Matiyò 13

Jisòs ma ngàn kum bè fùk

(Mâk 4.1-9; Lûk 8.4-8)

1À hì mô kəbi wu tuk afû, Jisòs fwo a ndâ yen ndokò yi bi lwi. 2Ghɨta ben dô kə ni, wù yen ya, lyi ndokò a ngwùk hì yikê, ghɨta timi yi bi jwôlì. 3Wù fôktì a gha ha ghɨna ghɨ dô kə ni kə sù ngàn.

Wù jis na, “Wùt lè tì shik hi mù ngwìk à wûn, 4shihi mù, yìlè chəmli a sù belâ sù fùksù, nyìmû ben chwubli kut nâ yì jɨ̀m. 5Se ale chəmlî a fu chyə, woli mô yi dèt, chyəfu dô wi afû yì nyâŋhì fwu kə ni beka chyəfu ndùku lûmà kə ni. 6Te chwì bana, nyok futu tɨntu tu yîm beka ghaŋtu ndùku mô teka tu fwu. 7Ngwìk yìlè chəmli atɨ̂n à tù tùŋ tu mù kàktù, tûŋtù fwu tahì saŋ atɨna. 8Se ale chəmli kə nâ a chyəfu jûŋ fù, saŋ atɨna kwok bwuslò bilò. Ghɨ sam, se saŋa fwu atɨ̂n à buk yile mtufa, fî fwu atɨ̂n à yile wu wə, fwu atɨn à yile mtât.”

9Jisòs ma ngàn yina ni, ki jîs na, “À tofa nâbi nde, wu hi tòkà yutê.”

Jisòs fôktì gha ye a wù yike a sù ngàn

(Mâk 4.10-12; Lûk 8.9-10)

10Jùmtìbàmsu Jisòs khɨŋti yen buf ha wun na, wò jìsà ha ghɨta a sù ngàn njwô ghə?

11Jisòs fîsì ha ghɨna na, “Yènfù ti fo tofu ha ghàn na ghàn hi ywo khɨle gha letena ghe ghɨ mô kum fə̂n wù Fùyènù, biyani te fo jə̀ ha ghɨna. 12Yi chwûtè na à kəta nâbi nde, ma ghɨ nê fo kpenhi ha wûn ma wù khɨti hidù, à hì gha nâbi nde, ma ghɨ nê fyi fu teta fe wù kəta. 13Mu jìsà ha ghɨna a sù ngàn ni shyəma ghɨna nê hi ke luktu yena wi, ywo kə yi yû gha biyani khɨle wi na ghɨ jîsà na ghə agha. 14Tum à Fùyèn ye fòktì Ìsayà tì fokte ti kpen ha ghɨna. Fu tì jis na: Ghàn bè hì yute kə nâ yi yutî gha, biyani khə wi na ghɨ jîsà na ghə agha, ke kəbi yi kî luktu biyani yena khɨle wi shyə ale. 15Ghɨt ghɨ̂n chilelò, tûŋlu ghɨna ywo wi gha, se ghɨna mô ma ghɨ ti baŋâ ghɨna yena wi kôŋà wi hi tè yena tu luk, à bu ya, ma ghɨna yenalò luktu fe ywô khɨle a ghâ, a ghɨna təm kaha ben ha mu, ma mu chwuk ghɨna.”

16Jisòs jis ni ki fê jìs ha jùmtìbàmsu wunsu na, “Jùŋ mò ha ghàn beka ghàn kəta se yena tu luk fê kəta wu tûŋlu ywo khɨle gha ghe ghɨ jîsà. 17Mu jìsà ha ghàn hamok na fòktìsu chiksu dosu nì ghɨt a chilichili ghɨ dona ndùku mô kôŋà hi yen a gha ghe ghàn yena, fè kôŋà hi ywo gha ghe ghàn ywo, biyani yi tê gàn.”

Jisòs fôktì gha ye gàn à bè fùk ndùku chwûtè

(Mâk 4.13-20; Lûk 8.11-15)

18Jisòs fî jis na, “Ghàn yuti gha ye ngàn à bè fùk yina yike. 19Ghɨt ghe ghɨ ywo tum kum fə̂n wù Fùyènù khɨle wi, mò te ngwìk ye yì chəmle a sù belâ. Ghɨna ywo, deblì ben chwuf lô nì yini a ghɨna təm. 20Wùt we wù ywo gha Fùyènì, wu nyâŋhì bimi kə yi bimî nì saŋlînì mô te ngwìk ye yì tì chəmle a tô fuchyə woli mô yi dèt yâ. 21Wùt mu wunâ ywo gha Fùyènì, wù hi kəta wi ghaŋtu, wu bimi kə fu yulâ ni. À hì mô a wu yu afa ngə̂k bèna makə ghɨ bânà wûn kum gha Fùyènì, wu nyâŋhè fən kə ni. 22Ngwìk yìlè ye yì chəmle atɨ̂n à tù tùŋ yâ mô te wùt we wù ywo gha Fùyènì, fumhènà mbye nì kôŋ ye wù kòŋà ghaki lehi wûn gha ghɨ̂n tè mo jə̀ tamu a wun a chyənà. 23Biyani ngwìk ye yì chəmle a chyəfu jûŋ fù mô te wùt we wù ywo gha Fùyènì, khɨli ki khɨlî gha ye yi jisà. Yi hi mo wu tam a wun a chyənà wu dô kə ni kəbi te ngwìk yê ghɨ tì yome a chyəfu jûŋ fù, yì lemâ, se saŋa hì fwo a to saŋa le wu wə, fwu ha ghɨ le mtufa, fwu ha ghɨ le, mtât.”

