Luka 20
20
Iwuzyo kuvyamaka yakwe Yesu yano wawombelanga ivintu
(Mateyu 21:23-27; Marko 11:27-33)
1Wanda wumwi pano Yesu wasambilizyanga awantu mbali nukuwizya Ilandwe Zima mung'anda yakwe Leza, wasimapepo wakulu nawasambilizya wamasundo, apaliponga nawasongo, awaya 2awamunena awati, Tunene, Nga amaka-chi yano ukuchitila ivintunye vyoo? Ngaweni wakupa amaka yaa?
3Yesu awatolelela ati, Aleni, kantele nani mbawuzye iwuzyo twivwe. Nenani, 4wuzye amaka yano Yohani wabatizizyanga yafumile kwe Leza pamwi kuwantu? 5Imipanzi ikatuka mwakwe woliwonye awati, Nga twandi tuti chani? Twala ndi twati, Amaka yafumile kwe Leza, wandi ati, Ngafwandi achani chino mutasuwilizile Yohani? 6Napo ndi twati, Amaka yafumile kuwantu, iwumbanye lyoo lyonsi lyandi litupole namawe, amuno wonsinye wapanichisya kuno Yohani walinji amutumwa. 7Achaleka awatolelela awati, Tutamanyile kuno Yohani wafumizye amaka.
8Ngapano Yesu awanena ati, Nanti anenenye ntamanyile, amaka yano nkuchitila ivintunye vyoo.
Umulumbe wamwenichalo chamiti yavikomwa
(Mateyu 21:33-46; Marko 12:1-12)
9Ngapano Yesu ayumila awantu umulumbanye woo ati, Kwalinji umuntu wino walimile ichalo chamiti yavikomwa, azumilizyania nawantu ukuti wikale muchalo, wawalya ivyamwenemo wamulipila, apita ayakunji ayikala impindi ntali. 10Ngapano impindi yakukuntula ivikomwa yafichila, atuma umuzya kwewano wasunganga ichalo ukuti wakamupe ivikomwa vyakwe. Ukuwa awantunye wawo awuma umuzya awamunyosya makasavye. 11Achaleka umwenichalo atuma umuzya winji; nawenye awaya awamuma, awamukwelengula ichiwipewipe, awamunyosya makasavye. 12Anyoka atuma umuzya wachititatu; nawenye awantu wakantu wawo awamuchisa, awamuzukuzila kulonde. 13Ngapano umwenichalo ati, Nganchite wuli? Fwandi kantume umwananenye umukundikwe; weni wandi wakamuchindike! 14Ukuwa walile awantu wakantunye wawo wamulola awanenana awati, Wee amwana wamwenichalo. Tumukome, ngavyonsi visyale avitu! 15Achaleka awamuzukuzila kulonde awamukoma.
Ngapano Yesu awuzya ati, Ngafwandi umwenichalonye chocho ichavikomwa vino wakasuta ipala alichita awantunye wawo chani? 16Alikoma awantunye wawo aleke wanji wikale muchalonye chocho.
Awala awantu wivwa wowonye awati, Asi avino chili!
17Yesu awalolechesya ati, Ngafwandi, Amawaliko Matelenye yaa yakasula chani?
Iwe lino wakazenga walikana wati alyavye
lyolyonye alino lyanyosile aliwa aliwe alyenecho,
18Wensi wino wiza waponela piwenye lyolyo alichisika alepunkane; ukuwa ndi iwe liza lyaponela wumwi, lilimusyutungula ngati alitukumbu.
Iwuzyo kuvyamisonko
(Mateyu 22:15-22; Marko 12:13-17)
19Ngapano awasambilizya wamasundo nawasimapepo wakulu awalonda ukuti waleme Yesu paponye nanti kumupulumula, amuno wamanyile kuno wawumizile woliwonye umulumbe; ukuwa awatina awantu. 20Ukuwa awavwamba impindi nzima yino wangamulemela. Awalipa awantu wamwi indalama awaya awakopelezya ngati weni awalungamane, awawatuma ukuyateya Yesu namawuzyo, alyakuti wamulemeke kwewakapanzya nakumulasi.
