Va'Atəŋ 48
48
Yakob aɓohuk ma sit kirtin Yosef
1Dərɓeget wənɗes na, mənah səni Yosef na: «Afuk gbəgba'i yaŋka.» Agimik kirtin sula Manase də Efrayim dəndəni. 2Məprəman sən Yakob na: «Yosef wutuk yaŋ adek azoko.» Israyel asokuk zən asilik ɗew aka zəga nawvoŋ nani. 3#VAA 28:13,14Yakob anah sən Yosef na: «Maŋgəlva Məzuɓappak arbanək zən azaw a Luz aka dələv na Kana'an, azaɓawəka. 4Anah su na: “In yakəŋ əkkpoŋgok məzuwa Wanəwok kuɗiskuɗisi wanəkkpaŋgok ka vanday, wanəpsən dələv sən zeŋvuk dərɓogok ka nan faɗə.”» 5Ya kakaŋ na: «Kirtuk sula muwə suk a Eziptə, tak nədegən azok a Eziptəŋ nawəŋgə. Efrayim də Manase wassoŋ suwən va may Ruben də Simeyon. 6Kirin en kəwə dərɓeget hara na, nokuŋgə, net warahaŋ hara əzəmgəla net a gəlet milmigiɗti. 7#VAA 35:16-19Naw pay nəde sə Paddan na, Rakel təmtə azaw aka tive addəv dələv na Kana'an faraɗay nawgap a Efrat ɓa. Nəndəkət adak a Efrat aka dələv na Bet-lehem.» 8Adan Israyel awle kirtin Yosef, amna: «May nawaŋ eŋdi?» 9Yosef azlan sən afən na: «Kirin məs Maŋgəlva avay aŋkəŋ.» Amna: «Azergit su go'o aŋɗa, nəɓuh sitgən ma.»
10Hara Israyel avu'uk sən wəzva, awɓap ula ɓa. Azergit azani, Allemik a makran kərrəmə. 11Yaŋ Israyel anah sən Yosef na: «Nəɗɗum ɗah nawla horok ɓa, yaŋ Maŋgəlva arban su zeŋvuko!» 12Yosef agilgit sə walaŋ təl afəni, appu'u afuŋgu. 13Yosef andek sulegiti, Efrayim dəka van dəzəŋ, aka zlaɓay na Israyel, Manase, dəka zlaɓay, aka dəzəŋ na Israyel. Azargitik azani. 14Israyel atələk van dəzəŋ aɗiy aka Efrayim ndəni sawa, van zlaɓay aka Manase. Aklakanək vani, vi Manase yi Tizi. 15Aɓuhma sən Yosef amna:
«Maŋgəlva məs afiŋgiɗu, Abraham də Isak adawaŋ abani,
Maŋgəlva məs dətaɗu səza məwu hã gap dəpaŋkəŋka,
16Maslay məs dəbitu səza mambray pakə,
dəzeɓet kirniŋki,
viyti, kawyani iya nawa
də an net afiŋgiɗu, Abraham də Isak,
duwanən kiyit kuɗiskuɗis addəv dələvəŋka.»
17Yosef dula na afən aɗiyək van dəzəŋ aka Efrayim, dənan nek ɓa. Ndən va afən kãw ərman akkpaŋgan səka ki Efrayim aka Manase. 18Yosef aɓsən afən na: «Vaski ɓa əbba, vi aŋki yi daya. Aɗi vok dəzəŋ akani.» 19Yaŋ afən aɓoŋgu, amna: «Nəsənka wətuwa. Nəsənka nan pak wawan ɗəf titir diyɗa, nan pak wakkpaŋ metiŋgini. Hara kan na, məlmən an sawa waday kini, zeŋvini vandayɗe.»
20 #
IBR 11:21
Aɓuh sitik ma dəpas dawnəh na: «Də iya nokum iyi, Israyel adawɓuh ma də wənah na: Maŋgəlva dəɗiyuk va Efrayim gəm va Manase!» Vaski Yakob aɗi Efrayim daabəŋ ki Manase. 21Israyel aɓsən Yosef na: «Yaŋ na, naw wanəmtə, Maŋgəlva wasan də mənokum, wamndogokum aka dələv net afiŋgiɗkum. 22Naw, in tat əpsuk Sikem, haran an dəday ki an net milmiŋgiɗko, məs nəmõh səvet mə Amorɗe də masalam gəm bəle nawa.»
Currently Selected:
Va'Atəŋ 48: GB
Highlight
Share
ਕਾਪੀ।
Want to have your highlights saved across all your devices? Sign up or sign in
All right reserved