ᐅᐸᓓᑭᔅ ᓘᒃ 4
4
ᒋᓴᔅ ᑲᑴᒋᐋᑳᓂᐎᐤ
(ᒫᑎᐤ 4:1–11; ᒫᕐᒃ 1:12–13)
1ᒋᓴᔅ ᒫᑲ, ᐁ ᓵᑲᔅᑭᓀᔅᑳᑯᑦ ᐸᓓᑭ ᐊᒑᑾ, ᒐᕐᑕᓂᒃ ᑮ ᐅᒋ ᑭᐌᐤ, ᓀᔥᑕ ᑮ ᐃᑐᑕᐃᑯ ᐊᒑᑾ ᐸᑾᑕᔅᑲᒥᑳᒃ, 2ᓀᒥᑕᓇᐤ ᑭᔑᑳᐗ ᐁ ᑲᑴᒋᐃᑯᑦ ᒪᒋᒪᓂᑐᐗ᙮ ᒣᒀᒡ ᒫᑲ ᐊᓂᐃ ᐁ ᑭᔑᑳᓕᑭ ᓇᒪᐎᓚ ᑫᒀᓕᐤ ᑮ ᐅᒋ ᒥᒋᐤ: ᐃᔅᐱ ᒫᑲ ᑳ ᐳᓂᐸᓕᓕᑭ, ᐁᑯ ᐙ ᒥᒋᓱᑦ᙮
3ᑮ ᐃᑎᑯ ᒫᑲ ᒪᒋᒪᓂᑐᐗ, ᑮᔥᐱᓐ ᑭᒋᒪᓂᑐ ᐌᑯᓯᓯᒥᔅᑴ, ᐃᑕᔓᐙᔥ ᐊᐗ ᐊᓯᓂ ᑭᒋ ᐊᓚᑯᓈᐎᑦ᙮
4ᒋᓴᔅ ᒫᑲ ᑮ ᓇᔥᑴᐗᔑᐁᐤ, ᐁ ᐃᑗᑦ, ᐃᑕᓯᓇᐃᑳᑌᐤ, ᐃᓕᓕᐤ ᓇᒪᐎᓚ ᑲᑕ ᐱᒫᑎᓯᐤ ᐱᔑᔑᒃ ᐊᓚᑲᓈᐗ ᐅᒋ, ᒫᑲ ᒥᓯᐌ ᑕᑐ ᐅᑦ ᐋᔭᒥᐎᓂᓕᐤ ᑭᒋᒪᓂᑐ ᐅᒋ᙮
5ᒪᒋᒪᓂᑐ ᒫᑲ ᐁ ᓵᑲᒋᐌᑕᐋᑦ ᐁ ᐃᔅᐸᑎᓈᓕᒃ ᐗᒌᒃ, ᓴᔅᒋᑯᒡ ᑮ ᐙᐸᑎᓓᐤ ᒥᓯᐌ ᐅᑭᒫᐎᐎᓇ ᐊᔅᑮᒃ᙮ 6ᒪᒋᒪᓂᑐ ᒫᑲ ᑮ ᐃᑌᐤ, ᒥᓯᐌ ᐅᒪ ᑲᔥᑭᐅᐎᓐ ᑭ ᑳ ᒥᓕᑎᓐ, ᓀᔥᑕ ᐁᔅᐱᒋ ᑭᔅᑌᓕᑖᑾᑭ: ᐌᓴ ᓂ ᑮ ᐸᑭᑎᓇᒫᑲᐎᓐ ᓀᔥᑕ ᐊᐌᓇ ᐱᑯ ᐙ ᒥᓚᑭ ᓂ ᒥᓚᐤ᙮ 7ᑮᔥᐱᓐ ᒫᑲ ᑫ ᓇᐗᑮᔅᑕᐎᐗᓀ, ᒥᓯᐌ ᑭ ᑳ ᑎᐱᓚᐌᐎᓰᓐ᙮
