Luke 10
10
1တၢ်မၤအသးတမံၤအံၤဝံၤအလီၢ်ခံနဲၢ်, ကစၢ်ယ့ၣ်ရှူးဃုထၢထီၣ်ဂါဘၠီၣ်အသီနွံဆ့ဂၤ,ဘျီးမၢလီၤအဝဲဝီၤ ခံဂၤတလိၣ်, ခံဂၤတလိၣ်, ဒ်သိး အကလဲၤဆိလိ အဝဲဒၣ်အမံၤညါလိ ခူဝ့ၢ်ဘျီး တၢ်လီၢ်ကိးလိၣ်ဒ့းခါဖဲအဝဲဒၣ်ကလဲၤဝဲ အလီၢ်နဲၢ်လိ. 2အဝဲဒၣ်စံးဘၣ်အဝဲဝီၤ, ‘ဘၣ်လိတၢ်ကဘၣ်ကူးအီၤအိၣ်ဝဲဒၣ်ဘျၢသးလိ. လၢၤဘျီး ဘၠီၣ်မၤတၢ်ဖွိလိ အကူးဘုၣ်ဘျီး ထၢဖှိၣ်ဘုၣ်နဲၢ်အိၣ်စှၤနီၢ်ဝဲလိ. ယဃ့ထုကဖၣ်လိ ကူးဘုၣ်အကစၢ်လိ အကဆှၢလီၤဘၠီၣ်မၤတၢ်ဖွိတလိၣ်ဒ်သိး အကကူးဘုၣ်ဘျီး ထၢဖှိၣ်က့ၤဂ့ၤဝဲ အဘုၣ်တလိၣ်အဂီၢ်နဲၢ်တကဲၢ်. 3လဲၤတကဲၢ်. ယမၢလီၤသုဒ်သိး တလိၣ်လိ ထွံၣ်မံၤတလိၣ်အကျၣ်အသိးနဲၢ်လိ. 4စ့ၣ်အထၢၣ်မဲၢ်ဂ့ၤ, တၢ်အီၣ်အထၢၣ်မဲၢ်ဂ့ၤ, ခီၣ်ဖံးတလိၣ်မဲၢ်ဂ့ၤ, တဘၣ်စိၤအီၤနီတမံၤတဂ့ၤ. တဘၣ်အိၣ်ကတီၢ်ဒ်သိးသုကကတိၤဆၢဂ့ၤဆၢဝၣ်ဘၠီၣ်လိ ကျဲၣ်လိၤနီတဂၤတဂ့ၤ. 5တဘျီလၢ်လၢ် ခါဖဲသုလဲၤနုလီၤလိ ဟံၣ်တဖျၢၣ်အပူၤနဲၢ်, စံးဆိသုဝဲ, မ်တၢ်ဃူတၢ်ဖိးအိၣ်ကိဟံၣ်တဖျၢၣ်အံၤအပူၤတကဲၢ်. 6ဘၠီၣ်လိအအဲၣ်တၢ်ဃူတၢ်ဖှိၣ်မဲၢ်အိၣ်ဖဲနံၤနဲၢ်, ပျဲနတၢ်ဃူတၢ်ဖှိၣ်အတၢ်ဆၢဂ့ၤဆၢဝၣ်အိၣ်ပၤစၢၤလိအလိၤတကဲၢ်. ဘၠီၣ်လိ အအဲၣ်တၢ်ဃူတၢ်ဖှိၣ်မဲၢ်တအိၣ်ဘၣ်ဘျီး ဟံးနဲၢ်ဂ့ၤနတၢ်ဃူတၢ်ဖှိၣ်အတၢ်ဆၢဂ့ၤဆၢဝၣ်နဲၢ်တကဲၢ်. 7အိၣ်ဝဲ ဟံၣ်တဖျၢၣ်ဃီနဲၢ်ဘျီးအီၣ်တၢ်အိတၢ်လိအဝဲဝီၤဟ့သုနဲၢ်တကဲၢ်. တၢ်ဂ့ၢ်ဒ့းအ့ၤ, ဘၠီၣ်မၤတၢ်ဖွိတဂၤကြၢးဘၣ်တၢ် ဟ့ၣ်အီၤလိ အဘူးအလဲလိ. တဘၣ်ဟးဝ့ၤဝီၤလိ ဟံၣ်တဖျၢၣ်လိ အဂၤတဖျၢၣ်နဲၢ်တဂ့ၤ. 