IMBOMBO SYA BATUMIGWA 13

Barnaba na Sauli bikusaligwa nukutumigwa

1Nkipanga iki kyali nkaya ka Antiokia, mo balimo abasololi nabamanyisi, Barnaba na Simeoni uyu batigi Nigeri, na Luki ugwa nkisu kya Kirene, na Manaeni, uyu akulile pamopene numalafyale Herodi, na Sauli. 2Lelo bo bali pakwiputa kuNtwa nukufipika ifyakulya, Mbepo Mwikemo alinkubabula alinkuti, “Amusungulilege Barnaba na Sauli kumbombo iyi mbabilikilile.” 3Lelo bo bafipikile ifyakulya nukwiputa, balinkubabikapo amaboko, balinkubasumusya.

Nkisu kya Saiprasi

4Lelo bo batumigwe na Mbepo Mwikemo, Barnaba na Sauli balinkusuluka ukubuka nkaya ka Seloikia, ukufuma mumo balinkuloboka inyanja ukubuka ndusungo lwa Saiprasi. 5Bo bafikile nkaya ka Salami, balinkulumbilila ilisyu lya Kyala nnyumba syakwiputilamo isya baYuda; yope Yohani balinkuya nagwe, alinkubatula. 6Lelo bo bakisenie ulusungo losa bayilekufika nkaya ka Pafu, balinkumwaga umundu yumo umbombamanjele, unJuda unsololi gwa butungulu, uyu ingamu yake ali yo Bar-Yesu; 7yo itugalaga na Setegi Pauli, undindililakisu, umundu gwa mahala uyu ababilikile ba Barnaba na Sauli, akuti apilike ilisyu lya Kyala. 8Umwene Elima ugwa manjele yula (namanga mo mumo yikusanukisigwa ingamu yake) alinkubapinga, alinkulonda ukungomola undindililakisu ukuti angitikaga. 9Umwene Sauli uyu iyingi ali yo Pauli, alinkwisula Mbepo Mwikemo alinkundulalila ugwa manjele yula, 10alinkuyoba nagwe alinkuti, “Gwe nnya mohesi ugwe, gwe gwiswile ubusyobi nubukomu bosa, gwe ndugu gwa bugolofu bosa; ngimba utikulekaga ukusiniongasya injila ingolofu sya Ntwa? 11Lelo keta, ikiboko kya Ntwa kikukwisilaga ugwe kuyaga mfwamaso, kikukindangapo akabalilo bo utikulibona nisuba.” Nakalinga itolo ulufunienie ningisi filinkungwila, alinkupusanika itolo, alinkulonda umundu gwa kunkola ikiboko nukuntetesya. 12Lelo bo undindililakisu asibwene isi syabonike, alinkwenda nukwitika, alinkuswiganika nulumanyisyo lwa Ntwa.

Nkaya ka Antiokia nkisu kya Pisidia

13Popapo Pauli nabanine balinkwipaka kangi mwiboti ukufuma nkaya ka Pafu, balinkwakufika nkaya ka Perge nkisu kya Pamfilia. Umwene Yohani alinkubaleka, alinkugomoka ukubuka mu Yerusalemu. 14Loli abene balinkusumuka ukufuma nkaya ka Perge, balinkwakufika nkaya ka Antiokia, nkisu kya Pisidi. Balinkwingila nnyumba yakwiputilamo pisiku lya Sabati, balinkutugasya. 15Lelo bo babalile amasyu ga mundagilo sya Mose naga basololi, popapo abakulumba ba nnyumba yakwiputilamo balinkubatumila indumi balinkuti, “Mwe bamyitu, linga muli nalyo limo ilisyu ilya kubakasya abandu aba, amuyobege.” 16Popapo Pauli alinkwima, alinkubabatamisya nikiboko alinkuyoba alinkuti,