8ᒋᓴᔅ ᒫᑲ ᑮ ᓇᔥᑴᐗᔑᐁᐤ, ᐁ ᐃᑖᑦ, ᓂᔅᐱᔅᑾᓂᒃ ᐃᔑ ᐃᑐᑌ, ᓭᑖᓐ; ᐌᓴ ᐃᑕᓯᓇᐃᑲᑌᐤ, ᑭ ᑳ ᓇᐗᑮᔅᑕᐗᐤ ᐅᑎᐯᓕᒋᑫᐤ ᑭ ᑭᒋᒪᓂᑐᒻ, ᐎᓚ ᓀᔥᑕ ᐱᑯ ᑭ ᑳ ᐊᑑᔅᑫᔅᑕᐗᐤ᙮
9ᑮ ᐯᒋ ᐃᑐᑕᐁᐤ ᒫᑲ ᒋᕉᓴᓚᒥᒃ, ᑮ ᑌᑕᓓᐤ ᒫᑲ ᑕᑯᒡ ᐃᑕ ᐁ ᐃᔥᐹᓕᒃ ᑭᒋᐋᔭᒥᐁᐎᑲᒥᑯᒃ, ᑮ ᐃᑌᐤ ᒫᑲ, ᑮᔥᐱᓐ ᑭᒋᒪᓂᑐ ᐌᑯᓯᓯᒥᔅᑴ, ᓂᒋᒀᔥᑯᑎ ᐅᑕ ᐅᒋ: 10ᐌᓴ ᐃᑕᓯᓇᐃᑳᑌᐤ, ᑲᑕ ᐃᑕᔓᐙᑌᐤ ᐅᑦ ᐁᓐᒐᓕᒪ ᑭᓚ ᐅᒋ, ᑭᒋ ᑲᓇᐌᓕᒥᔅᑭᒃ; 11ᓀᔥᑕ ᐅᒋᒋᐙᒃ ᑭ ᑳ ᐋᓱᓂᑾᒃ; ᐁᑳ ᑭᒋ ᐅᑕᒥᑎᑖᔭᓐ ᑮᓯᑦ ᐊᓯᓂᒃ᙮
12ᒋᓴᔅ ᒫᑲ ᐁ ᓇᔥᑴᐗᔑᐋᑦ, ᑮ ᐃᑌᐤ, ᐃᑣᓂᐗᓐ, ᐁᑳᐎᓚ ᑭ ᑳ ᑲᑴᒋᐋᐤ ᐅᑎᐯᓕᒋᑫᐤ ᑭ ᑭᒋᒪᓂᑐᒻ᙮
13ᐃᔅᐱ ᒫᑲ ᒪᒋᒪᓂᑐ ᑳ ᑮ ᑮᔑᑖᑦ ᒥᓯᐌ ᑲᑴᒋᐃᐌᐎᓂᓕᐤ, ᑮ ᓇᑲᑌᐤ ᐎᓕᐱᔉ᙮
ᒋᓴᔅ ᑭᒋᑖᐤ ᐅᑕᑐᔅᑫᐎᓐ ᑳᓕᓕᒃ
(ᒫᑎᐤ 4:12–17; ᒫᕐᒃ 1:14–15)
14ᒋᓴᔅ ᒫᑲ ᑮ ᐃᔑ ᑭᐌᐤ ᑳᓕᓖᒃ ᐊᒑᑾ ᐅ ᑲᔥᑭᐅᐎᓂᓕᒃ: ᑮ ᒫᒪᔅᑲᑖᒋᒪᐤ ᒫᑲ ᒥᓯᐌ ᐁᔅᐱᔖᒃ ᐊᔅᑮᒃ ᐙᔅᑲ᙮ 15ᑮ ᑭᔅᑭᓄᐊᒫᑫᐤ ᒫᑲ ᐅᑦ ᐋᔭᒥᐁᐎᑲᒥᑯᓖᒃ, ᐁ ᑭᔅᑖᒋᒥᑯᑦ ᒥᓯᐌ ᐊᐌᓕᐗ᙮
ᒋᓴᔅ ᐋᑕᐌᓕᒫᑲᓂᐎᐤ ᓈᓴᕆᑎᒃ
(ᒫᑎᐤ 13:53–58; ᒫᕐᒃ 6:1–6)
