Génesis 14
14
Lotta prësu apaykäyaptin Abram kutisimushqan
1Say wisanmi Sinar markapa mandaqnin rey karqan Amrafel. Elasar markapa mandaqnin rey karqan Arioc. Elam markapa mandaqninmi karqan rey Quedorlaomer. Goim markapa mandaqninmi karqan rey Tidal. 2Say reykunami guërracho kaykäyarqan Sodoma markapa mandaqnin rey Berawan, Gomorra markapa mandaqnin rey Birsawan, Adma markapa mandaqnin rey Sinabwan, Zeboim markapa mandaqnin rey Semeberwan y Bela markapa mandaqnin reywanpis. Bela markapa jukaq jutinmi karqan Zoar. 3Say pisqantin reykunami soldädunkunata shuntayarqan Sidim pampaman. Say pampachömi kananqa Kachi Lamar kaykan. 4Say reykunataqa rey Quedorlaomer chunka ishkay watami munaynincho sarararqan. Saypita juk wata päsarkuptinnami pisqan reykuna wilanakur Quedorlaomerpa contran sharkuyarqan.
5Saymi juknin watachöna Quedorlaomer yanapaqnin reykunawan y soldädunkunawan aywayarqan Astarot Karnaimman. Saychönami refaíta runakunawan pelyayashpan paykunata asulayarqan. Saynölami Ham markapa aywar zuzita runakunatapis ushakäsiyarqan. Saypita Save-Quiriataimpa aywar emita runakunatapis asulayarqan. 6Nirkur Seir jalqapa aywarnami horeo runakunatapis ushayarqan. Qeshpiq kaqtanami Parányaq qatipäyarqan. Say kaykan sunyaq jirka nawpanchömi. 7Saypita kutimurnami Quedorlaomer y paywan aywaqkuna En-mispatman chäyarqan. Saypa jukaq jutinmi karqan Cades. Saychönami amalecita runakunata asulayarqan. Saypita päsarmi Hazezon-tamar particho taq amorreo runakunatapis ushakäsiyarqan.
8Saymi Sodomapa, Gomorrapa, Admapa, Zeboimpa y Belapa mandaqnin reykuna kamarikuyarqan Sidim pampacho guërrata rurayänanpaq. (Bela markapa jukaq jutinmi karqan Zoar.) 9Saychömi say pisqa reykuna chusku reykunawan pelyayarqan. Say chuskun reykunami kayarqan Elampa mandaqnin rey Quedorlaomer, Goimpa mandaqnin rey Tidal, Sinarpa mandaqnin rey Amrafel y Elasarpa mandaqnin rey Arioc. 10Sidim pampachöqa brea#14.10 Breaqa imayka yana siniganömi kaykan. pözukuna askami karqan. Saymi Sodomapa y Gomorrapa mandaqnin reykuna soldädunkunawan guërrapita qeshpiykäyashqancho say brea pözukunaman jeqakurpuyarqan. Wakin kaq reykunami soldädunkunawan jalqakunapa qeshpiyarqan.
11Say pelyacho vinciq chusku reykunami soldädunkunawan Sodoma y Gomorra markakunaman yaykur imaykantapis alinnin kaqtaqa lapanta apakuyarqan. Saynölami lapan mikuyninkunatapis apakuyarqan. 12Abrampa sobrinun Lottapis Sodomacho taykaqtami prësu sarirkur lapan imaykankunatawan apakuyarqan. 13Sayno apaykäyaptinmi juk runa qeshpiykur Abramta wilaq aywarqan.
(Abramqa hebreo runami karqan. Pay taykarqan Mamripa encina munti chakranchömi. Mamre karqan amorreo runami y Escolpa y Anerpa wawqinmi. Paykunaqa Abramwan yanapänakuyänanpaqmi wilanakush kayarqan.)
14Sobrinun Lotta prësu apaykäyashqanta mayaykurmi Abram shuntarqan makincho yuriq ashmaynin runakunata. Say runakuna kayarqan kimsa pachak chunka puwaqmi (318). Paykunata pushakurkurmi prësu apaykaq runakunata Dan markayaq Abram qatiparqan. 15Taripaykurmi ashmaynin runakunawan elaqpita sakaypa atacayashpan vinciyarqan. Sayno vincirmi Hoba markayaq qatipäyarqan. Say marka kaykan Damasco markapita norti kaqläpa päsaychömi. 16Nirkurmi lapan apaykäyashqanta qechur kutisiyämurqan. Saynöpami sobrinun Lottapis imaykankunatawan kutisiyämurqan. Warmitapis olqutapis prësu aywaykaqkunata kutisiyämurqanmi.
Abramta Melquisedec bendicionninta qoshqan
17Quedorlaomerta y payta yanapaq reykunata vinciykur Abram kutiykämuptinmi Sodoma markapa mandaqnin rey tariparqan Save pampaman. Say pampapa jukaq jutinmi kaykan Mandaq Reypa Pampan. 18Saymi Salem markapa mandaqnin rey Melquisedecpis sayman chaykur tantatawan vïnuta Abramta qararqan. Melquisedecqa poderyuq Tayta Diosta sirviq cürami karqan.#14.18 Hebreo idiömacho kaynömi nin: Melquisedecqa El-Eliónta sirviq cürami karqan. El-Eliónqa Tayta Diospa jukaq jutinmi karqan. Saynölami nin Gén. 14.19-20, 22 versïculukunachöpis. 19Nirkurmi Abramta bendicionta qoshpan nirqan:
<<Jana pasatapis kay pasatapis kamaq poderyuq Tayta Dios bendicionninta qoykuläshunki.
20Poderyuq Tayta Dios alabash kaykuläsun.
Paymi yanapäshushkanki contrapartiki runakunata vincinaykipaq>>.
Sayno niptinmi Abram kutisimushqankunapita Melquisedecta diezmuta qoykurqan.#Heb. 5.6, 10; 6.20—7.17.
21Sodomapa mandaqnin reynami Abramta nirqan: <<Marka mayïkunata kachapaykamay. Saypita kaqta isanqa imaykatapis lapanta apakuy>>.
22Sayno niptinmi Abram nirqan: <<Jana pasata y kay pasata kamaq poderyuq Tayta Diospa jutincho jurarmi nishkä 23qampa kaqtaqa juk jïlulaykitapis ni lanqi watulaykitapis mana apanäpaq. Saynöpami nikankipaqsu: <Noqami Abrahamta rïcuyäsishkä>. 24Ashmaynï runakuna mikuyashlanna kasun. Aywäsimaq Aner, Escol y Mamre runakuna isanqa derëchunta apakuyäsun>>.
Markert nå:
Génesis 14: qvhB
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2003, Wycliffe Bible Translators, Inc. All rights reserved.