8တဘျီလၢ်လၢ်ဖဲသုလဲၤလိ ဝ့ၢ်တဖျၢၣ်အပူၤဘျီး တၢ်တူၢ်လိၤခီၣ်ဆၢသုနဲၢ် အီၣ်တၢ်လိ အဘၣ်တၢ်ပၤလီၤအီၤလိ သုမံၤညါနဲၢ်တကဲၢ်. 9မၤဟါမၢ်ဘၠီၣ်ဆူဘၠီၣ်ဆါလိ ဝ့ၢ်တဖျၢၣ်နဲၢ်အပူၤဘျီး စံးဘၣ်ဘၠီၣ်အိၣ်ဖဲနံၤတလိၣ်, ‘ကစၢ်ယွၤ အဘီအမုၢ်ဟဲဘူးလါသုလ့.’ 10လၢၤဘျီး တဘျီလၢ်လၢ်ဖဲသုလဲၤလိ ဝ့ၢ်တဖျၢၣ်အပူၤဘျီး သုတဘၣ်တၢ်တူာ်လိၤခီၣ်ဆၢသုဖဲနံၤနဲၢ်,လဲၤလီၤလိ ကျဲၣ်မုၢ်ခွိၣ်ဘျီး စံး 11‘ဖၣ်ကမူဖၣ်ဆါလိ သုဝ့ၢ်ပူၤလိ အအိၣ်ထီဝဲလိ ပခီၣ်ဒ့ဖီလၤအလိၤတလိၣ်ဒၣ်နဲၢ်, တဆ့းကွံၤပဝဲတကဲၢ်. လၢၤဘျီး သ့းနီၣ်ထီၣ်တၢ်အဝဲအံၤတကဲၢ်. ကစၢ်ယွၤ အဘီအမုၢ်ဟဲဘူးလါသုလ့.’ 12ယစံးဘၣ်သု, ဖဲမုၢ်စံၣ်ညီၣ်အနံၤနဲၢ်, ကစၢ်ယွၤကပၤဖျါထီၣ်တၢ်သးဘၣ်ဃဲၤလိ ဝ့ၢ်စဒွိၣ်အဖီခွိၣ်အါနဲၢ်ဒံးဝ့ၢ်တဖျၢၣ်နဲၢ်တကဲၢ်လိ. 13‘ဝ့ၢ်ဃရၤစံၣ်ဧိ တၢ်ကနးကဖှီၣ်လိနဂီၢ်ထဲလဲၣ်ခိလဲၣ်. နၤနဲၢ်နဲၢ်, ဝ့ၢ်ဘ့ၤသစဲဒၤဧိၤ1. တၢ်ကနးကဖှီၣ်လိနဂီၢ်ထဲလဲၣ်ခိလဲၣ်. တၢ်လီၤလၣ်လိအဘၣ်တၢ်မၤပၤစၢၤအီၤလိ သုပူၤတလိၣ် မဲၢ်ဘၣ်တၢ်မၤပၤစၢၤအီၤလိ ဝ့ၢ်ထါယၢၣ်လါဝ့ၢ်စံဒိၣ်နဲၢ်2, ဘၠီၣ်ထံဖွိကီၢ်ဖွိတလိၣ်ကဆ့နီၤဝဲအိၣ်လါ တၢ်ကူထီၣ်သွိးထီၣ် ထၢၣ်အတၢ်ကံးယၤဘျီးဖှ့လီၤဂ့ၤဖၣ်ဆါလိအလိၤ ဒ်သိးအကပၤဖျါလိ အဝဲဝီၤ ပီၢ်ယၢ်လီၤဂ့ၤအသးဖးထိလ့နဲၢ်လိ. 14ဖဲမုၢ်စံၣ်ညီၣ်အနံၤနဲၢ်, ကစၢ်ယွၤကပၤဖျါထီၣ်တၢ်သးဘၣ်ဃဲၤလိ ဝ့ၢ်ထါယၢၣ်လါ ဝ့ၢ်စံဒွိၣ်3အဖီခွိၣ်အၣ်နဲၢ်လိ သုဖီခွိၣ်တကဲၢ်လိ. 