Matyu 7
7
Ma itawade osep leklou kovok
(Luk 6.37-38 e Luk 6.41-42)
1E Yesus wai blang langane. “Umawade osep leklou urok elio kovok e Ida Tapolngon ma wade lumu elio kovok. 2Ida Tapolngon ma wade umu eriar langka umawade osep leklou. Elio ka umedidie e umawade isak ma Ida Tapolngon didi elio tonari e wade umu ine blang. 3Ina lange amkaranga amvati wan daudeng langka group ke gute silang bitna e amkaranga amvati wan langka akai palma omba ka dong ke emtem kovok? 4Langka wan langka akai palma omba dong ke emtem ina lange amwai ke supmu langane? ‘Ma ngapi group ka dong ke emtem.’ E dau emile wan langka akai palma omba dong ke emtem kovok. 5Wom gute yakngan ina. Wan ka itau langane. Mgo empi akai palma omba ke emtem deka amkaranga amvati malak ma empi group ka dong ke gute silang bitna.”
6“Umakar wan ka umerere Ida Tapolngon ila wan la ke gemle kovok. Ma tibauluk e tingen umu vala. E umatapre bis ka itau lokono e ka urok klingen omba la ke ovar kovok. Ovar kamsak ma tipes isak ke taklak vala.”
Aling aling itawai itau ke Ida Tapolngon
(Luk 11.9-13)
7“Umepmi Ida Tapolngon ke wan e ma iye kare ke umu. Umekrim ke wan e ma umapadoe. Lupmu tinopolpol ke ekreng bitna e ma Ida Tapolngon kloke ke umu. 8Kesua gute ka pmi ke wan ma due wan ka iye pmi ine e gute ka krim wan ma pado wan tonari e gute ka limla nopolpol ke ekreng bitna ma ekreng bitna noklok ke iye.”
9“Langka titopmu kene sa-panga due e iye pmi umu ke bret ma umakar opmu ke iye? 10Koke langka iye pmi umu ke lodu ma umakar mota ke iye? Aurou. 11Lumu elio soulu e dau umakar wan itau ke titopmu. E Pmomu ka dong ke omur heven ma iye kar wan itau ke osep ka tipmi iye ine.”
12“Umodue elio itau ke osep langka umawaiki tidue elio itau ke umu. Elio tonari Moses ila sogongon e osep napaprangan ina urok sogongon lana ine.”
Ma itesep ke ekreng bitna ka daudeng
(Luk 13.24)
13“Umesep ke ekreng bitna ka daudeng. Kesua ekreng bitna ka la ke omur agegeng ina omba e ekreng ke omur tonari ina op omba e osep tilila ine molil molil. E osep pula tididi ekreng tonari. 14E ekreng bitna ka mosongon ina daudeng lokono e ekreng are engil lokono ma itedidie. E osep awal boto vala tididie.”
Itaplau ite itau ke osep napaprangan yakngan ina
(Luk 6.43-44 e Luk 13.25-27)
15“Umaplau umu itau ke osep napaprangan yakngan ina. Tiwaiki osep aitno lisak mter urok elio molil molil langka sipsip e dau isak langka gemle kevena ka tiwaiki tingen wan. 16Umavati urok elio e umakaranga umeile isak osep napaprangan yakngan ina. Aitno lumu lange? Osep tivu galou wain toru ine ke galou marak? Koke tivu akai fik otna ke dipil? Aurou. 17Akai ka itau usu akai otna ka itau e akai ka sasi usu akai otna ka sasi. 18Akai ka sasi karanga usu akai otna ka itau kovok e akai ka itau karanga usu akai otna ka sasi kovok. 19Osep ma tiblou akai ka usu otna ka sasi e tiurie ke eiou ma eiou ngene. 20Umakaranga umeile osep napaprangan yakngan ina kesua umavati urok elio soulu ka tidue.”
21“Aitno lumu mter langane kovok. Osep keniye ka tisir ngong Ipem Puda ma tisep ke omur heven ka Ida Tapolngon plaue. Aurou. Osep ka tini Livou ka dong ke omur heven vala ma tisepe. 22Ke oklou ka Ida Tapolngon wade osep urok elio ine osep pula ma tisir ngong Urok Puda. E ma tiwai langane. ‘Imanapapra ke angain wom e imasapir angelo soulu ke osep ke angain wom e imodue elio arit ina pula ke angain wom.’ 23E ma ngawai ke isak langane. ‘Ngaile umu kovok. Umu osep soulu bitna e ngawaiki ngavati umu kovok. Umala.’”
Pelengon ano ke ninu ina uringen
(Luk 6.47-49)
24“Gute sei ka klingen lou pelengon e inie iye langka gute ka ile omur itau deka yas taklak e uri ila ninu ke opmu ma ninu dong dagar. 25E aragu nagaluvia duru e aki song e engen dagar ipu ninu tonari. E ninu dong e dardar kovok kesua ninu batne dong ke omur ka dagar. 26E gute ka klingen lou pelengon e inie kovok iye langka gute ka kaka ka uri ila ninu ke lavu vala. 27Aragu nagaluvia duru e aki song e engen dagar ipu ninu deka ninu dardar e polou sasi lokono.”
28Yesus parere osep yagos e osep tidigrik e aitno lisak mter pula ke ila parerengen. 29Kesua iye parere isak langka urok osep ka tiparere isak ke Moses ila sogongon kovok. Aurou. Iye parere isak langka gute ka arit dong ke ila parerengen.
Currently Selected:
Matyu 7: ANT
Highlight
Share
Copy
Want to have your highlights saved across all your devices? Sign up or sign in
copyright 2003 New Tribes Mission, Sanford, FL 32771