Матфейица бицараб Рохалил хабар 16
16
16 бетӏер
Гьаб умматалъе гӏаламат букӏине гьечӏо
1Гӏисахъе рачӏана фарисеялги саддукеялги. Гьесул хӏалбихьизелъун гьез тӏалаб гьабуна зодисан гӏаламат бихьизабеян. 2Жавабалъе гьес абуна:
– Къаси нужеца абула зоб багӏарлъун бугин, метер роцӏараб къо букӏинин. 3Радал нужеца абула жакъа кьерхараб къо букӏинин, багӏарсияб ва накӏкӏуяб кьер лъугьун бугин зодил. Зобалазул хиса-басиязда хадур гӏунтӏула нуж, амма гьаб тӏаде гӏунтӏун бугеб заманаялъул гӏаламатал щайха нужеда лъаларел? 4Квешлъиги хъахӏбалъиги гӏемерлъараб гьаб умматалъе къваригӏун буго зодисан гӏаламат бихьизе. Амма Юнус аварагасул гӏаламат гурони, цогидаб гӏаламат гьазие букӏине гьечӏо.
Цинги, гьелги жалго тун, Гӏиса нахъе ана.
Фарисеязулги саддукеязулги реччеялъул хӏакъалъулъ
5Ралъдал добцояб рагӏалде унаго, чед цадахъ босизе кӏочон тун батана муридазда. 6Гӏисаца гьезда абуна:
– Вореха, фарисеязулги саддукеязулги реччеялдаса цӏунун чӏа нуж.
Жидедаго гьоркьоб хабар ккана гьезул:
7«Нилъеца чед цадахъ босичӏилан абураб магӏна букӏине ккола гьел рагӏабазул». 8Гьезул пикру бичӏчӏун, Гӏисаца абуна:
– Чед гьечӏилан гаргадизе бегьилищ нуж? Нужго кинал гьединал иманги дагьал, 9бичӏчӏиги гьечӏел! Щуазарго чиясе щуго чед гӏураблъи ракӏалда гьечӏищ нужеда? Хутӏарал чадил мочӏабазул чан гьегь нужеца цӏезабураб? 10Яги ункъазарго чиясе анкьго чед гӏураблъи ракӏалда гьечӏищ? Хутӏарал чадил мочӏабазул чан гьегь нужеца цӏезабураб? 11Чадил бицунеб гьечӏеблъи щай нужеда бичӏчӏулареб? Амма фарисеязул реччеялдасаги саддукеязул реччеялдасаги цӏунун чӏа нуж!
12Гьанже гьезда бичӏчӏана фарисеязулги саддукеязулги реччеялдаса гуреб, гьезул малъа-хъваяздаса цӏунеян абулеб бугеблъи.
Пётрица иман лъуна Гӏиса Масихӏ вукӏиналде
13Филиппил Къайсарияталъул ракьалде щведал, Гӏисаца муридазда гьикъана:
– Гӏадамил Лъимер щивлъун рикӏкӏунев вугев гӏадамаз?
14Гьез абуна:
– Цояз абулеб буго Яхӏя авараг вугилан. Цояз абулеб буго Иляс авараг вугилан, Иеремия яги цогидав авараг вугилан абулел чагӏиги руго.
15– Нужеца щивлъунха дун рикӏкӏунев? – ан абуна Гӏисаца.
16Пётр абун тӏокӏцӏар бугев Симоница жаваб кьуна:
– Мун вуго хӏакъав Аллагьасул Вас Масихӏ!
17Гьесдехун вуссун Гӏисаца абуна:
– Гьардарав гурищ мун, Юнусил вас Симон. Инсанас гуро мун гьелде кантӏизавурав, зобалазда вугев дир Инсуца кантӏизавуна. 18Цоги дица дуда абулеб буго мун Пётр (Кьуру) вугилан, гьеб кьурда тӏад бала дица дирго Килиса#16:18 Гьаниб килисаялъул буго иман лъуразул агьлу абураб магӏна. , ва хвалил къуваталъе къуркьиларо гьеб. 19Дица духъе кьела Зобалазул Парччахӏлъиялъул кӏул, ракьалда дуца гьукъарабщинаб зобалаздаги гьукъила, ракьалда дуца изну кьурабщиналъе зобалаздаги изну кьела.
20Цинги Гӏисаца жиндирго муридазда лъазабуна жив Гӏиса Масихӏ вугилан лъиданиги бицунгеян.
Гӏисае букӏине бугеб гӏазаб-гӏакъуба
21Гьелдаса хадуб Гӏисаца гьезда бицине байбихьана жив Иерусалималде ине вугин, чӏухӏби-хӏакимзабазги, чӏахӏиял кашишзабазги, диниял гӏалимзабазги жиндие гӏазаб-гӏакъуба кьезе бугин, чӏвазе вугин ва лъабабилеб къоялъ Аллагьас чӏаголъизавизеги вугин.
22Довегӏанги вачун Пётр лъугьана гьедин абугейилан гьесда дандечӏун кӏалъазе:
– Аллагьас цӏунаги, Бетӏерчӏахъад! Дуе гьеб лъугьине рес гьечӏо!
23Кьурун вуссун, Пётрида абуна гьес:
– Тӏагӏа дида аскӏоса, илбис! Дуца дун къосинавулев вуго! Аллагьасулаб тун инсанасулаб лъугьун буго дур рекӏелъе.
24Цинги жиндирго муридазда Гӏисаца абуна:
– Дида цадахъ вилълъине бокьарав чи ватани, гьес жиндирго напсалдаса инкар гьабе, жиндаго тӏаде ккараб хъанчил гӏазабги бачче ва дида хадув вачӏа. 25Щаян абуни, жиндирго гӏумру цӏунизе бокьулев чи гьелдаса махӏрумлъила, дие гӏоло гӏумруялдаса махӏрумлъизе разилъарасда гьеб цӏидасан батила. 26Жиндирго рухӏги рецӏалие кьун, тӏолабго дуниялалъул кверщел хъатикье щвеялъул щиб пайда бугеб инсанасе? Жиндирго рухӏалъухъ хисун кьезе щиб бугеб инсанасул? 27Жиндирго Инсул къудраталдалъун, Гӏадамил Лъимер дуниялалде вачӏине вуго жиндирго малаикзабигун цадахъ. Щивасул амру-ишалда рекъон кьела Гьес гьебмехалъ. 28Хӏакълъун абулеб буго дица нужеда: Гӏадамил Лъимер Парччахӏлъун вачӏун вихьичӏого жидеца хвалил лълъар гьекъезе гьечӏел гӏадамалги ругелха гьанир эхетаразда гьоркьор.
Currently Selected:
Матфейица бицараб Рохалил хабар 16: AvrNT
Highlight
Share
Copy
Want to have your highlights saved across all your devices? Sign up or sign in
© Библия таржама гьабиялъул институт Москва 2008