मर्कुस 11
11
यरुसलेमता इसुहेङ स्वागत पाका
(मत्ति २१:१-११; लुका १९:२८-४०; युहन्ना १२:१२-१९)
1इसु वाको चात्यागेलाइदोफा यरुसलेम हानेकाताङ पालाउ जेलाउ ओबालाइ यरुसलेमको भेर्पा जाइतुन आरदाङको भेर्पा बेदफागे रो बेथानिया दोअ्का थामेता थुकालिलोहि, कोलाउ वा ताइको चात्यागेलाइता न्हेमिहेङ एसा दोअ्तेङ दिङगिल्हि, 2“नेलाइको आगाता तिङका देराता हानेसु रो दुल्कादुल्काताङ नेलाइ एला थिकापा हासुङ माधोल्का एलोङ गाधाको चान निङस्वाना। इङकोहेङ खाइतेङ इता चुमासु। 3हासुङ नेलाइहेङ ‘इदोइ हाइ पासुखेना?’ दोअ्नु, ‘प्रभुहेङ गोइका हि रो वा मारफाङ घुरिपाप्यावा’ दोअ्सु।”
4एम्बालाइ इन्ता हानेलाउ जातिङको एलोङ साअ्को बाहार मुलफिनु भेरपा इङको गाधाको चान धेउतेङ ताअ्का तिङहि रो इङकोहेङ खाइलि तोम्लाउ 5इन्ता जाअ्तेङ हिका आधिमि द्याङगेलाइ एम्बालाइहेङ हिअ्हि, “या गाधाको चानहेङ खाइतेङ नेलाइ हाइ पादोङसुखेना?” 6इसु आर्हाइकाभाइपाङ एम्बालाइ दोअ्हि रो इन्ता हिका द्याङगेलाइ गाधाको चान चुमपुलि पिहि।
7एम्बालाइ इङको गाधाको चानहेङ इसुकोता चुमाहि, इङको गाधाको चानर्हुता ताइको धाबागेलाइ दाअ्पिहि कालाउ इसु इङको र्हुता धोल्हि। 8हेअ्मि ताइको धाबागेलाइ रो बो हेअ्मि बारिसो ल्हाअ्बा सुदाङ हिका सिङको म्हुम्हुइका दालेङगेलाइ पालतेङ दामाता दाअ्पिहि।#११:८ यहुदिचलनता ताइको मानपालि गोइका द्याङहेङ मान पालाउ एसाङ पाघाखे। 9कालाउ इसुको आगापाहा तेका रो न्हुअ्न्हुअ् लोकालाइ एसा दोअ्तेङ जयपालि पालि तेङहि, “जय ज्याको! धने वा, जाइ परमप्रभुको मिङता लोखे!#ले ११८:२५-२६ 10च्याबास ज्याको, केलाइको आबा दाउदको सारभि लोलि तोम्काहि। वाकोङ सारभिको जय ज्याको। सादेलता हिका परमेस्वरको प्रताप ज्याको!”
11इसु यरुसलेमता लोतेङ थानलिअ्ता दुल्हि। कालाउ वा थानता कोरबितिङ रेसेलि दोकान्हुअ्सो बेलोमनाङ ताइको चात्यागेलाइहेङ चुमतेङ बेथानिया हानेहि।
फल मासेका दुमिरिको सिङ
(मत्ति २१:१८-१९)
12जुम्निदिना ओबालाइ बेथानियासो घुरिलाउ इसु म्हितुहि। 13कालाउ वा आसादुरे एलोङ चाअ्भ्रिका दुमिरिको सिङ तिङतेङ इङकोता फल निनाङका बे दोअ्तेङ हानेहि। कालाउ बुङ इन्ता थुकाकान्हुअ्सो वा सिङको ल्हाअ्बाबिना हाइदोङ मानिङहि, हाइपानु इङको पहर दुमिरिको फल सेका पहरदोङ जेङनाङ मान्थुघाहि। 14कालाउ इसु इङको सिङहेङ दोअ्हि, “एलासो ओसो हासु बुङ नासो फल माचाको।” कालाउ इदोइ दोअ्का वाको चात्यागेलाइ हिङहि।
इसु थानता हानेका
(मत्ति २१:१२-१७; लुका १९:४५-४८; युहन्ना २:१३-२२)
