ᐅᐸᓓᑭᔅ ᒫᕐᒃ 5
5
ᒋᓴᔅ ᒥᓇᐙᒋᐁᐤ ᐃᓕᓕᐗ ᒪᒋ ᐊᒑᑾ ᐁ ᐊᔭᐗᓕᒋ
(ᒫᑎᐤ 8:28–34; ᓘᒃ 8:26–39)
1ᑮ ᐅᑎᑕᐊᒶᒃ ᒫᑲ ᑴᔅᑲᑳᒻ ᐃᑌᑫ ᑭᒋᑲᒦᒃ, ᐅᑦ ᐊᔅᑭᐙᒃ ᑳᑕᕆᓇᒃ᙮ 2ᐃᔅᐱ ᒫᑲ ᑳ ᑲᐹᑦ ᓈᐱᒀᓂᒃ ᐅᒋ, ᑣᔦᒃ ᑮ ᓇᑮᔥᑳᑯ ᐃᓕᓕᐗ ᒋᐹᔨᑲᒥᑯᔅᑳᒃ ᐅᒋ, ᐁ ᐋᔭᐙᓕᒋ ᐎᓕᐱ ᐊᒑᑾ, 3ᑳ ᐎᑭᓕᒋ ᒋᐹᔨᑲᒥᑯᔅᑳᒃ, ᓇᒪᐎᓚ ᐊᐌᓇ ᐃᓕᓕᐤ ᒫᑲ ᑮ ᑲᔥᑭᑕᐤ ᑭᒋ ᒫᒫᒋᑯᐱᑖᑦ, ᓇᒪᐎᓚ, ᓇᒪᐎᓚ ᐙᐙᒡ ᐱᐙᐱᔅᑴᐋᐱᔭ ᐅᒋ: 4ᐋᑕ ᒥᒉᑡᐤ ᐁ ᑮ ᒫᒫᒋᑯᐱᑖᑲᓂᐎᑦ ᒫᒫᒋᒀᐱᔅᑲᐃᑲᓇ ᓀᔥᑕ ᐱᐙᐱᔅᑴᐋᐱᔭ ᐅᒋ, ᑮ ᐹᐱᑯᐱᑕᒻ ᒫᑲ ᐱᐙᐱᔅᑴᐋᐱᔭ, ᓀᔥᑕ ᒫᒫᒋᒀᐱᔅᑲᐃᑲᓇ ᑮ ᐱᑲᓇᒻ: ᓇᒪ ᓀᔥᑕ ᐊᐌᓕᐗ ᑮ ᑲᔥᑭᑖᓕᐗ ᑭᒋ ᓗᔅᐱᓯᐃᑯᑦ᙮ 5ᒧᔕᒃ ᒫᑲ, ᐁ ᑭᔑᑳᓕᒃ ᓀᔥᑕ ᐁ ᑌᐱᔅᑳᓕᒃ, ᐗᒋᒃ ᑮ ᐃᑕᐤ, ᓀᔥᑕ ᒋᐹᔨᑲᒥᑯᔅᑳᒃ, ᐁ ᑌᐺᑦ, ᓀᔥᑕ ᐁ ᒫᑎᔓᓱᑦ ᐊᓯᓂᔭ ᐅᒋ᙮
6ᒫᑲ ᐃᔅᐱ ᐎᐋᐸᒫᑦ ᒋᓴᓴ ᐙᓚᐤ ᐅᒋ, ᑮ ᐃᔅᐸᑕᐤ ᓀᔥᑕ ᑮ ᓇᐗᑮᔅᑕᐌᐤ᙮ 7ᑮ ᑌᐺᐤ ᒫᑲ ᐁ ᑭᔗᐌᑦ, ᓀᔥᑕ ᑮ ᐃᑗᐤ, ᑖᓂ ᑭᓚ ᑫ ᐃᑖᐸᒋᐃᑖᓐ, ᒋᓴᔅ ᑭᓚ ᐌᑯᓯᓯᒥᔉ ᒫᐗᒡ ᐁᔅᐯᓕᑖᑯᓯᑦ ᑭᒋᒪᓂᑐ? ᑭ ᑭᒋᐃᑗᐃᑎᓐ ᑭᒋᒪᓂᑐ ᐅᒋ, ᐁᑳ ᑭᒋ ᑲᒀᑕᑭᐃᔭᓐ᙮ 8(ᐌᓴ ᑮ ᐃᑌᐤ, ᐯᒋ ᐗᓚᐎ ᐃᓕᓕᐤ ᐎᔮᐎᒃ ᐅᒋ, ᑭᓚ ᐎᓕᐱ ᐊᒑᒃ᙮)
9ᑮ ᑲᑴᒋᒣᐤ ᒫᑲ, ᑖᓐ ᐁᔑᓂᑳᓱᔭᓐ?