21Amanengwenye yayo ayanena Yesu ayati, Musambilizya, Twamanya kuno vino ukavwanga avyakusimichila swinya ukasambilizya ichete. Twamanya kuno usipechela muno amiwele yamuntu, ukuwa ukasambilizya ukusimichila kwakwe Leza kuwantu. 22Sale tunene, wuzye chawindwa mwisundo litu ukuti tungasonka imisonko kumfumu yawa Roma, pamwi pole?
23Ukuwa Yesu alola umuchenjelo wawo awanena ati, 24Ndanjizyani ulundalama lutiswe vino luli. Nga ichizyungani champumi nizina vino vilipenepo avyakweni?
Awatolelela awati, Avyamfumu.
25Achaleka Yesu ati, Ee, fwandi panji imfumu vino avyakwe, nivyakwe Leza panji Leza.
26Awapotwa ukumulemenchezya pa. wantu, awamyalala-mya, awazunguka itolelelo lino wawatolelezile.
Iwuzyo kuvyakuzyulupuka
(Mateyu 22:23-33; Marko 12:18-27)
27AwaSaduki wamwi awaya kwe Yesu (awano watanji kusi ukuzyulupuka kuwafwe). Awamuwuzya awati, 28Musambilizya, Musa watuwalichizile isundonye lyoo ati, Ndi umuntu wafwa wasya umuchi, nanti kwata limwi, umunyina asyala atwala umuchi alyakuti awakwatila wino wafwa awana. 29Kwalinji awang'anda yonga munenulambali; umukulu wawo atwala, afwa nanti kwata. 30Nga uwachitiwili amupyana, 31nuwachitatunye. Achilanga chili wowonye mpaka kuwachitimunenulambali—awafwa nanti kusya ikwata. 32Pakupelelechezya numwanachinye afwa. 33Ale kanonzi, pawanda wuno awafwe wiza wazyulupuka umwanachinye weyo aliwa wemuka weni? Vino wonsinye munenulambali walinji awalume.
34Yesu awatolelela ati, Awonsi nawanachi wankulonye yoo weni wakatwalana; 35ukuwa awonsi nawanachi wano wazipila ukuzyulupuka kuwafwe munkulo yino iliyiza wataliwatwalana. 36Weni wakolana nawangeli watalitela wafwe. Awanakwe Leza, amuno wazyulupuka kumfwa. 37Nu Musa-nye wapanichisizye kuno awafwe wakazyulupulwa kumfwa. Pano ichimpuza chakanga wavwanzile ku Mfumu e Leza ati we Leza wakwe Abrahamu, e Leza wakwe Ayizeki, e Leza wakwe Jekapu. 38Chonye-choo chikusula ukuti we Leza wawawumi, asi we Leza wawafwe, amuno kwakwe weliwe vyonsinye avyawumi.
39Awasambilizya wamasundo wamwi awasimpuka awavwanga awati, Watolelela molimonye, Musambilizya! 40Amuno watalondanga ukumuwuzya iwuzyo limwi swinya.
Iwuzyo kuvyakwe Mesaya
(Mateyu 22:41-46; Marko 12:35-37)
41Yesu awanena ati, Nga chingavwangwa wuli chiti e Mesaya aliwa alikwata lyakwe Davidi? 42Ngavino nu Davidi-nye wavwanzile mwekalata waMalumbo ati,
Imfumu e Leza wanena Imfumu yane wati,
Yikala kwikasa lyane ilyandilo,
43nsuke ndeke awalwani wako wawe awakulyata penepo amatamba yako.
44Ngafwandi vino nu Davidi-nye akumwitanga akuti Mfumu. Ngafwandi Mesaya angawa alikwata lyakwe wuli?
Yesu asochela awasambilizya wamasundo
(Mateyu 23:1-36; Marko 12:38-40)
45Awantu wonsi wayivwilanga pano Yesu wanenanga awasambilizi wakwe akuti, 46Chenjelani nawasambilizya wamasundo, wane wakunda ukupita nimyinjilo mitali, swinya wakunda nukulamukwa numuchinzi mumasyo yakukazizya; swinya wakalonda ukwikala pavilimba vizima mung'anda zyakupepela nukwikala pamasyo masanzame pachakulya chakuyitopwa; 47wakatondowezya awanachi wafwilwe awalume awapoka ing'anda zyawo, ngawayilanjizya namapepo yawo ayamazwi matali. Ukusundwa kwawo kuliwa akwakalanda Owe!
Currently Selected:
Luka 20: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
