IMBOMBO SYA BATUMIGWA 15

Ulukomano lwa nkaya ka Yerusalemu

1 # Levi 12.3 Popapo abandu bamo balinkusuluka ukufuma nkisu kya Yudai, balinkubamanyisya abaKristi ukuti, “Linga mutikubutigwako ukufwana nulwiho lwa Mose mukabagila ukupokigwa.” 2Popapo Pauli na Barnaba balinkukanikana fiyo nabo, bunobuno abinabo balinkubasumusya ba Pauli na Barnaba nabangi bamo ukufyuka nkaya ka Yerusalemu kubatumigwa na kubakulumba, panongwa ya lukani lululu. 3Lelo bo ikipanga kibasindikile, balinkukisania nkisu kya Fenike nikya Samaria, balinkupanga isya lupinduko lwa bapanja balinkubapelela ulusekelo bosa abaKristi. 4Lelo bo bafikile nkaya ka Yerusalemu, popapo balinkwambililigwa nikipanga, nabatumigwa nabakulumba; abene balinkubapangila syosa isi Kyala abombile nabo. 5Popapo balinkusumuka bamo aba nkabugutila ka baFarisai, aba balipelile ukuya baKristi, balinkuyoba balinkuti, “Abapanja aba fikuti babutigwengeko, kangi balagiligwege ukusikonga indagilo sya Mose.”

6Popapo abatumigwa nabakulumba balinkubungana, ukuti bayikete inongwa yiyiyi. 7#Imbo 10.1-43Lelo bo bakanikene fiyo, popapo Peteri alinkusumuka alinkubabula alinkuti, “Mwe, bamyitu, mumenye ukuti iyolo Kyala asalile une nkati mmyinu ukuti abapanja balipilikilege ilisyu lya Nongwa Inunu mundomo gwangu, nukusitika. 8#Imbo 2.4; 10.44Umwene Kyala ummanyandumbula, yo abasisimikisye bo ikubapa Mbepo Mwikemo, bo papo atupaga nanuswe. 9Kangi alinkusita nukubikapo ulukindano pakati pamyitu nababo, alinkubelusya indumbula syabo ndwitiko. 10Lilino lelo, po mukungela fiki Kyala, apa mukubika ikigoligoli#15.10 Ikigoligoli: kifwene bo ikipiki iki sikufwikigwa ingambaku pakulima. pamakosi ga baKristi aba, iki batata kangi nayuyuswe twatoligwe ukupimba? 11Loli tukwitika ukuti uswe na balabala tukupokigwaga mwipyana lya Ntwa Yesu.”

12Ikilundilo kyosa kilinkuya mye itolo, kilinkubapilikisya ba Barnaba na Pauli bo bikubapangila isya fika nifiswigu, ifi Kyala abapelelaga abapanja mmaboko gabo. 13Abene bo bamalile ukuyoba, popapo Yakobu alinkwamula alinkuti, “Mwe bamyitu, amupilikisye kumyangu. 14Simeoni atubulile muno Kyala atalile ukubaketela abapanja, ukuti egemo mmyabo abandu aba kuya ba ngamu yake. 15Isi sikwitikana namasyu ga basololi, bo apa gasimbigwe ukuti,

16 # Amosi 9.11-12 ‘Panyuma pali sisisi, nisakugomokaga kangi,

nukubuyenga kangi ubunyafyale bwa Davidi,

nisakwandisyaga ukufiyenga ifisame fyake

nukubupela ukuya bunyafyale bwa maka kangi.

17Ukuti abandu aba basyele bandondege uNtwa,

nabapanja bosa aba mbabilikile bayege bandu bangu.

18Bo ikuya uNtwa, uyu asinangisye sisisi ukufuma liyolo.’

19Po apa nikulonga ilya kuti, tungabatamyaga abapanja aba bikupindukila kwa Kyala. 20#Kuso 34.15-17; Levi 17.10-16; 18.6-23Loli tubasimbilege ukuti bepukengeko kubunyali bwa fifwani, na kubuhahani, na kufinyamana ifi fipitigwe itolo, pamo kwilopa. 21Buno ukwanda pangulilo indasi, indagilo sya Mose sili nabo aba bikusifumusya ntwaya tosa, kangi sikubaligwa nnyumba syakwiputilamo bwila pisiku lya Sabati.