16ᑮ ᐯᒋ ᐃᑐᑌᐤ ᒫᑲ ᓈᓴᕆᑎᒃ, ᐃᑕ ᐁ ᑮ ᐅᐱᑭᐋᑲᓂᐎᑦ: ᑫᔮᐸᒡ ᒫᑲ ᑳ ᐋᔨᑐᑕᒃ, ᑮ ᐱᑐᑫᐤ ᐋᔭᒥᐁᐎᑲᒥᑯᒃ ᐁ ᐋᔭᒥᐁᑭᔑᑳᓕᒃ, ᑮ ᓂᐸᐎᐤ ᒫᑲ ᑭᒋ ᐋᔭᒥᒋᑫᑦ᙮ 17ᑮ ᒥᓚᐤ ᒫᑲ ᐅ ᒪᓯᓇᐃᑲᓐ ᐅᑭᔅᑭᐙᐃᑫᐤ ᐋᐃᓭᔭ, ᐃᔅᐱ ᒫᑲ ᑳ ᐋᐸᐊᒃ ᒪᓯᓇᐃᑲᓂᓕᐤ, ᑮ ᒥᔅᑲᒻ ᐃᑕ ᐁ ᒪᓯᓇᐃᑳᑌᓕᒃ, 18ᐅᑎᐯᓕᒋᑫᐤ ᐅᑦ ᐊᒑᑾ ᓂ ᑭᑭᔥᑳᑯᓕᐗ, ᐌᓴ ᓂ ᑮ ᑕᒪᔅᑯᓂᒃ ᑭᒋ ᑎᐹᒋᒧᔅᑕᐗᑭᒃ ᒥᓗᐋᒋᒧᐎᓂᓕᐤ ᐊᓂᑭ ᑳ ᑭᑎᒫᑭᓯᒋᒃ; ᓂ ᑮ ᐯᒋᑎᔕᐅᒃ ᑭᒋ ᒥᓇᐋᒋᐊᑭᒃ ᐊᓂᑭ ᑳ ᐱᑯᑌᐁᒋᒃ, ᑭᒋ ᑎᐹᒋᒧᔅᑕᐗᑭᒃ ᐋᐸᐊᒫᑫᐎᓂᓕᐤ ᐊᓂᑭ ᑳ ᐋᐗᑳᓂᐎᒋᒃ, ᓀᔥᑕ ᐙᐱᐎᓂᓕᐤ ᐊᓂᑭ ᐁᑳ ᑳ ᐙᐱᒋᒃ, ᑭᒋ ᐋᐸᐗᑭᒃ ᐊᓂᑭ ᑳ ᐅᑐᑭᓯᒋᒃ, 19ᑭᒋ ᑎᐹᑐᑕᒶᒃ ᐅᑎᐯᓕᒋᑫᐤ ᐅ ᒥᓜᓕᑖᑯᓯᐎ ᐱᐴᓐ᙮
20ᐁᑯ ᑭᐸᐊᒃ ᒪᓯᓇᐃᑲᓂᓕᐤ, ᑮ ᒥᓓᐤ ᒫᑲ ᐊᑑᔅᑫᓛᑲᓇ, ᓀᔥᑕ ᑮ ᓇᐊᐱᐤ᙮ ᓱᑲ ᒫᑲ ᑮ ᑲᓇᐙᐸᒥᑯ ᒥᓯᐌ ᐊᓂᐃ ᑳ ᐃᑖᓕᒋ ᐋᔭᒥᐁᐎᑲᒥᑯᒃ᙮ 21ᑮ ᒫᒋ ᐃᑌᐤ ᒫᑲ, ᐊᓄᒡ ᐁ ᑭᔑᑳᒃ ᐅᒪ ᒪᓯᓇᐃᑫᐎᓐ ᑎᐱᐸᓕᐤ ᑭᑖᐗᑳᐙᒃ᙮
22ᒥᓯᐌ ᒫᑲ ᑮ ᑎᐹᒋᒣᐗᒃ, ᓀᔥᑕ ᑮ ᒫᒪᔅᑳᑕᒬᐗᒃ ᐊᓂᐃ ᔕᐌᓕᒋᑫᐎ ᐋᔭᒥᐎᓇ ᑳ ᐅᒋᐸᓕᓕᑭ ᐅᑐᓂᓕᒃ᙮ ᑮ ᐃᑗᐗᒃ ᒫᑲ, ᓇᒪ ᓈ ᐊᐗ ᒍᓯᑉ ᐅᑯᓯᓴ?
