ᐅᐸᓓᑭᔅ ᒫᕐᒃ 14
14
ᑳ ᓃᑳᓂᒋᒃ ᑭᒧᒡ ᐎ ᓂᐸᐁᐗᒃ ᒋᓴᓴ
(ᒫᑎᐤ 26:1–5; ᓘᒃ 22:1–2; ᒑᓐ 11:45–53)
1ᑳ ᐳᓂᐸᓕᑭ ᓂᔓ ᑭᔑᑳᑭ ᑮ ᒥᔮᔥᑳᑫᐎᓂ ᒪᑯᔖᓂᐗᓐ, ᓀᔥᑕ ᐊᓚᑯᓇᐤ ᐁᑳ ᐁ ᐅᐱᓯᑦ: ᑭᒋ ᓵᓵᑭᐎᓕᐌᐎᓕᓕᐗᒃ ᒫᑲ ᓀᔥᑕ ᐅᒪᓯᓇᐃᑫᐗᒃ ᑮ ᓈᓇᑕᐌᓕᑕᒶᒃ ᑫ ᐃᔑ ᐙᔦᔑ ᐅᑎᓈᒋᒃ, ᓀᔥᑕ ᑭᒋ ᓂᐸᐋᒋᒃ᙮ 2ᒫᑲ ᑮ ᐃᑗᐗᒃ, ᓇᒪᐎᓚ ᒣᒀᒡ ᐁ ᒪᑯᔐᑭᔑᑳᒃ, ᐌᓴ ᑭᔅᑎᓈᒡ ᑲᑕ ᓈᔦᑕᐌᓕᑕᒶᒃ ᐃᓕᓕᐗᒃ᙮
ᒋᓴᔅ ᑖᒫᔅᑯᓈᑲᓂᐎᐤ ᐯᑕᓂᐃᒃ
(ᒫᑎᐤ 26:6–13; ᒑᓐ 12:1–8)
3ᐯᑕᓂᐃᒃ ᒫᑲ ᐁ ᐃᑖᑦ, ᐅ ᐙᔅᑳᔨᑲᓂᒥᓕᒃ ᓵᐃᒪᓇ ᐅᓓᑉᕈᓯᐃᑖᔅᐱᓀᐗ, ᒣᒀᒡ ᐁ ᐊᐱᑦ ᐁ ᒥᒋᓱᑦ, ᑮ ᐯᒋ ᐃᑐᑌᓕᐗ ᐃᔅᑴᐗ ᐁ ᐋᔮᓕᒋ ᔅᐸᐃᒃᓈᕐᑦ ᑕᒪᔅᑯᐎᓂᓕᐤ ᐊᓯᓂᐗᑎᒃ ᓈᔅᐱᒡ ᐁ ᒥᒉᑦ ᐗᑖᔦᔮᓕᒃ; ᑮ ᐱᑯᓂᒥᓕᐗ ᒫᑲ ᒥᐗᒥᓕᐤ, ᓀᔥᑕ ᑮ ᓯᑭᓇᒥᓂᐗ ᐅᔅᑎᒀᓂᒃ᙮ 4ᐋᑎᑦ ᒫᑲ ᑮ ᑭᓯᐙᓯᐗᒃ, ᑮ ᐃᑗᐗᒃ ᒫᑲ, ᑖᓀᑭ ᐌᒋ ᓂᔑᐗᓈᑭᑖᓂᐗᒃ ᐅᒪ ᑕᒪᔅᑯᐎᓐ? 5ᐌᓴ ᑲᑕ ᑮ ᐊᑖᐙᑲᓂᐗᓄᐸᓐ ᐊᐙᓯᑌ ᐃᔥᐱᔥ ᓂᔅᑡᐤ ᒥᑖᑐᒥᑕᓇᐤ ᔓᓕᐊᓈᐱᔅᑯᔕ, ᐁᑯ ᒫᑲ ᑭᒋ ᒥᓕᑣᐸᓐ ᐅᑭᑎᒫᑭᓯᐗᒃ᙮ ᑮ ᓈᔦᑕᐌᓕᒣᐗᒃ ᒫᑲ᙮
6ᒋᓴᔅ ᒫᑲ ᑮ ᐃᑗᐤ, ᐁᑳ ᑐᑖᒃ; ᑖᓀᑭ ᐌᒋ ᒥᑯᔥᑳᒋᐁᒃ? ᒥᓗ ᑫᒀᓕᐤ ᓂ ᑮ ᑐᑖᒃ᙮ 7ᐌᓴ ᒧᔕᒃ ᑭᑦ ᐗᔭᐙᐙᐗᒃ ᐁ ᐎᒋᑕᔑᑫᒥᑖᑾᒃ ᐅᑭᑎᒫᑭᓯᐗᒃ, ᓀᔥᑕ ᑕᑡᐤ ᐱᑯ ᓀᑕᐺᓕᑕᒣᑯ ᑭ ᑳ ᑮ ᒥᓗᑐᑕᐗᐗᐗᒃ; ᒫᑲ ᓂᓚ ᓇᒪᐎᓚ ᒧᔕᒃ ᑭᑦ ᐋᔭᐎᓇᐗᐤ᙮ 8ᑮ ᑐᑕᒻ ᐃᔥᐱᔥ ᐁ ᑲᔥᑭᑕᑦ: ᑮ ᐯᒋ ᐃᑐᑌᐤ ᓂᔮᑲᓇ ᑭᒋ ᑐᒥᓇᒃ ᓂᔭᐎᓕᐤ ᑭᒋ ᓇᐃᑳᑲᐎᐗᒃ᙮ 9ᑖᐺ ᑭᑦ ᐃᑎᓇᐗᐤ, ᐱᑯ ᐃᑕ ᐅᒪ ᒥᓗᐋᒋᒧᐎᓐ ᑫ ᐎᑖᑲᓂᐎᑴ ᒥᓯᐌ ᐊᔅᑮᒃ, ᐁᑯᑕ ᓀᔥᑕ ᐊᐗ ᐃᔅᑴᐤ ᑳ ᑐᑕᒃ ᑫ ᐋᓕᒧᒋᑳᑌᓕᒡ ᑭᒋ ᑭᔅᑭᓯᑐᑕᐙᑲᓂᐎᑦ᙮
ᒎᑕᓴ ᓇᔅᑲᒧ ᒋ ᐗᔦᔑᐸᑭᑎᓈᑦ ᒋᓴᓴ
(ᒫᑎᐤ 26:14–16; ᓘᒃ 22:3–6)
10ᒎᑕᔅ ᐃᔅᑳᕆᔭᑦ ᒫᑲ, ᐯᔭᒃ ᐊᓂᑭ ᓂᔓᔖᑉ, ᑮ ᓈᑌᐤ ᑭᒋ ᓵᓵᑭᐎᓕᐌᐎᓕᓕᐗ, ᑭᒋ ᐙᔦᔑᐸᑭᑎᓇᒪᐙᑦ᙮ 11ᐃᔅᐱ ᒫᑲ ᐱᐁᑕᑭᒃ, ᑮ ᓯᑭᓓᓯᐗᒃ, ᑮ ᐊᔓᑕᒪᐌᐗᒃ ᒫᑲ ᔔᓕᐋᓇ ᑭᒋ ᒥᓛᒋᒃ, ᑮ ᓇᓇᑕᐌᓕᑕᒻ ᒫᑲ ᑫ ᐃᔑ ᓇᐃ ᐙᔦᔑᐸᑭᑎᓈᑦ᙮
ᒋᓴᔅ ᐎᒋᒥᒋᓱᒣᐤ ᐅᑭᔅᑭᓄᐊᒪᐙᑲᓇ ᒥᔮᔥᑳᑫᐎ ᒪᑯᔐᐎᓂᓕᐤ
(ᒫᑎᐤ 26:17–25; ᓘᒃ 22:7–14, 21–23; ᒑᓐ 13:21–30)
12ᓃᔥᑕᒻ ᒫᑲ ᐁ ᑭᔑᑳᒃ ᐁᑳ ᐁ ᐅᐱᓱᑦ ᐊᓚᑯᓇᐤ ᐁ ᐋᐸᒋᐋᑲᓂᐎᑦ, ᐃᔅᐱ ᓀᐸᐋᒋᒃ ᒥᔮᔥᑳᑫᐎ ᒫᓂᔥᒑᓂᔑᔕ, ᑮ ᐃᑎᑯ ᐅ ᑭᔅᑭᓄᐊᒪᐙᑲᓇ, ᑖᓐᑌ ᐁᔑ ᓇᑕᐌᓕᒥᔮᒃ ᑭᒋ ᓇᑕᐎ ᐗᔦᔅᑲᐎᑕᒫᑖᒃ ᑭᒋ ᒥᒋᔭᓐ ᒥᔮᔖᑲᑫᐎ ᒪᑯᔐᐎᓐ?
13ᑭᒋᑎᔕᐌᐤ ᒫᑲ ᓂᔓ ᐅ ᑭᔅᑭᓄᐊᒪᐙᑲᓇ, ᐃᑌᐤ ᒫᑲ, ᐃᑐᑌᒃ ᐃᑖᐎᓂᒃ, ᐁᑯᑕ ᒫᑲ ᑫ ᓇᑭᔥᑳᑕᒃ ᐃᓕᓕᐤ ᐁ ᐱᒥᐎᑖᑦ ᒀᐱᑳᑲᓂᓕᐤ ᐁ ᓵᑲᔅᑭᓀᓕᒃ ᓂᐱᓕᐤ: ᓄᔅᐱᓇᑎᒃ᙮ 14ᐱᑯ ᐃᑕ ᒫᑲ ᑫ ᐱᑐᑫᑴ, ᐅᒪ ᐃᑎᒃ ᑳ ᑎᐯᓕᑕᒃ ᐙᔅᑳᔨᑲᓂᓕᐤ, ᐅᑭᔅᑭᓄᐊᒫᑫᐤ ᐃᑗᐤ, ᑖᓐᑌ ᒫᓐᑌᐎᑲᒥᒃ, ᐃᑕ ᑫ ᒥᒋᔮᓐ ᒥᔮᔥᑳᑫᐎ ᒪᑯᔐᐎᓐ ᐊᓯᒋ ᓂ ᑭᔅᑭᓄᐊᒪᐙᑲᓇᒃ? 15ᑭ ᑳ ᐙᐸᑎᓕᑯᐗᐤ ᒫᑲ ᐁ ᒥᔖᓕᒃ ᐱᔅᑭᒋ ᐙᔅᑳᔨᑲᓂᓕᐤ ᐃᔥᐱᒥᒃ ᐁ ᐙᐌᔑᒋᑳᑌᓕᒃ ᓀᔥᑕ ᐁ ᐋᔦᔅᑲᐎᑖᓂᐗᓂᓕᒃ: ᐁᑯᑕ ᐋᔦᔅᑲᐎᑕᒪᐎᓈᓐ᙮
16ᐅ ᑭᔅᑭᓄᐊᒪᐙᑲᓇ ᒫᑲ ᑮ ᑭᑐᑌᓕᐗ, ᓀᔥᑕ ᐃᑖᐎᓂᒃ ᑮ ᐯᒋ ᑕᑯᔑᓂᓕᐗ, ᑮ ᒥᔅᑲᒥᓕᐗ ᒫᑲ ᑳ ᑮ ᐃᔑ ᐎᑕᒫᑯᒋᒃ: ᑮ ᐋᔦᔅᑲᐎᑖᐗᒃ ᒫᑲ ᒥᔮᔥᑳᑫᐎ ᒪᑯᔐᐎᓂᓕᐤ᙮
17ᐌᑖᑯᔑᓂᓕᒃ ᒫᑲ ᑮ ᐯᒋ ᐃᑐᑌᐤ ᐊᓯᒋ ᐊᓂᑭ ᓂᔓᔖᑉ᙮ 18ᒣᒀᒡ ᒫᑲ ᐁ ᐊᐱᒋᒃ ᐁ ᒥᒋᓱᒋᒃ, ᒋᓴᔅ ᑮ ᐃᑗᐤ, ᑖᐺ ᑭᑦ ᐃᑎᓇᐗᐤ, ᐯᔭᒃ ᐁ ᐃᑕᔑᔦᒃ ᑳ ᐎᒋᒥᒋᓱᒥᔦᒃ ᓂ ᑳ ᐙᔦᔑᐸᑭᑎᓂᒃ᙮
19ᑮ ᒫᒋ ᒥᒋᓕᐌᓯᐗᒃ ᒫᑲ, ᓀᔥᑕ ᑮ ᐃᑌᐗᒃ ᐯᐯᔭᒃ, ᓂᓚ ᓈ? ᑯᑕᒃ ᒫᑲ ᑮ ᐃᑗᐤ, ᓂᓚ ᓈ?
20ᑮ ᓇᔥᑴᐗᔑᐁᐤ ᒫᑲ, ᐁ ᐃᑖᑦ, ᐁᐗᑯ ᐯᔭᒃ ᐁ ᓂᔓᔖᐳᔦᒃ ᑳ ᑭᑖᓇᒃ ᐅᒋᒋ ᐅᓛᑲᓂᒃ ᐊᓯᒋ ᓂᓚ᙮ 21ᐃᓕᓕᐎᑯᓯᓵᓐ ᑖᐺ ᑭᑐᑌᐤ ᐁ ᐃᔑ ᒪᓯᓇᐃᑳᑌᓕᒃ: ᒫᑲ ᑲᑕ ᑲᒀᑕᑭᓯᐤ ᐊᓇ ᐃᓕᓕᐤ ᑫ ᐙᔦᔑᐸᑭᑎᓈᑦ ᐃᓕᓕᐎᑯᓯᓵᓇ! ᑲᑕ ᑮ ᒥᓨᔑᓂᓕᐸᓐ ᐊᓇ ᐃᓕᓕᐤ ᑮᔥᐱᓐ ᐁᑳ ᐐᔅᑳᑦ ᑮ ᐅᒋ ᓂᑖᐎᑭᑦ᙮
ᐅᑎᐯᓕᒋᑫᐤ ᐅᓂᐯᑴᐎᓐ
(ᒫᑎᐤ 26:26–30; ᓘᒃ 22:14–20)
22ᒣᒀᒡ ᒫᑲ ᐁ ᒥᒋᓯᒋᒃ, ᒋᓴᔅ ᑮ ᐅᑎᓀᐤ ᐊᓚᑯᓇᐗ, ᑮ ᒥᓦᑭᒣᐤ ᒫᑲ, ᑮ ᐱᑯᓀᐤ ᒫᑲ, ᐁᑯ ᒫᓛᑦ, ᐁ ᐃᑖᑦ ᒫᑲ, ᐅᑎᓂᒃ, ᒧᐎᒃ: ᐁᐗᑯ ᐅᒪ ᓂᔭᐤ᙮
23ᑮ ᐅᑎᓇᒻ ᓀᔥᑕ ᒥᓂᒀᑲᓂᓕᐤ, ᐃᔅᐱ ᒫᑲ ᑳ ᓇᓈᔅᑯᒧᑦ, ᑮ ᒥᓓᐤ: ᒥᓯᐌ ᐁ ᐃᑕᓯᒋᒃ ᒫᑲ ᑮ ᒥᓂᑴᐗᒃ᙮ 24ᑮ ᐃᑌᐤ ᒫᑲ, ᐁᐗᑯ ᐅᒪ ᓂ ᒥᑯᒻ ᐅᔥᑭ ᓇᔅᑯᒥᑐᐎᓂᒃ, ᒥᒉᑦ ᑳ ᐅᒋ ᓯᑲᐃᑳᑌᒃ᙮ 25ᑖᐺ ᑭᑦ ᐃᑎᓇᐗᐤ, ᓇᒪᐎᓚ ᒥᓇ ᓂ ᑳ ᐅᒋ ᒥᓂᒀᑐᑕᒸᓐ ᐅ ᒥᓂᔕ ᔓᒥᓈᑎᒃ, ᐹᑎᒫ ᐊᓂᒪ ᐁ ᑭᔑᑳᒃ ᐅᔥᑭ ᒥᓂᑴᔹᓀ ᑭᒋᒪᓂᑐ ᐅᑦ ᐅᑭᒫᐎᐎᓂᒃ᙮
26ᐃᔅᐱ ᒫᑲ ᑳ ᑮ ᓂᑲᒧᒋᒃ ᓂᑲᒧᐎᓂᓕᐤ, ᑮ ᐗᓚᐎᐗᒃ ᐊᓕᑉᔅ ᐗᒋᒃ ᐁ ᐃᑐᑌᒋᒃ᙮
