Mwamulizo 17
17
Calamo, co citanjilo ce cilagane
1Mu vilo vyono Abulamu yali yaficila myaka makumi cenda ne 'cenda, u Muwaha Mulungu yakamulawila, yakamutya, “Ane yo nene mono nili Mulungu u Mudaha Vyose. Holeka agwe wutyatye wutonji wangu du, ho wuwe wusina yilema. 2Nane nonoza cilagane nagwe no kuwinjifya u lulelo lwako.” 3Baho Abulamu yakafugama, yakenama sunga no wusu wakwe wukapamiza ho hasi. Mulungu yakamutya, 4“Nghucinoza i cilagane cicino hamonga nagwe, vyono, agwe kowa sogo we makungugo menji. 5Na ku wulawa lulu, ilitagwa lyako si kocemwa kanyhi Abulamu, langa kocemwa Abulahamu. Hambi ane nha nakondya kukunoza ho wuwe sogo we makungugo menji. 6Nane nokunoza wuwe na ndelo nyinji muno muno. Kanyhi na mu wulawilila muli gwegwe, noganoza makungugo gawe menji, sunga ne watemi wose, wolawilila muli gwegwe.
7“Nane nocikangaza i cilagane cangu nagwe, hamonga no lulelo lwako, hamonga ne zindelo zawo zose cibitilila, vyono ane nowa Mulungu wako hamonga ne zindelo zako cibitilila. 8Nane nokupela gwegwe, hamonga no lulelo lwako, yisi yiyi yono wikaye nha wuli mujenzi, nha cinji yisi yose ya Kanani, yiwe yisi yenyu cibitilila, nane nowa Mulungu wawo.”
9Hanyuma u Muwaha Mulungu yakamulonjela kanyhi Abulahamu yakatya, “Ku lubavu lwako gwegwe go mweneco, kocibata i cilagane cangu, hamonga no lulelo lwako, ne zindelo zawo zose. 10Na aci co cilagane cangu cono wunojeye wucibate no kucikamisa, hagati yangu na gwegwe hamonga no lulelo lwako. Nha cinji, u mulume wowose wa muli'nye yimunojeye yalame. 11Nanye mokwalama, na mu walame wuwo, cowa co citanjilo ce cilagane cangu hagati yangu na nyenye. 12No mwana wo wose we cilume wa muli nyenye, mono yaficila vilo munana, yimunojeye yalame. No munhu wo wose we cilume wa mu zindelo zenyu zose, hamba yawe muwanda, mono yaleleywe mu zinyumba zenyu, hamba yawe mugulwa na sawo ku wulawa kuli wajenzi, 13wose wawo yiwanojeye walame. Na yiyi yo yolajila vyono hocili cilagane hagati yangu na nyenye, i cilagane ce cibitilila. 14No munhu we cilume wo wose mono si yalame, yuyo kokomwa muli wanhu wakwe, vyono kowa yabena i cilagane cangu.”
15U Mulungu yakamulonjela Abulahamu yakatya, “Kuli za Salayi u mugolece wako, ku wulawa lulu, nayo sikocemwa litagwa lyakwe kanyhi Salayi, aa ng'o, langa mwene kocemwa Sala, nane nomulugutiza. 16Ninga hamonga na zizo, mwene Sala, kowa yo nyina we makungugo menji, hamonga ne watemi wolawa muli mwene.” 17Baho Abulahamu, yakafugama, yakenama, sunga no wusu wakwe wukapamiza ho hasi, yakaseka, yakawa kwihwesa mu nhumbula yakwe, “Alu mwene mbeka yosumika mwana yalelwe kuli munhu mukombi nha nene, mono yaficile myaka yigana limonga? Hamba wule, alu mbeka Sala mono yaficila myaka makumi 'cenda, hongo aluno kosuma kutuga mwana?” 18Hodu Abulahamu yakamulonjela Mulungu yakatya, “Yali yiwe yili ciba le, hono wali wulumbe Ishumayeli yawe muhazi wangu.” 19Mulungu nayo yakamutya, “Aa, ng'o Abulahamu! Langa Sala u mugolece wako yo kokulelela mwana we cilume, nagwe komucemela litagwa lya Isaka. Nane, muli mwene Isaka, mo nocikangaziza i cilagane cangu hamonga no lulelo lwakwe, ho ciwe cilagane ca cibitilila.
20“Na kuli za Ishumayeli, nakondya kuwuhulika u wulombe wako. Holeka nayo nomulugutiza, nane nomupela wana wenji, no kuwenjifya muno muno. Nayo Ishumayeli kowa sogo we watemi yikumi na wejete, nane nomunoza yawe yikungugo yiwaha. 21Ninga i cilagane cangu aco langa nocikangaziza muli Isaka du, mono Sala kokulelela nha mu madaha gagano ku mwaka.” 22U Mulungu yali yeza kukondya kuduwana na Abulahamu, hodu yakawa kuwuka. 23Nayo Abulahamu yakawa kuwakonghola hamonga, Ishumayeli mwanagwe, ne wawanda wose we cilume walelelwa mu nyumba yakwe, hamonga na wono wagulwa ne sawo yakwe. Yakawa kuwategula wose ku calamo mwi'zuwa lilyo, nha vyono Mulungu yamulajiliza. 24Nayo Abulahamu mweneco, yalama lono yali yaficila myaka makumi yicenda ne 'cenda. 25No mwanagwe Ishumayeli, nayo yalama lono yali yaficila myaka yikumi na midatu. 26I lizuwa lilyo lyo walamila hamonga Abulahamu na Ishumayeli mwanagwe. 27Na we cilume wose wa mu nyumba yakwe, ne wawanda wose walelelwa mumo mu nyumba yakwe, na wose i wagulwa ne sawo yakwe ku wulawa kuli wajenzi, wose wakalama mwi'zuwa lilyo hamonga na Abulahamu.
Currently Selected:
Mwamulizo 17: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.