IMBOMBO SYA BATUMIGWA 12
12
Ukufwimigwa kukongelela
1Lelo pakabalilo kako, po umalafyale Herodi alinkwanda ukubafwima bamo aba nkipanga. 2Alinkungoga nulubo Yakobu ugwamyabo gwa Yohani. 3Lelo bo agile sibakyelile abaYuda, alinkongelapo, alinkunkola Peteri. Syo silinkuboneka pa kabalilo ka Kisyesye Ikisita Nkese. 4#Kuso 12.1-27Lelo bo ankolile, alinkumwigalila nnyumba ya bannyololo, alinkumbika mmaboko ga tubugutila twa basikali tuna, bana-bana ukundindilila; alondaga ukubasokesya abandu, bo kimalike Ikyaka kya Pasa. 5Popapo Peteri alinkulindililigwa nnyumba ya bannyololo; ikyene loli ikipanga kyo kilinkwiyumika ukumwiputila kwa Kyala.
Peteri ikwabuligwa nnyumba ya bannyololo
6Lelo bo Herodi ikuya pakunsosya, ikilo kikyo Peteri agonile utulo pakati pabasikali babili, apinyigwe niminyololo mibili; pope pakifigo balipo abalindilili aba balindililaga inyumba ya bannyololo. 7Nakalinga itolo ugwandumi gwa Ntwa alinkutupuka, ulumuli lulinkumulika nnyumba; alinkunkoma Peteri palubafu, alinkundembusya alinkuti, “Sumukaga mbibimbibi!” Popapo iminyololo gilinkulagala mmaboko. 8Ugwandumi alinkumbula Peteri alinkuti, “Ipinya munsana, ufwalege nifilato fyako;” umwene alinkubomba bo bunobuno. Popapo ugwandumi yula alinkumbula alinkuti, “Fwalaga ikilundo kyako, ungongege.” 9Popapo Peteri alinkusoka panja alinkunkonga. Umwene akasimenye ukuti sya naloli isi syabombigwaga nugwandumi, alinkwinogona itolo ukuti akibwene ikisetuka. 10Bo bakindile pa balindilili ba kwanda naba bubili, balinkufika pakipata ikya kyela ikya kusokela ukwingila nkaya, kyo kilinkwiguka kyene itolo; popapo balinkusoka, balinkukinda umpulo gumo, nakalinga ugwandumi alinkwenda nukundeka. 11Umwene Peteri bo iyagenie alinkuti, “Lilino po mmenye naloli ukuti uNtwa antumile ugwandumi gwake, ambokile mmaboko ga Herodi na muli isi abaYuda bagulilaga.” 12Bo asyagenie sisisi, alinkubuka kunyumba ya Mariya unna gwa Yohani, uyu iyingi ali yo Marko; muno babungene abandu ba bingi aba biputaga. 13Lelo bo akung'undile palwigi lwa kifigo, popapo undindwana yumo umbombi, uyu ali yo Roda ingamu, alinkubuka pakupilikisya. 14Bo alimenye ilisyu lya Peteri, panongwa ya lusekelo, alinkusita nukwigulako ulwigi, loli alinkubopela nnyumba, alinkwakubabula ukuti Peteri imile pakifigo. 15Abene balinkumbula balinkuti, “Uli nikigili.” Umwene loli alinkumilisya fiyo ukuti naloli bo sili. Bunobuno balinkuyoba balinkuti, “Utigi gwandumi gwake.” 16Umwene Peteri alinkumilisya ukukung'usya Lelo bo bigwileko, balinkumbona, balinkuswiganika fiyo. 17Umwene alinkubabatamisya nikiboko, alinkubapangila muno uNtwa alinsokisye nnyumba ya bannyololo, alinkubabula alinkuti, “Mukambulege Yakobu nabamyitu inongwa sisisi.” Popapo alinkusoka, alinkubuka kubungi.
18Lelo bo bukile, popapo abasikali kulinkusoba kulinkuleka, balinkuti, “Simwagile sya fiki Peteri?” 19Umwene Herodi bo andondile atoligwe, alinkubania fiyo abalindilili; popapo alinkulagila ukuti bagogigwege. Popapo Herodi alinkusokamo mu Yudai alinkusuluka ukubuka nkaya ka Kaisaria, mo alinkwakugonapo.
Ukufwa kwa Herodi
20Umwene Herodi alinkubakalalila fiyo aba nkaya ka Tiri naka Sidoni; bunobuno balinkwisa kumyake nindumbula yimoyene, balinkumanyana na Blasti untengafitala fya malafyale, ukuti abatule ukusuma isya lutengano; namanga ifyakulya fya nkisu kyabo fyafumaga nkisu kya malafyale.
21Lelo pisiku limo ilisaligwa, Herodi alinkufwala imyenda gyake gya bunyafyale alinkutugala pakikota kya bunyafyale, alinkubabula abandu inongwa. 22Popapo abandu balinkukolela balinkuti, “Ili lyo isyu lya Kyala, likaya lya mundu!” 23Nakalinga itolo ugwandumi gwa Ntwa alinkunkoma Herodi, papo akampaga ubukulumba Kyala. Bunobuno ifwingili silinkundya, alinkufwa.
24Ilyene loli ilisyu lya Ntwa lilinkukula, lilinkubala.
25Popapo Barnaba na Sauli bo bamalile imbombo yabo, balinkugomoka ukufuma nkaya ka Yerusalemu; balinkumwega na Yohani uyu batigi yo Marko.
Currently Selected:
IMBOMBO SYA BATUMIGWA 12: NNBII
Highlight
Share
ਕਾਪੀ।
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.
