Luka 21
21
Ukufima kwamwanachi mufwilwe umulume
(Marko 12:41-44)
1Yesu alolechesya kuno awachindame wasumbilanga ivyawila vyawo muchisengulilo chamung'anda yakwe Leza, 2anyoka alola umwanachi musaluke umufwilwe umulume wasumbila utumakopala tutichi tuwili mwenemo. 3Ati, Nkuwanena ichipumapuma nkuti, Umwanachinye wee umusaluke umufwilwe umulume wasumbila walusya wonsinye. 4Amuno wanji weni wasumbizile ivyawila vyawo ukulingana nukutavuzya kwansawo yawo; ukuwa weni, kukusowelwa kwakwe, wasumbila vyonsi vino ali navyo.
Yesu avwanga ivyakumungolwa kwang'anda yakwe Leza.
(Mateyu 24:1-2; Marko 13:1-2)
5Wamwi awakwe woliwo wavwanganga ivyakuyemba kwang'anda yakwe Leza nivyamawe mazima nkani yano wazenjezile nga nivyawila vino wafimile kwe Leza. Yesu ati, 6ivintunye vyoo vino mukulola impindi iliyiza pano kutalisyala iwe nanti lyonga lino liliyimilila piwuye; yonsinye-pyu yalisumbwa pansi.
Ukuyimba namatamyo
(Mateyu 24:3-14; Marko 13:3-13)
7Awamuwuzya awati, Musambilizya, ngafwandi vyonye-vyoo vilipona wandachi? Nga ichimanyilo chiliwa achimanyilo-chi pano vyovyonye vilipona?
8Yesu ati, Chenjelanji alyakuti wumwi atize awasovye. Amuno awavule waliwakwizila mwizina lyane wawati, Neweliwe! nkuti, Nimpindinye yapalamila! Mutize muwawakonka. 9Ndimwiza mwivwa isumo nimbilikiti; mutize mwize mufwe ichipafi; amuno ivintunye vyoo vilila vile vitalichile vipone, ukuwa insilo ililanga ichili.
10Alandalila nukuvwanga ati, Imyiko iliwasambuchilana, namawufumu yalivundumuchilana. 11Kuliwa ivizumanzi vikulu, nivinkumbili, nivifwanga nga konsinye; kulipona ivintu viwipe ivikulu vifume mupela. 12Vilila pano ivintunye vyoo vitani vipone, muliwalemwa awawayimvya; wawapanzya mung'anda zyakupepela; wawatwale mung'anda zyavingololo; nukuwatwala kuzyamfumu nakwewakapanzya muno alizina lyane. 13Lonye-loo aluli luliwa alongo lwinu ukuti muwawizya Ilandwe Zima. 14Manyani chonye-choo lyankani mutize mwize mupechele muti ngatwaya yichinjilila wuli; 15amuno ndiwapa amazwi namano yano awalwani winu watalifungula chimwi nanti akukana chino mwavwanga. 16Ukuwa muliwalemekwa nawakwasi winu, nawanyonko, ninko zinu, niviwuza; wamwi awapakwe mwemwe walikomwa. 17Wonsinye waliwapata muno alizina lyane. 18Ukuwa nanti alunyele lwakumitwe yinu lutalisowela. 19Simpisyanji, amuno mwakwe chonye-choo mulitulila uwumi winu.
Yesu avwanga ivyakumongolwa kwakwe Yerusalemu
(Mateyu 24:15-21; Marko 13:14-19)
20Ndimwiza mwalola Yerusalemu waliwilizwa nimisika, paponye apano mwize mumanye muti ukulowa kwakwe Yerusalemu kwapalamila. 21Apano mwize muleke wane wali mwe Yuda wize wasamalile mumyamba; nawano wali mukaya mukasi mwize muleke wafume, nawano wayile mulonde watize winjile mukaya. 22Amuno yanye-yaa ayali manda yakusundilwa, alyakuti Amawaliko Matele yonsi yafiswe. 23Akalanda kasikolo kuwanachi wane walilanga wali napanji, nawano wakonsya! Akalanda kasikolo nukuyimba kuno kulipona munsi, nuwukali wakwe Leza wuliponela awantunye waa. 24Wamwi walikomwa nizyampanga, wamwi wawe antapwa wasasizwe munsi zyonsi; amakandi yaliwalyatanjila Yerusalemu isuke impindi yawo ifike.
Ukwiza kwa Mwana Muntu
(Mateyu 24:29-31; Marko 13:24-27)
25ivimanyilo viliwa mwilanzi, namumwezi, namuntanda. Insi zyonsi ziliwaluwaluwa, intete ziwaleme kukupoma kwakwe sumbi nukupunka kwamang'wimbi. 26Awantu waliwayifwila ichipafi pano wakulindilila vino viliwapona munsi; amaka yamulwelele yaliyinganwa yafume muno yikala. 27Apano mulilola Umwana Muntu akwiza, mwiwingo namaka nuwukankala. 28Ndivintunye vyoo viza vyatalika ukupona, mwize mwimilile mwinuke nukwinuka amuno itulwa linu lilitela lyapalamila.
Isambilizyo lyamukunyu
(Mateyu 24:32-35; Marko 13:28-31)
29Ngapano Yesu awumila umulumbenye woo ati, Yizukani imikunyu nimiti yinji yonsi. 30Mukula mwalola pano yafundika amumanyanganye amuti aminjililo yapalamila, 31Awuliwonganye, ndimwiza mwalola ivintunye vyoo vyati aviwapona, mwize mumanyangenye muti Uwufumu wakwe Leza wananenchela ukwiza,
32Yizukani choo! ivintunye vyoo vyonsi vilipona pane inkulonye yao itani ilowe. 33Iyulu ninsi vilizimanjika; ukuwa amazwi yane yalilandila.
Pampukanji
34Yisunganji! Mutize muwavindwa nukulya nukung'wa kwakuyitopwa, nukutezela uwumi wampindinye yoo, wutize nche uwandanye wowo wize wuwiwuchizye. 35Amuno avino chiliponela wonsi awamunsi ngati achipingo. 36Mwenji lolelanji mbali nukupepa amanda nuwinji alyakuti muwe namaka mwize mupusuke kuvintunye vyoo vyonsi vino vilipona, ngamwize mwimilile pankolelo pa Mwana Muntu.
37Mumandanye yayo Yesu wasambilizyanga mung'anda yakwe Leza penye, kwalanga ndikwila aya kumwamba wamingungu akuno aya alala. 38Awantu wonsi walawilanga kung'anda yakwe Leza mwepwi kukumwivwa.
Currently Selected:
Luka 21: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
