LUKAS 2

Tong lohoo' Yésus

(Mat. 1:18-25)

1Tovoo' inah péh raja' Agustus nyohoo' kekat kelunan éh lem nihau néh tai moléé' tong tana' réh bu'un ke' réh bara' ngaran réh ngan kelunan éh tai alaa' ngaran réh. 2Inah éh bu'un réh alaa' ngaran kelunan sioo' Kirenius gabenor réh tong tana' Siria. 3Uban sohoo' Agustus kenat, pesiget betah moléé' tong pohoo' réh bu'un kepéh ke' néh alaa' ngaran néh.

4Tovoo' inah Yusup pu'un mokoo' tong leboo' Nasaret éh tong tana' Galilia, boh éh moléé' kepéh tai tana' Yudea tong leboo' Daud, ngaran leboo' inah Bétléhém. Yusup tai sinah uban néh ngepohoo' Daud. 5Iah tai ke' réh nyurat ngaran néh pemung ngan Meriam éh tunang néh, éh nemaléé' nah. 6Hun roh pu'un tong Bétléhém, sakit éh, sinah éh nganak 7jah anak lakei', anak néh éh tuken, iah Sevilit éh ke' néh pepegen éh lem jalan réh pakan ka'an olong uban bé' pu'un jalan roh mokoo' tong lamin sakai uban kelunan pinaa'.

Tong meliket poléng ngan kelunan éh mavaa' domba

8Tovoo' merem inah pu'un kelunan mokoo' tong tana' mavaa' domba. 9Tioo pu'un jah meliket Tuhan poléng tong ta'an réh ngan pengaren Tuhan nawa tutuh réh. Medai lah réh, 10Bang ha' meliket ngan réh, Mai keh medai! Uban akeu' juk bara' rengah éh jian ngan keh, rengah iteu' juk mihin kekat kelunan murung kenin. 11Hun iteu' pu'un jah anak maréng tong leboo' Daud éh juk purip ka'ah, inah éh Kristus éh Tuhan. 12Inah jalan keh omok jam éh, Anak inah sevilit réh éh, pepegen réh lem jalan réh pakan ka'an olong ha' meliket nah ngan réh.

13La'ah pinaa' meliket tuai kepéh pemung ngan meliket inah, ke' réh nyanyi mejing Allah. Ha' réh,

14Matek maren néh Allah éh tong seruga,

petunuk tong tana' ngan kekat kelunan

éh payoo' tong ta'an Néh, ha' réh.

15Hun kekat meliket inah lepah moléé' tai seruga kepéh, irah éh mavaa' domba nah pepané, ka' ha' réh, Tuai tam tai Bétléhém, dokoo' tam na'at kekat éh benara' Tuhan ngan tam ri', ha' réh.

16Rigah réh tai tavin Meriam ngan Yusup, inah réh na'at anak si'ik inah pegen lem jalan réh pakan ka'an olong.

17Hun réh na'at Éh, pu'un réh tosok kekat éh benara' meliket iri' ngan irah inah kepéh. 18La'ah béé kenin kekat kelunan éh menéng kekat ha' éh benara' kelunan inah ngan réh. 19La'ah Meriam mihau kekat ha' inah lem kenin néh. 20La'ah kelunan éh mihau domba nah, moléé' réh ngan nyanyi mejing Allah, ngeja'au ngaran Néh, uban kekat éh nenéng réh ngan éh ta'an réh pu'un éh pekua' éh benara' meliket ngan réh nah.

Tong réh nyunat Yésus ngan maneu' ngaran Yésus

21 # Ima. 12:3, Luk. 1:31 Ayah dau la'o lohoo' Néh tovoo' réh nyunat éh, irah maneu' ngaran néh Yésus, ngaran éh neu' meliket teka Meriam boré tong néh rai.

Tong réh mihin Yésus tai Umaa' Allah

22Hun sukup jaka' Yusup ngan Meriam kivu sohoo' lem Surat Musa éh bara' tong adet irah Yahudi peti'ai redo réh la'o réh nganak, Lakau roh tai Yerusalem mihin anak inah ke' roh mena' éh ngan Tuhan. 23#Kel. 13:2, 12 Uban ka' ha' lem Surat Musa, Siget-siget anak tuken éh Lakei' inah tekep nena' ngan Tuhan ha' néh. 24Inah kepéh rawah tai kenat dokoo' roh mena' pengena' roh ngan Tuhan, kivu ha' lem Surat Musa nah, ka' ha' néh, Duah juhit éh barei'-okoo' juhit punai, hun néh bé' kenat duah anak punai, ha' surat inah.

25Tovoo' inah pu'un jah kelunan mokoo' tong Yérusalem, ngaran néh Simeon. Kelunan inah jian ngan medai tong Tuhan, ngan kebit kenin iah mena hun kelunan Yahudi pawah jin kekat penusah réh. La'ah Sahéé' Ni'ai pu'un tong Simeon, 26ngan neu' Sahéé' inah, inah iah jam bé' iah matai jak hun néh bé' sakui na'at Kristus éh pejajii' Tuhan. 27La'ah Sahéé' Ni'ai majak éh tai tong Umaa' Allah. Inah tinen tamen anak si'ik nah mihin anak inah masek tong Umaa' Allah, ke' roh kivu kekat adet pekua' sohoo' lem Surat Musa. 28Inah Simeon alaa' anak inah ngan mikop éh ke' néh mejing Allah, ha' néh.

