Mwamulizo 18
18
Abulahamu yakwihuwizizwa kutuga mwana
1U Muwaha Mulungu, yakamulawila Abulahamu lono yali yali ha mibici ye minghola, ya Mamule. Mwene lulo Abulahamu yali yekaye ha mulango we lihema lyakwe mwi'pango lye livuce mu misi mugati. 2Nayo yali yeza kwinula i meso gakwe, yakawawona wanhu wadatu wemile. Nayo yali yeza kuwawona, yakamangha mbela mbela, yakabita kuwabocela. Yakafugama ha mwande yawo, yakenama sunga no wusu wakwe wukapamiza ho hasi, yakatya, 3“Nye nyo walumbwe, hono niwe natuga wuwonelwa lusungu na nyenye, ale mulece kumhulutiza, ane nili baha ho nimwitumamilenyi. 4Nane nomuletelenyi malenga madodo mwizuguze migulu yenyu, mucehe hadodo ahano hasi yo mubici. 5Ne cipango cono mowa mukali mucehile, nane nomuwikanizizenyi ndigwa ndodo mulye, ho mwiwikanize so muhinzo wenyu, vyono munyiziza ane, holeka mulece nimwitumamilenyi.” Nawo wakamutya, “Ale du, witumaje nha vyono wulonjile.”
6Nayo Abulahamu yakawuya mbela mbela kwi'hema lyakwe, yakawa kumulonjela mugolece wakwe Sala yakutya, “Ale, wuwikanize mbela mbela vipimo vidatu vyo wusaje wuswanu, wunoze mikate.” 7Hanyuma mwene Abulahamu, yakawa kwinjila musunho mwi'tewa lye zing'ombe, yakawa kuyihagula ndama monga swanu muno muno yono yijinile, yakawa kumupela mwitumami, nayo yakawa kuyiteleka mbela mbela. 8Abulahamu nayo yakasola tilazi, mele, hamonga na yiyo nyama, yakawatenjela wawo wajenzi ho walye ndigwa, nayo yakema behi nawo ho yawetumamile, lono walizaga baho hasi yo mubici. 9I wajenzi nawo wakamuwuza wakatya, “Alu Sala u mugolece wako yali hayi?” Nayo Abulahamu yakawapitula yakatya, “Sala yali mwi'hema.” 10Yunji muyawo yakatya, “Ane nokuwuyila kanyhi ku mwaka, nha mu madaha gagano, no mugolece wako Sala, kowa yena mwana wa cilume.” Kumbe nayo Sala yakawa yemile ha mulango we lihema kwa kugati yayo yahulicize. 11Nawo wa Abulahamu na mwene Sala, wali weza wakombi, nawo wali wakondya kuficila mu mazika mawaha muno. Nayo Sala i vilo vyakwe vyo mwezi vyali vyakondya kuduma. 12Holeka Sala yali yeza kuzihulika zizo, yakaseka, yakawa kwihwesa mu nhumbula yakwe yakutya, “Alu ane nili mukombi, no mulume wangu nhavivilya nayo mukombi. Alu mbeka yosumika hongo, nane sangalale hamonga no mulume wangu?” 13Baho u Muwaha Mulungu yakamuwuza Abulahamu yakatya, “Alu ku sokoci Sala kaseka, no kwiwuza nha vyono yosumika mbeka kuli mwene yatuje mwana na lono yeza mukombi? 14Alu wule, wukwihwesa hoyili nghani yoyose yono siyisumice hali Muwaha Mulungu? Ale, ane nokuwuyila kanyhi ku mwaka kwinha vivi, no mugolece wako Sala kowa na mwana wa cilume.” 15Ninga Sala vyono yali yenjilwa na woga wuwaha, holeka yakakana yakutya, “Ane sisecile yaye!” Nayo u Muwaha Mulungu yakamutya, “Gwe Sala, wulece kukana! Mbeka kuseka.”
Abulahamu yakulitetela likaya lya Sodoma
16Ale, i wanhu wawalya i wadatu, wakawa kuwuka wakawa kubita hanhu hono henucile, hono wosuma kuliwona viswanu likaya lya Sodoma, nayo Abulahamu yakawa kuwasindiciza. 17U Muwaha Mulungu yakatya, “Si yowa viswanu hono nimuhundice Abulahamu, zinghani zono nohila kuzituma mu vilo vivi. 18Nomunoza mwene Abulahamu yawe yikungugo yiwaha lye vilungo, na muli mwene, i makungugo gose ga mononze golugutizwa. 19Nimuhagula ho yawejize wanagwe hamonga no lulelo lwakwe, wayibate i nzila yangu nene no Muwaha Mulungu, mu wituma ziswanu na zo wiling'ano, nane no Muwaha Mulungu ho nimufisilizize zono namwihuwiza.”
20Nayo Muwaha Mulungu yakajendelela kanyhi kulonga yakatya, “Kuko ku Sodoma na Gomola, kowuli wung'ung'ulice winji muno muno, ku soko yo wusutye wawo vyono wuwaha muno. 21Holeka nane nobita kuko, ho nghewonelele no mweneco, hono mbeka wakwituma nha vyono genha i mang'ung'uliko gono nghugahulika kuli wene, na hono yiwe vyo si yinha, ale nomanya.” 22Na ku wulawilila baho, wanhu wawalya wakawa kutuluka no kubita ku Sodoma. Ninga Abulahamu, yakasigala yemile du hali Mulungu. 23Hanyuma Abulahamu yakasejelela hali Mulungu, yakatya, “Alu mwene mbeka du kosuma kuwongomeza i wanhu waswanu hamonga ne wanhu wabi? 24Na lunji yisumice wawe mowali wanhu waswanu makumi mahano mumo mwi'kaya, alu wule, kosuma kulyongomeza likaya hongo, hamba si kolileka yaye ku soko ye wanhu wawo we makumi mahano wono wali ling'ani? 25Ninga nitumbiye vyono si konoza nhavivyo! Nha cinji wuwawulaje i wanhu waswanu hamonga ne wanhu wabi, wo wutya, i waswanu wanozezwe muling'ano ne wanhu wabi! Aa ng'o! Viswanu kuli muling'anizi we yinze yose kuwituma ling'ani.” 26Nayo u Muwaha Mulungu yakamupitula Abulahamu yakamutya, “Hono niwagane wanhu waswanu makumi mahano kuko ku Sodoma, hodu nolileka likaya yitelevu ku soko ya wawo.”
27Nayo Abulahamu yakatya, “Ane mono sinojeye, kanyhi si nghwiliye kulongana no Mulungu, hambi ane nha nili manghundi na mavu du! 28Na lunji yisumice wawe mowali wanhu waswanu wali makumi mane na wahano du, wono si waficile makumi mahano. Wule, kolyongomeza likaya lyose ku soko vyono wacepuce wanhu wahano?” Nayo Mulungu yakamupitula yakatya, “Aa, ng'o! Sinolyongomeza likaya hono wawe mowali wanhu waswanu makumi mane na wahano.” 29Abulahamu nayo kanyhi yakatya, “Na lunji wowa wanhu waswanu makumi mane du wono wowa wali mumo.” U Muwaha Mulungu nayo yakapitula yakatya, “Ku soko ye wanhu wawo makumi mane i waswanu, sinonoza nhavivyo yaye.” 30Nayo Abulahamu yakacila du kulonga, yakatya, “Gwe Muwaha, nghukunena wulece kusimba, ane nghunena nonje kanyhi. Alu wule, ma, yisolaga lunji wejele mumo wanhu waswanu makumi madatu du.” Nayo Mulungu yakatya, “Sinonoza nhavivyo hono niwagane mumo wawo we makumi madatu.”
31Abulahamu kanyhi yakatya, “Gwe Muwaha, nghukunena wunenele ane mono sinojeye hali'gwe, njendelele kulongana nagwe. Na lunji wokwijela mumo makumi mejete ma?” U Muwaha Mulungu nayo yakatya, “Sinosuma kulyongomeza likaya, hono niwagane mumo makumi mejete.” 32Kanyhi Abulahamu yakatya, “Nghukunena Muwaha, wulece kukolwa ne likuwo, nane nolongana nagwe nghanghulo monga du. Ma na lunji wokwijela wali 'kumi du?” Nayo Mulungu yakatya, “Sinosuma kulyongomeza likaya, hono wejele mumo wali kumi du.” 33Nayo Mulungu yali yeza kukondya kulongana na Abulahamu, hodu yakawa kubita, nayo Abulahamu yakawa kuwuya ku kaya kwakwe.
Currently Selected:
Mwamulizo 18: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.