑌᑦ, ᑮ ᐃᔅᒀᑌᐗ; ᐁᑳ ᒫᑲ ᐁ ᐗᑕᐱᐗᑭ, ᑮ ᐊᑎ ᓂᐱᒪᑲᓋ᙮ 7ᐋᑎᑦ ᒫᑲ ᑮ ᐸᑭᑎᓋ ᒥᔑᑳᐎᒥᓇᑯᓰᔅᑳᒃ, ᒥᔑᑳᐎᒥᓇᑯᔑᔭᒃ ᒫᑲ ᐁ ᓵᑭᓂᑖᐎᑭᒋᒃ ᑭ ᑮ ᑭᐱᔅᑲᒶᒃ, ᓇᒪᐎᓚ ᒫᑲ ᑮ ᒥᓂᔑᐗᓐ᙮ 8ᑯᑕᑭᔭ ᒫᑲ ᑮ ᐸᑭᑎᓋ ᒥᓗ ᐊᔅᑮᒃ, ᑮ ᒥᓂᔑᐗᓋ ᒫᑲ, ᑳ ᓵᑭᓂᑕᐎᑭᑭ ᓀᔥᑕ ᑳ ᐊᑎ ᒥᒉᑎᑭ, ᓀᔥᑕ ᑮ ᓂᑕᐎᑭᑖᒪᑲᓋ, ᐋᑎᑦ ᓂᔅᑐᒥᑕᓇᐤ ᑕᑡᐤ ᐋᓞᐋᒃ, ᐋᑎᑦ ᓀᔥᑕ ᓂᑯᑡᓱᒥᑕᓇᐤ, ᐋᑎᑦ ᓀᔥᑕ ᒥᑖᑐᒥᑕᓇᐤ᙮
9ᑮ ᐃᑌᐤ ᒫᑲ ᐊᓇ ᑳ ᐅᑖᐗᑳᑦ ᑭᒋ ᐯᑕᒃ, ᐁᑯᔑ ᑲᑕ ᐯᑕᒻ᙮
ᒋᓴᔅ ᐐᑕᒻ ᑫᒀᓐ ᐌᒋ ᐋᐸᒋᑖᑦ ᓈᔅᐸᑐᐌᐎ ᐋᑕᓗᑳᓇ
(ᒫᑎᐤ 13:10–17; ᓘᒃ 8:9–10)
10ᐃᔅᐱ ᒫᑲ ᐱᐁᔭᑯᑦ, ᐊᓂᐃ ᐊᓐᑕ ᑳ ᐃᑖᓕᒋ, ᐊᓯᒋ ᐊᓂᐃ ᓂᔓᔖᑉ, ᑮ ᑲᑴᒋᒥᑯ ᐊᓂᐁᓕᐤ ᓇᔅᐱᑐᐌᐎ ᐋᑕᓗᑳᓂᓕᐤ᙮ 11ᑮ ᐃᑌᐤ ᒫᑲ, ᑭᓚᐗᐤ ᑭ ᒥᓕᑲᐎᓈᐗᐤ ᑭᒋ ᑭᔅᑫᓕᑕᒣᒃ ᑳ ᒫᒪᔅᑳᑌᓕᑖᑾᑭ ᑭᒋᒪᓂᑐ ᐅᑦ ᐅᑭᒫᐎᐎᓂᒃ: ᒫᑲ ᐊᓂᑭ ᐗᓚᐎᑎᒥᒃ ᑳ ᐃᑖᒋᒃ, ᒥᓯᐌ ᐅᐅ ᑫᒀᓇ ᓇᔅᐱᑐᐌᐎ ᐗᑕᓗᑳᓂᒃ ᑐᑕᒪᐙᐗᒃ: 12ᐁ ᐙᐱᒋᒃ ᑭᒋ ᐙᐸᑕᑭᒃ, ᐁᑳ ᒫᑲ ᑭᒋ ᓂᓯᑖᐎᓇᑭᒃ, ᓀᔥᑕ ᐁ ᐯᑖᑭᒃ, ᑭᒋ ᐯᑕᑭᒃ, ᐁᑳ ᒫᑲ ᑭᒋ ᓂᓯᑐᑕᑭᒃ; ᑫᑳ ᐎᔅᑳᑦ ᑭᒋ ᑴᔅᑳᑎᓯᒋᒃ, ᓀᔥᑕ ᐅ ᒪᒋᑐᑕᒧᐎᓂᐙᐗ ᑭᒋ ᐗᐯᓕᑕᒪᐙᑲᓂᐎᒋᒃ᙮
