MARKA 12
12
Grep huan thlawh hlawh tehkhin thu
(Mt. 21:33-46; Lk. 20:9-19)
1Tehkhin thuin an hnênah thu a sawi ta a. “Tu-in emaw grep huan a siam a, palin a hung a, grep sâwr khur a siam a, vênbûk sâng tak a sa bawk a, thlawh hlawh tûrin huan enkawltute a pe a, ram dangah a kal ta daih a. #Isa. 5:1,2. 2A lawh hun chuan a chan ai la tûrin huan enkawltute hnênah chuan bawih pakhat a tîr a. 3Anni chuan an lo man a, an vêl a, kut ruakin an hawtîr ta a. 4Bawih dang an hnênah a tîr leh a, ani pawh chu a lu an vuak pawhsak a, zahthlâk takin an sawisa a. 5Bawih dang a tîr leh a, chu phei chu an lo that a. Bawih dangte pawh a tîr zêl a, a ṭhen an lo vêl a, a ṭhen an lo that a. 6Mi dang tirh âwm pakhat, a fapa duh tak chauh a nei tawh a, ‘Ka fapa hi chu an lo zah ang chu maw,’ tiin a hnuhnûng berah a tîr ta a. 7Nimahsela, huan enkawltute chuan, ‘He mi hi ro luahtu tûr chu a ni, hawh u, i that ang u, a ro luah tûr hi kan ta a ni mai ang,’ an inti a. 8Tichuan, ani chu an man a, an that a, grep huan ata chu an paih chhuak ta a. 9Huan neitupa chuan engtin nge a rawn tih ang? A lo kal ang a, huan enkawltute chu a rawn tiboral ang a, huan chu mi dang a pe ang. 10He Lehkha Thu hi in chhiar lâwm ni?
‘In satute lung duh loh kha
Chu ngei chu a kil lung ṭangkai ber a lo ni si, #Sam. 118:22-23; Tirh. 4:11; 1 Pet. 2:16.
11Chu chu Lalpa tih a ni a,
Kan hmuhin mak kan ti,’ tih kha?” a ti a.
12Chu tehkhin thu chu anmahni demin a sawi tih an hriatin man an tum a; amaherawhchu, mipui an hlau bawk si a, ani chu an kalsan a, an kal bo ta a. #Mk. 11:18.
Kaisara hnêna chhiah chawi
(Mt. 22:15-22; Lk. 20:20-26)
13A thu sawiah a inṭawngâwk thei dah law maw tiin a hnênah Farisai-te leh Heroda pâwla mi ṭhenkhat an tîr a. #Mk. 3:6; Lk. 11:54. 14A hnên an lo thlen chuan, “Zirtîrtu, mi dik tak i ni a, pawisak chuan tu mah i nei lo tih kan hria e, tu mah zah bîk pawh nei chuang lovin Pathian thu dik tak i zirtîr ṭhîn; Kaisara hnêna chhiah chawi tûr kan ni nge ni lo? 15Kan pe ang nge pe lo vang?” an ti a. 16Ani erawh chuan an vervêkzia chu a lo hmuhin “Engah nge ṭawngawhtîr min tum? Duli#12:16 Denarion, Rom tangka a ni, inhlawhfa ni khat hlawh. mi han lâk ula, ka lo en teh ang,” a ti a. Anni chuan an rawn la a, an hnênah, “Hei, tu lem leh tu hming nge chuang hi?” a ti a. Anni chuan, “Kaisara,” an ti a. 17Isua chuan, “Kaisara ta chu Kaisara pe ula, Pathian ta chu Pathian pe ta che u,” tiin a chhâng a. Mak an ti nasa êm êm a.
Thawhlehna thu
(Mt. 22:23-33; Lk. 20:27-40)
18Sadukai-ho, thawhlehna a awm lo titute pawh chu a hnênah an lo kal ve a; #Tirh. 23:8. 19“Zirtîrtu, Mosian, ‘Tu pawhin fa nei lovin nupui thihsan se, a nupui chu a unaupain rochungin a unaupa tân chuan chi a thlahsak tûr a ni,’ tiin min ziaksak a. #Deut. 25:5. 20Aw le, unau mipa pasarih an awm a, a upa ber chuan nupui a nei a; mahse, fa nei lovin a thi a. 21A dawttu chuan a nupui chu a rochung a, chi thlah lovin a thi ve leh ta a; a pathumna pawh chutiang chu a ni a. 22Unau pasarihte chuan nupuiah an nei ṭheuh va; mahse, tu man chi rêng an thlah lo. A tâwpah hmeichhia pawh chu a thi ve ta a. 23Thawhlehnaah chuan tu nupui ber nge ni ang, an pasarihin nupuiah an nei ṭheuh si a?” tiin an zâwt a.
24Isuan anni chu a chhâng a, “Lehkha Thu leh Pathian thiltihtheihna in hriat loh avâng hian a ni rêng lâwm ni in kal sual ṭhin? 25An lo thawhleh hun chuan nupui pasal an innei tawh dâwn hlei nêm, vâna vântirhkohte ang mai an ni zâwk dâwn asin. 26Mitthite kaihthawha an awm tûr thu-ah chuan - Mosia lehkhabua hnimbuka meialh thu kha in chhiar ngai lo vem ni? Pathianin a hnênah, ‘Kei hi Abrahama Pathian, Isaka Pathian, Jakoba Pathian ka ni,’ a tih kha, #Exod. 3:6. 27Ani chu mitthi Pathian a ni lo va, mi nung Pathian a ni zâwk; in bo nasa tawh a nih hi,” a ti a.
