Матфейица бицараб Рохалил хабар 15
15
15 бетӏер
Аллагьасул амруялги умумузул гӏадаталги
1Гьебмехалъ Гӏисахъеги рачӏун, Иерусалималдаса диниял гӏалимзабаз ва фарисеяз абуна:
2– Дур муридаз нилъер умумузул динияб гӏадат щай цӏунулареб? Кваналелде кверал чурулел гьечӏогури гьез.
3Гӏисаца гьезда абуна:
– Нужерго гӏадат цӏунизе бокьун, нужецаго щай Аллагьасул амру тӏубазабулареб? 4Аллагьас абун буго: «Дурго инсулги эбелалъулги адаб-хъатир гьабе!» Хадубги: «Жиндирго инсул яги эбелалъул хӏакъалъулъ квешаб рагӏи абурав чи чӏвазе ккола», – ян. 5Нужеца малъулеб буго: «Дидасан нужее щвезе кколеб букӏараб жо дица Аллагьасе назру гьабунилан жиндирго инсуда яги эбелалда абурав чияс 6инсулги эбелалъулги адаб-хъатир гьабизе кколаро», – ян. Гьедин нужеца нужерго гӏадаталдалъун хвезабулеб буго Аллагьасул амру. 7Вай, нужее ххвелал гьаризе бокьулеб куц! Нужер хӏакъалъулъ Ишая аварагасул тӏехьалда цӏакъ битӏун абун бугебха:
8«Гьел гӏадамазул кӏалалъ Дир цӏар гӏемер рехсола,
Амма гьезул ракӏални рикӏкӏад руго Дидаса.
9Гӏадада ккела гьезул Дие гьабураб тӏагӏат,
Гӏадамазул гӏадатал цӏунизе халкъ тӏамидал».
10Нахъеги халкъги аскӏобе ахӏун, Гӏисаца абуна:
11– Дихъ гӏенекке нуж: кӏалдиса жанибе аралъ гуро инсан хъублъизавулев, кӏалдиса къватӏибе бачӏаралъин. Гьеб бичӏчӏа нужеда!
12Гьебмехалъ, аскӏоре рачӏун, муридаз абуна Гӏисада:
– Дур рагӏабаз фарисеял ццидахинарун рукӏин лъалищ дуда?
13Гӏисаца гьезие жаваб гьабуна:
– Зобалазда вугев дир Инсуца ахикь чӏечӏебщинаб гъветӏ кьолболъа бахъун рехизе буго. 14Жахӏалго те гьел. Гьел руго бецал чагӏи, квер ккун хадур цӏалел бецукал. Бецукас ккун бецук вачунев вугони, кӏиялгоги гвандинире рортила гьел.
15Пётрица гьарана дол рагӏабазул магӏна бицеян.
16– Гьедигӏанго жо бичӏчӏуларел чагӏийищха нужги, – ян хӏикмалъана Гӏиса.
17Нилъеца кӏалдибе босараб жо чохьонибе кколеблъи ва гьенисан къватӏибе унеблъи лъаларебищха нужеда? 18Амма кӏалдисан къватӏибе бачӏуна рекӏелъ бугеб жо. Гьеле гьелъин чи хъублъизавулев. 19Щаян абуни, инсанасул рекӏелъан рачӏуна квешал къасдалги, чӏвай-хъвейги, зиначилъиги, хъахӏбалъиги, цӏогьги, гьересинугӏлъиги, бугьтанги. 20Гьеб киналъго хъублъизавула инсан. Амма кваналелде кверал чуричӏогойилан гьев хъублъуларо.
Цогидаб халкъалъул гӏаданалъги Гӏисаде иман лъола
21Гьениса вахъун Гӏиса унев вукӏана Тиралъул ва Сидоналъул улкабазде.
22Ханааналдаса цо гӏадан#15:22 Ханааналда яшав гьабулеб букӏана Аллагь лъалареб халкъалъ. ячӏана Гӏисада аскӏое ва гӏодилаго ахӏдезе лъугьана:
– Я, Бетӏерчӏахъад! Я, Давудил Вас! Гурхӏа мун дида. Дир яс йиго шайтӏабаз ккун кутакаб гӏазабалда гъоркь.
