Muuduko 8
8
Buuru'allako tov aiyo'nugwoloka tovinokwono
1Toro te Noowaike'aro yiuwi'nokai ibesa'aiyo allu kuulolo kuulludaiyorodeyo oo wiyorodeyo toorogai'aro tooro sip toollu aulomwalopo tooraino Gooti tool kuudo miyallulo'gwonokarogano. Toro tooro sip toollu kuuno kuulomwalodopure toga Gooti tool dolo bwotonyo puruv aiyowomno amoropiyabokaikono. Toro te dolo tov ino ino sumaiyokwe wonyo buugo tov aiyo'nugwolokakwono. 2Aki toro toga wonyo kwako akavida'ai sulowilovaboka tovi kuullukurokaikono. Aki sulugumdo tomuuda'ai wonyo kuvi kuruv kuullukurokaikono. Toro kuullukuroka toga buuruko tov avomuudodavokakwono. 3Toro povomuudoda'mno sumaiyokwe wonyo buugo tov kaveno kaveno kiyo'nugwoloduke tov 150 iruko tobuul kuuwolo'nokakwono. 4Toro uuwolo'nyuno sumaiyokwe lobako naba 7 toolluro iruko 17 toga sip tool muumuudo pwollu muunyu toru kwolarokaikono. Muumuudo su toolluno yovo tov Aroratolekono. 5Toro te sip tool toro wola'no sumaiyokwe wonyo buugo tov kuuno kiyo'nugwolno kiyo'nugwolno sumaiyokwe toga lobako naba 10 toolluro iruko muudu'nodo tollugwoji muumuudo tooro kuu'maiyo toru'no salugunoporogano. Muumuudo tooravuro yiuno mido'bwoka ton kuu'maiyo toru'no salugunoporogano.
6Toro salugunopo toga Noowal sip toollu 40-pela iruko pubuuke'aro mwalno sumaiyokwe toga widoo me'no sokwollosungiko tovi ausokaikono. 7Toro kuusuno sumaiyokwe doka'yadomwoto dugubunyo pwollu amogalapiyokaikono. Toro amogalapiyoka tool yiuwi'nokai tomuu plovomolluno plovomolluno sumaiyokwe sip toollomno aikomgu mabokaikono. Toro tool wonyo buugo tov aiyo'nopiyoneyokwe tovino sogwollo kinodowo avlovomollajukekono. 8Aki toruda'ai lukomgu Noowal wonyo buugo tov me'no aiyo'nopimoka'mdukoneyokwe tovino wonomollo'mo tov dokato sobuuro pwollu amogalapiyokaikono. 9Toro amogalapiyoka tool plovomolluno plovomolluno sumaiyokwe wonyo buugo tov yiuwi'nokai kwako tovi aiyowomno kuuno wo'duke tovino tov dokato sobuuro su tool gami nomwallo'mo puruv nonaguto imo'no'no sip toollomno aikomgu abokaikono. Toro aboka toollu Noowal galomaro'no sip toollu anakuuto tomuu amokaulokaikono. 10Toro galomokaulno sumaiyokwe toga iruko pubuul sogwollo ainokaikono. Toro tool 7-pela iruko tobuul me'no kuuwolo'noka toga dokato sobuuro toollu aki aiko te abilomogalopiyokaikono. 11Dokato sobuuro su tool plovomolluno sumaiyokwe sulato toga sip toollomno aikomgu abokaikono. Toro bino sumaiyokwe iko oolip toolluro ikoulo tokwe amulomdu'bworomokabokaikono. Toro tovi Noowal wonyuno sumaiyokwe kuudo saurokaikono. Oo wonyo tov me'no deyo'nopigiyo. Kuudo saurokaikono. 12Toro kuudo yau'no sumaiyokwe aki aiko te iruko pubuuke'aro sogwollo ainokaikono. Toro tool 7-pela iruko tobuul me'no kuuwolo'noka toga dokato sobuuro avalo toollu aki aiko te amogalapiyokaikono. Toro amogalapiyoka toga'no'gwowi dokato tool aikomgu mabo'no yiunokuudo avlavokaikono.
