MARKA 14
14
Isua man an tum
(Mt. 26:1-5; Lk. 22:1,2; Jn. 11:45-53)
1Tin, ni hnih hnuah Kalhlên Kût leh Chhang Dawidim telh loh Kût a awm dâwn a; puithiam lalte leh Dân zirtîrtute chuan amah chu ngamthlêma mana tihhlum theihna kawng an zawng a, #Exod. 12:1-27. 2“Kût lai chuan ni suh se, mipui zîngah buaina a chhuak dah ang e,” an ti a ni.
Isua Bethani-a hriak thih
(Mt. 26:6-13; Jn. 12:1-8)
3Bethani-ah, phâr Simona ina chaw a kîl laiin alabasta bûra nard hriak rimtui hlîr hlak, to tak kengin hmeichhe pakhat a lo kal a, alabasta bur chu a tikeh a, a lu-ah a leih ta a. #Lk. 7:37-38; Deut. 15:11. 4Chuta mi ṭhenkhat chu an lungni lo hle a, anmahni zîngah, “Engati nge hriak rimtui hi a tihriral tâk mai chu le? 5Duli zathum aia tam#14:5 Mss ṭhenkhatah ‘aia tam’ tih a tel lo. man a ni si a; hralha, mi retheite pêk zâwk âwm,” tiin chu nu chu an sawisêl a. 6Isua erawh chuan, “Eng mah tih suh u, engah nge in tihbuai? Ka chunga a tih hi thil ṭha ti a ni e. 7In zîngah mi retheite eng lai pawhin an awm a, in duh hun hunah thil ṭha in tihsak thei a; kei erawh chu in zînga awm reng tûr ka ni lo. 8A tih theih ang chu a ti ta a, ka taksa hi phûm tûrin hriak a lo hnawih lâwk a nih hi. #Jn. 19:40. 9Thu dik ka hrilh a che u, khawvêl pum puia chanchin Ṭha hi an hrilhna apiangah, he nu thil tih pawh hi amah hriat reng nân an sawi ve zêl ang,” a ti a.
Judan Isua mantîr a tum
(Mt. 26:14-16; Lk. 22:3-6)
10Tin, Sâwmpahnihte zînga mi pakhat, Juda Iskariota kha Isua mantîr tumin puithiam lalte hnênah a va kal a. 11Chu chu an lo hriatin an lâwm hle a, pawisa pêk an tiam ta a. Tichuan, mantîr dân tûr remchâng a zawng ta a.
Zirtîrte nêna Kalhlên Kût hman
(Mt. 26:17-26; Lk. 22:7-14,21-23; Jn. 13:21-30)
12Chhang Dawidim telh loh Kût ni hmasa ber, Kalhlên Kût berâmno an talh ṭhinna ni-ah chuan, a zirtîrten, “Khawi hmunah nge Kalhlên kût chaw i ei tûr va buatsaih i la i duh?” an ti a. 13Tichuan, zirtîrte zînga mi pahnih a tîr a, “Khawpuiah va kal ta ula, pa pakhat hlumbêla tui chawiin a lo tâwk ang che u; ani chu zui ula, 14a luhna in neitu hnênah chuan, ‘Zirtîrtu chuan, Ka zirtîrte nêna Kalhlên Kût chaw kan eina tûr pindan chu khawiah nge? a ti e,’ va ti ang che u. 15Amah ngei chuan pindan chungnung zau tak, engkim awm, peih diam a entîr ang che u, chutah chuan kan tân va buatsaih tawh u,” a ti a. 16Tichuan, zirtîrte chu an chhuak a, khawpuiah chuan an va kal a, an hnêna a sawi ang ngei khân an va hmu a, Kalhlên Kût chaw chu an buatsaih ta a.
17Khua a lo tlai lam chuan Sâwmpahnihte nên an va kal ta a. 18Chaw an kîl a, an ei lai chuan Isuan, “Thu dik ka hrilh a che u, in zînga pakhat, mi kîlpuitu ngei hian, mi mantîr dâwn a ni,” a ti a. #Sam. 41:9. 19An mangang ta hle a, a mal malin a hnênah, “Kei chu ka ni lâwng chu maw?” an ti ta ṭheuh va. 20Ani chuan, “Sâwmpahnihte zînga mi, thlêng mi zenpuitu ngei hi a ni. 21Mihring Fapa mantîrtu tûr mihring chung chu a pik e. Chu mihring chu piang lo se a tân a ṭha zâwk ang,” a ti a.
Lalpa Zanriah hman ṭan
(Mt. 26:26-30; Lk. 22:14-20; 1 Kor. 11:23-25)
22Chutia an ei lai chuan Isuan chhang a la a, malsâwmna a sawi a, a phel a, an hnênah a pe a, “La rawh u, hei hi ka taksa a ni,” a ti a. #Mk. 6:41; 8:6; Lk. 24:30. 23No pawh chu a la a, lâwmthu a sawi zawhin an hnênah a pe a, nova mi chu an za chuan an in ta ṭheuh va. 24Ani chuan, “Hei hi ka thisen, thuthlunna,#14:24 Mss ṭhenkhatah ‘thar’ tih a tel. mi tam tak tâna chhuak tûr chu a ni. #Exod. 24:8; Jer. 31:31-34; Heb. 9:20. 25Thu dik ka hrilh a che u, Pathian rama a thar ka in hun a thlen hma zawng, grep rah tui hi ka in leh tawh lo vang,” a ti a. 26Hla an sak zawh chuan Oliv tlâng panin an chhuak ta a.
