Matiyò 14

Ghɨ ywi Jon Fo Mòlû

(Mâk 6.14-29; Lûk 9.7-9)

1À ndùku mô wu tuk afû, Helòd we wù ndùku saka bâh a lak ale ghɨ toŋte na Galìlî yu a gha kum Jisòs, 2jis ha ghɨt a wuna ghɨ fetana na, “À mò kə nâ Jon Fo Mòlû te wù kaha lote a yi kpû. A mò gha ye wù kəta jyaka hi tè nè gha mɨ ghɨ̂n ni.”

3Yi ndùku mô ya ma à jis kə nâ wun a wun a ngɨŋ na ghɨ kwo Jon ma kwut wûn ma ghɨ lem a chyâk, yi mô ni ma wun Helòd tì kwo fyi Hèlodiyàs, ywê wâ nè wûn Filîb, Jon hì njaŋâ. 4Jon fâŋ hì kumtè kə yi kûmtì ha wun na, “Wù ti ni gha saki bime wi, ni te wò mala wùt ywên wuna. 5Helòd hì khɨŋa hi ywe Jon biyani fânà à ghɨ̂t beka ghɨta ndùku lyê Jon te fòktì Fùyèn wù chìk.”

6À hì mô wu tuk afa ghɨ ndùku yə tuk wu bwənu Helòd, wâ Hèlodiyàs wù ywên hì bɨna a ghɨna ashyə̂, gha tɨni hì foma ha Helòd nâ haŋaŋ. 7Wù ki chwûnà wan wù ywên atɨ̂n jis na, “Mu jìsà hamok na mu nè folò nâbi ghə ghe wò kòŋà na mu fo ha wò.”

8Nè wûn nyamti jis ha wun na wù jîsà kə na yi khɨŋa na ghɨ fo to Jon ha yi a khət à khɨ̀ŋa, kə chîn.

9Fə̀n Helòd jî wu wun nâ haŋaŋ, biyani jis na ghɨ kat à ben nì to Jon ma ghɨ fo ha wan wù ywên àtɨ̂n. Wù tì ni ni beka wù tì jìsa gha tɨni kanlò a ghɨt a benana ashyə̂. 10Te ghɨ ye a ndâ chyâk kat a to Jon, 11kaha ben nì ghɨna a khət à khɨ̀ŋa fo ha wan wù ywên we, wù yen fo ha nè wûn. 12Jùmtìbàmsu Jon su lyi gun yi wuni yen gumà lò ki yê fòktè gha tɨni ha Jisòs.

Jisòs yəhi ghɨta ghɨ chyâ kamsu tân

(Mâk 6.30-44; Lûk 9.10-17; Jon 6.1-14)

13Te Jisòs tì ywo gha ye ghɨ ne ha Jon wù lye a ngwùk ghê jùmtìbàmsu wunsu hì yênà wu lùk wùt bu afû. Ghɨta yû lo fwu a tu tèk nâ hidù hi gbê yênà a wun yi bàm kə nì wulu. 14Te Jisòs ye tana kə ni fî yen ghɨta dona ghê, seni kwo wûn ha ghɨna. Wù chwuk ghê ghɨ ndùku yable a ghɨna fùtɨ̂n.

15À hì mô a leŋ a yu kolô, jùmtìbàmsu wunsu ben jis ha wun na, “Yu ti chyâ, luk wuna fê mô a yi bàm. Yi jwôfà na wò jis ha ghɨt ghɨ̂n na ghɨ kahà lyê yen a tu tèk ma yun mwə̀ mù yə̂mù afû ma yə.”

16Jisòs fîsì na, “Ghɨna kəta wi hi kolô, nâ ghàn fo shyə ma ghɨna yə.”

17Jùmtìbàmsu wunsu jis na, “Ghàh kəta kə ban wu tân afân nì yila à bà.”

18Jisòs jis na ghɨna fo ha yi, 19wù ki jîs ha ghɨt ghe na ghɨna ndokte a chyə̂ a tô wù wə̀lâ. Yi bàm yi tɨ̂n, wù fyi ban we wù tân nì yila ghe à bà ki kokhe a nyə̂ fo àyòŋnà ha Yènfù bəkti ban wu tɨnu chîntì fo mwə̀ mù tɨ̂n ha jùmtìbàmsu wunsu na ghɨna jyati ha ghɨta. 20Ghɨna yə kwut nâ à jɨ̀m, jùmtìbàmsu wunsu kumti chyàksu ban se su faŋa, su lun kà njwòsù bà. 21Ghɨt ghe a ghɨ tì yə mwə̀ mù yə̂ munâ ndùku chəmlò kam sù tân, ghɨ taŋa wi ywena nì mwəlà.

Jisòs gbe a tô mòlû

(Mâk 6.45-52; Jon 6.15-21)

22Te ghɨt ghe tì yə mihe, Jisòs jis ha jùmtìbàmsu wunsu na su lye a ngwùk ma daŋ à yen a yi jin yi lwi yile ashyə̂, wù faŋ yi bàm jis na ghɨta hi kolê. 23Te wù jìsa yâ, ghɨta lô hì kolê wù lo kwok a tô kùn kə wù nɨ̂ŋ hi jə̀m, tuku hì jyə bênà wu mô kə afû wù nɨ̂ŋ. 24A mô ni, ma ngwùk ye jùmtìbàmsù wunsu ye lye atɨ̂n ma yì ti yen nâ ha ghaf atɨ̂n à wù lwi, jwò hì shikà yinì nâ haŋaŋ beka fufa ndùku chyâlà, bê lumu a ghɨna ashyə̂.

25À ndùku mô te tuku yula bênà, Jisòs lô hì gbê yênà a tô mòlû hi yè yena jùmtìbàmsu wunsu. 26Te ghɨna tì yena te wù gbè bênà a tû mòlû ni, ghɨna hì mô nì fânì bwata jyê, jyâna na, “À mò wùt à chyə̂!” 27Kə wu yu, Jisòs jis ha ghɨna na, “Kə ghàn fan. À mò mu. Ghàn kwut təma.”

28Bità ki jîs ha wun na, “Bâ, à hì mô kə nâ wò hamok, wò jis na mu gbi a tô mòlû ma mu bê yen wò.”

29Jisòs jis na wù ben. Bità fwu hì gbê yênà a Jisòs à ngwùŋ kə nâ a tô mòlû. 30À hì mô te wù yena fufa chyâlà, fânì kwo wûn, wù yîmì hi sàŋà a jwô, wù bwat jî ha Jisòs na, “bâ, gàmti mu kə mu saŋa!” 31Kə wu yu, Jisòs nâhè a wô khɨti wûn ki buf ha wun na, “Samhî ya tobte ghə ni? Njwô ghə te wò ye hì kante yi kantî na mu làhi nì, na wò gbi a tô mòlû agha?”

32Te ghɨna tì kaha lye a ngwùk fuf ghe tenâ. 33Jùmtìbàmsu wun se su ndùku mô a ngwùk hì kokhe wûn jyâna, “Hamok wò mò kə nâ Wâ Fùyèn.”

Jisòs chwuk ghɨta yi tèk yi Gènesalèt

(Mâk 6.53-56)

34Te ghɨna dàŋa mihe tan a yi tèk yi Gènesalèt, 35ghɨta yen khɨli wûn afû tum fòktì ha ghɨt à jɨ̀m atɨ̂n a yi lak afû na ghɨta lyê ben nì ghɨt a yablena ha wûn nâ à jɨ̀m, 36chyati wun na wù de ma ghɨt a yablena tɨna kum kə nâ yi kûm soŋ a wuna ghɨ sù nju. Ghɨt ghe ghɨ tì kùma ta kə à jɨ̀m. Ghɨt a Jûs ndùku ke na Ìlajà bè kaha bênàlò a chyə̂ tuk lefu hi bakte a ghɨta a Klistù yi bèn, (malachi 4.5-6) Jisòs fî jis na Jon mò fòktì te Ìlajà we ghɨ ndùku yute.

Currently Selected:

Matiyò 14: bmv

Highlight

Copy

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)

Matiyò 14

Popular Bible Verses from
Matiyò 14

Listen to Matiyò 14

Bible:

Bum

Version: Ŋwàklù Fùyèn Kàn Mù Fê (Cameron) - bmv

Matiyò 14

Matiyò 14

Popular Bible Verses from Matiyò 14

Listen to Matiyò 14

Bible:

Bum

Version: Ŋwàklù Fùyèn Kàn Mù Fê (Cameron) - bmv

Matiyò 14

Popular Bible Verses from
Matiyò 14