23Гьелъие жаваб гьабун цо рагӏицин абичӏо Гӏисаца. Аскӏоре рачӏун муридаз гьарана, гьадай гӏадан ахӏделаго нилъеда хадуй ячӏуней йигин, дой нахъе йитӏеян. 24Гьезие жаваб гьабун Гӏисаца абуна:
– Дун Исраилил умматалъухъе витӏун вуго вехьасухъа риларал чахъаби гӏадин ругел гьелъул гӏадамал ралагьизе.
25Аскӏое ячӏун, Гӏисада цее накабаздаги чӏун, гьарулеб букӏана дой гӏаданалъ:
– Я, Бетӏерчӏахъад! Кумек гьабе дие, – ян.
26– Лъималазул кӏалдиса бахъун чед гьабзазе базе бегьуларо, – ян абуна гьелда Гӏисаца.
27Гьей гӏаданалъ абуна:
– Я, Бетӏерчӏахъад! Гьебни битӏараб буго. Амма жидерго бетӏергьабазул столалдаса рортарал кескал рукъалъул гьабзазеги щолагури.
28Гьебмехалъ Гӏисаца гьелда абуна:
– Я, чӏужугӏадан! Кутакаб божи-иман буго дур рекӏелъ. Рекӏел мурад тӏубайги дур!
Гьебсагӏат сахлъана гьей гӏаданалъул яс.
Гӏемерал гӏадамал сахлъизарула Гӏисаца
29Гьениса вахъун ун, Галилеялъул ралъдал рагӏалдасан вачӏун, цо магӏарде вахана Гӏиса ва гьенив чӏана. 30Гӏемераб халкъ бачӏана Гӏисада хадуб гьенибеги. Гьезда гъорлъ рукӏана рекъал, гӏажизал, бецал, мацӏ лъаларел ва цогидабги гӏузру-сакъат бугел гӏадамал. Гьесул хӏатӏазда цере лъолел рукӏана гьединал гӏадамал, ва гьес гьел сахлъизарулаан. 31Мацӏ лъаларел кӏалъалел ругелъул, бецазда канлъи бихьулеб бугелъул, гӏажизал сахлъулел ругелъул, рекъал лъикӏго рилълъанхъулел ругелъул, тӏолабго халкъ гӏажаиблъун хутӏун букӏана. Исраилил Аллагьасе рецц гьабулеб букӏана гьез.
Гӏисаца ункъазарго чи гӏорцӏизавула
32Жиндирго муридалги аскӏоре ахӏун, Гӏисаца гьезда абуна:
– Гьал гӏадамазда гурхӏун вуго дун. Гьале лъабабго къоялъ дида аскӏор чӏун руго. Кваназе жоги хутӏун гьечӏо гьазухъ. Гьал кваначӏого риччазеги бокьун гьечӏо дие: нухда рухӏ дагьлъун гӏодор ккезе бегьула.
33Муридаз гьесда абуна:
– Гьадигӏан гӏемераб халкъ гӏорцӏизе гӏураб чед гьаб гӏалхуда киса бахъилеб нижеца?
34Чан чед нужехъ бугебилан гьикъана Гӏисаца гьезда. Анкьго чедги цо чанго ччугӏаги бугилан абуна гьез. 35Цинги Гӏисаца гьел гӏадамазда абуна кваназе гӏодор чӏайилан.
36Доб анкьабго чедги чанго ччугӏаги кодобе босун, тӏаде дугӏаги гьабун, Гӏисаца бек-бекун жиндирго муридазухъе кьуна, гьезги халкъалъе бикьана гьеб. 37Киналго гӏорцӏизегӏан кванана гьенир, нахъе хутӏарал чадил мочӏабазулги анкьго гьегь цӏуна. 38Руччабиги лъималги малъичӏого, ункъазарго чи вукӏана гьенив кваналев.
39Халкъги нахъе биччан Гӏиса, росодаги рекӏун, Магаданалъул ракьалде ана.
Currently Selected:
Матфейица бицараб Рохалил хабар 15: AvrNT
Highlight
Share
Copy
Want to have your highlights saved across all your devices? Sign up or sign in
© Библия таржама гьабиялъул институт Москва 2008