ᒋᓴᔅ ᐎᑕᒻ ᐁ ᐃᑗᒋᑳᑌᒃ ᐅᓴᓶᐱᓂᑯᐎ ᓈᔅᐱᑐᐌᐎ ᐋᑕᓗᑳᓐ
(ᒫᑎᐤ 13:18–23; ᓘᒃ 8:11–15)
13ᐃᑌᐤ ᒫᑲ, ᓇᒪ ᓈ ᑭ ᑭᔅᑫᓕᑌᓇᐗᐤ ᐅᒪ ᓇᔅᐱᑐᐌᐎ ᐋᑐᓗᑳᓐ? ᑖᓐᑌ ᒫᑲ ᑫ ᑮ ᐅᒋ ᑭᔅᑫᓕᑕᒣᒃ ᒥᓯᐌ ᓇᔅᐱᑐᐌᐎ ᐋᑕᓗᑳᓇ? 14ᐅᐗᓴᓶᐱᓂᑫᐤ ᐗᓴᓶᐱᓇᒻ ᐋᔭᒥᐎᓂᓕᐤ᙮ 15ᐅᑯ ᒫᑲ ᐁᐗᑾᓂᑭ ᐅᐱᒣ ᒣᔅᑲᓈᒃ, ᐃᑕ ᐋᔭᒥᐎᓐ ᑳ ᐗᓴᓶᐱᓂᑳᑌᒃ, ᒫᑲ, ᐃᔅᐱ ᑳ ᐯᑕᑭᒃ, ᑣᔦᒃ ᐯᒋ ᐃᑐᑌᐤ ᓭᑖᓐ ᒪᔅᑲᒣᐤ ᒫᑲ ᐋᔭᒥᐎᓂᓕᐤ ᑳ ᑮ ᐸᑭᑎᓂᑳᑌᓕᒃ ᐅᑌᐃᐙᒃ᙮ 16ᐅᑯ ᓀᔥᑕ ᐁᐗᒀᓂᑭ ᑳ ᐗᓴᓶᐱᓇᒫᒋᒃ ᐁ ᐊᓯᓂᐗᔅᑲᒥᑳᒃ; ᐊᓂᑭ, ᐃᔅᐱ ᑳ ᐯᑕᑭᒃ ᐋᔭᒥᐎᓂᓕᐤ, ᑣᔦᒃ ᐅᑎᓇᒶᒃ ᐁ ᓯᑭᓓᓯᒋᒃ; 17ᓇᒪᐎᓚ ᒫᑲ ᐎᑕᐱᐎᐗᒃ ᐎᓚᐗᐤ ᑫᒋᐙᒃ, ᐎᓕᐱᔉ ᐱᑯ ᐃᑖᐗᒃ; ᐹᑎᒫ ᒫᑲ ᐃᔅᐱ ᐊᓕᒥᓯᐎᓂᓕᐤ ᓀᔥᑕ ᑲᒀᑕᑭᓯᐎᓂᓕᐤ ᒥᐋᒋ ᑕᑾᓂᓕᑭ ᐋᔭᒥᐎᓐ ᐅᒋ, ᑣᔦᒃ ᓈᔦᑕᐌᓕᑕᒶᒃ᙮ 18ᐅᑯ ᓀᔥᑕ ᐁᐗᒀᓂᑭ ᑳ ᐗᓴᓶᐱᓇᒫᒋᒃ ᒥᔑᑳᐎᒥᓇᑯᓯᔅᑳᒃ; ᐊᓂᑭ ᑳ ᐯᑕᑭᒃ ᐋᔭᒥᐎᓂᓕᐤ, 19ᐁ ᐅᑕᒣᓕᑕᑭᒃ ᒫᑲ ᐅᒣᓕᐤ ᐊᔅᑭᓕᐤ, ᓀᔥᑕ ᐁ ᐙᔦᔑᐃᑯᒋᒃ ᒥᔕᑭᓯᐎᓇ, ᓀᔥᑕ ᐁ ᓇᑕᐌᓕᒋᑳᑌᑭ ᑯᑕᑭᔭ ᑫᒀᓇ ᐁ ᐱᑐᑫᒪᑲᑭ, ᑭᐱᔅᑲᒶᒃ ᐋᔭᒥᐎᓂᓕᐤ, ᓇᒪᐎᓚ ᒫᑲ ᒥᓂᔑᐗᓐ᙮ 20ᐅᑯ ᓀᔥᑕ ᐁᐗᒀᓂᑭ ᑳ ᐗᓴᓶᐱᓇᒫᒋᒃ ᒥᓗ ᐊᔅᑮᒃ; ᐊᓂᑭ ᑳ ᐯᑕᑭᒃ ᐋᔭᒥᐎᓂᓕᐤ, ᓀᔥᑕ ᑳ ᐅᑎᓇᑭᒃ, ᓀᔥᑕ ᑳ ᒥᓂᔑᐎᒋᒃ, ᐋᑎᑦ ᓂᔅᑐᒥᑕᓇᐤ, ᐋᑎᑦ ᓂᑯᑣᓱᒥᑕᓇᐤ, ᐋᑎᑦ ᒥᑖᑐᒥᑕᓇᐤ᙮
