चुणिरे चेले रे काम 1

कताबा री जाणकारी

1हे आदरणीय थियुफिलुस, मैं आपणी पैहली कताब तिन्हा सभी गल्ला रे बारे मन्झ लिखी, जिन्हा गल्ला जो यीसूए करणा होर सिखाणा सुर्हू कितेया, 2होर तेस ध्याड़े तक करदा रेहा, जेबे तक कि तेस जो परमेसरे स्वर्गा वखा जो चक्केया। परमेसरे यीसू जो स्वर्गा वखा जो चक्कणे ले पैहले, तिन्हें आपणे चुणिरे चेले जो पवित्र आत्मा रे ज्रीए हुक्म दितेया। 3आपणे दुःख सैहणे होर मरणे रे बाद चाली ध्याड़े तक चेलेया जो सुझ्दा रैहया। होर बौह्त सारे पक्के सबूत देई-देई किन्हें आपणे आपा जो जिउंदा साबित कितेया। होर से तिन्हा किन्हें परमेसरा रे राजा री गल्ला करदा रैहया।

पवित्र आत्मा जो भेजणे रा वादा

4जेब्की से हाल्ले भी तिन्हा साउगी था तेबे यीसूए तिन्हो हुक्म दितेया कि, “यरुस्लेम सैहरा जो नी छाडा, पर बापू री तेस वादे रे पूरा हूंणे रा इंतजार करदे रैहया, जेसरे बारे मन्झ तुस्से मेरे ले सुणी चुकिरे। 5क्यूंकि यहून्ना बपतिस्मा देणे वाल़े ता पाणी मन्झ बपतिस्मा दितेया पर थोह्ड़े ध्याड़े ले बाद तुस्सा जो पवित्र आत्मा रा बपतिस्मा मिलणा।”

6कुछ टैमा बाद चेले यीसू किन्हें दबारा मिले होर तिन्हें यीसू ले पूछेया कि, हे प्रभु, क्या से टैम आई गईरा कि तू इस्राएल देसा रे राजा बणी किन्हे लोका पर राज करणा? 7यीसूए तिन्हा किन्हें बोल्या, समय होर काला जो जाणना तुस्सा रा काम नी आ। इन्हा गल्ला रा फैसला करणे रा हक मेरे बापू वाले आ। 8पर जेबे पवित्र आत्मा तुस्सा पर आऊंणा तेबे तुस्सा सामर्थ पाणी; होर यरुस्लेम सैहरा होर सारे यहूदिया ईलाके होर सामरिया ईलाके, होर पुरे संसारा मन्झ लोका जो तुस्सा मेरी गुआह देणी।

यीसू रा स्वर्गा वखा जो जाणा

9एह्ड़ा बोलणे ले बाद तिन्हारे देख्दे-देख्दे परमेसरे से स्वर्गा जो चकी लितेया गया, होर एक बादला री वजहा ले स्यों तेस जो देखी नी सके। 10जेबे यीसू जाया करहा था ता स्यों आसमाना वखा जो ध्याना ल्गाई किन्हें देख्या करहा ऐं थे, ता देखा, दो माह्णुं चीटे कपड़े पैन्ही किन्हें तिन्हा वाले खड़ी गये। 11होर बोल्दे लगे, हे गलील जिल्ले रे माह्णुंओ, तुस्से खड़ी किन्हें आसमाना वखा किधियो देख्या करहा ऐं? यीसू जो परमेसरे तुस्सा रे बिचा ले स्वर्गा वखा जो चक्की लईरा। जेस तरीके किन्हें तुस्से से स्वर्गा वखा जो जांदा देख्या, तिहां ईं तुस्सा दबारा वापस आऊंदे देखणा।

