Va'Atəŋ 49
49
Yakob tay wəɓuh sit ma sit kirtin kəlaw kiyit sula
1Yakob ayek kirtini, aɓsit na: Məkkalə, vi nənah sukumgən an dədaɗɗa akokum laha.
2«Məkkalə, məprəma, kirtin Yakob,
Məprəm Israyel afukum.
3Ruben, istə Tiz nawa,
gbogboŋ nawa, ətəŋ na gərom nawa,
də offo kənani, də gbogboŋ kənani.
4Kəputkur va iŋkile məzugəbəɗaŋ ɓa!
Adan kəpeŋgik aka zəga nawvoŋ na afuko,
kərnokonək zəga nawvoŋ an asan akani.
5Simeyon də Levi məlməni,
Əsap net ka zəga nawgay yi.
6Nəŋger na əzzaw a təki ətawanwən net ɓa,
megenegenew ade na addəv ətawanwən net ɓa;
vi addəv makra net abayan ɗəfa
ka nanneken zit abəlnən zlozloŋgboŋ medgeɗge.
7Əray dəsan aka makra neti!
Də wətem neti, vi adayka!
Wanuɗeket addəv Yakob,
Wanətəreygit a Israyel.
8Yuda, anoki milmiŋgiɗuk adawɗiyaŋ kiyko.
Vok wadoɗ kiyit məzuzelɗe noko,
kirtin afuk wappu'oŋ aboko.
9 #
ƏŊƊ 24:9; HNH 5:5 Yuda wət ɓoolu kənani,
aw! Sə təki əbaket sluɗe! Kəmili wətuwa
Aktəmək takprani, avoŋguk va ɓoolu,
va ɓoolu mugolun, naway nawsilgən di?
10Zleŋge na məlĩ azar na sə Yuda ɓa,
may zleŋge na əssel sə walaŋ tələn ɓa,
hã gap afən zleŋge adazzan sə Silo,
anan ɗiy adaprəman mani.
11Ndən miynə koro nan aza megezlembirke,
wət koro nan aza zluzluŋgburni,
askoɓuk lukutɗe nan addəv mbazla na megezlembirke,
lukutuk nan addəvit iŋkile na mokkoy na megezlemirke.
12Haran ɗiwɗiwi yi, day ki mbazla na megezlembirke,
slayən babar dayki moŋvo.
13Zabulon a met peheɗ adawsan də gəla.
Ndən zəknan, bəlayɗe nan tahəŋ a mabuzgum,
met meŋge nan go'oy də Sidon.
14Isakar, koro mizilin də sleŋsleŋgin guriɗi yi,
dəziw aweleŋgit mezeŋgeɗ nassa akani.
15Awla na, əffet lewi,
dələv neki yi.
Aɗonzoŋguk kivan nawslan gabal,
asanək sən wəza va balam.
16Dan, watawwən net ɗiy nani
va taka na zeŋvit mə Israyelɗe.
17Dan dəsan dohõ aka tive, barway akat təvak laɓlaɓə,
ndəni nawbəl motokpotokpo təl pəlsa,
ɗəf nakan waskot medeŋgbile.
18Aka wəkõh noki yi, makraw asani Yawe.
19Gad, masapeɗ azzoŋ akan,
nan, wakkpaŋ aket meddirɓe.
20Səna Aser da, səlhã adazzan, peŋ nani yi,
dəndən adaɗɗa məpəpəla net milyeŋge.
21Neftali, mune mugolun dəmani yi
məzuwa kirtin lelewɗe.
22Yosef wəska na wəlaŋga məzuway yi,
wəska na wəlaŋga məzuwa a met iŋkile,
wəska nan hã pakpak aka zlava na dəlva.
23Asilgin sənənək makrani, armaŋgək mama azani,
Migil bəle alpaŋgək dəndəni,
24ya bəle nan asanək ŋgəreŋ ŋgəreŋgi
van dit kirtin van tahəŋ əɗɗaŋ wəza petpeti.
Də gbogboŋ na Maŋgəlva Məzuɓappak na Yakob,
də iya na Məzutaɗa, Gərəm na Israyel,
25Də Maŋgəlva na afuk məzəbbah suko,
Maŋgəlva Məzuɓappak, wazaɓok
də wəzaɓɗe na disiŋ məsəɗəɗə,
də wəzaɓɗe nammba dələvafuŋ məhədəkə,
də wəzaɓ na met bide də an na gəla uwa,
26Wəzaɓ na afuk adayək kiyit
wəzaɓɗe naket mossorgoɗe en na maguwa,
Hã gap wəŋgla net mossorgoɗe en faɗə.
Dəprikeŋ aka ki Yosef,
aka muhur ki ɗəf muwelin səret milmiŋgiɗni.
27Benyamin, kəramuyã yi, ndən bayə, də pummo ndən həmpərə,
də moskoyo, ndən uɗak zəgeɗ en amõhu.»
28Eskis pak mahəlfa na Israyeləŋ kəlaw kiyit sula. Zəgeɗis efit anah siti, naway pak, də wəzaɓ nan, gala adawɓuh sit ma.
Əmta na Yakob
29Yaŋ aɗi sit wəna, amna: «Naw an nəmtəka, kəndəkwəngən azet afiŋgiɗwa, addəv bətəŋ na guli ana Efron mə Hitti da, 30#VAA 23:3-20a bətəŋ naddəv guli a Makpela haran ta' aka Mamre aka dələv na Kana'an, məs Abraham albah səva Efron, mə Hitti, ka na magamasə. 31#VAA 25:9,10 VAA 35:29Adaki məndik may Abraham dət Sara, guluk nani, adaki məndik may Isak dət Rebeka, guluk nani, adaki nəndəkət Le'a. 32Guli də bətəŋ naddəvənəŋ səvet kirtin Het məlbəhən.» 33#WNM 7:15Yakob asəɓ sit kirtin gərakə, ndən tələn hãs aka zəga nawvoŋ nan seki, ndən zam, sap azet ɗiy nani.
Currently Selected:
Va'Atəŋ 49: GB
Highlight
Share
ਕਾਪੀ।
Want to have your highlights saved across all your devices? Sign up or sign in
All right reserved