ᐗᔅᑌᓇᒫᑲᓐ ᔑᐹ ᓂᐯᐎᓂᒃ
(ᓘᒃ 8:16–18)
21ᑮ ᐃᑌᐤ ᒫᑲ, ᐯᑖᓂᐗᓐ ᓈ ᐙᔅᑌᓇᒫᑲᓐ ᑭᒋ ᐊᔅᑖᓂᐗᒃ ᔑᐹ ᓂᐯᐎᓂᒃ? ᒫᑲ ᑭᒋ ᐊᔅᑖᓂᐗᒃ ᐗᔅᑌᓇᒫᑲᓇᑎᑯᒃ? 22ᐌᓴ ᓇᒪᐎᓚ ᑫᒀᓐ ᑳᑖᓂᐗᓇ ᐁᑳ ᑫ ᐹᔭᑌᓄᑯᑖᓂᐗᒃ; ᓇᒪᐎᔅᑳᑦ ᓀᔥᑕ ᑫᒀᓐ ᑮᒧᒡ ᑮ ᑲᓇᐌᓕᒋᑳᑌᐤ, ᐁᑳ ᑫ ᑭᔅᑫᓕᑖᑾᒃ᙮ 23ᑮᔥᐱᓐ ᐊᐌᓇ ᐌᑕᐗᑳᑴ ᑭᒋ ᐯᑕᒃ, ᐁᑯᔑ ᑲᑕ ᐯᑕᒻ᙮
24ᐃᑌᐤ ᒫᑲ, ᔮᑾᒥᓰᒃ ᑫᒀᓐ ᑳ ᐯᑕᒣᒃ: ᐊᓂᒪ ᑎᐹᔨᑲᓐ ᑫ ᐃᔑ ᑎᐹᔨᑫᔦᒃ, ᐁᑯ ᑫ ᐃᔑ ᑎᐸᐊᒫᑲᐎᔦᒃ: ᑭᓚᐗᐤ ᓀᔥᑕ ᑳ ᐯᑕᒣᒃ ᐊᐙᓯᑌ ᑭ ᑳ ᒥᓕᑳᐎᓇᐗᐤ᙮ 25ᐌᓴ ᐊᓇ ᑳ ᐋᔮᑦ, ᐁᐗᒀᓇ ᑫ ᒥᓛᑲᓂᐎᑦ: ᐊᓇ ᒫᑲ ᐁᑳ ᑳ ᐋᔮᑦ, ᐁᐗᒀᓇ ᑫ ᒪᔅᑲᒫᑲᓂᐎᑦ ᐙᐙᒡ ᐊᓂᐁᓕᐤ ᑳ ᐋᔮᑦ᙮
ᐁ ᓂᑖᐎᑭᒃ ᓯᒥᓐ ᓈᔅᐱᑐᐌᐎ ᐋᑕᓗᑳᓐ
26ᑮ ᐃᑗᐤ ᒫᑲ, ᐁᑯ ᐁᑌᓕᑖᑾᓂᓕᒃ ᑭᒋᒪᓂᑐ ᐅᑦ ᐅᑭᒫᐎᐎᓐ, ᑖᐱᔅᑯᒡ ᐃᓕᓕᐤ ᐁ ᐌᐱᓇᒃ ᓯᒥᓇ ᐊᔅᑮᒃ; 27ᐁᑯ ᒫᑲ ᐁ ᓂᐹᑦ, ᓀᔥᑕ ᐁ ᐗᓂᔥᑳᑦ ᐁ ᑎᐱᔅᑳᓕᒃ ᓀᔥᑕ ᐁ ᑭᔑᑳᓕᒃ, ᓯᒥᓇ ᒫᑲ ᑭᒋ ᓵᑭᓂᑖᐎᑭᓂᓕᑭ ᓀᔥᑕ ᑭᒋ ᐅᐱᑭᓂᓕᑭ, ᐁᑳ ᐁ ᑭᔅᑫᓕᑕᒃ ᑖᓂ ᐁᔑ ᐃᑭᓂᓕᒃ᙮ 28ᐌᓴ ᐊᔅᑭ ᑫᒋᐙᒃ ᓂᑖᐎᑭᑖᒪᑲᓐ ᒥᓂᔕ; ᓃᔥᑕᒻ ᒪᔅᑯᔑᐎᐤ, ᐁᑯ ᐁ ᐱᔅᑯᓂᑕᐎᑭᒋᒃ, ᐹᑎᒪ ᒫᑲ ᒪᑖᒥᓐ ᐁ ᑭᔑ ᓂᑕᐎᑭᑦ᙮ 29ᐃᔅᐱ ᒫᑲ ᒪᑕᒥᓇ ᐁ ᐊᑎᑌᑭ, ᑣᔦᒃ ᐃᑕᔅᑕᐤ ᐅ ᒪᓂᔑᑲᓐ, ᐋᔕᔾ ᐁ ᐅᑎᒋᐸᓕᒃ ᑭᒋ ᒪᐗᒋᒋᑳᓂᐗᒃ᙮
ᒪᔅᑕᑦ ᓯᒥᓐ ᓈᔅᐱᑐᐌᐎ ᐋᑕᓗᑳᓐ
(ᒫᑎᐤ 13:31–32; ᓘᒃ 13:18–19)
30ᑮ ᐃᑗᐤ ᒫᑲ, ᑫᒀᓐ ᑫ ᐃᑗᔮᓐ ᐁ ᓇᔅᐱᑐᐌᒪᑲᓂᓕᒃ ᑭᒋᒪᓂᑐ ᐅᑦ ᐅᑭᒫᐎᐎᓐ? ᓀᔥᑕᐱᑯ ᑫᑯ ᑖᐱᔅᑯᑌᓕᒋᑫᐎᓐ ᑫ ᐅᒋ ᑖᐱᔅᑯᑌᓕᑕᒫᒃ? 31ᐃᑌᓕᑖᑾᓐ ᑖᐱᔅᑯᒡ ᐯᔭᑯᒥᓐ ᒪᔅᑕᑦ ᓯᒥᓐ, ᐃᔅᐱ ᑳ ᐸᑭᑎᓂᑳᑌᑭ ᐊᔅᑮᒃ, ᒫᐗᒡ ᐋᐱᔖᔑᓐ ᐁ ᐃᑕᑎᑭ ᓯᒥᓇ ᐊᔅᑮᒃ: 32ᒫᑲ ᐃᔅᐱ ᑳ ᐸᑭᑎᓂᑳᑌᑭ, ᓵᑭᑭᓐ, ᐊᐙᓯᑌ ᒫᑲ ᐊᑎ ᒥᔕᐤ ᐃᔥᐱᔥ ᒥᓯᐌ ᓂᑖᐎᑭᑖᑲᓇ, ᒪᑭ ᐸᔅᑫᑎᒀᓀᔭᐤ ᓀᔥᑕ, ᐁᑯᑕ ᓀᔥᑕ ᐱᓓᓯᐗᒃ ᑳ ᐸᐸᒥᓛᒋᒃ ᐃᔮᑳᐙᔅᑌᔑᒧᒋᒃ᙮
33ᒥᒉᑦ ᒫᑲ ᐅᒪ ᑐᐎ ᓇᔅᐱᑐᐌᐎ ᐋᑕᓗᑳᓇ ᑮ ᐅᒋ ᐎᑕᒪᐌᐤ ᐋᔭᒥᐎᓂᓕᐤ, ᐁ ᐃᔑ ᑲᔥᑭᑖᓕᒋ ᑭᒋ ᐯᑕᒥᓕᒋ᙮ 34ᒫᑲ ᐁᑳ ᓇᔅᐱᑐᐌᐎ ᐋᑕᓗᑳᓂᓕᐤ ᐁ ᐋᐸᒋᑖᑦ, ᓇᒪᐎᓚ ᑮ ᐅᒋ ᐋᔭᒥᐁᐤ: ᐃᔅᐱ ᒫᑲ ᐱᔦᔭᑯᒋᒃ, ᑮ ᓂᓯᑐᑕᒥᐁᐤ ᐅ ᑭᔅᑭᓄᐊᒪᐙᑲᓇ ᒥᓯᐌ ᑫᒀᓇ᙮
ᒋᓴᔅ ᐋᓦᔅᑎᓂᑖᐤ ᐁ ᓗᑎᓂᓕᒃ