ᒋᓴᔅ ᓂᑳᓂᐎᑕᒻ ᑫ ᐋᑕᐌᓕᒥᑯᑦ ᐱᑕᕋ
(ᒫᑎᐤ 26:31–35; ᓘᒃ 22:31–34; ᒑᓐ 13:36–38)
27ᒋᓴᔅ ᒫᑲ ᐃᑌᐤ, ᒥᓯᐌ ᐁ ᐃᑕᔑᔦᒃ ᑭ ᑳ ᓈᔦᑕᐌᓕᑌᓂᐗᐤ ᓂᓚ ᐅᒋ ᐊᓄᒡ ᑫ ᑎᐱᔅᑳᒃ: ᐌᓴ ᐃᑕᓯᓇᐃᑳᑌᐤ, ᓂ ᑳ ᐸᑲᒪᐗᐤ ᒫᓂᔥᒑᓂᔑᐎᓕᓕᐤ, ᒫᓂᔥᒑᓂᔕᒃ ᒫᑲ ᑲᑕ ᐗᓴᓶᑎᔕᐙᐗᒃ᙮ 28ᐃᔅᐱ ᒫᑲ ᑮ ᐗᓂᔥᑲᔮᓀ, ᑭ ᑳ ᓇᑕᐎ ᐯᐃᑎᓇᐗᐤ ᑳᓕᓕᒃ᙮
29ᒫᑲ ᐱᑕᕐ ᑮ ᐃᑌᐤ, ᑮᔥᐱᓐ ᒥᓯᐌ ᓈᔦᑕᐌᓕᑕᑾᐌ, ᐁᓕᐌᒃ ᒫᑲ ᓇᒪᐎᓚ ᓂᓚ ᓂ ᑳ ᓈᔦᑕᐌᓕᑌᓐ᙮
30ᒋᓴᔅ ᒫᑲ ᐃᑌᐤ, ᑖᐺ ᑭᑦ ᐃᑎᓐ, ᐊᓄᒡ ᐁ ᑭᔑᑳᒃ, ᐊᓄᒡ ᑫ ᑎᐱᔅᑳᒃ ᐅᑎ, ᐸᒧᔑ ᓂᔡᐤ ᓄᑖᑯᓯᑦ ᓈᐯ ᐹᑲᐋᒀᓐ, ᓂᔅᑡᐤ ᑭ ᑳ ᐋᓉᑌᓐ ᐁ ᑭᔅᑫᓕᒥᔭᓐ᙮
31ᒫᑲ ᐊᐙᓯᑌ ᐁᓕᑯᒃ ᑮ ᐋᔭᒥᐤ, ᑮᔥᐱᓐ ᐋᑕ ᐎᒋᓂᐱᒥᑖᓀ, ᐁᓕᐌᒃ ᒫᑲ ᒥᑐᓂ ᓇᒪᐎᓚ ᓂ ᑳ ᐊᓉᑌᓐ ᐁ ᑭᔅᑫᓕᒥᑖᓐ᙮
ᐁᑯ ᓀᔥᑕ ᑳ ᐃᑗᒋᒃ ᒥᓯᐌ ᐁ ᐃᑕᓯᒋᒃ᙮
ᒋᓴᔅ ᐊᔭᒥᒋᑫᐤ ᑫᑦᓭᒪᓂᒃ
(ᒫᑎᐤ 26:36–46; ᓘᒃ 22:39–46)
32ᑮ ᐯᒋ ᐃᑐᑌᐗᒃ ᒫᑲ ᐊᓐᑕ ᑫᑦᓭᒪᓇ ᐁᔑᓂᑳᑌᒃ: ᐃᑌᐤ ᒫᑲ ᐅ ᑭᔅᑭᓄᐊᒪᐙᑲᓇ ᐅᑕ ᐊᐱᒃ ᑭᓚᐗᐤ, ᒣᒀᒡ ᐁ ᐋᔭᒥᐋᔮᓐ᙮ 33ᑮ ᐎᒉᐌᐤ ᒫᑲ ᐱᑕᕋ, ᓀᔥᑕ ᒉᒻᓴ, ᓀᔥᑕ ᒑᓇ, ᓈᔅᐱᒡ ᒫᑲ ᑮ ᐊᑎ ᒥᑯᔥᑳᑌᓕᑕᒻ, ᓈᔅᐱᒡ ᓀᔥᑕ ᑮ ᑯᓯᑯᒪᒋᐅ; 34ᐃᑌᐤ ᒫᑲ, ᓂᑦ ᐊᒑᒃ ᓈᔅᐱᒡ ᒪᒥᔑᒣᓕᑕᒻ, ᐱᓕᔥ ᓂᐱᐎᓂᒃ ᐃᔑ: ᐅᑕ ᑕᔑᑫᒃ ᐊᔕᐙᐱᒃ ᒫᑲ᙮
35ᐊᐙᓯᑌᔑᔥ ᒫᑲ ᑮ ᐃᑐᑌᐤ, ᓀᔥᑕ ᐊᔅᑮᒃ ᑮ ᐸᑭᔑᓐ, ᑮ ᐋᔭᒥᐊᐤ ᒫᑲ, ᑮᔥᐱᓐ ᑮ ᑐᒋᑳᑌᓕᒃ, ᐊᓂᐁᓕᐤ ᑎᐹᔨᑲᓂᓕᐤ ᐱᓯᒧᑳᓂᒃ ᑭᒋ ᒥᔮᔥᑳᑯᑦ᙮ 36ᑮ ᐃᑗᐤ ᒫᑲ, ᐋᐸ, ᓄᑖ, ᒥᓯᐌ ᑫᒀᓇ ᑭ ᑲᔥᑭᑖᓐ; ᐃᑲᑌᓇᒪᐎᓐ ᐅᒪ ᒥᓂᒀᑲᓐ: ᐁᓕᐌᒃ ᒫᑲ, ᓇᒪᐎᓚ ᓂᓚ ᐁ ᐃᑌᓕᑕᒫᓐ, ᒫᑲ ᐁ ᐃᑌᓕᑕᒪᓐ ᑭᓚ᙮