15မဲၢ်မဲၢ်နဲဒၣ်ဝ့ၢ်ကပ့းရနီၣ်ဧိ နသးအိၣ်ယူၤထီၣ်ထိနသးလိ မွိခွိၣ်, မဲၢ်ဧါ. နကဘၣ်တၢ်တ့ၢ်လီၤနၤလိ လၢၢ်ရၢ်အပူၤလိ.’ 16ယ့ၣ်ရှူးစံးဘၣ်အခ့အပှၤတလိၣ်, ‘ဘၠီၣ်တဂၤလၢ်လၢ်လိ အဒိကနၣ်သုတၢ်ကတိၤနဲၢ်, မဲၢ်အဒိကနၣ်ယတၢ်ကတိၤလိ. ဘၠီၣ်တဂၤလၢ်လၢ်လိ အညိကွံၤသုနဲၢ် မဲၢ်အညိကွံၤယၤ, ဘျီး ဘၠီၣ်တဂၤလၢ်လၢ်လိ အညိကွံၤယၤနဲၢ်မဲၢ်အညိကွံၤဘၠီၣ်လိ အမၢလီၤယၤတဂၤနဲၢ်လိ.’ 17ဘၠီၣ်နွံဆ့ဂၤဟဲက့ၤဝဲလိတၢ်သူၣ်ဖှးသးညီဖးဒွိၣ်အပူၤလိ.အဝဲဝီၤစံးဝဲ, ‘ကစၢ်ဧိ တၢ်ဝ့းတၢ်နါတလိၣ်ဒၣ်လဲၣ်စူၤပကလုၢ်လိနမံၤအဃိလိ.’ 18ယ့ၣ်ရှူးစံးဆၢအဝဲဝီၤ, ‘ယထ့ၣ်မုၣ်ကီၤလံၢ်ဟဲလီၤတ့ၤလိ မွိခွိၣ်ဒ်လီဝၢ်ဒံးအသိးလိ. 19ကနၢ်တကဲၢ်. ယဟ့စိဟ့ကမီၤလ့သုဒ်သိး သုယီၢ်သုခါဂုၢ်ဧိၤဒးဧိၤတလိၣ်. ပတ့ၤချဲတလိၣ်လါဒုၣ်ဒါအစိကမီၤခဲလုၤကသ့းဝဲအဂီၢ်ဘျီး တၢ်တမၤဆူမၤဆါသုနီတမံၤဘၣ်လိ. 20လၢၤဘျီး တဘၣ်သူၣ်ခုသးခုလိ တၢ်ဝ့းတၢ်နါ တလိၣ်စူၤသုကလုၢ်အဃိတဂ့ၤ. မဲၢ်မဲၢ်, သူၣ်ခူသးခူလိ သုမံၤတလိၣ်ဘၣ်တၢ်ကွ့းလီၤပၤအီၤလိမွိခွိၣ်အဃိနဲၢ်တကဲၢ်.’ 21ဖဲအဆၢကတီၢ်ဝဲနဲၢ်, ယ့ၣ်ရှူးလိပှဲၤလါတၢ်သးခူခီဖျိ သးစီဆှံဘျီးစံးဝဲ, ‘မွိခွိၣ်လါဟီၣ်ခွိၣ်အကစၢ်ပၢ်ယွၤဧိ, ယစံးဘျုးနၤမဲၢ်လိ နပၤဖျါထီၣ်တၢ်တလိၣ်အံၤလိနပၤကိသုၣ်အီၣ်လိ ဘၠီၣ်ကူၣ်ဘၣ်ကူၣ်သ့းဘျီး မၤလိမၤဒိးဘၣ်တၢ်တလိၣ်ဆူဘၠီၣ်လိ အတမၤလိ မၤဒိးဘၣ်တၢ်တလိၣ်အဃိနဲၢ်လိ. မဲၢ်လိ, ပၢ်ဧိ တၢ်အဝဲအံၤဘၣ်တၢ်မၤအီၤလိ နတၢ်ဘၣ်နသးဒၣ်ဝဲ အဃိလိ. 