ᐁ ᓇᔥᑴᐗᔑᐃᐌᑦ ᒫᑲ, ᑮ ᐃᑗᐤ, ᓕᒋᔭᓐ ᓂᑦ ᐃᔑᓂᑳᓱᓐ; ᐌᓴ ᓂ ᒥᒉᑎᓈᓐ᙮ 10ᓱᑲ ᒫᑲ ᑮ ᓇᑐᑕᒪᐌᐤ ᐁᑳ ᑭᒋ ᑭᒋᑎᔕᐅᑯᑦ ᐊᓂᒪ ᐊᔅᑮᒃ ᐅᒋ᙮
11ᐁᑯᑕ ᒫᑲ ᐁᑖᒋᒃ, ᐯᔓᒡ ᐗᒌᒃ, ᓈᔅᐱᒡ ᒥᒉᑦ ᐁ ᐊᓭᔭᑎᒋᒃ ᑯᑯᔕᒃ ᐁ ᒥᒋᓱᒋᒃ᙮ 12ᒥᓯᐌ ᒫᑲ ᒪᒋ ᐊᒑᑾᒃ ᑮ ᓇᑐᑕᒪᐌᐗᐤ, ᐁ ᐃᑗᒋᒃ, ᐃᔑᑎᔕᐅᓈᓐ ᐃᑕ ᐁ ᐃᑖᒋᒃ ᑯᑯᔕᒃ, ᑭᒋ ᐱᑐᑫᔅᑲᐗᑭᒋᒃ᙮ 13ᑣᔦᒃ ᒫᑲ ᑮ ᐃᓕᓇᐌᐤ᙮ ᐊᓂᑭ ᐎᓕᐱ ᐊᒑᑾᒃ ᒫᑲ ᑮ ᐗᓚᐎᐗᒃ, ᑮ ᐱᑐᑫᔅᑲᐌᐗᒃ ᒫᑲ ᑯᑯᔕ; ᐊᓂᑭ ᑯᑯᔕᒃ ᒫᑲ ᓱᑲ ᑮ ᓈᓯᐯᐸᑖᐗᒃ ᐃᑕ ᐁ ᑭᔅᑲᒑᓕᒃ ᑭᒋᑲᒦᒃ, (ᓈᓐᑕᐤ ᓂᔡᐤ ᑭᒋᒥᑖᑐᒥᑕᓇᐤ ᑮ ᐃᑕᔑᐗᒃ, ᑮ ᓂᔅᑖᐸᐌᐗᒃ ᒫᑲ ᑭᒋᑲᒦᒃ)᙮
14ᐊᓂᑭ ᒫᑲ ᑳ ᐊᔕᒫᒋᒃ ᑯᑯᔕ ᑮ ᐅᔑᒧᐗᒃ, ᑮ ᐎᑕᒶᒃ ᒫᑲ ᐃᑖᐎᓂᒃ, ᓀᔥᑕ ᐊᓐᑕ ᐊᔅᑮᒃ᙮ ᑮ ᐗᓚᐎᐃᑐᑌᐗᒃ ᒫᑲ ᑭᒋ ᐙᐸᑕᑭᒃ ᑫᒀᓕᐤ ᑳ ᑐᒋᑳᑌᓕᒃ᙮ 15ᐯᒋ ᓈᑌᐗᒃ ᒫᑲ ᒋᓴᓴ, ᐙᐸᒣᐗᒃ ᒫᑲ ᐊᓂᐃ ᑳ ᑮ ᐱᒋᔅᑳᑯᓕᒋ ᒪᒋ ᐊᒑᑾ, ᓀᔥᑕ ᑳ ᑮ ᐋᔭᐙᓕᒋ ᐊᓂᐃ ᓕᒋᔭᓇ, ᐁ ᐊᐱᓕᒋ, ᐁ ᐎᓛᒋᑲᓂᓕᒋ, ᓀᔥᑕ ᐁ ᒀᔭᔅᑯ ᒥᑐᓀᓕᒋᑲᓂᓕᒋ; ᑮ ᓭᑭᓯᐗᒃ ᒫᑲ᙮ 16ᐊᓂᑭ ᒫᑲ ᑳ ᐙᐸᑕᑭᒃ, ᑮ ᐎᑕᒪᐌᐗᒃ ᑳ ᑮ ᐃᑭᓂᓕᒃ ᐊᓂᐃ ᑳ ᑮ ᐱᒋᔅᑳᑯᓕᒋ ᒪᒋ ᐊᒑᑾ, ᐊᓯᒋ ᓀᔥᑕ ᑯᑯᔕ ᐅᒋ᙮