“Mwe banyambala ba Israeli na mwe mukuntila Kyala, amupilikisyege. 17#Kuso 1.7; 12.51Kyala gwa bandu aba abanyaIsraeli, abasalile abatata, alinkubimika abandu bala bo bali mbuhesya nkisu kya Egiputi; kangi alinkubasosya nkisu kya Egiputi namaka gake amakulumba. 18#Kuba 14.34; Kukumbu 1.31Alinkuti lya mbepa kufyinja amalongo mana (40), bo bali ndungalangala. 19#Kukumbu 7.1; Yos 14.1Lelo bo afipyutile ifikolo finano na fibili nkisu kya Kanani, alinkubapa ikisu ukuya kilingo kyabo, 20#Balo 2.16; 1 Samu 3.20kufyinja ifi fyaliti fyali pa bamia bana na malongo mahano (450); Panyuma alinkubapa abalongi ukwisakufika pansololi Samueli.

21 # 1 Samu 8.5; 10.21 “Bo basumile umalafyale, umwene Kyala alinkubapa Sauli unnya Kishi, umundu gwa nkikolo kya Benjamini, kufyinja amalongo mana (40). 22#1 Samu 13.14; 16.12; Salimo 89.20Lelo bo ansosisyepo, popapo alinkubimikila Davidi ukuya malafyale gwabo; yo alinkunsisimikisya alinkuti, ‘Numwagile Davidi unnya Yese, umundu uyu indumbula yangu yikyelile nagwe, yo uyu isakubombaga ubwigane bwangu bosa.’ 23Nduyungu lwa mundu yuyuyu, Kyala, ansumukisye Israeli umpoki, yu Yesu, bo mumo afingile; 24#Mar 1.4; Luk 3.3uyu bo akali nukwisa, Yohani alinkutala ukulumbilila kubanyaIsraeli bosa isya losyo lwa lupinduko. 25#Mat 3.11; Mar 1.7; Luk 3.16; Yoh 1.20,27Umwene Yohani bo ikuya pakumala akabombo kake, alinkubabula alinkuti, ‘Ngimba mukwinogona ukuti ne ani? Ngaya ne mundu uyu mukungulila. Loli keta, ikwisa munyuma mmyangu yumo, uyu ifilato fyake ngabagila nukwabula.’

26“Mwe bamyitu, mwe bana ba kikolo kya Abrahamu na mwe mukuntila Kyala, ilisyu lya bupoki ubu, litumigwe kumyitu. 27Namanga aba bayengile nkaya ka Yerusalemu nabakulumba babo, papo bakalimmenye yuyo, kangi bakagamenye amasyu ga basololi aga gabaligwaga bwila pisiku lya Sabati, balinkusimalisya syosa sisisi apa bangogaga Yesu. 28#Mat 27.22-23; Mar 15.13-14; Luk 23.21-23; Yoh 19.15Napa bakayagile nayimo inongwa ya kungogelamo, balinkunsuma Pilati ukuti agogigwe. 29#Mat 27.57-61; Mar 15.42-47; Luk 23.50-56; Yoh 19.38-42Lelo bo basimalisisye syosa isi sinkunjoba mmasimbo, balinkunsulusya pampiki, balinkumbika mwipumba. 30Loli Kyala alinkunsyusya mbafwe; 31#Imbo 1.3umwene Yesu yo alinkubasetukila amasiku ga mingi aba bafyukile nagwe nkaya ka Yerusalemu ukufuma mu Galilai, aba lilino bo baketi bake kubandu. 32Nanuswe tukubafumukisya Inongwa Inunu isya lufingo ulu bapegigwe batata, 33#Salimo 2.7ukuti Kyala asimalikisye muli uswe twe banabo, apa ansyusyaga Yesu mbafwe, bo lilyo lisimbigwe ndwimbo lwa Israeli ulwa bubili ili likuti, ‘Ugwe uli Mwanangu, ngupapile umusyugu.’ 34#Yes 55.3Loli isya kuti ansyusisye mbafwe, unsitakugomokelako kububofu, syo asiyobile atile, ‘Nisakubapaga ulusayo ulwikemo, ulwa naloli, ulu nafingene na Davidi.’ 35#Salimo 16.10Fyobene ikuyoba pabusimbe ubungi ikuti, ‘Utisakundeka uMwikemo gwako ukuti akumanye ukubola.’ 36Buno Davidi bo ayibombile ingulilo yake ukufwana nulubatiko lwa Kyala alinkufwa; alinkusyiligwa pamopene nabagwise, alinkukumanya ukubola. 37Loli umwene uyu Kyala alinsyusisye mbafwe, yo akakumanyamo ukubola. 38Mwe bamyitu, amusimanyege ukuti yuyuyu, mo muno ubuswe bwa mbibi bukufumusigwa kumyinu, kangi mundagilo sya Mose mukabagila ukubwagilamo ubugolofu, 39loli muli yuyuyu mo ikubwagilaga ubugolofu gwesa uyu linga ikumwitika. 40Mwandege lelo ukuti singabisilaga isi syayobigwe mbasololi ukuti,