22ယပၢ်ဟ့လီၤလ့ယၤလိ တၢ်ကိးမံၤဒ့းလ့. ဖွိခွါမဲၢ်မတဂၤလဲၣ်နဲၢ်ဘၠီၣ်တသံညါနီတဂၤဘၣ်. ဘၠီၣ်သံညါမဲၢ်ထဲပၢ်တဂၤဧိၤလိ. ဘျီးပၢ်မဲၢ်မတဂၤလဲၣ်နဲၢ်ဘၠီၣ်တသံညါနီတဂၤဘၣ်. ဘၠီၣ်သံညါမဲၢ်ဝဲထဲဖွိခွါလါဘၠီၣ်တလိၣ်လိ ဖွိခွါသးအိၣ်ပၤဖျါထီၣ်ပၢ်လိအီၤနဲၢ်လိ.’ 23တုၤနုၤတဘျီယ့ၣ်ရှူးဃၤဝီၤအသးလိအခ့အပှၤတလိၣ်အအိၣ်ဘျီးစံးဘၣ်အဝဲဝီၤကစုၣ်ဒုၣ်, ‘သုထ့ၣ်တၢ်လိသုကဘၣ်ထ့ၣ်တလိၣ်အံၤဘျီးသုဘၣ်ဆိၣ်ဂ့ၤဆိၣ်ဝၣ်သုဝဲဆံးဒွိၣ်လဲၣ်. 24ယစံးဘၣ်သု, ဝံၤဘျီးစီၤလိၣ်စီၤပၤတလိၣ်သးအိၣ်ထ့ၣ်ဘၣ်တၢ်လိသုထ့ၣ်လၢၤတထ့ၣ်ဘၣ်ဝဲဘၣ်. ဘျီးသးအိၣ်နၢ်ဟူဘၣ်တၢ်လိသုနၢ်ဟူ, လၢၤတနၢ်ဟူဘၣ်ဝဲဘၣ်.’ 25ဘၠီၣ်သ့ၤတၢ်ဘူၣ်တၢ်ဘါအတၢ်သိၣ်တၢ်သီတဂၤဂ့ၤထ့ဘျီး ဂုၢ်ကျဲးစၢၤဝဲဒ်သိး အကဖီၣ်န့ၢ်ယ့ၣ်ရှူးလိ အတၢ်ကတိၤဒၣ်ဝဲလိ. အဝဲဒၣ်သ့းကွၢ်ယ့ၣ်ရှူး, ‘သရၣ်ဧိ ဒ်သိးယကဒိးန့ၢ်ဘၣ်တၢ်မူအထူအယိၣ်နဲၢ်ယကဘၣ်မၤဒ်လဲၣ်ခိလဲၣ်.’ 26ယ့ၣ်ရှူးစံးဆၢဝဲ, ‘တၢ်ကွ့းအသးစီဆှံတလိၣ်စံးဝဲဒ်လဲၣ်. နထူးထီၣ်ဝဲအခီပညီဒ်လဲၣ်.’ 27ဘၠီၣ်တဂၤနဲၢ်စံးဆၢတၢ်ဘျီးစံးဝဲ, ‘နကဘၣ်အဲၣ်ယွၤနကစၢ်လိ နသူၣ်ကံၢ်သးလဲ, လိနသးထီဖျၢၣ်, လိနဂံၢ်နဘါခဲလုၤဘျီး လိနတၢ်ကူၣ်တၢ်ဆးခဲလုၤ, ဘျီးနကဘၣ်အဲၣ်ဘၠီၣ်လိ နဃၢၤဒ်နအဲၣ်လီၤနသးဒၣ်နဲအသိးလိ. 28ယ့ၣ်ရှူးစံးဆၢဝဲ, ‘နတၢ်စံးဆၢဘၣ်ဝဲလိ. အိၣ်မူထွဲအခံဘျီး နကမူဝဲလိ. 