Muuduko 7
7
Buuru'allako bwotonyo tov abu'duvolomaroka tovinokwono
1Toruda'ai Gooti Yawel Noowallu aro kuudokaikono. “Nuu yiuwi'nokai a'mwo abolo amwakopo tonyu wonodum yiuno guu judo tookuno sugudo agwonadokwono. Toro te aga gumi yiuwi'nokai julkwolaiyo togai'aro tonumdotekul sip toollu douloulo. 2-3Aki yiuwi'nokai ibesa'aiyo kumakomaiyo sugudo tooraida'ai 7-pela kwolo toorogai'aro 7-pela abolo togai'aro togai neya domokaulawono. Aki dokato kworo kuruv yiunokuudo nobolpiyokweyo'mo yovodolobunyo go'no go'nodo tooravuro 7-pela kwolo toorogai'aro 7-pela abolo togai'aro togai neya domokaulawono. Toro kuvi kuruv yiuwi'nokai ibesa'aiyo kumakokwe tooraida'ai to'gwowi yiuno kwoleke abolokwe piyaulno piyaulno neya domokaulawono. Toro amokaulabi su ton lukomgu taiyo aki aiko te nokwo mulojai'nupinorogano.” Kuudokaikono. 4Toro wuujuno sumaiyokwe toga kuudokaikono. “7-pela iruko tobuul me'no bawowo'ji toga nuvu buuruko tov moropiyamonyugono. Buuruko su tov iruko togake'aro surakuuto kugake'aro toga pino pino yowo'ji iruko 40-pela tobuul uuwolo'nonokwono. Toro te moro yiuwi'nokai aiyokwe sokwolloso ton kwako akavi amwakopo tonyu romiyebuuropimonyugono.” Gooti Yawel toro kuudokaikono. 5Toro te Noowal yiuwi'nokai Gooti Yawelluro kuudoka ton kuvinono kuumjunokaikono.
6Noowal 600 kworomo tobuul uuwolo'no'no mwaloduke toga buuru'allako su tov kwako akavi abu'duvolomarokakwono. 7#Mt. 24:38,39; Lk. 17:27Toro te Noowaike'aro gami abolo tokwe'aro gami muugunyo toorogai'aro gami jaiyo togai'aro ton buuru'allako tov nomulegoukuuranekubweyo'jokwe sip toollu aulapogano. 8-9Aki yiuwi'nokai ibesa'aiyo dokato kumakorodeyo oo kumakomaiyorodeyo tooraida'ai kwoleke abolokwe piyaulno piyaulno amaroka tooro sip toollu Noowaike aulapogano. Gooti tool Noowallu me'no kuudoka tomgu'aro kuvinono aulapogano. 10Toruda'ai 7-pela iruko tobuul me'no bawo'no buuru'allako tov kwako akavi aiyowomno abu'duvolomarokakwono.
11 #
2Pt. 3:6
Toro te Noowal 600 kworomokwe tool sip toollu kuulomwaloduke toga allako bwotonyo tov aro sumo'nokakwono. Kwako tovi anakuuto tomuuda'ai wonyo kwokopo ton guureji silowilovabopogano. Aki toro ilowilovabodopure toga sulugumdo tomuuda'ai wonyo kwokopo tonyuro kudo'aiko tov kuusoda'mno sumaiyokwe wonyo bwotonyo tov kwako akavi abwolobu'duvolomarokakwono. Lobako naba 2 toolluro iruko 17 tollugwoji toro sumo'nokakwono. 12Toro te buuruko tov kwako akavi pino pino sumaiyokwe 40-pela iruko surakuuto tobuul avomwalokakwono.
13Buuruko tov toro avomaroka kuunodo tollugwoji Noowaike'aro gamoro abolo tokwe'aro gamoro muugunyo Semol Hamol Jafetol toorogai'aro kemoro abolo togai'aro ton sip toollu aulapogano. 14Aki ibesa'aiyo allu kuulolo toorogai'aro kwako tovi mworogu'nomollodupudo kworogai'aro yiuwi'nokai dokato yovodolobunyo go'no go'nodo toorogai'aro kworo kuruv sip toollu aulaporogano.
15-16Gooti tool Noowallu kuudoka kuvinono yiuwi'nokai aiyo mwalodupudo tooravuro kwolo toorogai'aro abolo togai'aro piyaulno piyaulnodo ton aulomwalopogano. Toro kuulomwalodopure toga Gooti Yawel sip toolluro kudo'aiko tov amallukurokaikono.
17-18Toro kuulomwalodopure toga buuru'allako tov novomwongelaboduke tov 40-pela iruko tobuul kuuwolo'nokakwono. Toro povomwongelabino sumaiyokwe wonyo buugo tov bwotonyo avomwongelokakwono. Toro te sip tool wonyo buugo te muunyu toru boroollo sularokaikono. 19Toro te wonyo buugo tov kuuno povomwongelno sumaiyokwe yiuwi'nokai kwako akavida'ai muumuudo kumi'yago kworai kuruv uuwolovo'no abu'duvolomarokakwono. 20Toro bu'duvoloma'no sumaiyokwe muumuudo toorai 7 mita toru'aro kuuwolovokakwono. 21-22Toro te yiuwi'nokai kwako akavida'ai aiyokwe luvojuru'bworomollodupudo ton wonyo tov amulegoukuurosokarogano. Yiuwi'nokai ibesa'aiyo dokato tooro kuulludaiyorodeyo oo wiyorodeyo toorogai'aro aki yiuwi'nokai a'mwo abolo kugai'aro ton wonyo buugo tov amulegoukuurosoka ton abolopiyopogano. 23Toro te Gooti tool yiuwi'nokai kwako akavi amwallajupo tonyu kaiyako amollounapiyokagano. A'mwo abolo kugai'aro ibesa'aiyo allu kuulolo toorogai'aro kwako tovi mworogu'nomollodupudo kworogai'aro dokato toorogai'aro toorai aromiyebuuropiyokagano. Toro kuvi kuruv Noowalno'gwowi mabolokaikono. Toro tooke'aro yiuwi'nokai sip toollu aulomwalopo togai'aro ton yiuno ilaiyo to'no aulomwalopogano. 24Toro kuulomwalodopure toga wonyo buugo bwotonyo su tov kwako tovi aiyowomno povomwona'no povomwona'no sumaiyokwe 150-pela iruko tobuul kuuwolo'nokakwono.
Currently Selected:
Muuduko 7: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida