Матфейица бицараб Рохалил хабар 17
17
17 бетӏер
Гӏиса хиса-басун лъугьуна
1Гьелдаса хадуб анлъго къоялдасан Пётрги, Якъубги ва гьесул вац Иоаннги гурони тӏокӏав чиги цадахъ вачинчӏого, Гӏиса цо борхатаб магӏарде вахана. 2Гьелги ралагьун рукӏаго, хиса-басун лъугьана Гӏиса. Гьесул гьумер бакъ гӏадин гвангъана, хъахӏлъун лъугьараб ретӏел нурлъун кенчӏелеб букӏана. 3Гьале Мусаги Илясги рихьана гьезда гьевгун гара-чӏварулел. 4Пётрица Гӏисада абуна:
– Я, Бетӏерчӏахъад! Лъикӏ буго гьаниб нилъее! Дуе бокьани, дица лъабго хъощ бала гьаниб: цо дуе, цо Мусае, цо Илясие.
5Гӏисадехун Пётр гьедин кӏалъалев вукӏаго, гьале цо гвангъараб накӏкӏул парча бачӏун рахчизаруна гьел. Гьале гьеб накӏкӏуда гьоркьосан бахъана цо гьаракь:
– Гьав вуго дие вокьулев дир Вас, гьасдаса вохун вуго Дун! Гьасухъ гӏенекке нуж!
6Гьеб рагӏидал гӏасиго хӏинкъун кӏалагъоркье ккана муридал. 7Аскӏове вачӏун, гьезда кверги хъван, Гӏисаца абуна:
– Хӏинкъуге! Тӏаде рахъа! – ян.
8Эхеде рорхун ралагьидал цохӏо Гӏиса тун батӏияв чи гьезда вихьичӏо.
9Гьеб магӏардаса гӏодоре рещтӏунеб мехалъ Гӏисаца гьезда лъазабуна Гӏадамил Лъимер хваралъуса вахъинегӏан гьаб нужеда бихьараб гӏаламаталъул лъиданиги цӏар бахъугейилан. 10Муридаз Гӏисада гьикъана:
– Щайха диниял гӏалимзабаз абулеб цин цеве Иляс авараг вачӏине кколилан?
11Гьезие жаваб гьабун Гӏисаца абуна:
– Битӏараб буго, Иляс вачӏине кколаан ва гьес кинабго къачӏан тезеги кколаан. 12Дица нужеда абулеб буго: Иляс вачӏун вукӏана, амма гӏадамазда гьев лъачӏо, жидее бокьанщинаб гьабуна гьесие, Гӏадамил Лъимадуеги гӏазаб кьезе буго гьез.
13Гьебмехалъ муридазда бичӏчӏана гьес Яхӏя аварагасул хӏакъалъулъ бицунеб букӏин.
Гӏисаца сахлъизавула жундуз ккурав цо вас
14Халкъалда аскӏоре тӏадруссун гьал щведал, аскӏове вачӏун накабазда чӏун, цо чи гьардана Гӏисада:
15– Я, Бетӏерчӏахъад! Дир васасда гурхӏа мун. Унти бачӏун лъугьуна гьев, кӏудияб гӏазаб буго гьесие: цин цӏадулъе вортула, цин лъадалъе вортула. 16Дица вас дур муридазухъе вачун вукӏана, амма гьезда кӏвечӏо гьев сах гьавизе.
17Гьебмехалъ Гӏисаца абуна:
– Гьай, нуж иман гьечӏеб ва пасатаб наслу! Кидалъагӏан дун нужеда цадахъ вукӏинев ва кидалъагӏан дица нуж хӏехьелел! Гьаниве ваче гьев дида аскӏове.
18Гӏисаца амру гьабидал, васасул чорхолъа къватӏибе лъугьана жен. Гьебсагӏат сахлъана гьев.
19Батӏаго аскӏореги рачӏун, муридаз Гӏисада гьикъана:
– Нижеда щай кӏвечӏеб доб жен бачахъизе?
20Гӏисаца гьезда абуна:
– Божи-иман дагьаб бугелъулха нужелъ! Хӏакълъун абулеб буго дица нужеда: горчицаялъул хьодул мугьгӏанасеб божи нужелъ бугони, нужеца гьаб мегӏералда абила гьаниса бахъун добегӏан айилан, ва бахъун добегӏан ина гьеб. Гьедин нужеда кӏолареб жо щибниги букӏине гьечӏо#17:20 Инжилалъул цо-цо хъвай-хъвагӏаязда ратула гьадинал калимабиги: 21 Амма доб тайпаялъул жундул рачахъизе кӏола гӏицӏго дугӏаялдалъун ва кӏал кквеялдалъун. .
Гӏазаб-гӏакъубаялъул хӏакъалъулъ цоги нухалъ
22Гьениса рахъун Галилеялде унаго, Гӏисаца муридазда абуна:
– Гӏадамил Лъимер кьезе вуго гӏадамазда кодове. 23Гьез гьев чӏвала ва лъабабилеб къоялъ чӏаголъизеги чӏаголъила.
Гьел цӏакъ пашманлъана.
Мукъадасаб Рукъалъе кьолеб магъалоялъул хӏакъалъулъ
24Гьал Капернаумалде щведал, Мукъадасаб Рукъалъе магъало бакӏарулев чи вачӏана Пётрида аскӏове:
– Дур Мугӏалимас кӏиго диргьам магъалоялъе кьоларебищ? – ан гьикьизе.
– Кьола! – ян абуна Пётрица 25ва Гӏисада аскӏове жаниве лъугьана. Пётрица кӏал рагьилалдего, Гӏисаца гьесда абуна:
– Дуда кин кколеб, Симон, дуниялалъул парччахӏзабаз магъало яги налог лъихъа босулеб? Жидеразухъагойищ яги чияразухъайищ?
26Чияразухъа, – ян жаваб кьуна гьесие Пётрица.
– Гьедин батани, жидерго гӏадамазда тӏадаб гьечӏогуриха гьеб кьезе, – ян абуна Гӏисаца. 27Амма гьал къварид гьарун щай нилъее. Вахъа, мун хӏорил рагӏалде а, гъармахъ рехун ччугӏа кквезе. Тӏоцебе ккураб ччугӏил кӏалдиве вакке. Гьениб батила дуда ункъо диргьамалъул гӏарац. Цинги гьеб дуего гӏологи дие гӏологи магъалоялъе кье.
Currently Selected:
Матфейица бицараб Рохалил хабар 17: AvrNT
Highlight
Share
Copy
Want to have your highlights saved across all your devices? Sign up or sign in
© Библия таржама гьабиялъул институт Москва 2008