चुणिरे चेले रे काम 2

पवित्र आत्मा रा आऊंणा

1एक ध्याड़े जेबे यहूदी लोक पिन्तेकुस्ता रा साजा मनाया करहा ऐं थे, ता सभ विस्वासी भाई यरुस्लेम सैहरा मन्झ कठे हुईरे थे। 2होर अचानक आसमाना ले बड़ी आंधी जेहड़ी अवाज तेस कमरे मन्झ जेथी स्यों बैठिरे थे, फैल्ही गई गया। 3होर तेबे तिन्हारे साम्हणें एक एह्ड़ी आगी री लपटा सुझी, जेसरा रूप जीभा साहीं था, जो बढ़ी किन्हें तिन्हा मन्झा ले हर एक विस्वासिया रे गास आई किन्हें रुकी गई। 4होर स्यों सभ पवित्र आत्मा किन्हें भर्ही गये, होर जिहां पवित्र आत्मे तिन्हा जो बोलणे री सामर्थ दिती, तेता रे मताबक स्यों अनजाण भासा मन्झ बोल्दे लगे।

5होर तेस टैम परमेसरा रा डर मनणे वाले कई यहूदी लोक पैंतीकोस्ता रा साजा बनाणे रे कठे यरुस्लेम सैहरा मन्झ रुकिरे थे, होर स्यों कई लग-लग देसा ले आईरे थे। 6जेबे तिन्हें आंधी जेहड़ी अवाज सुणी ता भीड़ लगी गई होर लोक डरी गये। क्यूंकि हर आपणी-आपणी भासा मन्झ चेलेया जो बोलदे हुए सुणेया करहा था। 7होर स्यों सभ बौह्त हरान हुई किन्हें बोल्दे लगे, देखा, ये जो बोल्या करहा ऐं क्या ये सभ गलील जिल्ले मन्झ रैहणे वाले लोक नी ऐं? 8तेबे ये क्या हुंदा लगिरा कि आस्सा मन्झा ले हर एक आस्सा री मात्र भासा मन्झ इन्हा लोका जो गल्ला बोल्दे सुणेया करहा ऐं। 9आस्से जेह्ड़े पारथी होर मेदी होर इलीमास लोक होर मेसोपोटामिया ईलाके होर यहूदिया ईलाके होर कप्पुदुकीया ईलाके होर पुन्तुस होर आसिया रे ईलाके रैहणे वाले। 10होर आस्से जो फ्रुगिया जिल्ले होर पंफुलिया जिल्ले होर मिस्र देस होर लीबिया देस जो कुरेन सैहरा रे नेडे आ, रहें। होर आस्सा मन्झा ले कई तेथी होर एह्ड़े ऐं जो रोम देसा रे लोक आई किन्हें यरुस्लेमा मन्झ आऊंदे जांदे रैंहयां ऐं। 11क्या यहूदी लोक, होर क्या यहूदी पन्थ धारण करणे वाले, क्रेते टापू मन्झ रैहणे वाले होर अरब देसा रे लोक भी आपणी-आपणी भासा मन्झ इन्हारे मुंहा ले परमेसरा रे बडे-बडे कामा री चरचा सुणहां ऐं। 12होर स्यों सभ हरान हुई गये, होर डरी किन्हें एक दूजे किन्हें बोल्दे लगे कि ये क्या हुएया करहा? 13पर होरिए मजाक करदे हुए बोल्या कि, स्यों ता नंऊँऐं सराबा रे नसे मन्झ चूर ऐं।

पतरसा रा प्रचार

14पतरस तिन्हा ग्यारा चेले साउगी खड़ा हुएया होर जोरा-जोरा किन्हें बोल्दा लग्या कि, हे यहूदिया ईलाके होर यरुस्लेम सैहरा मन्झ रैहणे वालेयो, ये जाणी लऊआ होर कान ल्गाई किन्हें मेरी गल्ला सुणा। 15जेह्ड़ा तुस्से सम्झेया करहा ऐं, ये नसे मन्झ नी ऐं, क्यूंकि हली ता भ्यागा रे नौ बजी रे। 16आस्सा साउगी जो हुआं करहा, ये इधी कठे हुआ जेहड़ी गल्ला परमेसरे योऐल नबी रे ज्रीए बोलिरी से पूरी हो कि,