29O Tuhan, hun iteu' kekat éh benara' Ko' ngan ké' rai, pu'un éh lepah avéé' tenéh,

ngan omok lah ku' moléé' ngan Ko' ngan jian kenin.

30Uban pu'un ku' lepah na'at

Iah éh nena' Ko' ke' Néh purip kekat kelunan.

31Pu'un Ke' ngevéléé' ngan mena' éh kenat tong ta'an kekat kelunan.

32Tong kelunan éh tengéé' pohoo' jin irah Yahudi, Iah pu'un nawa tong réh, dokoo' réh omok jam Ke' kepéh.

Tong pohoo' Yahudi éh kevéléé' Ko', iah pu'un mihin réh pu'un pengaren ngan kenajung réh, ha' néh.

33Béé kenin tinen tamen anak inah menéng ha' Simeon bara' kenat. 34La'ah Simeon menyat Tuhan nolong réh teleu' panak inah, ngan iah bara' ngan Meriam éh tinen anak si'ik nah, Allah lepah ngevéléé' Anak inah dokoo' Néh ngera' jelua' kelunan Yahudi ngan ngajung jelua' kepéh. Allah nyohoo' Éh tuai dokoo' Néh jah telana' jin Allah, bang nebet réh awah éh, 35inah néh éh pepoléng kenin réh éh pelim. Ngan ka'au' pu'un barei'-okoo' pega' posoo' neu' kepua kenin ko', ha' néh.

36La'ah pu'un jah redo ngaran néh Hana, iah jah nabi Tuhan. Ngaran tamen redo inah Panuel, éh jin betah Asyer, mukun mu'un redo inah. Tujuu' ta'un de' ke' kelebéé' néh pemung ngan lakei' néh, 37la'o inah baleu' éh avéé' ayah poloo' pat ta'un. Mokoo' tengéé' éh tong Umaa' Allah. Siget dau ngan siget merem iah seva' Allah, ngan kelaset awah ke' néh sebayang. 38Tovoo' Simeon réh teleu' inah pu'un keto tong Umaa' Allah, inah redo inah masek kepéh ke' néh mejing Allah uban anak si'ik inah. Bé' éh omok ma'o tosok ngan bara' anak inah ngan kekat kelunan éh mena Allah ngelepu Yérusalem jin kekat penusah réh.

Tong réh teleu' panak moléé' tai Nasaret

39 # Mat. 2:23 La'o Yusup ngan Meriam maneu' kekat sohoo' lem Surat Musa, moléé' roh kepéh tong tana' Galilia tong leboo' Nasaret éh leboo' roh. 40La'ah anak si'ik inah vat-vat ngan gahang, ngan jam seruh ngan sukup kenin lah, ngan Allah pika éh ngan mihau éh.

Yésus mokoo' keto tong Umaa' Allah rai

41Siget ta'un tinen tamen Yésus tai leboo' Yérusalem tovoo' jaka' Dau Ja'au Paska'. 42Sioo' urip Yésus jah poloo' duah ta'un, tai réh Dau Ja'au inah barei' éh kemalai réh. 43Hun dau ja'au inah lepah ma'o, tinen tamen néh peleka moléé', bang anak roh Yésus to mokoo' tong leboo' Yérusalem, bang bé' rawah jam éh kenat. 44Rawah seruh éh kivu panak roh moléé' nah. Uban rawah seruh éh kenat inah rawah lakau jah dau kejuu', boh roh pitah éh belah panak roh. 45Bang hun rawah jam éh bé' pu'un kivu irah panak roh, inah rawah moléé' murin tai Yérusalem kepéh ke' roh pitah éh sitai. 46Tong keteleu' dau boh roh na'at éh tong Umaa' Allah, mokoo' ngan irah guru éh nebaraa' irah Yahudi tong adet réh, ke' Néh menéng ha' réh ngan ke' Néh neteng réh kepéh. 47Kekat irah éh menéng ha' néh pané, béé kenin réh uban Néh jam seruh ngan jam mipa ha' réh. 48Tamen tinen Néh péh béé kenin na'at Éh kenat. Ha' tinen Néh ngan Néh, Nak, uban ineu' Ke' maneu' kenat? Tusah kenin amo tamam pitah Ke' kenat ne', ha' néh ngan Néh.

49Ha' Yésus mipa éh, Uban ineu' koh tawang pitah Akeu', bé' koh jam adang Akeu' tekep pu'un tong lamin Tamen Ké' kei, ha' Néh. 50Bang bé' rawah jam ha' Néh kenat.

51Moléé' Yésus kivu roh tai Nasaret kepéh, ngan Iah kivu kekat sohoo' roh. Tinen Néh mihau kekat ha' inah lem kenin néh. 52Yésus makin ja'au ngan jam seruh, ngan Iah ngepayoo' kenin Allah ngan kelunan péh.

Currently Selected:

LUKAS 2: PNT

Highlight

ਕਾਪੀ।