17ᑮ ᒫᒋ ᓇᑐᑕᒪᐌᐗᒃ ᒫᑲ ᑭᒋ ᑭᑐᑌᓕᒋ ᐅᑦ ᐊᔅᑭᐙᒃ ᐅᒋ᙮
18ᐃᔅᐱ ᒫᑲ ᑳ ᐳᓯᑦ ᓈᐱᒀᓂᒃ, ᐊᓇ ᑳ ᑮ ᐱᒋᔅᑳᑯᑦ ᒪᒋ ᐊᒑᑾ ᑮ ᓇᑐᑕᒪᐌᐤ ᑭᒋ ᐎᒉᐙᑦ᙮
19ᐁᓕᐌᒃ ᒫᑲ ᒋᓴᔅ ᓇᒪᐎᓚ ᑮ ᐃᓕᓇᐌᐤ; ᒫᑲ ᐃᑌᐤ, ᑭᐌ ᓈᔑᒃ ᑭ ᑐᑌᒪᒃ, ᐎᑕᒫᐎᒃ ᒫᑲ ᑫᑯ ᑭᒋ ᑫᒀᓇ ᐅᑎᐯᓕᒋᑫᐤ ᑳ ᑮ ᑐᑕᒫᔉ, ᓀᔥᑕ ᐁ ᑮ ᑭᑎᒫᑫᓕᒥᔉ᙮
20ᑮ ᑭᑐᑌᐤ ᒫᑲ, ᓀᔥᑕ ᑮ ᒫᒋ ᐙᐎᑕᒻ ᑎᑳᐳᓕᓯᒃ ᐊᓂᐃ ᑭᒋ ᑫᒀᓇ ᑳ ᑮ ᑐᑕᒫᑯᑦ ᒋᓴᓴ: ᒥᓯᐌ ᐃᓕᓕᐗᒃ ᒫᑲ ᑮ ᒫᒪᔅᑳᑕᒶᒃ᙮
ᒉᕋᔅ ᐅᑖᓂᓴ ᓀᔥᑕ ᐃᔅᑴᐤ ᑳ ᓵᒥᓇᒃ ᒋᓴᔅ ᐅᑖᑯᐅᓂᓕᐤ
(ᒫᑎᐤ 9:18–26; ᓘᒃ 8:40–56)
21ᐃᔅᐱ ᒫᑲ ᒋᓴᔅ ᒥᓇ ᑳ ᐊᔓᐙᐊᒃ ᓈᐱᒀᓂᒃ ᑴᔅᑲᑳᒻ ᐃᑌᑫ, ᑮ ᒪᐗᓴᑯᓈᑎᑯ ᒥᒉᑦ ᐃᓕᓕᐗ ᐯᔓᒡ ᒫᑲ ᑭᒋᑲᒦᒃ ᑮ ᐃᑕᐤ᙮ 22ᒫᑎᑲ, ᒫᑲ, ᑮ ᐯᒋ ᓈᑎᑯ ᐊᐌᓕᐗ ᑳ ᑎᐯᓕᑕᒥᓕᒋ ᐋᔭᒥᐁᐎᑲᒥᑯᓕᐤ, ᒉᕋᔅ ᐁ ᐃᔑᓂᑳᓱᓕᒋ; ᐃᔅᐱ ᒫᑲ ᐎᐋᐸᒥᑯᑦ, ᑮ ᐸᑭᔑᓂᓕᐗ ᐅᓯᑎᒃ, 23ᓱᑲ ᒫᑲ ᑮ ᓇᑐᑕᒫᑯ, ᐁ ᐃᑎᑯᑦ, ᓂᑖᓂᔅ ᑳ ᐋᐱᔑᔑᔑᑦ ᐱᒥᔑᓐ ᑫᑳᑦ ᐁ ᐳᓂ ᐱᒫᑎᓰᑦ; ᑭ ᓇᑐᑕᒫᑎᓐ ᑭᒋ ᐯᒋ ᓵᒥᓇᑦ, ᑭᒋ ᒥᓇᐙᒋᐋᑲᓂᐎᑦ, ᑲᑕ ᐱᒫᑎᓯᐤ ᒫᑲ᙮
24ᒋᓴᔅ ᒫᑲ ᑮ ᐎᒉᐌᐤ; ᑮ ᓄᔅᐱᓈᑎᑯ ᓀᔥᑕ ᒥᒉᑦ ᐃᓕᓕᐗ, ᑮ ᓯᑎᔥᑳᑯ ᒫᑲ᙮
25ᐯᔭᒃ ᒫᑲ ᐃᔅᑴᐤ, ᐁ ᐅᒋᑲᐗᓂᓕᒃ ᐅᒥᑯ ᓂᔓᔖᑉ ᐱᐴᓋ᙮ 26ᓀᔥᑕ ᒥᒉᑦ ᑫᒀᓇ ᐁ ᑮ ᐋᑯᐃᑯᑦ ᐁ ᐃᑐᑖᑯᑦ ᒥᒉᑦ ᓇᑕᑯᓚᓇ, ᐁ ᑮ ᒣᔅᑎᓇᒃ ᓀᔥᑕ ᒥᓯᐌ ᑫᒀᓇ ᑳ ᐋᔮᑦ, ᐁᑳ ᒫᑲ ᐙᐙᒡ ᐋᐱᔑᔥ ᐁ ᒥᓗᐋᔮᑦ, ᒫᑲ ᐋᒋᐱᑯ ᐁ ᑮ ᐋᑯᓯᑦ, 27ᐃᔅᐱ ᑳ ᐯᑕᒃ ᒋᓴᓴ ᐅᒋ, ᑮ ᐯᒋ ᓯᑕᐎᓚᑭᐤ ᐅᑖᓈᒃ, ᑮ ᓵᒥᓇᒬᐤ ᒫᑲ ᐅᑦ ᐊᑯᐅᓂᓕᐤ: 28ᐌᓴ ᑮ ᐃᑗᐤ, ᑮᔥᐱᓐ ᑮ ᓵᒥᓇᒶᑫ ᐅ ᐎᓛᒋᑲᓇ ᐱᑯ, ᓂ ᑳ ᒥᓚᐋᔮᓐ᙮
29ᑣᔦᒃ ᒫᑲ ᐃᑕ ᑳ ᐅᑖᔑᑳᐗᓂᓕᒃ ᐅᒥᑯ ᑮ ᐹᔅᑌᓕᐤ; ᓀᔥᑕ ᑮ ᒧᔑᑕᐤ ᐎᔮᐎᒃ ᐁ ᒥᓇᐙᒋᐋᑲᓂᐎᑦ ᐊᓂᒪ ᐋᑯᐃᑖᔅᐱᓀᐎᓐ ᐅᒋ᙮ 30ᒋᓴᔅ ᒫᑲ, ᑣᔦᒃ ᐁ ᑭᔅᑫᓕᑕᒃ ᓱᑳᑎᓯᐎᓂᓕᐤ ᐁ ᑮ ᐗᓚᐎᐸᓕᓕᒃ ᐎᔮᐎᒃ ᐅᒋ, ᑮ ᑴᔅᑭᑳᐸᐎᐤ ᐁ ᓯᑎᔥᑳᑖᑲᓂᐎᑦ, ᑮ ᐃᑗᐤ ᒫᑲ, ᐊᐌᓇ ᑳ ᓵᒥᓇᒃ ᓂ ᐎᓛᒋᑲᓇ?
31ᑮ ᐃᑎᑯ ᒫᑲ ᐅ ᑭᔅᑭᓄᐊᒪᐙᑲᓇ, ᑮ ᐙᐸᒪᐗᒃ ᒥᔮᒪᐎᒥᒉᑎᒋᒃ ᐃᓕᓕᐗᒃ ᐁ ᓯᑎᔥᑳᔅᑭᒃ, ᑭᑦ ᐃᑣᓐ ᓈ ᒫᑲ, ᐊᐌᓇ ᑳ ᓵᒥᓂᑦ?
32ᐙᔅᑲ ᒫᑲ ᑮ ᐃᑖᐱᐤ, ᐁ ᐎ ᐙᐸᒫᑦ ᐊᓂᐃ ᑳ ᑮ ᑐᑕᒥᓕᒋ ᐊᓂᐁᓕᐤ᙮ 33ᒫᑲ ᐊᓇ ᐃᔅᑴᐤ, ᐁ ᓭᑭᓯᑦ ᓀᔥᑕ ᐁ ᓇᓂᑭᐸᓕᑦ, ᐁ ᑭᔅᑫᓕᑕᒃ ᑫᒀᓕᐤ ᑳ ᑮ ᑐᑕᐙᑲᓂᐎᑦ, ᑮ ᐯᒋ ᐅᑎᑕᐱᔅᑕᐌᐤ, ᓀᔥᑕ ᐁ ᑖᐺᑦ ᒥᓯᐌ ᑮ ᐎᑕᒪᐌᐤ᙮ 34ᑮ ᐃᑌᐤ ᒫᑲ, ᓂᑖᓂᔅ, ᑭ ᑖᐺᔦᓕᑕᒧᐎᓐ ᑭ ᑮ ᒥᓇᐙᒋᐃᑯᓐ; ᑭᑐᑌ ᑳᔮᒣᓕᑕᒧᐎᓂᒃ, ᓀᔥᑕ ᒥᓗᒪᒋᐅ ᑭᑦ ᐃᑖᔅᐱᓀᐎᓐ ᐅᒋ᙮
35ᒣᒀᒡ ᑫᔮᐸᒡ ᐁ ᐋᔭᒥᑦ ᑮ ᐯᒋ ᐃᑐᑌᓕᐗ ᐋᑎᑦ ᐎᑭᒃ ᐅᒋ ᐊᓇ ᑳ ᑎᐯᓕᑕᒃ ᐋᔭᒥᐁᐎᑲᒥᑯᓕᐤ, ᐁ ᐃᑗᓕᒋ, ᑭᑖᓂᔅ ᓇᒪ ᐱᒫᑎᓯᐤ; ᑖᓀᑭ ᐌᒋ ᑫᔮᐸᒡ ᒥᑯᔅᑳᒋᐊᑦ ᐅᑭᒪᐤ?