41 # Haba 1.5 ‘Amuketege mwe balobelo, muswigege, kangi mwende nukuyonga.

Buno nikubomba imbombo mmasiku ginu,

imbombo iyi mutisakuyitikamo siku, linga yumo ikubabula.’ ”

42Lelo bo Pauli na Barnaba bikusoka Nnyumba yakwiputilamo, popapo abandu balinkubasuma ukuti bisebababulege kangi amasyu gagaga pisiku lya Sabati uyungi. 43Lelo bo babalanile, po abaYuda ba bingi nabingisigwa mbuYuda, abatila-Kyala, balinkunkonga Pauli na Barnaba, aba bo bikuyoba nabo, balinkubakasya ukuti bumililege mwipyana lya Kyala.

Abatumigwa bikulabila kubapanja

44Lelo pisiku lya Sabati ugwa bubili, abandu ba bingi, tutigi akaya kosa, balinkubungana kukulipilikisya ilisyu lya Kyala. 45Loli bo abaYuda bafibwene ifilundilo, popapo kalinkubaga akabini, balinkusipinga syosa isi Pauli ayobaga, balinkunhelula. 46Popapo Pauli na Barnaba balinkuyoba itolo nubukifu balinkuti, “Kwabagile ukuti ilisyu lya Kyala liyobigwege tasi kumyinu; lelo papo mukulikana, kangi nukwibona mwibene ukuti mukabagila kubumi bwa bwila, keta, lilino po tukusanukilaga kubapanja. 47#Yes 42.6; 49.6Buno mo mumo atulagile uNtwa ukuti,

‘Ngwimike ugwe ukuya lumuli lwa bapanja,

ukuti abandu ba nkisu kyosa bapokigwege.’ ”

48Lelo bo abapanja basipilike sisisi, balinkusekela balinkulitufya ilisyu lya Ntwa. Popapo bosa aba balyimikiligwe kubumi bwa bwila balinkwitika. 49Ilyene ilisyu lya Ntwa lilinkubalanila nkisu kyosa. 50Loli abaYuda balinkubasambulania abakikulu abafumuke abatila-Kyala, nabakulumba ba kaya, balinkubasonga abandu ukubafwima ba Pauli na Barnaba, balinkubakagamo nkisu kyabo. 51#Mat 10.14; Mar 6.11; Luk 9.5; 10.11Loli abene balinkubakung'undila ulufumbi lwa kumalundi gabo, balinkubuka nkaya ka Ikonia. 52Abene abitiki ba nkaya ka Antiokia balinkwisula nulusekelo na Mbepo Mwikemo.

Currently Selected:

IMBOMBO SYA BATUMIGWA 13: NNBII

Highlight

ਕਾਪੀ।