Thupêk ropui ber
(Mt. 22:34-40; Lk. 10:25-28)
28Dân zirtîrtu zînga pakhat a lo kal a, an thu sawite chu a ngaithla a, a chhâng ṭha hle tih a hriat chuan a hnênah, “Thupêk zawng zawngah a eng hi nge pawimawh ber?” tiin a han zâwt ve a.#Lk. 10:25-28. 29Ani chuan a chhang a, “Aw Israel, ngai teh, Lalpa kan Pathian chauh hi Lalpa chu a ni. #Deut. 6:4,5. 30Lalpa i Pathian chu i thinlung zawng zawngin, i nunna zawng zawngin, i rilru zawng zawngin, i chakna zawng zawngin i hmangaih tûr a ni,’ tih hi a pawimawh ber a, 31a dawttu chu, ‘Nangmah i inhmangaih angin i vêngte pawh hmangaih ve rawh,’ tih hi a ni. Hêng aia thupêk pawimawh zâwk rêng hi a awm lo,” a ti a. #Lev. 19:18; Rom. 13:9; Gal. 5:14; Jak. 2:8. 32Dân zirtîrtu pawh chuan, “A ni tak e, Zirtîrtu, Lalpa chauh hi Pathian chu a ni a, amah chauh lo chu tu mah dang an awm lo, #Deut. 4:35. 33amah chauh chu ngaihtuahna zawng zawng leh hriatna zawng zawng leh chakna zawng zawnga hmangaih leh mahni inhmangaih anga vêngte hmangaih hi pumhâl thilhlan leh inthawina zawng zawng aiin a ṭha zâwk êm êm tih hi, i sawi dik ngei mai,” a ti a. #1 Samu. 15:22; Hos. 6:6; Mik. 6:6-8; Mt. 9:13. 34Ngun taka ngaihtuahin a chhâng a ni tih Isuan a hriatin, “Pathian ram chu i hlat lo ve,” a ti a. Chuta chin chu tu man eng mah an zâwt ngam ta lo va.
Mesia chungchâng zawh fiah
(Mt. 22:41-46; Lk. 20:41-44)
35Isuan Tempula a zirtîr pah chuan a sawi zêl a, “Dân zirtîrtute hian engtizia nge Krista chu Davida fapa nia an sawi? 36Amah Davida ngei khân Thlarau Thianghlima sawiin,
‘Lalpa chuan ka Lalpa hnênah,
Ka ding lamah lo ṭhu rawh,
I hmêlmate i ke hnuaiah #12:36 Mss ṭhenkhatah ‘I ke nghahchhanah’ tih a ni. ka han dah ang e,’ a ti si a.#Sam. 110:1; Tirh. 2:34,35; Heb. 1:13.
37Amah Davida ngeiin ani chu ‘Lalpa,’ a tih si chuan engtin nge a fapa a nih theih ang?” a ti a. 38Mipui pung khâwm nasa tak chuan a thu chu an ngaithla tui hle a.
Dân zirtîrtute laka fîmkhur tûr
(Mt. 23:1-36; Lk. 20:45-47)
A zirtîr pah chuan an hnênah, “Dân zirtîrtu, kawrfual haa lên vêl chînga, dâwr hmuna chibai bûk ngainaa, 39sunagog-a ṭhutna langsâr ber leh ruai ṭhehna hmuna ṭhutna pawimawh ber ngiat ṭhînte lakah hian fîmkhur rawh u. 40Hêngho, hmeithai#12:40 Mss ṭhenkhatah ‘leh fahrahte’ tih a tel. sum ei zawhsaka, mi hmuh atân maia rei tak tak ṭawngṭai chîng site hian hrem an tuar nasa ber ang,” a ti a.
Hmeithai thilpêk
(Lk. 21:1-4)
41Tin, thawhlâwm bâwm zâwnah chuan a ṭhu a, miten bâwma tangka an thlâk lai chu a lo thlîr reng a. Mi hausa tak takte chuan an rawn thlâk ṭeuh ṭeuh va. 42Hmeithai rethei tak pakhat hi a lo kal ve a, dar pawisa pahnih#12:42 ‘Lepta hnih’ tih a ni, Lepta 96 chu Denarion khat hu, pawisa tih hi Rom tangka Kuadran a ni. a rawn thlâk a (chu chu pawisa pakhat hu a ni.) 43Isuan a zirtîrte chu a ko va, an hnênah, “Thu dik ka hrilh a che u, mi dang zawng zawng aiin he hmeithai rethei tak hian thawhlâwm bâwmah a thlâk tam zâwk. 44Mi dangte hi chuan an neih liam#12:44 an hman bân tih theih a ni. an rawn thlâk a; ani hi chuan tlachham chung chungin, a neih zawng zawng, intunnunna tûra a neih chhun chu, a rawn thlâk a nih hi,” a ti a.
Currently Selected:
MARKA 12: MIZCLBSI
Highlight
Share
ਕਾਪੀ।
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.