15इसु चात्यागेलाइदोफा आरोङ यरुसलेमता दुल्हि रो थानता हानेहि। वा थानता चोलतेङपिअ्तेङ हिका पाइकारिगेलाइहेङ बाहार ओल्हेपागिल्हि। वा टाका सोकालाइको टेबुलगेलाइ थाल्पिगिल्हि रो पारेउ पिअ्कालाइको दोन्ध्रागेलाइ तुपिगिल्हि। 16वा हासुहेङ हिदोङ चिज थानसो चुमपुलि मापिहि। 17कालाउ इसु बिद्या पितेङ दोअ्हि, “हाइ इसिका लेखेका मान्थु, ‘काङको साअ् गोताङ जात्याको भाअ्सिङ पुकारको साअ् दोअ्न्हावा?’ कालाउ बुङ नेलाइ ते यासेहेङ डाकुगेलाइको आडा बान्हाइका हिसुन्हा।”#यसैया ५६:७; यर्मिया ७:११ 18इदोइ काथा हिङतेङ मुल धामिगेलाइ रो धरममास्टरगेलाइ इसुहेङ सेअ्लि जुक्ति भोलि तेङहि। हाइदोनु एम्बालाइ वाकोदोफा थिघाखे रो झाराङ द्याङगेलाइ वाको बिद्याता भारभुसाइघाखे। 19दिलिमा जेङलाउ इसु ताइको चात्यागेलाइदोफाङ यरुसलेम पुरसो ओल्हितेङ हानेहि।
दुमिरिको सिङसो बिद्या
(मत्ति २१:२०-२२)
20जुम्निदिना एर्हिमाङ इन्तासो लाम्फाकोङ दामा हानेलाउ ओबालाइ इङको दुमिरिको सिङहेङ जारिसोङ सेङका तिङहि। 21कालाउ पत्रुसहेङ इदोइ फोम लोहि रो वा इसुहेङ दोअ्हि, “मास्टर, खाङ, ना साराप पिका दुमिरिको सिङ ते सेङहि।”
22इसु एम्बालाइहेङ दोअ्हि, “परमेस्वरता खान्धुर पासु। 23जातिङको का नेलाइहेङ दोअ्खा, हासुङ ताइको कोन्धाङता आतुइसा बुङ साङखा मापासिङ ताइमिको दोअ्का काथा पोङघाङ दोअ्तेङ खान्धुर पातेङ इदोइ आर्दाङहेङ ‘इतासो उअ्न्हातेङ जाहादिता हुल’ दोअ्नु, वाको भाअ्सिङ इन्सिकाङ ज्यावा।#मत्ति १७:२०; १ कोरिन्थि १३:२ 24इदोइभाअ्सिङ का नेलाइहेङ दोअ्खा, नेलाइ पुकार पातेङ जे र्हेसुखेना, इङको का निङहोइका दोअ्तेङ खान्धुर पासु रो इङको नेलाइको ज्यावा। 25जेलाउ नेलाइ पुकार पालि जाअ्स्वाना, हासुङको खिलापता नेलाइको हाइ हि पानु माफ पिसु। कालाउ सादेलता हिका नेलाइको आबा बुङ नेलाइको कुकरम माफ पाप्याको।#मत्ति ६:१४-१५ 26[कालाउ बुङ माफ मापानु, सादेलता हिका नेलाइको आबा बुङ नेलाइको कुकरमगेलाइ माफ मापाप्यावा।”]#११:२६ इदोइ दारजा आधे पुर्ना स्रोत बाइबलता मान्थु।
इसुको खाबराबारे हिअ्का
(मत्ति २१:२३-२७; लुका २०:१-८)
27इसु ताइको चात्यागेलाइदोफा आरोङ यरुसलेमता लोहि। कालाउ वा थानता इसोउसो हिगिल्लाउ मुल धामिगेलाइ, धरममास्टरगेलाइ रो आगुवागेलाइ वाकोता लोहि। 28एम्बालाइ वासेहेङ हिअ्हि, “हिदोइ खाबरासो ना इदोइ कामगेलाइ पाखेना? इदोइ कामगेलाइ पाका खाबारा नासेहेङ हासु पिहि?” 29इसु एम्बालाइहेङ दोअ्हि, “का नेलाइहेङ एलोङ काथा हिअ्ताङका, नेलाइ इङकोको जावाफ पिसु, हिदोइ खाबारासो का इदोइ काम पाखा, इङको नेलाइहेङ दोअ्ताङका। 30ते दोअ्सु, युहन्नाको पिका चिभुअ्लि सादेलसो ना द्याङसो?” 31इदोइ हिङतेङ एम्बालाइ एसा दोअ्तेङ ताताइमिता बहस पालि तेङहि, “सादेलसो दोअ्ताङ पानु नेलाइ वासेहेङ हाइपालि खान्धुर मापासुन्हा?” दोअ्तेङ वा दोअ्तावा। 32द्याङपाहासो दोअ्ताङ पानु हेसापा दोअ्लि? एसा दोअ्लि एम्बालाइ थिहि। हाइपानु झाराङ युहन्नाहेङ आगाधुइका दोअ्तेङ मानिघाखे।
33कालाउ एम्बालाइ इसुहेङ दोअ्हि, “केलाइ मागिन्हाखे।”
इसु एम्बालाइहेङ दोअ्हि, “का बुङ हिदोइ खाबारासो इदोइ काम पाखा, इङको नेलाइहेङ मादोअ्ताङका।”
Currently Selected:
मर्कुस 11: DHIM
Highlight
Share
ਕਾਪੀ।
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.