IMBOMBO SYA BATUMIGWA 16

Timoti ikubuka na Pauli na Sila

1Popapo Pauli alinkwakufika nkaya ka Derbe na ka Listra; mo alimo unKristi yumo uyu ali yo Timoti ingamu, umwana gwa nkikulu unJuda uyu alinKristi, loli ugwise ali nGriki. 2AbaKristi bosa balinkunjoba ubununu Timoti nkaya ka Listra na ka Ikonia. 3Umwene Pauli alondaga ukubuka nagwe Timoti; popapo alinkumbutako, papo balimo abaYuda ntwaya tula, namanga bosa bamenye ukuti ugwise ali nGriki. 4Lelo bo bikukisania ntwaya, balinkubapa abitiki indagilo isi balitikene abatumigwa nabakulumba ba nkaya ka Yerusalemu, ukuti basikongege. 5Popapo ifipanga filinkukaka ndwitiko, filinkongelapo ukubala amasiku gosa.

Pa kiloboko kya Troa: ikisetuka kya Pauli

6Popapo balinkukisania nkisu kya Frigia nikya Galatia, namanga Mbepo Mwikemo abakanisye ukulumbilila ilisyu nkisu kya Asia. 7Lelo bo bikuya pakufika nkisu kya Misia, balinkugela ukwingila nkisu kya Bitinia, loli Mbepo gwa Yesu alinkusita nukubitikisya. 8Abene balinkukisania nkisu kya Misia, balinkusuluka ukubuka pa kiloboko kya Troa. 9Popapo ikisetuka kilinkumbonekela Pauli pakilo; alinkwaga umundu yumo ugwa nkisu kya Makedonia imile ikupyelesya kumyake ikuti, “Loboka gwisege nkisu kya Makedonia ututule!” 10Lelo bo akibwene ikisetuka, nakalinga itolo tulinkulonda ukubuka nkisu kya Makedonia, tulinkumanya ukuti yo Kyala atubilikile kukubabula Inongwa Inunu.

Nkaya ka Filipi: ukupinduka kwa Lidia

11Popapo tulinkwipaka mungalaba ukufuma pa kiloboko kya Troa, tulinkugoloka ukubuka nkaya ka Samotrake; ulwa kilabo tulinkufika nkaya ka Neapoli; 12ukufuma papo tulinkwakufika nkaya ka Filipi, aka ko kaya akakulumba nkisu kya Makedonia, kako balingania abaRoma. Tulinkugonamo mumo amasiku manandi. 13Lelo pisiku lya Sabati, tulinkusoka pakipata, tulinkubuka pambali palusoko, apa twinogonaga ukuti bulipo ubuyo bwa kwiputilapo; tulinkutugala, tulinkuyoba nabakikulu aba babungene papo. 14Popapo yumo unkikulu uyu ali yo Lidia ingamu, umulisi gwa myenda imifubifu-ubutitu, ugwa nkaya ka Tiatira, uyu antilaga Kyala, yo alinkupilikisya; yo uNtwa alimwigwile indumbula ukusipilikisya isi ayobaga Pauli. 15Umwene lelo bo osigwe nabannyumba yake bosa, popapo alinkupyelesya alinkuti, “Linga mumbwene ukumwitika uNtwa naloli, po muli-isaga munyumba yangu mo mugonege; umwene alinkutufimbilisya itolo.”

Nnyumba ya bannyololo nkaya ka Filipi

16Lumo lelo bo tukubuka pabwiputilo, popapo tulinkwaganila nundindwana yumo untumwa, uyu ali nimbepo ya bulagusi, yo abakabilaga ikyuma ikingi fiyo abenenagwe nubulagusi bwake. 17Undindwana yula alinkunkonga Pauli nanuswe, alinkukolela alinkuti, “Abandu aba bo babombi ba Kyala unkinde, aba bikubafumukisya injila ya bupoki.” 18Syo alinkubombo amasiku mingi sisisi, popapo Pauli alinkukalala, alinkuyisyutukila imbepo yila, alinkuyibula alinkuti, “Nikukubulila mungamu ya Yesu Kristi, ukuti usokemo mmyake.” Popapo yilinkusoka pakabalilo kako itolo.