Kalata ikutumigwa ku baKristi abafuma mbwapanja

22Popapo silinkuya nunu nkyeni mbatumigwa, nakubakulumba, nakukipanga kyosa ukubasala abandu nkati mmyabo aba kubatuma ukubuka nkaya ka Antiokia, pamopene na Pauli na Barnaba, balinkunsala Yuda uyu batigi Barsaba, na Sila, abandu abalongosi mbamyabo; 23balinkubapa kalata ugwa kukolela mmaboko, uyu asimbigwe ukuti:

“Yo uswe twe batumigwa na twe bakulumba, twe bamyinu, tukubaponia mwe bamyitu, mwe ba nkaya ka Antiokia, nkisu kya Siria, nikya Kilikia, mwe mufumile mbapanja. 24Papo tupilike ukuti bamo mmyitu babatamisye namasyu, nukugipalagania imyoyo gyinu, aba tukabalagile. 25Bo twitikene, twagile nunu ukubasala abandu aba kubatuma kumyinu, pamopene nabakundwe bitu Barnaba na Pauli; 26aba ubumi bwabo babutagile panongwa ya ngamu ya Ntwa gwitu Yesu Kristi. 27Po apa tubatumile Yuda na Sila, bo bikubabulaga syosa sisisi nimilomo gyabo. 28Namanga Mbepo Mwikemo nanuswe, twagile syo nunu ukuti tungabongelelangapo ukubatwika ikitwalo ikisito ukukinda isi sikulondigwa isya kuti, 29mwepukengeko kuli ifi bikemekisye kufifwani, na kwilopa, na ku finyamana ifi fipitigwe, kangi na kuluhaho. Linga mukwiyepusya kuli fififi, bo munosisye. Mugonege lelo.” 30Lelo bo babasumwisye, balinkusuluka ukubuka nkaya ka Antiokia; abene bo bababungenie abandu, popapo balinkubapa kalata. 31Lelo bo babalile, balinkusekela panongwa ya lusubisyo ulu lwalimo. 32Popapo Yuda na Sila aba bope bali basololi, balinkubasubisya abaKristi namasyu ga mingi, balinkubakasya. 33Bo bagonilepo, popapo abaKristi balinkubasumusya nulutengano ukugomokela kuli aba babatumile.#15.33 Amasimbo gamo gikongelelako vesi 34: Loli Sila alinkwaga ukuti kununu ukusyala mumo. 35Umwene tali Pauli na Barnaba bo balinkuya mu nkaya ka Antiokia, balinkumanyisya nukulumbilila ilisyu lya Ntwa pamopene nabangi ba bingi.

Ukupagukana kwa Pauli na Barnaba

36Lelo bo gakindilepo amasiku manandi, popapo Pauli alinkumbula Barnaba alinkuti, “Nduko tugomokeleko kukubaketa abamyitu ntwaya tosa muno twalumbilile ilisyu lya Ntwa, tukabakete muno bayilile.” 37Umwene Barnaba alondaga ukumwega Yohani, uyu batigi Marko ukuti babukege nagwe. 38Loli Pauli alinkwaga kukaya kununu ukumwega nukubuka nagwe umundu uyu ayongile nkaya ka Pamfilia, kangi akanile ukubuka nabo kumbombo. 39Popapo lulinkutupuka ulukani ulukulumba, lo lulinkubapelela ukutapukana. Barnaba alinkumwega Marko, balinkwipaka mungalaba, balinkubuka ndusungo lwa Saiprasi. 40Umwene Pauli yo alinkunsala Sila, alinkubuka nagwe, bo abaKristi bambikile mwipyana lya Ntwa. 41Popapo alinkukisania nkisu kya Siria nikya Kilikia, alinkufikasya ifipanga.

Currently Selected:

IMBOMBO SYA BATUMIGWA 15: NNBII

Highlight

ਕਾਪੀ।