37ᐯᒋ ᐃᑐᑌᐤ ᒫᑲ, ᒥᔅᑲᐌᐤ ᒫᑲ ᐁ ᓂᐹᓕᒋ, ᐃᑌᐤ ᒫᑲ ᐱᑕᕋ, ᓵᐃᒪᓐ, ᑭ ᓂᐹᓐ ᓈ? ᓇᒪ ᓈ ᑭ ᑲᔥᑭᑖᓐ ᐃᔥᐱᔥ ᐯᔭᒃ ᑎᐹᔨᑲᓐ ᐱᓯᒧᑳᓂᒃ ᑭᒋ ᐊᔕᐙᐱᔭᓐ? 38ᐊᔕᐙᐱᒃ ᓀᔥᑕ ᐋᔭᒥᐋᒃ, ᐁᑳ ᑭᒋ ᐃᔅᐸᓕᔦᒃ ᑲᑴᒋᐃᐌᐎᓂᒃ: ᐊᒑᒃ ᑖᐺ ᒪᔥᑲᐌᓕᑕᒻ, ᒫᑲ ᐎᔮᔅ ᓕᓚᒥᓯᒪᑲᓐ᙮
39ᒥᓇ ᒫᑲ ᑮ ᑭᑐᑌᐤ, ᑮ ᐋᔭᒥᐋᐤ ᒫᑲ, ᑫᔮᐸᒡ ᐁ ᐃᑗᑦ ᑳ ᑮ ᐃᑗᑦ᙮ 40ᐃᔅᐱ ᒫᑲ ᐱᐁᒋ ᑭᐌᑦ, ᒥᓇ ᑮ ᒥᔅᑲᐌᐤ ᐁ ᓂᐹᓕᒋ; ᐌᓴ ᑮ ᑯᓯᑯᒪᒋᑖᐗᒃ ᐅᔅᑭᔑᑯᐙᐗ; ᓇᒪ ᓀᔥᑕ ᑮ ᑭᔅᑫᓕᑕᒶᒃ ᑫ ᐃᔑ ᓇᔥᑴᐗᔑᐋᒋᒃ᙮
41ᐯᒋ ᐃᑐᑌᐤ ᒫᑲ ᐁᑯ ᓂᔅᑡᐤ, ᐃᑌᐤ ᒫᑲ, ᐁᑯ ᓂᐹᒃ, ᐋᓜᔑᓄᒃ ᒫᑲ: ᐁᒀᓂ, ᒫᑎᑲ, ᐃᓕᓕᐎᑯᓯᓵᓐ ᐙᔦᔕᐸᑭᑎᓇᐤ ᐅᒋᒋᓕᒃ ᐅᒪᒋᑣᐗ᙮ 42ᐗᓂᔥᑳᒃ, ᑭᑐᑌᑕᐤ: ᒫᑎᑲ, ᐊᓇ ᑳ ᐙᔦᔑᐸᑭᑎᓂᑦ ᐯᔓᒡ ᐃᑕᐤ᙮
ᐅᑎᓇᑲᓂᐎᐤ ᒋᓴᔅ
(ᒫᑎᐤ 26:47–56; ᓘᒃ 22:47–53; ᒑᓐ 18:3–12)
43ᑣᔦᒃ ᒫᑲ, ᒣᒀᒡ ᑫᔮᐸᒡ ᐁ ᐋᔭᒥᑦ, ᑕᑯᔑᓐ ᒎᑕᔅ, ᐯᔭᒃ ᐊᓂᑭ ᓂᔓᔖᑉ, ᐁ ᐎᒉᐎᑯᑦ ᓈᔅᐱᒡ ᒥᔮᒪᐎᒥᒉᑎᓕᒋ ᐃᓕᓕᐗ, ᔑᒫᑲᓇ ᓀᔥᑕ ᓴᔅᑲᐅᓇ ᐁ ᐋᔮᓕᒋ, ᑳ ᐯᒋᑎᔕᐅᑯᓕᒋ ᑭᒋ ᓵᓵᑭᐎᓕᐌᐎᓕᓕᐗ, ᓀᔥᑕ ᐅᒪᓯᓇᐃᑫᐗ, ᓀᔥᑕ ᑳ ᓂᑳᓀᓕᑖᑯᓯᓕᒋ᙮ 44ᐊᓇ ᒫᑲ ᑳ ᐙᔦᔑᐸᑭᑎᓈᑦ ᑮ ᒥᓓᐤ ᑭᔅᑭᓄᐙᒋᒋᑲᓂᓕᐤ, ᐁ ᐃᑗᑦ, ᐊᐌᓇ ᑫ ᐅᒉᒪᐗᑴ, ᐁᐗᒀᓇ; ᐅᑎᓂᒃ, ᓀᔥᑕ ᑭᒋᐎᓕᒃ᙮
45ᐎᐸᒡ ᒫᑲ ᑌᑯᔑᒃ, ᑣᔦᒃ ᑮ ᓈᑌᐤ, ᐃᑌᐤ ᒫᑲ, ᐅᑭᒪᐤ, ᐅᑭᒪᐤ; ᑮ ᐅᒉᒣᐤ ᒫᑲ᙮ 46ᑮ ᒫᑯᓀᐗᒃ ᒫᑲ, ᓀᔥᑕ ᑮ ᐅᑎᓀᐗᒃ᙮ 47ᐯᔭᒃ ᒫᑲ ᐁ ᐃᑕᓯᒋᒃ ᐯᔓᒡ ᑳ ᓂᐸᐎᒋᒃ, ᑮ ᓛᓕᔅᑭᐱᑕᒻ ᔑᒫᑲᓂᓕᐤ, ᑮ ᐅᑖᒪᐅᒣᐤ ᒫᑲ ᐅᑦ ᐊᑑᔅᑫᓛᑲᓂᒪ ᑭᒋ ᓵᓵᑭᐎᓕᐌᐎᓕᓕᐤ, ᑮ ᒪᓂᑕᐗᑲᔦᔗᐤ ᒫᑲ᙮ 48ᒋᓴᔅ ᒫᑲ ᑮ ᓇᔥᑴᐗᔑᐁᐤ ᐁ ᐃᑖᑦ, ᑭ ᐯᒋ ᐃᑐᑖᓇᐗᐤ ᓈ ᑖᐱᔅᑯᒡ ᐁ ᓈᑌᒃ ᑭᒧᑎᔉ, ᐁ ᐋᔭᔦᒃ ᔑᒫᑲᓇ ᓀᔥᑕ ᓴᔅᑲᐅᓇ ᐁ ᐎ ᐅᑎᓂᔦᒃ? 49ᑕᑡᐤ ᑳᔑᑳᑭ ᑭ ᑮ ᐎᒉᐎᑎᓇᐗᐤ ᑭᒋᐋᔭᒥᐁᐎᑲᒥᑯᒃ ᐁ ᑭᔅᑭᓄᐊᒫᑫᔮᓐ, ᓇᒪᐎᓚ ᒫᑲ ᑭ ᐅᒋ ᐅᑎᓂᓇᐗᐤ: ᒫᑲ ᑭᒋ ᒪᓯᓇᐃᑫᐎᓇ ᑲᑕ ᑎᐱᐸᓕᐗ᙮
50ᐁᑯ ᒥᓯᐌ ᓂᑲᑖᒋᒃ, ᑮ ᐅᔑᒧᐗᒃ ᒫᑲ᙮
51ᑮ ᓄᔅᐱᓈᑎᑯ ᒫᑲ ᐯᔭᒃ ᐅᔥᑭᓂᑭᐗ, ᐁ ᐊᑾᓂᓕᒋ ᐸᐸᑭᐙᔮᓀᑭᓂᓕᐤ ᒧᔐ ᐎᔮᐎᒃ; ᑮ ᒫᑯᓂᑯ ᒫᑲ ᐅᔥᑭᓂᑭᐗ᙮ 52ᑮ ᓇᑲᑕᒻ ᒫᑲ ᐸᐸᑭᐙᔮᓀᑭᓂᓕᐤ, ᑮ ᐅᔑᒣᐤ ᒫᑲ ᐁ ᒧᔐᔥᑲᑌᑦ᙮
ᒋᓴᔅ ᐅᑎᔅᑲᐤ ᐅᑎᐹᔅᑯᓂᑫᐗ
(ᒫᑎᐤ 26:57–68; ᓘᒃ 22:54–55, 63–71; ᒑᓐ 18:13–14, 19–24)
53ᑮ ᐃᑐᑕᐁᐗᒃ ᒫᑲ ᒋᓴᓴ ᐃᑕ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐗ ᐁ ᐃᑖᓕᒋ ᐁᑯᑕ ᓀᔥᑕ ᑳ ᐊᓯᒋ ᒫᐗᒋᐃᑐᒋᒃ ᒥᓯᐌ ᑭᒋ ᓵᓵᑭᐎᓕᐌᐎᓕᓕᐗᒃ, ᓀᔥᑕ ᑳ ᓂᑲᓀᓕᑖᑯᓯᒋᒃ, ᓀᔥᑕ ᐅᒪᓯᓇᐃᑫᐗᒃ᙮ 54ᐱᑕᕐ ᒫᑲ ᐙᓚᐤ ᑮ ᐅᒋ ᓄᔅᐱᓇᑌᐤ, ᐱᓕᔥ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐗ ᐅ ᑭᒋ ᐙᔅᑳᔨᑲᓂᒥᓕᒃ: ᑮ ᐎᑕᐱᒣᐤ ᒫᑲ ᐊᑑᔅᑫᓛᑲᓇ, ᓀᔥᑕ ᑮ ᐊᐗᓱ ᐃᔥᑯᑌᒃ᙮ 55ᑭᒋ ᓵᓵᑭᐎᓕᐌᐎᓕᓕᐗᒃ ᒫᑲ ᓀᔥᑕ ᒥᓯᐌ ᑳ ᐎᑕᐱᒥᑯᒋᒃ ᑮ ᓈᓇᑕᐌᓕᑕᒶᒃ ᑫ ᐃᔑ ᒫᒥᔑᒥᒥᒋ ᒋᓴᓴ, ᑭᒋ ᓂᐸᐋᒋᒃ; ᓇᒪᐎᓚ ᒫᑲ ᐅᒋ ᒥᔅᑲᒶᒃ: 56ᐌᓴ ᒥᒉᑦ ᑮ ᓇᔅᐹᒋ ᑎᐹᒋᒣᐗᒃ; ᒫᑲ ᐅ ᑎᐹᒋᒧᐎᓂᐗᐤ ᓇᒪᐎᓚ ᑮ ᓇᐃᐸᓕᓕᐤ᙮
57ᐋᑎᑦ ᒫᑲ ᑮ ᐸᓯᑯᐗᒃ, ᓀᔥᑕ ᑮ ᑭᓛᔅᑭ ᑎᐹᒋᒣᐗᒃ, ᐁ ᐃᑗᒋᒃ, 58ᓂ ᑮ ᐯᑕᐙᓈᓐ ᐁ ᐃᑗᑦ, ᓂ ᑳ ᓂᔑᐗᓈᒋᑖᓐ ᐅᒪ ᑭᒋᐋᔭᒥᐁᐎᑲᒥᒃ ᒥᒋᒋᔭ ᑳ ᐅᒋ ᐅᔑᒋᑳᑌᒃ, ᐃᔥᐱᔥ ᒫᑲ ᓂᔅᑐ ᐁ ᑭᔑᑳᑭ ᑯᑕᒃ ᓂ ᑳ ᐅᔑᑖᓐ ᐁᑳ ᒥᒋᒋᔭ ᑫ ᐅᒋ ᐅᔑᒋᑳᑌᒃ᙮ 59ᒫᑲ ᓇᒪ ᓀᔥᑕ ᐎᓚᐗᐤ ᑖᐱᔅᑯᒡ ᑮ ᓇᐃᐸᓕᓕᐤ ᐅ ᑎᐹᒋᒧᐎᓂᐗᐤ᙮
60ᑌᑖᐎᒡ ᒫᑲ ᑮ ᓂᐸᐎᐤ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐤ, ᑮ ᑲᑴᒋᒣᐤ ᒫᑲ ᒋᓴᓴ, ᐁ ᐃᑗᑦ, ᓈᒪ ᓈ ᐙᔦᔥ ᑭ ᓇᔥᑴᐗᔑᐃᐙᓐ? ᑫᒀᓕᐤ ᑳ ᐎᑕᑭᒃ ᐅᑯ ᑳ ᒫᒥᔑᒥᔅᑭᒃ?
61ᒫᑲ ᓇᒪᐎᓚ ᐅᒋ ᑭᑐ, ᓇᒪ ᓀᔥᑕ ᐙᔦᔥ ᑮ ᓈᔥᑴᐗᔑᐃᐌᐤ᙮ ᒥᓇ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐤ ᑮ ᑲᑴᒋᒧᐤ, ᑭᓚ ᓈ ᐊᓇ ᙭, ᐅᑯᓯᓴ ᔑᐋᐌᓕᑖᑯᓯᑦ?
62ᒋᓴᔅ ᒫᑲ ᑮ ᐃᑗᐤ, ᐁᐁ ᓂᑦ ᐋᐐᓐ: ᑭ ᑳ ᐙᐸᒫᐗᐤ ᒫᑲ ᐃᓕᓕᐎᑯᓯᓵᓐ ᐁ ᐊᐱᑦ ᑭᒋᓂᔅᑮᒃ ᑲᔥᑭᐅᐎᓂᒃ, ᓀᔥᑕ ᐁ ᐯᒋ ᐃᑐᑌᑦ ᑭᒋᑭᔑᑳᐎ ᐗᔅᑯᒃ᙮
63ᐁᑯ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐤ ᑎᐋᑐᐱᑕᒃ ᐅ ᐎᓦᒋᑲᓇ, ᐃᑌᐤ ᒫᑲ, ᑫᒀᓐ ᐌᒋ ᑫᔮᐸᒡ ᓇᑕᐌᓕᒪᑯᒃ ᐅᑎᐹᒋᒧᐗᒃ? 64ᑭ ᑮ ᐯᑕᒸᓇᐗᐤ ᐅ ᐹᔅᑕᒧᐎᓐ: ᑖᓐ ᐁᑌᓕᑕᒣᒃ?
