MARKA 13
13
Tempul chhiat tûr hrilh lâwk
(Mt. 24:1,2; Lk. 21:5,6)
1Tempul ata chu an kal chhuah laiin a zirtîrte zînga pakhat chuan, “Zirtîrtu, en teh, a lungte hi a lianin, a in sakte hi a mawi teh a nia!” a ti a. 2Isuan a chhâng a, “Hêng in lian pui pui hi i hmu maw? Lung intiang rêng rêng pakhat mah tihchim lohva hnutchhiah a awm lo vang,” a ti a. #Lk. 19:43,44; Mk. 14:58; Jn. 2:9; Tirh. 6:14.
Buaina leh tihduhdahna
(Mt. 24:3-14; Lk. 21:7-19)
3Tempul zâwn, Oliv Tlânga a ṭhut laiin Petera te, Jakoba te, Johana te, Andria te chuan a fâlin thu an zâwt a; 4“Chûng chu engtikah nge a lo awm ang a, chûng zawng zawng lo thlen dâwn chuan chhinchhiahna thil mak eng eng nge lo awm ang? Min hrilh teh,” an ti a. #Lk. 17:20. 5Tichuan, Isuan a hrilh ta a; “Tu man an hruai bo loh nân che u fîmkhur rawh u. 6Ka hming chhâlin, ‘Keimah hi ka ni,’ tiin mi tam tak an lo chhuak ang a, mi an hruai bo ṭeuh vang. #Jn. 8:24; 1 Jn. 2:18. 7Indo ri te, indo chanchinte in hriat hunah pawh thlaphâng suh ang che u, chûng chu lo thleng tûr rêng a ni; hun tawp erawh zawng a ni rih lo ve. 8Hnam hrang leh hnam hrang an indo vang a, sawrkâr leh sawrkâr an indo vang, hmun hrang hrangah lîr a nghîng ang a, ṭâm a la tla ang. Chûng chu nau vei a inṭan ta tihna a ni.
9“Nangni zawng inring rawh u; Sunagog-ahte leh a rorêltute hnênah an hlân ang che ua, an vua ang che u, keimah avângin hotute leh lalte hmaah, ka thu an hriat theih nân, an dintîr ang che u. #Mt. 10:17-20; Lk. 12:11,12. 10Chanchin Ṭha hi hnam zawng zawng hnênah hril hmasak ngei tûr a ni si a. 11An man che u a, in chungthu rêl tûra an hlan hun che u chuan in sawi tûr enghelh lâwk suh ang che u, chumi huna lo lang apiang chu in sawi mai dâwn nia, a sawitu chu nangni in ni dâwn si lo, Thlarau Thianghlim a ni zâwk dâwn si a. #Jn. 16:7-11; Lk. 12:11,12. 12Tihhlum tûrin unau leh unau an inmantîr ang a, pa pawhin a fa; fate pawhin an nu leh pate an do vang a, an tihhlumtîr bawk ang. 13Keima hming avângin mi tam takin an hua ang che u a; nimahsela, a tâwp thlenga chhel taka tuar peih apiang, chûng mite ngei chu chhandam an ni ang. #Mt. 10:22; Jn. 15:21.
Tiṭiautu tenawm
(Mt. 24:15-28; Lk. 21:20-24)
14“Tiṭiautu tenawm chu a din lohna tûra ding in hmuh hunah erawh chuan (a chhiar chuan a awmzia hre rawh se), Judai rama awmte chu tlângramahte tlân rawh se. 15In chunga awm chu ina lûtin a chhûnga englo chuh tûrin chhuk suh se; #Dan. 9:27; 11:31; 12:11.#Lk. 19:31,32. 16lova feh pawh a silhfên chuh tûrin haw hek suh se. 17Chûng huna naupaite leh nauno pawmte chu an va khawngaihthlâk dâwn em! #Lk. 23:29. 18Thlasik khaw chên laia a lo thlen loh nân ṭawngṭai rawh u. 19Chumi huna hrehawm lo thleng chu, Pathianin leilung a siam tirh ata la awm ngai lo, engtik maha awm leh tawh hek lo tûr chu a ni. #Dan. 12:1. 20Lalpan chûng nite chu titawi lo se mihring tu mah an dam khawchhuak lo vang; a mi thlante avângin a titawi a ni.
21“Chutih hunah chuan, tu pawhin in hnênah, ‘En teh u, Krista chu heta hi,’ emaw, ‘En teh u, sawta saw,’ emaw an tih pawhin awih suh ang che u. 22Krista der leh zâwlnei derte an lo chhuak dâwn si a, thei ang sela thlante meuh pawh hruai bo tûrin chhinchhiahna leh thil makte an ti ang. 23Nangni zawng fîmkhur rawh u, engkim ka hrilh diam tawh che u hi.
Mihring Fapa lo kal
(Mt. 24:29-31; Lk. 21:25-28)
24“Chûng hun hrehawm chu a liam hun chuan ni a thim ang a, thla a êng hek lo vang a, #Isa. 13:10; Ezek. 32:7; Joel. 2:10,31; 3:15; Thup. 6:12. 25vân aṭangin arsite a tla ang a, vâna thiltihtheihnate chu tihnghîn a ni ang. #Isa. 34:4; Joel. 2:10; Thup. 6:13. 26Chutih hunah chuan Mihring Fapa hi thiltihtheihna nasa tak nên ropui takin chhûm zînga lo kal an hmu ang.#Dan. 7:13; Mt. 10:23; Thup. 1:7. 27Chutichuan, vântirhkohte chu a tîr chhuak ang a, a mi thlante chu kâwlkil li ata leilung tâwp aṭanga vân tâwp thlengin a lâwr khâwmtîr ang.
Theipui kûng aṭanga zir tûr
(Mt. 24:32-35; Lk. 21:29-33)
28“Tichuan, theipui kûng awm dân aṭang hian zir tûr in nei; a zîk a lo nova, hnah a rawn chhuah chuan nipui a thaw dâwn tih in hre ṭhîn. 29Chutiang bawkin, nangni pawhin chûng zawng zawng lo thleng in hmuh hun chuan ani chu a lo hnai tawh a, a lo thleng ṭêp tawh tih hria ang che u. 30Thu dik ka hrilh a che u, chûng zawng zawng chu a lo thlen hma chuan tûnlai mite hi an ral hman lo vang. #Mk. 9:1. 31Lei leh vân a ral ang a, ka thu erawh chu a ral tawp lo vang. #Mt. 5:18; Lk. 16:17.
A hun leh ni hriat loh
(Mt. 24:36-44)
32“Nimahsela, chûng thil lo thlen hun tûr, ni leh dâr chu; Pa chauh lo chuan tu man an hre lo, vâna vântirhkohte pawhin, Fapa pawhin an hre lo. #Mt. 24:36; Tirh. 1:7. 33Fîmkhur ula, inring reng rawh u,#13:33 Mss ṭhenkhatah ‘ṭawngṭai rawh u’ tih a tel. chumi hun chu in hre si lo. #Efe. 6:18; Kol. 4:2. 34Mi ram danga zin dâwna, a bawihte hnêna an hna pual ṭheuhva mawhphurhtîra, kawngkhâr vêngtu pawh inring renga awm tûra hrilh diama kal ta daih ang hi a ni.#Lk. 12:35-40. 35Chuvângin, inring reng rawh u. In neitupa hâwn hun tûr chu tlai lamah nge, zânlaiah nge, âr khuanah nge, kâwl ênah nge tih in hre si lo; 36a lo haw thut mai zawngin muhîlin a rawn hmu hlauh dah ang che u. 37Tichuan, in hnêna sawi hi mi zawng zawng tâna sawi ka ni, inring reng rawh u,” a ti a.#Lk. 12:35-40.
Currently Selected:
MARKA 13: MIZCLBSI
Highlight
Share
ਕਾਪੀ।
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.