मत्तियाहा जो यहूदा री जगहा चुणना

12तेबे स्यों दो स्वर्गदूता रे जाणे ले बाद, चेले जैतूना नांऊँआं रे प्हाड़ा ले यरुस्लेम सैहरा जो वापस चली गये जो आधे किलोमीटर या एक किलोमीटरा री दूरी पर आ। 13होर जेबे स्यों सैहरा मन्झ पूजे ता स्यों ऊपर्ले कमरे मन्झ गये, जेथी पतरस होर यहून्ना होर याकूब होर अन्द्रियास होर फिलिप्पुस होर थोमा होर बरतुल्मै होर मत्ती होर हलफईसा रा मह्ठा याकूब होर समौन जेहड़ा जेलोतेस दला#1:13 ये एक कट्टर राजनीतिक दला रा नाऊँ था जेह्ड़े रोम देसा रे बरखलाफ काम करहे थे, जेसरा से सदस्य हुआ करहा था रा था, होर याकूबा रा मह्ठा यहूदा रैंहयां ऐं थे। 14ये सब चेले तेथी रोज एक मन हुई किन्हे यीसू री माऊ मरियम, होर तिन्हारे भाई होर दूजी ज्नानिया साउगी कठा हुई किन्हें प्रार्थना रे कठे कठा हुंदे लगे। 15होर तिन्हा ध्याड़े एक ध्याड़े लगभग एक सौ बीह विस्वासी कठे थे, पतरस तिन्हारे बीच भरा खड़ी किन्हें बोल्दा लग्या, 16हे मेरे विस्वासी भाईयो बैहणो, जरूरी था कि पवित्र सास्त्रा मन्झ लिखिरी गल्ला पूरी हुई जाए। जो पवित्र आत्मे राजा दाऊदा रे मुंहा ले यहूदा इस्करयोति रे बारे मन्झ पैहले ले ई बोलिरा था, जो यीसू जो पकड़वाणे वाले रा नेता था। 17क्यूंकि से ता आस्सा रे मन्झा ले एक था, होर एस सेऊआ रे कामा मन्झ साझी था। 18(जेस पापा री कमाई जो तिन्हें यहूदी अगुवे जो वापस करी दिते, तेता ले ही तिन्हें ले एक खेत खरदी लया। तेता बाद तिन्हें आपणे आपा जो फांसी पर लटकाई दितेया, होर तेसरा सरीर जमीना पर पई गया, तेसरा पेट फटी गया, होर तेसरी सब आंद्रा बाहर निकली गयी। 19होर एस गल्ला जो यरुस्लेम सैहरा रे सब रैहणे वाले जाणी गये। इधी कठे तिन्हें तेस खेता रा नांऊँ तिन्हारी भासा मन्झ हकलदमा मतलब खूना रा खेत रखेया।) 20क्यूंकि भजन संहिता मन्झ दाउद लिख्हा कि,

तेसरा घर उजड़ी जाए,

होर तेता मन्झ कोई बसणे ना पाए;

होर, तेसरे अगुवे री पदवी जो कोई होर लई ले।

21-22इधी कठे जो लोक यीसू रे सारे कामा रे गुआह ऐ, यानि प्रभु यीसू जो यहून्ना रे ज्रीए बपतिस्मा लैणे ले लेई किन्हें स्वर्गा मन्झ उठाए जाणे तक जो माह्णुं आस्सा साउगी यीसू रे जी उठणे रा गुआह ऐ। एह्ड़े माह्णुं मन्झा ले केसी एकी जो चुणना आस्सा रे कठे जरूरी आ।

23तेबे तिन्हें दो माह्णुं खड़े किते, एक युसुफ, जेस जो जे बरसब्बास बोल्हा ऐं, (जेसरा उपनाम युस्तुस आ), होर दूजा मत्तियाह। 24होर ये बोली किन्हें प्रार्थना किती कि, हे प्रभु, तू ता सभी रे मना जो जाणहां, ये दसी दे कि इन्हा दुहीं मन्झा ले तैं कुण चुणेया, 25जो एस सेऊआ रे काम होर चेले हूंणे रे पद जो लेई ले, जेस जो यहूदा इस्करयोति जो खाली छाडी किन्हें एह्ड़ी जगहा जो चली गईरा जेथी जे तेस जो हूंणां चहिए। 26तेबे तिन्हें तिन्हारे नांऊँआं री चिठिया पाई, होर चिठ्ठी मत्तियाह रे नांऊँआं पर निकली। इधी कठे से तिन्हा ग्यारा चुणिरे चेलेया साउगी गिणेया गया।

Currently Selected:

चुणिरे चेले रे काम 1: MJLNT

Highlight

ਕਾਪੀ।