23ᑮ ᐃᑌᐤ ᒫᑲ, ᑫᒋᓈᔥ ᑭ ᑳ ᐃᔑᓇᐗᐤ ᐅᒪ ᑭᑫᑕᐎᐃᑗᐎᓐ, ᓇᑕᑯᓚᓐ, ᒥᓇᐙᒋᐃᑎᓱ: ᒥᓯᐌ ᑫᒀᓇ ᑳ ᐎᑕᒫᑲᐎᔮᒃ ᑳ ᐋᔨᑐᒋᑳᑌᑭ ᑲᐸᕐᓀᔭᒥᒃ, ᐅᑕ ᓀᔥᑕ ᑐᑕ ᑎᐱᓚᐌ ᑭᑦ ᐊᔅᑮᒃ᙮ 24ᑮ ᐃᑗᐤ ᒫᑲ, ᑖᐺ ᑭᑦ ᐃᑎᓇᐗᐤ, ᐅᑭᔅᑭᐙᐃᑫᐤ ᓇᒪᐎᓚ ᐱᓯᔅᑫᓕᒪᐤ ᑎᐱᓚᐌ ᐅᑦ ᐊᔅᑮᒃ᙮
25ᒫᑲ ᑖᐺ ᑭ ᐎᑕᒫᑎᓇᐗᐤ, ᑮ ᐃᑖᐗᒃ ᐃᔅᕃᐃᓕᒃ ᒥᒉᑦ ᑭᑎᒫᑭᔅᑴᐗᒃ ᒣᒀᒡ ᐁ ᐅ ᑭᔑᑳᒥᑦ ᐃᓛᐃᒐ, ᐃᔅᐱ ᐁ ᑮ ᑭᐳᐃᑳᑌᒃ ᑭᔑᒃ ᐃᔥᐱᔥ ᓂᔅᑐ ᐱᐴᓋ ᓀᔥᑕ ᓂᑯᑣᓱ ᐱᓯᒶ, ᐃᔅᐱ ᓈᔅᐱᒡ ᑳ ᑲᐗᑲᑖᓂᐗᒃ ᒥᓯᐌ ᐁᔅᐱᔖᒃ ᐊᓂᒪ ᐊᔅᑮᒃ; 26ᒫᑲ ᐃᓛᐃᒐ ᓇᒪᐃᓚ ᑮ ᐃᔑᑎᔕᐗᐤ ᑭᒋ ᓇᑕᐙᐸᒫᑦ ᐊᓂᐃ ᐃᔅᑴᐗ, ᐱᑯ ᓴᕃᑉᑕᐃᒃ, ᐃᑖᐎᓂᒃ ᓴᐃᑕᓂᒃ, ᑭᒋ ᓇᑕᐙᐸᒫᑦ ᑭᑎᒫᑭᔅᑴᐗ᙮ 27ᓀᔥᑕ ᒥᒉᑦ ᐅᓓᑉᕈᓯᐃᑖᔅᐱᓀᐗᒃ ᑮ ᐃᑖᐙᒃ ᐃᔅᕃᐃᓕᒃ ᒣᒀᒡ ᐁ ᐅ ᑭᔑᑳᒥᑦ ᐃᓛᐃᒐ ᐅᑭᔅᑭᐗᐃᑫᐤ; ᓇᒪᐎᓚ ᐊᐌᓇ ᐁ ᐃᑕᓯᒋᒃ ᑮ ᐅᒋ ᐹᔦᑭᐊᐤ, ᐱᑯ ᓀᐊᒫᓐ ᓯᕆᐊᐃᓕᓕᐤ᙮
28ᒥᓯᐌ ᐊᓂᑭ ᒫᑲ ᐋᔭᒥᐁᐎᑲᒥᑯᒃ ᑳ ᐃᑖᒋᒃ, ᐃᔅᐱ ᐱᐁᑕᑭᒃ ᐅᐅ ᑫᒀᓇ, ᑮ ᓵᑲᔅᑭᓀᔅᑳᑯᐗᒃ ᐋᑯᓚᐌᓯᐎᓂᓕᐤ, 29ᑮ ᐸᓯᑯᐗᒃ ᒫᑲ, ᓀᔥᑕ ᐃᑖᐎᓂᒃ ᑮ ᐅᒋ ᐗᓚᐎᑎᔑᓀᐗᒃ, ᑮ ᐃᑐᑕᐁᐗᒃ ᒫᑲ ᐊᓐᑕ ᐁ ᐋᒪᑎᓂᓕᒃ ᐗᒋᔑᔑᓕᐤ ᐃᑕ ᑳ ᐅᔑᑖᓂᐗᓂᓕᒃ ᐅᑦ ᐃᑖᐎᓂᐗᐤ, ᑭᒋ ᐊᒋᒋ ᓂᑕᒋᐌᐱᓈᒋᒃ᙮ 30ᒫᑲ ᐎᓚ, ᐁ ᔖᐳᔥᑲᐙᑦ ᑮ ᑭᑐᑌᐤ᙮
ᐃᓕᓕᐤ ᑳ ᑭᑭᔅᑳᑯᑦ ᒪᒋ ᐊᒑᑾ
(ᒫᕐᒃ 1:21–28)
31ᑮ ᐯᒋ ᐃᑐᑌᐤ ᒫᑲ ᑲᐸᕐᓀᔭᒥᒃ, ᐃᑖᐎᓐ ᑳᓕᓖᒃ, ᑮ ᑭᔅᑭᓄᐊᒪᐌᐤ ᒫᑲ ᐁ ᐋᔭᒥᐁᑭᔑᑳᓕᑭ᙮ 32ᑮ ᒫᒪᔅᑳᑕᒬᐗᒃ ᒫᑲ ᐅ ᑭᔅᑭᓄᐊᒫᑫᐎᓂᓕᐤ; ᐌᓴ ᐅᑦ ᐋᔭᒥᐎᓐ ᑮ ᓱᑳᑎᓯᒪᑲᓂᓕᐤ᙮ 33ᐋᔭᒥᐁᐎᑲᒥᑯᒃ ᒫᑲ ᑮ ᐃᑖᐤ ᐃᓕᓕᐤ ᑳ ᐋᔭᐎᒫᑦ ᐅᑦ ᐊᒑᑾ ᐎᓕᐱ ᐊᒑᒃ, ᑮ ᑌᐺᐤ ᒫᑲ, ᐁ ᑭᔗᐌᑦ, 34ᐁ ᐃᑗᑦ, ᐁᑳᐎᓚ ᐱᒣᓕᒥᓈᓐ: ᑖᓂ ᑭᓚ ᑫ ᐃᑖᐸᒋᐃᑖᒃ, ᑭᓚ ᒋᓴᔅ, ᓇᓴᕋᑎᒃ ᑳ ᐅᒋᔭᓐ? ᑭ ᐯᒋ ᓂᔑᐗᓈᒋᐃᓈᓐ ᓈ? ᑭ ᑭᔅᑫᓕᒥᑎᓐ ᐊᐌᓇ ᑭᓚ; ᐅ ᐸᓓᑭᓯᒪ ᑭᒋᒪᓂᑐ᙮
35ᒋᓴᔅ ᒫᑲ ᑮ ᑭᑐᑌᐤ, ᐁ ᐃᑗᑦ, ᐁᑳ ᑭᑐ, ᐯᒋ ᐗᓚᐙᔅᑲᐤ ᒫᑲ᙮ ᐃᔅᐱ ᒫᑲ ᒪᒋ ᐊᒑᒃ ᑳ ᑮ ᑲᐎᐌᐱᓈᑦ ᑌᑖᐎᒡ, ᑭ ᐯᒋ ᐗᓚᐎᔅᑲᐌᐤ, ᓇᒪ ᓀᔥᑕ ᑮ ᐋᑯᐁᐤ᙮
36ᒥᓯᐌ ᐁ ᐃᑕᓯᒋᒃ ᒫᑲ ᑮ ᒫᒪᔅᑳᑕᒶᒃ, ᓀᔥᑕ ᑮ ᐋᔭᒥᐃᑐᐗᒃ, ᐁ ᐃᑗᒋᒃ, ᑫᑯ ᐋᔭᒥᐎᓐ ᐅᒪ! ᐌᓴ ᑌᐯᓕᒋᑫᐎᓂᓕᐤ ᓀᔥᑕ ᑲᔥᑭᐅᐎᓂᓕᐤ ᐅᒋ ᐅᓚᔓᐙᑌᐤ ᐎᓕᐱ ᐊᒑᑾ, ᐯᒋ ᐗᓚᐎᐸᓕᐗ ᒫᑲ᙮ 37ᑮ ᒫᒪᔅᑳᑖᒋᒪᐤ ᒫᑲ ᒥᓯᐌ ᐁᔅᐱᔖᒃ ᐊᔅᑮᒃ ᐗᔅᑲ᙮
ᒋᓴᔅ ᒥᓇᐙᒋᐁᐤ ᒥᒉᑦ ᐃᓕᓕᐗ
(ᒫᑎᐤ 8:14–17; ᒫᕐᒃ 1:29–34)