(ᒫᑎᐤ 8:23–27; ᓘᒃ 8:22–25)
35ᐊᓂᒪ ᒫᑲ ᑫᔮᐸᒡ ᐁ ᑭᔑᑳᒃ, ᐃᔅᐱ ᐁᑎ ᐅᑖᑯᔑᒃ, ᐃᑌᐤ, ᒫᑎ ᐊᔓᐗᐋᑕᐤ ᑴᔅᑲᑳᒻ ᐃᔑ᙮ 36ᐃᔅᐱ ᒫᑲ ᑫᒋᑎᔕᐙᒋᒃ ᒥᔮᒪᐎᒥᒉᑎᓕᒋ ᐃᓕᓕᐗ, ᑮ ᐅᑎᓀᐗᒃ ᐁ ᐃᔑ ᐋᔮᓕᒋ ᓈᐱᒀᓂᒃ: ᑮ ᐎᑕᐅᒥᑯ ᓀᔥᑕ ᑯᑕᑭᔭ ᓈᐱᒀᓂᔕ᙮ 37ᓱᑲ ᒫᑲ ᑮ ᐊᑎ ᑮᔅᑭᓗᐌᐤ, ᑲᔅᑲᓇᒃ ᒫᑲ ᓈᐱᒀᓂᒃ ᑮ ᐳᓯᐸᓕᐗᒃ, ᐱᓕᔥ ᐃᓕᑯᒃ ᐁ ᓵᑲᔅᑭᓀᒃ᙮ 38ᐎᓚ ᒫᑲ ᐅᑖᑫᑖᑯᒃ ᑮ ᐃᑕᐤ, ᐁ ᓂᐹᑦ ᐊᔅᐱᔅᑴᔑᒧᐎᓂᒃ: ᑮ ᑯᔅᑯᓀᐗᒃ ᒫᑲ, ᐁ ᐃᑖᒋᒃ, ᐅᑭᒪᐤ, ᓇᒪ ᓈ ᐙᔦᔥ ᑭᑦ ᐃᑌᓕᑌᓐ ᑭᒋ ᓂᔑᐗᓈᑎᓯᔮᒃ?
39ᑮ ᐗᓂᔥᑲᐤ ᒫᑲ, ᓀᔥᑕ ᑮ ᑭᑐᑕᒻ ᐁ ᓗᑎᓂᓕᒃ, ᓀᔥᑕ ᑮ ᐎᑕᒻ ᑭᒋᑳᒥᓕᐤ, ᑳᔭᒻ, ᐁᑳ ᒫᒋ᙮ ᑮ ᐳᓂᓗᐌᐤ ᒫᑲ, ᓈᔅᐱᒡ ᒫᑲ ᑮ ᑭᒋ ᐋᓨᔅᑎᓐ᙮ 40ᑮ ᐃᑌᐤ ᒫᑲ, ᑖᓀᑭ ᐌᒋ ᐃᔅᐱᒋ ᓭᑭᓯᔦᒃ? ᑖᓀᑭ ᐌᒋ ᐁᑳ ᐋᔮᔦᒃ ᑖᐺᔦᓕᑕᒧᐎᓐ?
41ᓈᔅᐱᒡ ᒫᑲ ᑮ ᓭᑭᓯᐗᒃ, ᑮ ᐃᑎᑐᐗᒃ ᒫᑲ, ᑫᑯ ᑐᐎ ᐃᓕᓕᐤ ᐊᐗ, ᐙᐙᒡ ᐁ ᓗᑎᓂᓕᒃ ᓀᔥᑕ ᑭᒋᑲᒥᓕᐤ ᐁ ᓇᓇᐃᑖᑯᑦ᙮
Currently Selected:
ᐅᐸᓓᑭᔅ ᒫᕐᒃ 4: MCNT91
Highlight
Share
ਕਾਪੀ।
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.