Génesis 13
13
Abramwan Lot rakikäyashqan
1Egiptupita Abram kutikushpanmi warminta pushakurkur y lapan imaykankunatapis apakurkur Neguevman charqan. Paywanmi sobrinun Lotpis aywarqan. 2Abram seqaypa rïcu runami karqan. Saymi qorinpis qellayninpis uywankunapis aska karqan. 3Neguevpita cercaman cercaman aywarmi Bet-elman Abram charqan. Saypitanami kutikurqan nawpata tashqan kaqman. Say karqan Bet-elpita Haiman aywanachömi. 4Saychömi altarta unaypis perqashqan kaqcho Tayta Diosta manakur adorarqan.
5Lotpis tiyun Abramnömi rïcu karqan. Paypapis askami uyshankuna, cabrankuna, wäkankuna y toldunkunapis kayarqan. 6Saysika uywankuna kaptinmi juk partilacho ishkan täyänanpaqqa ayparqannasu. 7Saymi Abrampa uywa misiqninkunawan Lotpa uywa misiqninkuna qewa janan pelyayaq. Say wisan cananeo runakuna y ferezeo runakunapis saycho taykäyarqanraqmi.
8Uywa misiqninkuna sayno pelyayaptinmi sobrinun Lotta Abram nirqan: <<Say ayllula kaykarqa ama chikinakushunsu ni misikuqninsikunapis ama pelyayäsunsu. 9Rikashqaykinöpis kay parti jatunmi kaykan. Mayninchöpis shuyni täkunaykipaq akrakuy. Janapa aywaptikiqa urapami aywashaq. Urapa aywaptikiqa janapami aywashaq>>.
10Sayno niptinmi Lotqa Jordán mayu nawpan intëru pampakunata Zoar markalämanpa rikarqan. Say pampakunacho qewapis y yakupis aska kaptinmi Edén huertanöraq#Gén. 2.8-9. y Egiptunöraq karqan. Sayno karqan Sodoma y Gomorra markakunata Tayta Dios manaraq ushakäsiptinmi. 11Mas ali kashqanta rikarmi Lot akrarqan Jordán mayu nawpan pampakunata. Saymi Abrampita rakikar inti jeqamunanläpa aywakurqan. 12Abrammi isanqa jinan Canaánlacho quëdakurqan. Lotmi Jordán mayu aywaq pampakunacho kaykaq markakunaman aywashpan Sodoma marka cercancho tarqan. 13Sodomachöqa Tayta Diosta mana cäsukur jusalikuq runakunalami täyarqan.
14Lot aywaskiptinnami Abramta Tayta Dios nirqan: <<Kay taykashqaykipita norti kaqläpa, sur kaqläpa, inti jeqamunanläpa, inti jeqananläpa rikachakuy. 15Say rikashqayki partitaqa lapantami qoykushayki. Imayyaqpis say kanqa qampaq y qampita miraqkunapaqmi.#Hech. 7.5. 16Shumaq rikaptïmi qampita miraqkuna saysikaman mirayanqa. Saymi yupaytapis mana atipaypaq aqushanöraq paykuna kayanqa. 17Intërunpa rikapakur tumamuy. Lapan rikashqayki kaqtaqa qamtami qoykushayki>>.
18 Tayta Dios sayno niptinmi lapan imaykankunatapis apakurkur Hebrón marka cercanman Abram aywakurqan. Saychömi karqan aska encina jachakuna. Say jachakuna karqan Mamre runapami. Saycho tarnami altarta Abram perqarqan Tayta Diosta adorar manakunanpaq.
Markert nå:
Génesis 13: qvhB
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2003, Wycliffe Bible Translators, Inc. All rights reserved.