38ᐊᔭᒥᐁᐎᑳᒥᑯᒃ ᒫᑲ ᑮ ᐅᒋ ᐊᓚᐃᐤ, ᓀᔥᑕ ᑮ ᐱᑐᑫᐌᐤ ᓵᐃᒪᓇ ᐎᑭᓕᒃ: ᒫᑲ ᐎᐗ ᐅᑳᐎᓕᐗ ᑮ ᐅᑎᑎᑯᓕᐗ ᑭᒋ ᑭᓯᓱᐎ ᐃᑖᔅᐱᓀᐎᓂᓕᐤ; ᐁᑯ ᒫᑲ ᓀᑐᑕᒪᐙᒋ ᑭᒋ ᒥᓇᐙᒋᐋᑦ᙮ 39ᑮ ᑕᑯᑳᐸᐎᔅᑕᐌᐤ ᒫᑲ, ᓀᔥᑕ ᑮ ᑭᑐᑕᒻ ᑭᓯᓱᐎ ᐃᑖᔅᐱᓀᐎᓂᓕᐤ; ᐁᑯ ᓀᑲᑎᑯᓕᒋ᙮ ᑡᔦᒃ ᒫᑲ ᑮ ᐗᓂᔥᑲᐤ, ᓀᔥᑕ ᑮ ᐸᒥᐁᐤ᙮
40ᐃᔅᐱ ᒫᑲ ᐁ ᐊᑎ ᐸᑭᔑᒧᑦ ᐱᓯᒻ, ᒥᓯᐌ ᐊᓂᑭ ᑳ ᐋᔭᐙᒋᒃ ᐊᓂᐃ ᓇᓈᑲᐤ ᑳ ᐃᑖᔅᐱᓀᓕᒋ, ᑮ ᐯᑐᐌᐗᒃ; ᑮ ᓵᒥᓀᐤ ᒫᑲ ᒥᓯᐌ ᑕᑐ ᐁ ᐃᑕᓯᓕᒋ, ᓀᔥᑕ ᑮ ᒥᓇᐙᒋᐁᐤ᙮ 41ᒪᒋ ᐊᒑᑾᒃ ᒫᑲ ᒥᒉᑦ ᑮ ᐅᒋ ᐗᓚᐙᔅᑲᐌᐗᒃ, ᐁ ᑌᐺᒋᒃ, ᓀᔥᑕ ᐁ ᐃᑗᒋᒃ, ᑭᓚ ᐁᐗᑯ ᙭, ᑭᒋᒪᓂᑐ ᐅᑯᓯᓴ᙮
ᐎᓚ ᒫᑲ, ᐁ ᑭᑐᑖᑦ, ᑮ ᑭᑕᐊᒪᐌᐤ ᐁᑳ ᑭᒋ ᐋᔭᒥᓕᒋ: ᐌᓴ ᑮ ᑭᔅᑫᓕᑕᒥᓕᐗ ᐁ ᐋᐎᑦ ᙭᙮
ᒋᓴᔅ ᑭᔅᑭᓄᐊᒫᑫᐤ ᐲᒋ ᒎᐗᒃ ᐅᑕᔭᒥᐁᐎᑲᒥᑯᐗᒃ
(ᒫᕐᒃ 1:35–39)
42ᐃᔅᐱ ᒫᑲ ᐎᐋᐸᓂᓕᒃ ᑮ ᑭᑐᑌᐤ, ᐁ ᐃᑐᑌᑦ ᐊᓐᑕ ᐁ ᐸᑾᑌᓕᑖᑾᒃ; ᑮ ᓈᓇᑕᐗᐸᒥᑯ ᒫᑲ ᐃᓕᓕᐗ, ᓀᔥᑕ ᑮ ᐯᒋ ᓈᑎᑯ, ᓀᔥᑕ ᑮ ᑭᐱᒋᐃᑯ, ᐁᑳ ᑭᒋ ᓇᑲᑖᑦ᙮ 43ᑮ ᐃᑌᐤ ᒫᑲ, ᔮᓕᑌᓪ ᓂ ᑳ ᑎᐹᑐᑕᒸᓐ ᑭᒋᒪᓂᑐ ᐅᑦ ᐅᑭᒫᐎᐎᓐ ᑯᑕᑭᔭ ᐃᑖᐎᓂᒃ ᐊᓯᒋ; ᐌᓴ ᐁᐗᑯ ᐌᒋ ᐯᒋᑎᔕᐅᑳᐎᔮᓐ᙮
44ᑮ ᑲᑫᔅᑭᒥᐌᐤ ᒫᑲ ᐋᔭᒥᐁᐎᑲᒥᑯᒃ ᑳᓕᓕᒃ ᑳ ᐃᑕᑾᓂᓕᑭ᙮
Currently Selected:
ᐅᐸᓓᑭᔅ ᓘᒃ 4: MCNT91
Highlight
Share
ਕਾਪੀ।
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