19Lelo bo abenenagwe bagile kasokilemo aka basubilaga ukukabilamo, popapo balinkunkola Pauli na Sila balinkubalusila pasokoni nkyeni mbalagili; 20bo babatwele nkyeni mbalongi balinkuti, “Abandu aba bikukapalagania akaya kitu, namanga baYuda; 21kangi bikufumusya inyiho isi sili mwiko kuli uswe twe baRoma, ukusitika nukusibomba.” 22Popapo ikilundilo kyosa kilinkongana nabo kilinkubalukila ba Pauli na Sila, abene abalongi balinkubafula imyenda, balinkulagila ukuti bakomigwege nifikoti. 23Lelo bo babakomile ifikoti fi fingi itolo, balinkubigalila nnyumba ya bannyololo, balinkundagila undindililanyumba ya bannyololo ukuti abaketelelege fiyo. 24Umwene bo alwambilile ululagilo lululu, popapo alinkubabika nnyumba ya nkati fiyo, amalundi gabo balinkubafyatika mipindo.

25Pakilo pakati, Pauli na Sila balinkwiputa nukuntufya Kyala ninyimbo; abene abannyololo balinkubapilikisya. 26Popapo balinkunyomoka kikuboneka akasenyenda akakulumba, syope ninyalo sya nyumba ya bannyololo silinkusukamka; nakalinga itolo inyigi syosa silinkwiguka, nimbingu sya bosa silinkulagala pasi. 27Popapo undindililanyumba ya bannyololo alinkulembuka, lelo bo agile inyigi sya nyumba ya bannyololo sigwike, alinkukwaba ulubo lwake alinkuti nigoge; namanga inogonaga ukuti abannyololo bayongile. 28Umwene loli Pauli alinkukolela ilisyu ilikulumba alinkuti, “Ungibombelaga imbibi simo, buno twesa tulimo.” 29Lelo bo akolile ukuti batwale inyale, popapo alinkunyela alinkwingila nnyumba, alinkutetema nukwitaga nkyeni mwa Pauli na Sila. 30Popapo alinkubasosya panja alinkuti, “Mwe banyafyale mbombe fiki ukuti mbokigwege?” 31Abene balinkumbula balinkuti, “Umwitikege uNtwa Yesu, po kupokigwaga ugwe nabannyumba yako.” 32Popapo balinkumbula ilisyu lya Ntwa pamopene nabannyumba yake bosa. 33Umwene alinkubega pakabalilo kako pakilo, alinkubasuka ififulalo fyabo; popapo nakalinga itolo alinkosigwa yuyo nabannyumba yake bosa. 34Bo afyukile nabo kunyumba yake, popapo alinkubategelekesya ifyakulya; alinkusekela fiyo pamopene nabannyumba yake bosa; papo alimwitike Kyala.

35Lelo bo bukile, popapo abalongi balinkubatuma abasikali babo balinkuti, “Buka Mukababule abandu bala nnyumba ya bannyololo.” 36Popapo undindililanyumba ya bannyololo alinkumpangila Pauli amasyu aga alinkuti, “Abalongi batumile indumi ukuti mbabule umwe nnyumba ya bannyololo lilino lelo amusokege mubukege nulutengano.” 37Umwene Pauli alinkubabula alinkuti, “Batukomile itolo pabwelu kisita kutulonga uswe twe baRoma, batwigalile nnyumba ya bannyololo, kangi lilino bikulonda ukutusosya kubutitu? Mma, loli baleke bise batusosye babo.” 38Popapo abasikali balinkwakubabula abalongi amasyu gagaga. Abene loli balinkutila bo bapilike ukuti baRoma, 39balinkwisa, balinkubatengulila; popapo balinkubasosya, balinkubasuma ukuti basokemo nkaya. 40Abene balinkusoka nnyumba ya bannyololo, balinkwakwingila nnyumba ya Lidia, balinkubaketa abaKristi nukubakasya; popapo balinkubuka.

Currently Selected:

IMBOMBO SYA BATUMIGWA 16: NNBII

Highlight

ਕਾਪੀ।