29လၢၤဘျီး ဘၠီၣ်သ့းတၢ်ဘူၣ်တၢ်ဘါအတၢ်သိၣ်တၢ်သီတဂၤအံၤသးအိၣ်, ပၤတီပၤလိၤအသး သတးဘျီသ့းကွၢ်ယ့ၣ်ရှူး, ‘ဘၠီၣ်လိယကပၤမဲၢ်မတဂၤလဲၣ်.’ 30ယ့ၣ်ရှူးစံးဆၢဝဲ, ‘တဘျီဘၠီၣ်အိၣ်ဝဲတဂၤ, ဘျီးဖဲအဝဲလဲၤလီၤလိ ဝ့ၢ်ယရူၤရှလ့ၣ်လိဝ့ၢ်ယရံဃိနဲၢ်, လီၤဘၣ်လိ တမျၢ်အကျၣ်, ဘျီးအဝဲဝီၤ ဘ့လီၤကွံၤအကူအသွိး, ဟံးန့ၢ်အတၢ်ခဲလုၤတီၢ်နီၢ်တုၤလိ အကဘၣ်သ့းအသးဘျီးပၤတီၢ်ဝဲဖဲနံၤလိ. 31တၢ်မၤအသးလိဘၠီၣ်လုၢ်တၢ်အခွိၣ်တဂၤလဲၤဘၣ်အတီၤဖဲကျဲၣ်အဝဲနံၤလိ.ဖဲအဝဲဒၣ်ထ့ၣ်ဘၠီၣ်တဂၤနဲၢ် အဝဲဒၣ်လဲၤပူၤကွံၤအီၤလိ ကျဲၣ်အဂၤတခီပၤနဲၢ်လိ. 32တၢ်နံၤအသိး ဘၠီၣ်လ့ၤဝံဖွိတဂၤ ဟဲဖဲနံၤနဲၢ်နဲၢ် လဲၤဝီၤဝဲ, ဘျီး ကွၢ်ဘၠီၣ်တဂၤနံၤဘျီး လဲၤပူၤကွံၤအီၤလိကျဲၣ်အဂၤတကပၤနဲၢ်လိ. 33မဲၢ်မဲၢ်ဘၠီၣ်ရှၤမရံဖွိတဂၤ, ဖဲအဝဲဒၣ်လဲၤတၢ်, ဘျီး ဟဲဘၣ်ဖဲဘၠီၣ်တဂၤအိၣ်ဝဲအလီၢ်ဘျီးထ့ၣ်ဘၣ်အီၤနဲၢ်. အဝဲဒၣ်အသးဘၣ်ဃဲၤဘၣ်အီၤလိ. 34အဝဲဒၣ်လဲၤဝီၤလိ အအိၣ်, လူလီၤသွိလါစပံးထံလိအပူၤလီၢ်ပူၤကျဲၣ်တလိၣ်အလိၤ, ဘျီးဘိၣ်ဘံထီၣ်ဝဲလိ. တၢ်နဲၢ်ဝံၤအလီၢ်ခံအဝဲဒၣ်ပၤထီၣ်အီၤလိ အနီၢ်ကစၢ်ဒၣ်ဝဲ အဆၣ်ဖွိကီၢ်ဖွိအလိၤဘျီး ဆှၢဝဲလိ ပှၤတမှံၤအိၣ်တၢ်အလီၢ်ဘျီး ကွၢ်ထွဲအီၤဖဲနံၤလိ. 35မုၢ်ဝၣ်ထီၣ်တနံၤနဲၢ်, အဝဲဒၣ်ထူးထီၣ်စ့ၣ်ဒန့ၤရံခံဘ့ၣ်, ဘျီးဟ့လီၤဝဲဘျီၣ်ခွိၣ်,ဘျီး စံးဘၣ်အီၤ, ‘ကွၢ်ထွဲအီၤတကဲၢ်. ဘျီးယမဲၢ်ဟဲက့ၤနဲၢ်, ယကဟ့ခွိၣ်ခံဂ့ၤနၤကယဲတၢ်လိနတၢ်လၢာ်ဘူၣ်လၢာ်စ့ၤထဲလဲၣ်ခိနဲၢ် ယကဟ့အၣ်ထီၣ်နၤလိ အဝဲဒၣ်အဂီၢ်နဲၢ်လိ.’ 