Jisòs ma ngàn kum wəlâ be

24Jisòs ma ngàn yìlè ha ghɨna na, “Fə̂n wu Fùyènù mò kəbi wu lum afan ni. Wùt tî yomi ngwìk a wûn a fùk, 25tuku jyə̂ wu tuk wule, ghɨta bwunî kə à jɨ̀m, bànà wûn nyam yen yomi wəlâ wu be atɨ̂n à ngwìk afû, 26Saŋa tɨna fwu bwuslò, wəlâ be we boŋ kwôk. 27Ghɨt a fetana bè fùk mu we buf ha wûn na, Bèbɨn, ba tì yomi kə nâ wò ngwìk à saŋ yì jùŋ a wo fùk, nki wə̀lâ mu wûn mò ma wu lo afa? 28Wùt atɨ̂n jis na, gha mi yin ni kə wùt we wù bànà mu. Ghɨt a fetana mu ghe buf ha wun na, ghàh yê soli wəlâ tɨnu agha? 29Bè fùk we jis ha ghɨna na, ngaŋ, ghàn làhi yèn hi solî, ma ghàn nê hi chwokte bakha nì saŋa. 30Ghàn de ma saŋa tɨna hi ləma kə tɨn à wù wəlâ hi bè tàn wu tuk afa ghàn bè shika hi kpì. À bè hì mô wu tuk mefû, ma mu bê jis ha ghɨt a kpena na ghɨ yità chwokti wəlâ tɨna ma kwut wu bum shyəma ghɨ nyok ma ki kpê saŋa ma kolo bè yana a wu tân.”

Jisòs ma ngàn kum yi se mostà

(Mâk 4.30-32; Lûk 13.18-19)

31Jisòs tî ma ngàn yìlè ha ghɨna jis na, “Fə̂n wù Fùyènù mò kəbi te sèla fu ngwìk fùsakhì fu lefu ghɨ toŋte na mostà, wùt ye yomi sakhì mu fîn a wun a fùk, fu hì ləmâ. 32À nê hì mô wu yu afû, sèla fù sakhì mu fîn hi tobte chyâ nâbi yìni ngwìk, biyani fu ləmâ fo tu kpôŋ, fu hi ghaka chyâ nâbi mùni mwə̀ me ghɨ yome a fùk hi fate mbàh atɨ̂n. Nyɨ̀mû hi bê bâ ndasu ghɨna su a tu kpoŋ tu tɨntu.”

Jisòs ma ngàn kum fùshìk

(Lûk 13.20-21)

33Jisòs fî ma ngàn yìlè ha ghɨna jis na, “Fə̂n wù Fùyènù mò kəbi te fùshìk te wùt ywên lye fwəh a mkat mu dô kə ni, fu gbi mkat mù tɨ̂n mù jɨ̀m.”

(Mâk 4.33-34)

34Jisòs tì yike gha ghɨn ha ghɨta à jɨ̀m kə sù ngàn, bu hi fòktì nâ gha yì mòk ha ghɨna teka wù ma ha ngàn. 35Wù ndùku nê ni hi lunhe gha ghe Yènfù tì jìsa tohne ha fòktì wù chìk. Fu tì jis na: “Mu bè hì jîsà ha ghɨna a sù ngàn. Mu bè hì fôktè a gha ha ghɨna teka wùt timè hi khə nâ hi yìmì te ghɨ tì fate mbyî.”

Jisòs fôktì gha ye ngàn a wəlâ be ye ndùku fôktè

36À hì mô te Jisòs ghê jùmtìbàmsu wunsu de ghɨt a dona ghe kaha lye a ndâ, ghɨna ki jîs ha wun na wù fokti gha ye ngàn à wəlâ be ye ndùku yike.