17परमेसर बोल्हा कि, आखरी ध्याड़े मन्झ एह्ड़ा हूंणां,

कि मां आपणी आत्मा सभ माह्णुंआं पर देणी

होर तुस्सा रे मह्ठे होर मह्ठीया भविस्यवाणी करणी

होर तुस्सा रे जुआना दर्सन देखणे,

होर तुस्सा रे स्याणेया सुपणे देखणे।

18पर मेरे कठे काम करणे वाले हर जन्नानी होर मर्धा जो

तिन्हा ध्याड़े मन्झ आपणी आत्मा देणी, होर तिन्हा भविस्यवाणी करणी।

19होर मां गास आसमाना मन्झ चमत्कार,

होर धरती पर चिन्ह, खून होर आग होर धुएँ रा बादल दसणा।

20प्रभु रे बडे होर महिमा रे ध्याड़े रे आऊणें ले पैहले

सूरजा न्हयारा होर चांद खूना साहीं हुई जाणा।

21जो कोई प्रभु जो मदद रे हाका पांगा, तेस उद्धार हूंणा।

22हे इस्राएल देसा रे लोको, इन्हा बचना जो सुणां: नासरता रे रैहणे वाले यीसू जो तुस्से सब जाणहां ऐं। तिन्हें चमत्कारा रे काम, होर नौखे काम, जो तिन्हें परमेसरा रे ज्रीए तुस्सा रे साम्हणें किते, ये साबित करदा रैहया कि से परमेसरा री वखा ले आ। 23ये सेई माह्णुं, जेस जो परमेसरा री पैहले री बणाईरी योजना होर परमेसरा रे पैहले रे ज्ञाना रे मताबक पकड़वाया गया, ता तुस्से से पापिया रे हाथा ले तेस जो क्रूसा प्रयाल्हे चढ़ाई किन्हें मारी दितेया। 24पर तेस जो परमेसरे मौता रे बंधना ले छुड़ाई किन्हें जिन्दा कितेया: क्यूंकि ये नामुमकिन था कि मौता तेस जो आपणे बसा मन्झ रखे। 25क्यूंकि राजा दाऊद तेसरे बारे मन्झ एह्ड़ा बोल्हा,

कि मैं प्रभु जो हमेसा आपणे साम्हणें देख्दा रैंहयां

क्यूंकि से मेरे साउगी आ, ताकि हांऊँ पई केते नी जाऊं।

26इधी कठे मेरा दिल खुस था, होर मेरी गल्ला खुसी किन्हें भरीरी हूणीं;

बल्कि मेरे सरीरा रे कठे भी ये आस ई कि एस भी जी उठणा।

27क्यूंकि तुध मेरे प्राण पताल लोका मन्झ नी छाडणे;

होर ना आपणे पवित्र माह्णुं री ल्हासा जो सड़ने देणा।

28तैं मुंजो जीणे रा पैंडा दसेया;

तुध आपणे दर्सना रे ज्रीए हांऊँ खुसी किन्हें भरी देणा।

29हे मेरे विस्वासी भाईयो बैहणो, हांऊँ आस्सा रे बापदादे राजा दाऊदा रे बारे मन्झ तुस्सा किन्हें खुल्ही किन्हें बोली सक्हा कि से ता मरी गया होर तेसरी ल्हास कब्र मन्झ रखी, होर आज भी से कब्र आस्सा वाले ई। 30पर दाउद नबी था होर जाणहां था कि परमेसरे कसम खाई किन्हें तेस किन्हें वादा कितेया कि, “मां तेरे बंसा मन्झा ले एक आदमी तेरी राजगद्दी पर बठयाल्णा।” 31इधी कठे तिन्हें ये देखी किन्हें पैहले ई मसीह रे मरिरे मन्झा ले जी उठणा रे बारे मन्झ भविस्यवाणी किती की, तेसरा प्राण पताल लोका मन्झ नी रख्या जाणा, होर ना ई तेसरा ल्हास नी सड़नी। 32एस मसीह यीसू जो परमेसरे जिउंदा करी दितेया। होर आस्से सभ एस्सा सच्चाई रे गुआह ऐं। 33एस तरहा तिन्हें परमेसरा रे सीधी वखा जो सभी ले बडी जगहा पाई किन्हें, यीसूए बापू रे वादे रे मताबक पवित्र आत्मा पाई। होर से ही पवित्र आत्मा जो तिन्हें आस्सा जो देई दिती, जेस जो तुस्से ऐबे देख्या करहा ऐं, होर सुणेया करहा ऐं। 34क्यूंकि राजा दाऊद ता स्वर्गा जो नी गया; पर से आपु बोल्हा कि,

प्रभु परमेसरे मेरे प्रभु किन्हें बोल्या, मेरी दाहिनी तरफ बैठ,

35जेबे तक कि हांऊँ तेरे दुस्मणा जो तेरे अधीन नी करी लेऊँ।

36इधी कठे ऐबे सारे इस्राएल देसा रे लोक पक्का ये जाणी ले कि परमेसरे तेस यीसू जो जेस जो तुस्से क्रूसा प्रयाल्हे चढ़ाया, से प्रभु होर मसीह ठैहराया। 37जो पतरसे बोल्या, तेता जो सुणी किन्हें लोक आपणे आपा जो दोसी मन्नदे लगे क्यूंकि स्यों जाणहां ऐं थे कि तिन्हें गलती किती। होर तेबे तिन्हें पतरसा ले होर बाकि चुणिरे चेलेया ले पुछदे लगे कि, हे भाईयो, आस्सा जो क्या करणा चहिए? 38पतरसे तिन्हा किन्हें बोल्या, “पाप करणा छाडी देआ, होर तुस्सा मन्झा ले हर एक आपणे-आपणे पापा री माफी रे कठे यीसू मसीहा रे नांऊँआं ले बपतिस्मा लेया; ता तुस्सा पवित्र आत्मा रा दान पाणा। 39क्यूंकि ये वादा तुस्सा, होर तुस्सा रे बाल बच्चे, होर तिन्हा सभ दूरा-दूरा रे लोका रे कठे भी आ जिन्हा जो प्रभु आस्सा रे परमेसरा आपणे वाले सादणे।” 40होर पतरसे बौह्त गल्ला मन्झ भी गुआही देई-देई किन्हें अर्ज किती कि, “आपणे आपा जो एस्सा बुरे पीढ़ी ले बचाऊआ।” 41जिन्हें पतरसा री गल्ला पर विस्वास कितेया होर तिन्हें बपतिस्मा लया; होर तेस ई ध्याड़े लगभग तीन हज़ार लोक विस्वासिया रे समूहा मन्झ जुड़ी गये। 42होर स्यों चुणिरे चेलेया ले उपदेस पाणे, होर एक दूजे किन्हें संगती करणे, होर प्रभु भोज लेणे#2:42 एता रा मतलब आ, जेबे स्यों प्रभु भोज लैहां ऐं थे, ता फेरी सारे विस्वासी लोका साउगी खाणा खाहें थे होर प्रार्थना करणे मन्झ व्यस्त रहे।

विस्वासी लोका री साझेदारी

43चुणिरे चेले रे ज्रीए बौह्त चमत्कार होर नौखे चिन्ह दसे गये, जेस ले सभी लोका पर बड़ा भारी डर छाई गया। 44होर स्यों सभ विस्वास करणे वाले कठे रैहें थे, होर तिन्हारी सभ चीजा बांडा री थी। 45होर स्यों आपणी जायदाद होर समान बेची-बेची किन्हें जेह्ड़ी जेसरी ज्रूरत हुंहा ईं थी बांडी देहां ऐं थे। 46होर स्यों हर रोज एक मन हुई किन्हें मन्दरा मन्झ कठे हुंहा ऐं थे, होर एक दूजे रे घरा मन्झ साउगी रोटी तोड़दे होर खुसी म्नांदे होर एक मन हुई किन्हें खाणे रे कठे कठा हुएं थे। 47होर परमेसरा री बड़ाई करहा ऐं थे, होर सभ लोक तिन्हा ले बड़े खुस थे। होर जो उद्धार पाहें थे, परमेसर तिन्हा जो हर रोज तिन्हारे समूहा मन्झ मिलाई देहां था।

Currently Selected:

चुणिरे चेले रे काम 2: MJLNT

Highlight

ਕਾਪੀ।