Acts 1

Anernerem Tanqilriim Akqutkumallra

1Ciuqliit kalikautekellrenka elpenun Theophilus-aaq, qaneryarangqertut Jesus-aam calillranek, ayuqucirtuutekellranek-llu ayagniqarraallranek, 2qilagmun mayullra engelkarrluku, Anernerkun Tanqilriakun alerquumariamiki elitnaurani cucukellni. 3Nangteqellmi-llu kinguani tangercet'lartuq ellaitnun yuucimitun, nallunaitqapiggluni; yuinaagnek-llu malrugnek ernengqerluni qavcirqunek alairvik'larai, Agayutem-llu Angayuqauvia qalarutekluku. 4Quyungqallratni-llu inerqurai Jerusalem-aamek ayaasqevkenaki, tau͡gaam utaqasqelluku Aatam akqutii, tauna-gguq, “Niitellerci wangnek. 5Wani-wa John-aaq ilumun angllurcecilartuq merkun. Tau͡gaam elpeci ak'anivkenaci anglluumaciquci Anernerkun Tanqilriakun.”

6Quyurrvikellratni aptaat qanerluteng, “Ataneq, uum-qaa nalliini Israel-aam angayuqauvia ataam piurteqataran?” 7Kiugai-llu, “Elpeci nallunrilkaunritarci picirkaq ciunerkaq-llu, Aatam kiimi pisqutkarkaungaku. 8Tau͡gaam elpeci Anernermek Tanqilriamek pingumarikuvci pinimek cikiumaciquci; nallunairistekciqamci-llu Jerusalem-aami, Judea-mi-llu, Samaria-mi-llu, nunani-llu tamaitni.”

Jesus-aam Mayullra

9Makunek-llu qanrucimariamiki tangvainanratni pakmavircecimauq, amirlum-llu naligaa tangrrunrirtelluku. 10Ayallrani-llu qilatmun ciugngaurtut, tangerrluku-llu, angutek malruk caniatni nangengqalriik, qatellrianek aturlutek. 11Taukuk qanertuk ellaitnun, “Galilee-armiuni, ciin nangengqaceci qilagmun ciugngaluci? Una Jesus-aaq, elpecen̄ek pakmavircecimalria, tuaten ayuqluni cali tekitarkauguq tangrrucirpecetun ayallrani qilagmun.”

Matthias-aamek Cucukillrat, Judas-aam Cimirkaanek

12Tuaken Olive-aam Ingrianek aterpagcimalriamek utertut Jerusalem-aarmiunun, tamana Sabbath-aam pekcaraatun yaaqsigtauq. 13Nunarpagnun-llu tekicameng, enem qullianun mayurtut quyurrvik'lallermeggnun. Taukut atrit waniwaugut: Peter, John-aaq-llu, James-aaq, Andrew-llu, Philip-aaq, Thomas-aaq-llu, Bartholomew, Matthew-llu, James-aaq-llu Alphaeus-aam qetunraa, Simon-aaq-llu Zealot-aaq, Judas-aaq-llu James-aam anelgutii. 14Ukut tamarmeng cumiggluteng piicagtu'rtut umyuallgutekluteng, ilaluteng-llu arnanek, Mary-mek-llu Jesus-aam aaniinek, anelgutainek-llu cali.

15Erenret taukut iliitni Peter nangertuq taukut ukverumalriit akunliitnun (tuani quyungqalriit yuinaat arvinelgen engelkartait) qanrutai-llu, 16“Ilamaa, igat piciurtarkaullruut, Anernerem Tanqilriim qanellri, David-aakun, Judas-aaq pitekluku, tauna Jesus-aam tegustain apertuutestiit. 17Wani-wa ilakellruyaaqerput, caliamten̄ek-llu avgucimallruluni.” 18Tauna assiilngillmi akiliutiinek nunautmek kiputellruuq, kanaqerluni-llu ullirtuq, qilui-llu tamarmeng anluteng. 19Tamana-llu nallunriraat Jerusalem-aarmiut tamarmeng. Taumek qaneryaramegteggun waten aterpagtaat: Akeldama, mumiggluku kangingqerrluni waten: “Nuna Augtalek.” 20“Wani-wa kalikani Psalm-ani igausngauq ‘Nunii yuilqerrurrli, yuum-llu nunakenrilliu, qaunqesten͞gucia-llu allam caliaqsaguskiliu.’ 21Taumek angutmek cucukiarkaugukut, imumirpak ilakellemta iliitnek, Atanrem Jesus-aam akunlemten̄etellrani. 22Anglluuciminek John-aamun ayagnirluni, qilagmun-llu maaken wangkutnek ayaucini engelkarrluku; tamakut iliit nallunairisten͞gurrluku Jesus-aam unguirucianun.” 23Malruk-llu umyuaqagket: Joseph-aaq-wa Barsabbas-aaq, aterluni-llu Justus-aamek, aipaa-llu Matthias-aamek atengqertuq. 24Waten-llu piicagtut, “Ataneq, elpet nallunritaten yuut tamarmeng ircaquit; nasviskut ukuk naliagnek cucukucirpenek 25tegusqelluku Judas-aam caliara, apostle-aarucia-llu, pegcaku taum, nunakani ullagnaluku.” 26Nall'arcetaarutkagket-llu; nall'arcetaarutiit-llu Matthias-aamun piuq; apostle-aat-llu taukut qulen ataucimek cipnelget ilaksagutaat.

Currently Selected:

Acts 1: YPK

Highlight

ਕਾਪੀ।