SAN MATEO 19
19
Cusandic huarmindicca mana raquirinacunamanta
(Mr 10.1-12; Lc 16.18)
1Chaicunata nishca q'uipami, Jesusca Galilea llactamanta rishpa, Jordán yacumanta chimbanic Judea llactaman chayarca. 2Tauca gentecunami Jesusta c'atircacuna. Chaipimi Jesusca ungushcacunata alliyachirca. 3Chaipi cacpimi fariseocuna*f** shamushpaca, ima mana allita nicpica juchanchishun nishpa:
—Mandashcacunapi nishca shinaca, ¿cusaca paipac huarmimanta raquirinaca allichu canga, imashi?— nishpa, Jesusman tapurcacuna.
4Chashna nicpi Jesusca:
—Taita Dios cai pachata ruhuashpaca, c'aritapish, huarmitapish ruhuarcami. ¿Chaitaca manachu Dios quillcachishcapica ricushcanguichic? 5Shinallatac Taita Diosca: ‘Chaimantami c'arica taita mamata saquishpa, paipac huarmihuan tandarishpa causanga. Chashna tandanacushpaca, ishcaimanta shucllami tucunga’ nircami. 6Chashna cashcamanta ña mana ishcaichu, ashtahuanpish shucllami can. Chaimanta Taita Dios tandachishcataca, pi mana ch'icanyachinachu can— nirca.
7Chaimanta paicunaca:
—¿Ima nishpatac Moisesca: ‘Firmata cushpaca, huarmimanta raquirichunlla’ nirca?— nishpa tapurca.
8Chashna nicpi Jesusca:
—Moisesca cancuna sinchi shungucuna cacpimi, huarmimanta raquirichun saquircalla, ashtahuanpish callaripica, mana chashnachu carca. 9Shina cacpipish ñucaca cashnami nini: Manapish shuc-huan juchallirishca cacpi, huarmimanta raquirishpa shuc-huan cazaracca, juchallinmi— nirca.
10Chashna nicpi yachacuccunaca:
—Shina mana huarmimanta raquirinalla cacpica, cazaranaca mana allichu canga— nircacuna.
11Chashna nicpi Jesusca:
—Chashna canataca, mana tucuichu chashna cangacuna, ashtahuanpish Taita Dios chashna cachun nishcacunallami chashnaca cangacuna. 12Maijancunaca capashca shinami huacharincuna. Cutin maijancunaca capashcatacmi cancuna. Shinallatac maijancunaca jahua pacha Taita Dios mandacucpi servingapacmi, capashca shina tucuncuna. Chashnami tauca runacuna mana cazarashpa causancuna. Maijanpish caita entendinata pudishpaca, chasquichunlla— nirca.
Huahuacunamanta Jesús mañashcamanta
(Mr 10.13-16; Lc 18.15-17)
13Chai q'uipami huahuacunapac uma jahuapi maquita churashpa Taita Diosman mañachun nishpa, Jesuspacman pushamurcacuna. Chaita paipac yachacuccuna ricushpaca: “Ama p'iñachic shamuichicchu” nishpami jarcarcacuna. 14Paicuna chashna jarcacpimi Jesusca:
—Saquichic, huahuacuna ñucapacman shamuchun, ama jarcaichicchu. Cai huahuacuna shina caccunami Taita Dios mandacucmanca yaicungacuna— nirca.
15Jesusca huahuacunapac uma jahuapi maquita churashpa mañashca q'uipaca, chaimanta rircallami.
Shuc chayuc moso Jesusman tapushcamanta
(Mr 10.17-31; Lc 18.18-30)
16Shuc runa Jesuspacman shamushpaca:
—Yachachiclla, huiñai causaita charingapacca, ¿ima allitatac ruhuana cani?— nishpa tapurca.
17Chashna nicpi Jesusca:
—¿Ima nishpatac alli canamanta tapungui? Allica, shucllami tiyan. Chaimanta huiñai causaiman yaicusha nishpaca, mandashcacunata pactachingui— nirca.
18Chashna nicpi chai mosoca:
—Chai mandashcaca, ¿maijancunallatacyari?— nirca.
Chashna nicpi Jesusca:
—Ama huañuchingui, ama shuhuangui, ama llullangui, ama huaclliringui, 19cambac taita mamata c'uyangui. Shinallatac can ima shinami c'uyaringui, chashnallatac shuccunatapish c'uyangui— nirca.
20Chashna nicpi chai mosoca:
—Chaicunataca tucuitami pactachishcani. Ashtahuanca, ¿imatatac ruhuana cani?— nirca.
21Chashna nicpi Jesusca:
—Taita Diospac ñaupapi allitac cangapacca, tucui can charishcacunata c'atushpa, huacchacunaman cugri. Chashna ruhuashpami, jahua pachapica achcata charingui. Chashna ruhuashpaca, ñucata c'atingapac shamuilla— nirca.
22Chashna nicpi chai mosoca mai chayuc cashcamantami, llaquilla tucushpa rircalla. 23Chaimantami paipac yachacuccunaman Jesusca:
—Chayuccunaca, Taita Dios mandacucpica mana utca yaicui pudingachu. Chaica chashnatacmi. 24Shuc chayuc runa Dios mandacucman yaicunapac randica, shuc camello*f** animalchari auja rinrita mana jarcarishpa pasarinmanlla— nirca.
25Chaita yachacuccuna uyashpaca, ashtahuan mancharishpami:
—Chashna cacpica, ¿pitac quishpiringayari?— ninacurcacuna.
26Chashna nicpi Jesusca paicunata ricurashpaca:
—Gentecunapac yuyaipica, maita mana quishpiripacchu, ashtahuanpish Taita Diosmanca imapish ruhuaipacllami— nirca.
27Chashna nicpi Pedroca:
—Ñucanchicca tucui imalla charishcacunata saquishpami, cantaca c'aticunchic. ¿Chaimantaca imatatac japishun?— nishpa tapurca.
28Chaimantami Jesusca cashna nirca:
—Cai pachata Taita Dios mushucta ruhuacucpimi, Runa Tucungapac shamushca*f** ñucaca, sumaimana achicllapi mandai callarisha. Chaipica cancunapish ñucata c'aticcuna cashcamantaca, chunga ishcai mandaccuna mandashpa tiyarinacunapi tiyarishpami, chunga ishcai Israel*f** aillucunata mandanguichic. Chaica chashnatacmi canga. 29Maijanpish ñucata c'atingaraicu huasita, huauquicunata, panicunata, taita mamata, huarmita, huahuacunata, shinallatac allpata saquicca, caicunamanta pasac cutinhuan yallimi japinga, shinallatac huiñai causaitapish japingami. 30Chashna cacpipish cunan punzhapi ‘allimi canchic’ niccunaca, achcacunami yangalla cangacuna. Shinallatac achcacunami cunan punzhapi yangalla nishcacunaca, alli nishca cangacuna.
Markert nå:
SAN MATEO 19: QXR96
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Quichua Cañar Nuevo Testamento © United Bible Societies in Ecuador, 1996.