36ဘျီးယ့ၣ်ရှူးမၤကတၢၢ်တၢ်ကတိၤဘျီးစံးဝဲ, ‘လိနတၢ်ထ့ၣ်နဲၢ်, ဘၠီၣ်သၢဂၤအံၤအကျၣ်ဘၠီၣ်မၤဘၣ်ဘၠီၣ်လိ တမျၢ်ဒွိအီၤတဂၤဒ်ဘၠီၣ်လိ အကပၤတဂၤအသိးနဲၢ်, မဲၢ်ဖဲလဲၣ်တဂၤလဲၣ်.’ 37ဘၠီၣ်သ့းတၢ်ဘူၣ်တၢ်ဘါအတၢ်သိၣ်တၢ်သီတဂၤအံၤ စံးဆၢဝဲ, ‘မဲၢ်ဘၠီၣ်လိ အဂ့ၤလိ အဝဲဒၣ် အဖီခွိၣ်တဂၤနဲၢ်လိ.’ ယ့ၣ်ရှူးစံးဆၢဝဲ, ‘လဲၤဘျီးမၤဝဲဒ့းန့ၤအသိးတကဲၢ်.’ 38ဖဲယ့ၣ်ရှူးလါအခ့အပှၤတလိၣ်လဲၤသီတဘျီးတၢ်လိတၢ်မံၤညါနဲၢ်, အဝဲဝီၤ လဲၤတုၤလိ သဝီတဖျၢၣ်လိ ဘၠီၣ်မ့ၣ်ပှၢ်တဂၤလိ အမံၤမဲၢ်နိၢ်မၢ်သၤ, တူၢ်လိၤခီၣ်ဆၢအီၤလိ အဝဲဒၣ်အဟံၣ်ပူၤလိ. 39အဝဲဒၣ်အိၣ်လါ အထီပုၢ်ဝဲၢ်မုၣ်တဂၤလိ အမံၤမဲၢ်နီၢ်မၤရံ, လိ အဆ့နီၤဝဲကစၢ်အခီၣ်ထံးဘျီး ဒိကနၣ်အဝဲအတၢ်သိၣ်လီၤသီလီၤတၢ်နဲၢ်လိ. 40နီၢ်မၢ်သၤ အသးဘၣ်တံၤတၤလိ တၢ်ဖံးတၢ်မၤခဲလုၤလိ အဘၣ်မၤဝဲတလိၣ်အဃိလိ. လိတၢ်နံၤအဃိ အဝဲဒၣ် လဲၤဝီၤလိ အအိၣ်ဘျီး စံးဝဲ, ‘ကစၢ်ဧိ, ယထီပုၢ်ဝဲၢ်မုၣ်ဒွိးမၤယၤတၢ်မၤခဲလုၤထဲတဂၤဧိၤနဲၢ်, နတပၤလိ အမဲၢ်တၢ်နီတမံၤဘၣ်ဧါ. စံးအီၤလိ အကဟဲမၤစၢၤယၤတကဲၢ်.’ 41ကစၢ်ယ့ၣ်ရှူးစံးဆၢဝဲ, ‘နီၢ်မၢ်သၤဧိ, နီၢ်မၢ်သၤဧိ, နဲဒၣ်အံၤ နဘၣ်ကွိၢ်ဘၣ်ဂီၤလါနသးဘၣ်တံၤတၤလိ တၢ်အိၣ်ဘျၢအသးအဃိလိ. 42လၢၤဘျီး တၢ်လိ အလီၢ်အိၣ်ဝဲထဲတမံၤဧိၤလိ. နီၢ်မၤရံဃုထၢပၤစၢၤဝဲတၢ်လိ အဂ့ၤအဘၣ်တမံၤဘျီးဘၠီၣ်တဟံးထီၣ်ကွံၤအီၤလိ အအီၣ်နီတဂၤဘၣ်လိ.’
Markert nå:
Luke 10: ktpv-rv
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