13To'no'gwowi Noowal 601 kworomokwe tool mwaloduke toga lobako naba 1 toolluro iruko muudu'nodo tollugwoji wonyo tov kwako tovi kiyo'nugwoloduke toga Noowal sip toolluro ajulmdo tov amouropiyokaikono. Toro mouropino sumaiyokwe kwako tov yaluko aiyo mujolmawoduke tovi kwonokaikono. 14Toro wonyuno sumaiyokwe toga lobako naba 2 toolluro iruko 27 tollugwoji kwako tov aiyowomno yaluko yiunokuudo ailopiyokakwono.
15Toruda'ai Gooti tool Noowallu kuuguudo tov aro amadokaikono. 16“Gumi abolo tokwe'aro gumi muugunyo toorogai'aro kemoro abolo togai'aro togaikul sip toolluda'ai bolokwilo. 17Toro te kevu abolokuupi toga yiuwi'nokai aiyokwe mwalodupudo kworogai'aro bomokalokwono. Yiuwi'nokai dokato toorogai'aro ibesa'aiyo allu kuulo toorogai'aro kwako tovi mworogu'nomollodupudo kworogai'aro toorai bomokalokwono. Toro tooro taiyo bwotonyago mulejai'nopi yiuwi'nokai kwako akavi aiyowomno yo'mowopipureyokweyo'mo guu bomokalokwono.” Kuuguudo toro amadokaikono. 18Toro te Noowal gami abolo tokwe'aro muugunyo toorogai'aro kemoro abolo togai'aro ton abolokwopogano. 19Aki yiuwi'nokai ibesa'aiyo allu kuulolo toorogai'aro kwako tovi mworogu'nomollodupudo kworogai'aro dokato yovodolobunyo go'no go'nodo toorogai'aro yiuwi'nokai su ton kemi aval'no kula'noka togai i'bwo'no'mno sip toolluda'ai abolokwopogano.
Noowal Gooti Yawellu wiyo'mo suroudapiyoka tovinokwono
20Toruda'ai Noowal sulo pun malluno sumaiyokwe Gooti Yawellu wiroudapiyo'moneyokwe dukwagupto puruv aluvogilo'melokaikono. Toro tool yiuwi'nokai ibesa'aiyo toorogai'aro dokato toorogai'aro kumakomaiyo yiuwi'nokai sugudo su tooraida'ai pwolno pwolno maro'no aromiroudapiyokaikono. 21Toro romiroudapiyoduke tovida'ai wobeya sudo tov Gooti Yawellu kuunokakwono. Toro kuunoka tovino Gooti Yawel gami poowokalago kuunodo tokwe aro sajunokaikono. “A'mwo abolo ton ma'no ma'no yodopure kunyu kuruv nuu aki aiko te kwako akavi kaiyako migolmonyugono. Yiuwi'nokai a'mwo abolo ton kwolaiyo taiyo kula'nyo mwalodopure togada'ai ma'no ma'no pasudo tovi mujumelabopudogano. Toro kuvi kuruv yiuwi'nokai aiyo amwalopo tonyu kaiyako amollounapiyo to'busuko kubalno aki aiko te mamollounapimonyugono.” Sajunokaikono. 22Toro yajunyuno sumaiyokwe aro adokaikono. “Kwako akav kuuno mujo'movla'mdowo'jure toga wosamuju'womdo kuujo'mo togake'aro wosamujuko kuto mulomallo'mo togake'aro toval nooronokwono. Aki lukuu'wuulo togake'aro atamwuulo togake'aro toval nooronokwono. Aki kuuloulo togake'aro modoga togake'aro toval nooronokwono. Aki iruko togake'aro surakuuto togake'aro toval nooronokwono. Yiuwi'nokai su ton kwako akavi yiunokuudo mujumo'nugovla'mwalpinogano.” Gooti Yawel toro adokaikono.
Currently Selected:
Muuduko 8: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida