LUKAS 3

Ha' tebaraa' éh benara' Yohanes Batis

(Mat. 3:1-12, Mrk. 1:1-8, Yoh. 1:19-28)

1Tovoo' avéé' jah poloo' lemah ta'un lem Tiberias raja' réh, inah sioo' Tuhan pané ngan Yohanes. Tovoo' inah péh Pontius Pilatus éh gabenor tong tana' Yudea, ngan Herodis éh pengeja'au peritah tong tana' Galilia, ngan padéé' néh Pilipus pengeja'au peritah tong tana' Ituria ngan tana' Terakhonitis, ngan Lisanias éh pengeja'au peritah tong tana' Abilene. 2Kepéh Hanas rawah Kayapas, inah éh imam éh Pengeja'au kekat imam. Tovoo' inah Allah pu'un pané ngan Yohanes anak Sakaria hun néh to mokoo' tong ahang tana'. 3Inah Yohanes lakau tutuh tana' tong baa' Yordan ke' néh nebaraa' kelunan. Ka' ha' néh, Jian keh piso jin kesa'at keh ngan batis, dokoo' Allah omok mega' penyala' keh, ha' néh. 4Inah Yohanes pu'un maneu' éh pekua' ha' lem surat nabi Yesaya. Ka' ha' néh,

Pu'un jah kelunan mejui tong ahang tana', Ka' ha' jui néh,

Jian keh petenup jalan ngan Tuhan

ngan pepejek éh.

5Kekat sawa' keh tavun éh,

kekat berusu' ngan tokong keh ngediva' éh,

kekat jalan éh pakok keh pepejek éh,

kekat lebek keh maneu' éh pedereng,

6 # Yes. 40:3-5 Boh kekat kelunan omok na'at

Tuhan Allah éh purip kelunan.

7 # Mat. 12:34, 23:33 La'ah pinaa' kelunan tai tavin Yohanes menyat éh ngebatis réh. Ha' Yohanes ngan réh, Ka'ah pekua' torok awah, kineu' keh seruh keh omok kelap jin ukum Allah ke' néh bé' teneng tong ka'ah? Ukum inah danii' mu'un éh juk avéé' tong keh. 8#Yoh. 8:33 Jian keh maneu' barék keh teneng, inah éh pepoléng keh lepah nelikut jin kekat kesa'at keh. Boh keh omok kelap jin ukum inah. Mai keh bara' ka', Abraham éh tepun améé', ha'. Mai keh ngelan tong inah. Uban Allah pu'un penyukat Néh, bateu' péh ke' Néh suai malui anak, éh anak-ayam Abraham, omok éh. 9#Mat. 7:19 Hun iteu' péh pu'un kapak lepah pedah ke' néh tebeng tong lakat kayeu'. La'ah kekat inan kayeu' éh bé' ngebuaa' ngan buaa' éh jian, tenebeng néh ngan nebet néh dalem luten, ha' néh.

10Pu'un irah kelunan neteng éh, ka' ha' réh, Hun néh kenat kineu' jalan mé' kepéh, ha' réh.

11Ha' Yohanes ngan réh kepéh, Kelunan éh pu'un duah kerayung, jian éh mena' jah ngan kelunan éh bé' pu'un kerayung, kenat péh kelunan éh pu'un ka'an, jian éh petulat ka'an inah ngan irah éh bé' pu'un ka'an, ha' néh.

12 # Luk. 7:29 La'ah pu'un irah kelunan kepéh éh alaa' sukai tai tavin Yohanes ke' réh menyat éh ngebatis réh. Ka' ha' réh neteng éh, O guru, ineu' éh tekep ke' mé' maneu? Ha' réh ngan néh. 13Ha' Yohanes mipa réh, Mai keh menyat livah kelunan mutaa' jin éh tekep nalaa' keh, ha' néh.

14Pu'un irah seradu kepéh neteng Yohanes, ka' ha' réh ngan néh, Kineu' lah améé'? Ineu' éh tekep ke' mé' maneu'? Ha' réh.

Ha' néh mipa réh, Mai keh ngedai kelunan dokoo' keh omok alaa' livah réh pinaa', bang jian keh alaa' éh sukup tong gaji keh nah, ngan jian kenin. Mai keh magat juk alaa' éh pelapah pinaa' jin inah, ha' néh.

15Betéé' kenin irah pinaa', kelem réh, Barang Yohanes teu' péh Kristus éh pejajii' Allah, kelem réh. 16Uban réh seruh éh kenat, inah Yohanes pané ngan réh, Akeu' éh ngebatis ka'ah dalem baa', bang pu'un jah kelunan éh saa' murin iteu' kepéh éh juk ngebatis keh neu' Sahéé' Ni'ai ngan luten néh. Kelunan inah éh pelapah ja'au jin akeu', la'ah usah ké' péh bé' tekep muka talei' kasut Néh. 17Iah juk napan kekat lo'ong parai ke' néh bet éh upih néh ngan ke' néh tipun kekat lo'ong parai lem luvung néh, bang kekat upih néh, notong néh lem luten éh bé' omok pata', ha' néh.

18La'ah neu' kuraa'-kuraa' arong ha' tebaraa' éh jah, inah jalan Yohanes bara' Rengah Jian ngan réh. 19Jah koléé' Yohanes pané meta' Herodis éh pengeja'au peritah tong tana' Galilia, uban Herodis nah alaa' do padéé' néh, ngaran redo inah Herodias, ngan pinaa' arong kesa'at éh neu' Herodis nah kepéh. 20#Mat. 14:3-4, Mrk. 6:17-18 Herodis maneu' penyala' pelapah ja'au kepéh uban néh ngamit Yohanes ngan maneu' éh lem lamin tutup.

Yésus benatis Yohanes

(Mat. 3:13-17, Mrk. 1:9-11)

21La'o Yohanes ngebatis kelunan pinaa', Yésus péh benatis néh kepéh. Tovoo' Yésus sebayang pukap langit 22#Kej. 22:2, Msm. 2:7, Yes. 42:1, Mat. 3:17, Mrk. 1:11, Luk. 9:35 ngan Sahéé' Ni'ai tuhun tong Néh, layan néh barei'-okoo' juhit punai. La'ah pu'un ha' jin langit, ka' ha' Néh, Ka'au' néh Anak Ké' éh penika Ké', bang tong Ka'au' awah Akeu' payoo' kenin ha' Néh.

Kekat ngaran pohoo' tepun Tuhan Yésus

(Mat. 1:1-17)

23La'ah tong bu'un Yésus tai maneu' kereja' Néh, ngioo' urip néh tong keteleu' poloo' ta'un inah Éh tai. La'ah éh kenioo' kelunan, Yésus nah anak Yusup éh anak Éli. 24Éli inah anak Matat, Matat inah anak Lewi, Lewi inah anak Malkhi, Malkhi inah anak Yana, Yana inah anak Yusup, 25Yusup inah anak Matica, Matica inah anak Amos, Amos inah anak Nahum, Nahum inah anak Hesli, Hesli inah anak Nagi, 26Nagi inah anak Ma'at, Ma'at inah anak Matica, Matica inah anak Simei, Simei inah anak Yusik, Yusik inah anak Yoda, 27Yoda inah anak Yuana, Yuana inah anak Risa, Risa inah anak Sorubabel, Sorubabel inah anak Sealtiel, Sealtiel inah anak Néri, 28Néri inah anak Malaki, Malaki inah anak Adi, Adi inah anak Kusam, Kusam inah anak Émodam, Émodam inah anak Ér, 29Ér inah anak Yosua, Yosua inah anak Elieser, Elieser inah anak Yorim, Yorim inah anak Matat, Matat inah anak Lewi. 30Lewi inah anak Simeon, Simeon inah anak Yehuda, Yehuda inah anak Yusup, Yusup inah anak Yunam, Yunam inah anak Elyakim, 31Elyakim inah anak Melea, Melea inah anak Mina, Mina inah anak Matata, Matata inah anak Natan, Natan inah anak Daud, 32Daud inah anak Isai, Isai inah anak Obed, Obed inah anak Boas, Boas inah anak Salmon, Salmon inah anak Nahason, 33Nahason inah anak Aminadab, Aminadab inah anak Admin, Admin inah anak Arni, Arni inah anak Hesron, Hesron inah anak Peres, Peres inah anak Yehuda, 34Yehuda inah anak Yakub, Yakub inah anak Ishak, Ishak inah anak Abraham, Abraham inah anak Terah, Terah inah anak Nahor, 35Nahor inah anak Sarug, Sarug inah anak Rehu, Rehu inah anak Peleg, Peleg inah anak Eber, Eber inah anak Selah, 36Selah inah anak Kanan, Kanan inah anak Apasat, Apasat inah anak Sem, Sem inah anak Noh, Noh inah anak Lamék, 37Lamék inah anak Metusalah, Metusalah inah anak Henokh, Henokh inah anak Yared, Yared inah anak Mahlalel, Mahlalel inah anak Kanan, 38Kanan inah anak Énos, Énos inah anak Sét, Sét inah anak Adam, Adam inah anak Allah.

Currently Selected:

LUKAS 3: PNT

Highlight

ਕਾਪੀ।