Mwamulizo 25
25
U lulelo lunji lwa Abulahamu
(1Zin 1:32-33)
1Nayo Abulahamu yakatola mucekulu yunji litagwa lyakwe Ketula. 2Nayo Ketula yakamulelela Abulahamu wana awa, Zimulani, Yokishani, Medani, Midiyani, Ishibaki na Shuwa. 3Yokishani nayo, yakawalela Sheba na Dedani. Nawo wana wa Dedani wali wo Waashuli, Waletushi ne Wale-yumu. 4Nawo i wana wa Midiyani, wali awa: Efa, Efeli, Hanoki, Abida na Elida. Wawo wo wali wana wa Ketula. 5Nayo Abulahamu yakamuhaza Isaka, sawo yakwe yose. 6Ninga i wana wono wali waleligwe ne wacekulu wanji, awo yakawapela zizawadi du. Hanyuma yakawategula ku yisi ya kucilima, ho wekale kutali kutali na Isaka mwanagwe.
U wufwe no wuzikwe wa Abulahamu
7Abulahamu yekala myaka yigana limonga na makumi mupunghati na mihano. 8Nayo yakafwa lono yali yaweza mukombi muno muno. 9Nawo i wanagwe, Isaka na Ishumayeli, wakamuzika u sogo yawo mu mhango ya ku Makipela, lubavu lwa kucilima lwe Mamule, mu mugunda wono wali wa Efuloni u mwana wa Sohali, Muhiti. 10Abulahamu yali yawugula u mugunda wuwo kuli Wahiti. Kuko ko wazikwa wose, Abulahamu na Sala u mugolece wakwe. 11Kukawa lono Abulahamu yakondya kufwa, u Muwaha Mulungu yakamulugutiza Isaka muno muno. Nayo Isaka yekalaga ku Beli-lahayi-loyi.
I wana wa Ishumayeli
(1Zin 1:28-31)
12Nayo Ishumayeli u mwana wa Abulahamu, mono yalelwa na Hagali Mumisili u mwitumami wa Sala, 13yakalela wana awano, nha vyono winha u wityatye wawo, mu ndelwa yawo. U mwana mulongozi wa Ishumayeli Nebayoti, Kedali, Adibeli, Mibusamu, 14Mishima, Duma, Masa, 15Hadadi, Tema, Yetuli, Nafishi na Kedama. 16Wawo wo wana wa Ishumayeli, wono wali wo mwamulizo we zinghungugo yikumi na nyejete, sunga ne matumbi gawo gono wekalaga, gakacemelwa i matagwa gawo gago. 17Nayo Ishumayeli yakafwa yaficile myaka yigana limonga, na makumi madatu na mupunghati. 18Wawo nawo wo lulelo lwa Ishumayeli, wakekala ku wulawa ku Havila na Shuli, lubavu lwa kucilima ye Misili, hono wukubita ku Ashuli. Nawo wakekala kutali kutali ne wayawo i wana awalya wanji wa Abulahamu.
U wulelwe wa Esawu na Yakobo
19Azi zo ndelo za Isaka, u mwana wa Abulahamu. 20Isaka yali yaficila myaka makumi mane lono yamutolaga Labeka mwana wa Betuyeli, u Muwalami, mulawa ku Mesopotamiya. Nayo Labeka yali yo lumbulye wa Labani. 21Nayo Labeka yali sikalelaga, holeka Isaka yakamulomba u Muwaha Mulungu. Nayo u Muwaha Mulungu yawubocela u wulombe wakwe, nayo Labeka yakadinghula 'nda. 22No muda wuwo, wali wa wana we metundu. I wana wawo wakesumaniza munda ye nyina yawo, lono wakali si nalelwa. Nayo Labeka yakatya, “Ka! Zinghani hono ziwe vyo zinha nhavivi, alu socici nghali mumi?” Labeka yakawa kubita kumuwuza u Muwaha Mulungu.
23Nayo u Muwaha Mulungu yakamutya,
“Munda yako, mogali makungugo mejete,
Nazo zizo zimbeyu zi nyejete zono zolelwa nagwe, zokwitemanuka.
Likungugo linji lyowa na vilungo kuciza liyagwe,
u Muwaha komwitumamila u mudodo.”
24Ne vilo vyakwe vyo kusawa, vikaficila, nayo Labeka yakasawa wana wejete we metundu. 25U mwana mulongozi kulelwa, yali mudunghu, no muwili wakwe wali nha mwenda wo wukunzeje, holeka wakamucemela litagwa lya Esawu. 26Nayo u mwana we kejete, yakalelwa akuno yebatiliye ne cising'anilo co muwahawe Esawu, nayo wakamucemela litagwa lya Yakobo. Nayo Isaka yali yaficila myaka makumi mutandatu, lono i wana wawo wakulelwa.
Esawu yakuwuguza u wulongola wakwe wo kulelwa
27I wana wawo i wejete, wakajendelela kuwiluka. Na Esawu nayo yakawa munghula mu wupelembi, yakawa mwenda kwikala mu nyika. Ninga mwene Yakobo, yakawa munhu mutuvu, kanyhi mwenda kwikala ha kaya. 28Ale, Isaka nayo yakawa yamwendile Esawu muno muno, vyono yalizaga vyo wupelembi wakwe. Nayo Labeka yakamwenda Yakobo. 29Hodu, mwi'zuwa linji, lono Yakobo yatelekaga muhuzi wa nandala, nayo Esawu yali yawuya ku wulawa ku wupelembi wakwe, yali mu nyumba. Ne nzala nayo yikawa yamutama muno muno. 30Yakawa kumunena Yakobo yakatya, “Gwe mwanakwetu Yakobo, nzala yanhama muno nomuyago, holeka dedede, wumhelaje ndigwa yiyo ndunghu nilye.” (Nayo yo soko yono yaleka wakamupela litagwa lya Edomu.)
31Nayo Yakobo yakamupitula yakamutya, “Ane, heya nokupela, ninga hono wamule wunguzize zo wulongola wako wo kulelwa.” 32Nayo Esawu yakapitula yakatya, “Heya viswanu! Hambi ane nha neza behi no kufwa, alu zizo zo wulongola wangu wo kulelwa, waco zonghwila cici'ne?” 33Hodu nayo Yakobo yakamutya Esawu, “Alu wamule wunyilahizize zuwali, nha vyono wandecela u wulongola wako wo kulelwa.” Nayo Esawu, yakawa kumwilahila Yakobo, yakawa kumuguziza Yakobo zo wulongola wakwe wo kulelwa. 34Hodu, Yakobo yakawa kumupela Esawu mukate, hamonga no muhuzi we nandala, nayo Esawu yakawa kulya, yakang'wa, hodu yakawa kutuluka. Na vyo yinha, vyo Esawu yanoza, yakabedegala zo wulongola wakwe wo kulelwa.
Currently Selected:
Mwamulizo 25: LLKWW
Highlight
Share
ਕਾਪੀ।
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.