37Jisòs jis ha ghɨna na, “Wùt we wù yome ni mò Wâ Wùt. 38Fûk atɨna mô mbyî, ngwìk yì jùŋ mô ghɨt ghe ghɨ mô yi sah yi sak yi Fùyènì, ngwìk yì be mô ghɨt ghe ghɨ mô a deblì yi sah à yì sak. 39Bànà ye yì yome wəlâ be we mô deblì, yu kpenu mô gokhi mbyi, ghɨt a kpena mô anjèlsu Fùyèn su. 40A gokhe mbyi ghɨ bè yûŋtè ghɨt ghe ghɨ mô yi sah yi sak nì deblì ma nyok kəbi te ghɨ yè yûŋtè wəlâ wu be a fùk, ghɨ nyok lò. 41Wâ Wùt bè tumlò anjèlsu wunsu, ma su ben ma chîntè fihi nâbi ghə ghe ghɨ nê ghɨta na ghɨ hi nê be a wun a luk wu fə̀nù. 42Yi bàm yi tɨ̂n ma ghɨ bê mâk ghɨna wu lùk wu wùsu, ma ghɨna hi luŋle jyê. 43Ghɨta chilichili bè hì bana wu tuk mefû kə te yu chwî wu lùk wu fə̀n wù Bè ghɨna. À hì tofa nâ nâbi nde, wù hi tokà yutê.”

Jisòs ma ngàn kum yi ghak

44Jisòs tì jis na, “Fə̂n wù Fùyènù mò kəbi te ghak yile ghɨ lete a fùk, wùt yen te ghɨ leta fî tôk letìlò, kaha kolo lò, gha tɨni hi foma a wun wu wùn nâ jûŋ, wù yen hi bəkli nâbi ghə wù ndùku kəta hi yè yun a fûk mu ghê.”

45“Fə̂n wù Fùyènù mô kəbi te wùt bəklena wù gbè khɨŋa tu nki tu fwa tu letu, tu jwôfà nâ jûŋ,#13.45 Nki tu fo tu letu: Ghɨ ndùku fate fo mu tɨn nì ti yile yi ta a wu ka nâ haŋaŋ, jwôfà nâ a jûŋ, fufa fê njêntè. 46wù ki yena yi sê le yi kokne nâ jûŋ, ma wù kaha kolo ma wù bəkli nâbi ghə wù kəta, ma wù ye yun.”

Jisòs ma ngàn kum wu wə

47“Fə̂n wù Fùyènù mò te wu wə te ghɨ maka a jwô, kwo tu nki tu yì tu kə tù jɨ̀m, 48tu lun, ghɨt ghe ghɨ kwo yila guf fihi yi bi jwôlì titi fihi yila jûŋà lema sù kà ghɨ be ghɨ mâkàlò. 49A gòkhi à mbyî yi bè hì mô kəbi ni. Anjèlsù Fùyènsu bè hì tite fihe ghɨt a be atɨ̂n à ghɨt a jûŋà, 50ma tum à lihi ghɨna atɨ̂n à wu wùs, ma ghɨna nê hi luŋle jyê afû.”

Ghɨta ma Jisòs a Nasalì

51Jisòs jis ni ki buf ha jùmtìbàmsu wunsu na, ghàn ywo khɨlelò gha mi ghɨ̂n agha?

Ghɨna bimi.

52Wù ki jîs ha ghɨna na, “Yina chwùtè na nâbi wuni chichà wù sak ki gânà jùmtìbàm à Fə̂n wù Fùyènù hì yike gha ye fə̂n wù Fùyènù mò yini, ma wù hi mô kəbi te bè ndâ we wù fihi mwə̀ mù mwu nì mù fê a wun a ndâ wù lem wu lùk afa wù lèmà mwə̀ mù wûn atɨ̂n.”

(Mâk 6.1-6; Lûk 4.16-30)

53Te Jisòs tì ma mihe ngàn sîn ni lo afû 54kaha kolo yen yi tèk afa wù tì ləma kwoka atɨ̂n, wu yusa yike ghɨta a ghɨna ndasu chintesu. Ghɨna hì mô nì kani bufa nâ, “Wùt wuna lyì afa nki tof wuna nì jyak ghɨna agha? 55Bâ wùna mò kə nâ wâ wùt wuna wù kwoma mwə̀lû ni? Ba nè wûn mò Mèli, wana nè wuna mô Jêms nì Josèf nì Samùn nì Judàs. 56Bâ jâmtùsù wunsu chyə kə nâ yi tèk afân? Ni, wù lyi afa tof wun nì jyak ghɨ̂n.” 57Ghɨna jis yâ, tunhi hi bimi ha wûn.

Jisòs ki jîs ha ghɨna na, “Ghɨ kokhe lò fòktè Fùyèn nâbi afa, a bu kə wu lùk afa wù fwo atɨ̂n nì sah yi nda wuni.” 58Jisòs tà ni jə gha kanana dona a Nasalì beka ghɨta afû tì tunhe hi bimî.

Currently Selected:

Matiyò 13: bmv

Highlight

Copy

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)

Matiyò 13

Popular Bible Verses from
Matiyò 13

Listen to Matiyò 13

Bible:

Bum

Version: Ŋwàklù Fùyèn Kàn Mù Fê (Cameron) - bmv

Matiyò 13

Matiyò 13

Popular Bible Verses from Matiyò 13

Listen to Matiyò 13

Bible:

Bum

Version: Ŋwàklù Fùyèn Kàn Mù Fê (Cameron) - bmv

Matiyò 13

Popular Bible Verses from
Matiyò 13