ᒥᓯᐌ ᐁ ᐃᑕᓯᒋᒃ ᒫᑲ ᑮ ᓂᔑᐗᓈᒋᒣᐗᒃ ᑭᒋ ᐃᑌᓕᑖᑯᓯᓕᒋ ᑭᒋ ᓂᐹᔨᒥᒋ᙮
65ᐋᑎᑦ ᒫᑲ ᑮ ᒫᒋ ᓯᒀᑌᐗᒃ, ᓀᔥᑕ ᑮ ᐊᑾᓇᑴᐗᒃ, ᑮ ᐅᑕᒫᐌᐗᒃ ᒫᑲ ᐁ ᐃᑗᒋᒃ, ᑭᔅᑭᐙᐃᑫ: ᐊᑑᔅᑫᓛᑲᓇᒃ ᒫᑲ ᑮ ᐸᐸᓯᑴᐌᐗᒃ᙮
ᒧᓚ ᓂᑭᔅᑫᓕᒫᐤ, ᐱᑕᕐ ᐃᑗᐤ ᒋᓴᓴ ᐅᒋ
(ᒫᑎᐤ 26:69–75; ᓘᒃ 22:56–62; ᒑᓐ 18:15–18, 25–27)
66ᒣᒀᒡ ᐱᑕᕐ ᓂᑕᑉ ᐁ ᐃᑖᑦ ᑭᒋᐙᔅᑳᔨᑲᓂᒃ, ᑮ ᐯᒋ ᐃᑐᑌᓕᐗ ᐯᔭᒃ ᑭᒋ ᓵᓵᑭᐎᓕᐌᐃᓕᓕᐤ ᐅᑦ ᐊᑑᔅᑫᓛᑲᓂᔅᑴᒪ: 67ᐃᔅᐱ ᒫᑲ ᐎᐋᐸᒫᑦ ᐱᑕᕋ ᐁ ᐊᐗᓯᓕᒋ, ᑮ ᑲᓇᐙᐸᒣᐤ, ᓀᔥᑕ ᑮ ᐃᑗᐤ, ᑭᓚ ᓀᔥᑕ ᑭ ᑮ ᐎᒉᐗᐤ ᒋᓴᔅ ᓈᓴᕆᑎᒃ ᑳ ᐅᒌᑦ᙮
68ᒫᑲ ᑮ ᐋᓉᑕᒻ, ᐁ ᐃᑗᑦ, ᓇᒪᐎᓚ ᓂ ᑭᔅᑫᓕᑌᓐ, ᓇᒪ ᓀᔥᑕ ᓂ ᓂᓯᑐᑌᓐ ᑳ ᐃᑗᔭᓐ᙮ ᑮ ᐗᓚᐎᐤ ᒫᑲ ᐱᔅᑭᒋᐙᔅᑳᔨᑲᓂᒃ; ᓈᐯ ᐹᑲᐋᒀᓐ ᒫᑲ ᑮ ᓄᑖᑯᓯᐤ᙮
69ᐅᔥᑭᓂᑭᔅᑴᐤ ᒫᑲ ᒥᓇ ᑮ ᐙᐸᒣᐤ, ᑮ ᒫᒋ ᐃᑌᐤ ᓀᔥᑕ ᐊᓂᐃ ᐊᓐᑕ ᐁ ᓂᐸᐎᓕᒋ, ᐊᐗ ᐁᐗᑯ ᐯᔭᒃ ᐁ ᐃᑕᓯᒋᒃ᙮ 70ᒥᓇ ᒫᑲ ᑮ ᐋᓉᑕᒻ᙮
ᓈᑫ ᒫᑲ ᐊᓂᑭ ᐊᓐᑕ ᐁ ᓂᐸᐎᒋᒃ ᒥᓇ ᑮ ᐃᑌᐗᒃ ᐱᑕᕋ, ᐅᒋᑕᐤ ᑭᓚ ᐯᔭᒃ ᐊᓂᑭ: ᐌᓴ ᑭ ᑳᓕᓕᐃᓕᓕᐎᓐ, ᐁᑯ ᓀᔥᑕ ᐁᑎᑖᑯᓯᔭᓐ᙮
71ᒫᑲ ᑮ ᒫᒋ ᒪᒋᐃᑗᐤ, ᓀᔥᑕ ᑭᒋᐃᑗᐤ, ᐁ ᐃᑗᑦ, ᓇᒪᐎᓚ ᓂ ᑭᔅᑫᓕᒪᐤ ᐊᐗ ᐃᓕᓕᐤ ᑳ ᐋᓕᒧᒣᒃ᙮
72ᒥᓇ ᒫᑲ ᐁᑯ ᓂᔡᐤ ᓂᐅᑖᑯᓯᑦ ᓈᐯ ᐹᑲᐋᒀᓐ᙮ ᐱᑕᕐ ᒫᑲ ᑮ ᑭᔅᑭᓯᐤ ᑳ ᑮ ᐃᑗᓕᒋ ᒋᓴᓴ ᐁ ᑮ ᐃᑌᑯᑦ, ᐸᒧᔑ ᓂᔡᐤ ᓄᑖᑯᓯᑦ ᓈᐯ ᐹᑲᐋᒀᓐ, ᓂᔅᑡᐤ ᑭ ᑳ ᐋᓉᑌᓐ ᐁ ᑭᔅᑫᓕᒥᔭᓐ᙮ ᐃᔅᐱ ᒫᑲ ᒥᐋᒥᑐᓀᓕᑕᒃ, ᑮ ᒫᑐ᙮
Currently Selected:
ᐅᐸᓓᑭᔅ ᒫᕐᒃ 14: MCNT91
Highlight
Share
ਕਾਪੀ।
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.