36ᐃᔅᐱ ᒫᑲ ᒋᓴᔅ ᐱᐁᑕᒃ ᑳ ᑮ ᐃᑣᓂᐗᓂᓕᒃ, ᐃᑌᐤ ᐊᓂᐃ ᑳ ᑎᐯᓕᑕᒥᓕᒋ ᐋᔭᒥᐁᐎᑲᒥᑯᓕᐤ, ᐁᑳᐎᓚ ᓭᑭᓯ, ᑖᐺᑕ ᐱᑯ᙮ 37ᓇᒪ ᒫᑲ ᑮ ᐃᓕᓇᐌᐤ ᐊᐌᓕᐗ ᑭᒋ ᓄᔅᐱᓈᑎᑯᑦ, ᐱᑯ ᐱᑕᕐ, ᓀᔥᑕ ᒉᒻᔅ, ᓀᔥᑕ ᒑᓐ ᐎᒋᔖᓇ ᒉᒻᔅ᙮ 38ᐅᑎᑕᒬᐤ ᒫᑲ ᐎᑭᓕᐤ ᐊᓂᐃ ᑳ ᑎᐯᓕᑕᒥᓕᒋ ᐋᔭᒥᐁᐎᑲᒥᑯᓕᐤ, ᐙᐸᑕᒻ ᒫᑲ ᐁ ᒥᑯᔅᑳᑌᓕᒋᑳᑌᓕᒃ, ᐊᓂᐃ ᓀᔥᑕ ᑳ ᒫᑐᓕᒋ ᓀᔥᑕ ᓈᔅᐱᒡ ᑳ ᑲᒀᑕᑲᑗᒧᓕᒋ᙮ 39ᐃᔅᐱ ᒫᑲ ᑳ ᐱᑐᑫᑦ, ᐃᑌᐤ, ᑖᓀᑭ ᐌᒋ ᐅᒪ ᐃᔑ ᑲᒀᑕᑲᑗᒧᔦᒃ ᓀᔥᑕ ᒫᑐᔦᒃ? ᐅᔥᑭᓂᑭᔅᑴᔑᔥ ᓇᒪᐎᓚ ᓂᐱᐤ, ᒫᑲ ᓂᐸᐤ᙮
40ᓱᑲ ᒫᑲ ᑮ ᐹᐱᐁᐗᒃ᙮ ᒫᑲ ᐃᔅᐱ ᒥᓯᐌ ᑳ ᑮ ᐗᓚᐎᑎᔕᐙᑦ, ᑮ ᐃᑐᑕᐃᒣᐤ ᐅᑖᐎᔭ ᓀᔥᑕ ᐅᑳᐎᔭ ᐅᔥᑭᓂᑭᔅᑴᔑᔥ, ᐊᓂᐃ ᓀᔥᑕ ᑳ ᑮ ᐯᒋ ᐎᒉᐎᑯᑦ ᓀᔥᑕ ᐱᑐᑫᐤ ᐃᑕ ᐁ ᐃᔑ ᐱᒥᔑᓂᓕᒋ ᐅᔥᑭᓂᑭᔅᑴᔑᔕ᙮ 41ᑮ ᓴᑭᒉᓀᐤ ᒫᑲ ᐅᔥᑭᓂᑭᔅᑴᔑᔕ, ᑮ ᐃᑌᐤ ᒫᑲ, ᑖᓕᑕ ᑰᒪᐃ; ᑳ ᐃᑗᒪᑲᒃ ᐁ ᐃᑗᔅᒋᑳᑌᒃ, ᐅᔥᑭᓂᑭᔅᑴᔑᔥ, ᑭᑦ ᐃᑎᓐ, ᐗᓂᔥᑳ᙮
42ᑣᔦᒃ ᒫᑲ ᐅᔥᑭᓂᑭᔅᑴᔑᔥ ᑮ ᐗᓂᔥᑲᐤ, ᑮ ᐱᒧᑌᐤ ᒫᑲ; ᐌᓴ ᑮ ᓂᔓᔖᐱᐴᓀᓯᐤ; ᑮ ᒫᒪᔅᑳᑕᒸᒃ ᒫᑲ ᑭᒋ ᒫᒪᔅᑳᑕᒧᐎᓐ ᐅᒋ᙮ 43ᓱᑲ ᒫᑲ ᑮ ᐃᑕᔓᒣᐤ ᐁᑳᐎᓚ ᐊᐌᓕᐗ ᑭᒋ ᑭᔅᑫᓕᑕᒥᓕᒋ; ᑮ ᐃᑕᔓᐌᐤ ᒫᑲ ᑫᒀᓕᐤ ᑭᒋ ᐊᔕᒥᒥᒋ᙮
Currently Selected:
ᐅᐸᓓᑭᔅ ᒫᕐᒃ 5: MCNT91
Highlight
Share
ਕਾਪੀ।
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.