Peteran a phat tûr thu
(Mt. 26:31-35; Lk. 22:31-34; Jn. 13:36-38)
27Isuan an hnênah, “In za-in mi hawisan vek ang. ‘Berâmpu chu ka vua ang a, berâmte chu an darh ang,’ tih ziak a nih kha.#Zak. 13:7; Jn. 16:32. 28Nimahsela, kaihthawha ka awm hnuin Galili ramah ka lo kal hmasa ang,” a ti. #Mt. 28:16; Mk. 16:7. 29Petera erawh chuan, “An vaiin hawisan vek che mah se kei zawngin ka hawisan hauh lo vang che,” a ti a. 30Isuan a hnênah, “Thu dik ka hrilh a che, zâninah,#14:30 Grik-ah ‘vawiin’ tih a ni. zânin la la hian, âr vawi hnih a khuan hmain nangin vawi thum mi phat ngei ang,” a ti a. 31Ani erawh chuan khauh takin, “I thihnaah chuan thi ve dâwn pawh ni ila, ka phat tawp lo vang che,” a ti a. Chutiang bawkin an za chuan an ti ta ṭheuh va.
Gethsemani huana ṭawngṭai
(Mt. 26:36-46; Lk. 22:39-46)
32Huan pakhat, Gethsemani an tih chu, an thleng a, a zirtîrte hnênah, “Ka ṭawngṭai hlânin hetah hian lo ṭhu rawh u,” a ti a. 33Petera te, Jakoba te, Johana te chu a hruai a. Nasa takin a thlaphâng a, a mangang ta êm êm a. 34An hnênah, “Ka thla a phâng hle mai a! Thihpui tham hial a ni; hetah hian awm ula, lo inrâlring rawh u” a ti a. #Jn. 12:27. 35Hma lamah tlêm a va kal hlek a, leiah a bawkkhup a, chumi hun chuan amah a pelh mial theih nân a ṭawngṭai a. 36“Abba, ka pa, engkim i ti thei a, he no hi mi lâk sawnsak rawh; nimahsela, keima thu ni lovin nangma thu thu ni zâwk rawh se,” a ti a. #Rom. 8:15; Gal. 4:6; Mk. 10:38; Jn. 18:11.
37A lo kîr a, anniho muthlu chu a rawn hmu a; Petera hnênah “Simon, i muthlu a ni maw? Dârkâr khat chauh pawh i inrâlring thei na nge? 38Thlêmnaa in tlûk luh loh nân invêngin ṭawngṭai rawh u; thlarau zawngin a huam a, tisa erawh chu a chak lo va ni,” a ti a. #Mt. 6:13; Lk. 11:4. 39A kal leh a, a thu sawi ngai sawiin a va ṭawngṭai leh a. 40A lo kîr leh chuan an muthlu chu a rawn hmu leh a, an mut a chhuah êm avângin chhân ngaihna pawh an hre lo. 41A lo kîr vawi thumnaah chuan, “In la muthluin in la inthlahdul ta cheu a ni maw? A tâwk ta#14:41 Mss ṭhenkhatah ‘tâwpna a lo thleng ta’ tih a ni. Tangka inpêknaah ‘ka dawng e,’ tih nân he thu hi an hmang ṭhîn. e, a hun chu a lo thleng ta; ngai teh u, Mihring Fapa hi mi sualte kûtah hlan a nih dâwn tâk hi. 42Tho teh u, i kal ang u. En teh u, mi mantîrtu tûr pawh a lo hnaih tâk hi,” a ti a.
Isua an man
(Mt. 26:47-56; Lk. 22:47-53; Jn. 18:3-12)
43Chutia a la ṭawng lai mêk chuan Juda, Sâwmpahnihte zînga pakhat kha a lo thleng ta nghâl a, ama rual chuan puithiam lalte, Dân zirtîrtute leh upate tirh mi tam tak, khandaih leh talhtum kengin an lo thleng ta rup a. 44A mantîrtu tûr khân chhinchhiahna tûr a lo hrilh lâwk tawh diam a, “Ka fawha chu amah chu a ni ang, man ula, ngun taka vêngin hruai ang che u,” tiin. 45A lo thlen veleh Isua chu a rawn pan nghâl, a, “Rabi,” tiin a fâwp ta ngawih ngawih a. 46Isua chu an chelh a, an man ta a. 47A kianga dingte zînga pakhat chuan khandaih a phawi a, puithiam lalber bawih chu a sât a, a beng a hlawisak a. 48Chûngho chu Isuan a bia a, an hnênah, “Suamhmang man tûr ang ziazângin khandaih leh talhtum kengin min man tûrin in lo thawk a ni maw? 49In zîngah tempulah ni tin mi ka zirtîr ṭhîn a, mi man si lo. Lehkha Thu chu lo thlêng tûr rêng a ni e,” a ti a. #Lk. 19:47. 50Zirtîrte chuan amah chu an hawisan a, an tlânchhiatsan ta a.
Tlangvâl saruaka tlânchhia
51Tlangvâl pakhat, puan zai sîn chauh sin hian a lo zui ve a, ani pawh chu an man a; 52mahse, a tâl pût a, saruakin a tlân bo ta a.
Sanhedrin hmaah Isua a ding
(Mt. 26:57-64; Lk. 22:54-55,63-71; Jn. 18:13-14,19-24)
53Isua chu Puithiam lalber hnênah an hruai a, puithiam lal te, upaho te leh Dân zirtîrtu te an lo kal khâwm a. 54Petera pawh chuan hnung fêah Puithiam lalber in hual chhûng kawtlai thlengin a rawn zui a; chhiahhlawhte zîngah chuan meilum aiin a ṭhu ve ta a.
55Puithiam lalber leh Sanhedrin-a tel zawng zawng chuan Isua tihhlum theihna tûr thu an zawng ta a; mahse, an hmu hlei thei lo. 56Mi tam takin dâwtin an rawn hêk a; nimahsela, an hêkna thu chu a inhmu thei si lo. 57Mi ṭhenkhat an lo ding chhuak a, dâwtin an hêk a, 58“‘He Tempul, kuta sak hi ka ṭhiat ang a, a dang, kuta sak ni lo, ni thum chhûngin ka din leh ang,’ a tih keimahni ngei hian kan hria,” an rawn ti a. #Mk. 13:2; 15:29; Tirh. 6:14; Jn. 2:19. 59Chu thilah pawh chuan an hêkna thu chu a inhmu thei chuang lo.
60Puithiam lalber chu a laiah a va ding chhuak a, Isua chu a zâwt a, “Hêngho hêkna che hi i chhâng thei na nge?” a ti a. 61Ani erawh chu a ngawi reng a, a enga mah a chhâng lo. Puithiam lalber chuan a hnênah, “Faktlâka Fapa, Krista chu i ni em?” tiin a zâwt leh a. 62Tichuan, Isuan a chhâng ta a, “Ka ni asin, Mihring Fapa hi Thiltitheia ding lama ṭhu-a, vân chhûmte nên a lo kal in la hmu dâwn a ni,” a ti a. #Dan. 7:13; Mk. 9:1; 13:26. 63Chu veleh Puithiam lalber chuan a silhfênte chu a pawtthlêr a, “Thuhretu dang engah nge kan ngaih tawh ang? #Lev. 24:16. 64Pathian pawi a sawi dân chu in hre ta, engtin nge in ngaih?” a ti a. Tichuan, an za-in Isua chu tihhlum tlâkah an ngai a. 65A ṭhen phei chuan amah chu chil an chhak ta pang a, a hmai te an tuam a, an hnek a, ‘Tu nge ti che sawi teh,#14:65 Mss ṭhenkhatah ‘Krista, tu nge bêng che min hrilh rawh’ tih a ni. an ti a. Vêngtute chuan an kai a, an bêng sawk sawk a.
Peteran Isua a phat
(Mt. 26:69-75; Lk. 22:56-62; Jn. 18:15-18,25-27)
66Petera chu in chhâwng hnuai lam in hung chhûng kawt laiah chuan a awm reng a. Puithiam lalber chhiahhlawh zînga nula pakhat a lo kal a; 67Petera meilum ai chu a rawn hmu a, a han en chiang a, “Nang pawh hi he Nazaret mi Isua hnêna awm kha i nih hi,” a ti a. 68Ani erawh chuan, “I thu sawi awmzia chu ka hre hauh lo mai, a ngaihna pawh ka hre lo ve,” tiin a phat a. Pâwn lam a pan a (ar a khuang#14:68 Mss ṭhenkhatah kual khung chhûnga mi hi a tel lo. a). 69Nula khân a enzui a, a bula dingte hnênah chuan, “An zînga mi a ni maw le,” a ti leh a. 70Ani chuan a phat leh a. Chumi hnu lawkah Petera kianga dingte chuan, “An zînga mi i nih ngei hi, Galili mi i ni alâwm,” an ti a. 71Ani erawh chuan ânchhe dawn huamin chhia a chham a, “Chu mihring in sawia chu ka hre hauh lo,” a ti a, 72âr chu a khuang leh ta nghâl a. Isuan a hnêna, “âr vawi hnih a khuan hmain nangin vawi thum mi phat ang,” a tih thu kha Petera chuan a hre chhuak a; lungchhe takin a ṭap chhuak ta a.#14:72 lu khuh, pâwna chhuak, tia ngaih theih a ni.
Currently Selected:
MARKA 14: MIZCLBSI
Highlight
Share
ਕਾਪੀ।
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.