Matiusu 7
7
O Yesusu wadotoko onangika abe wato ufa yomaketehohowono
Lukasa 6:37-38, 6:41-42
1De o Yesusu wogila-gilali wadotoko ona ko manga ngoeika wato, “De ngini ufa nimahidadi o tobauru-urusu ma nyawa abe ka de niamake o nyawa manga datoro de ka ngini dika niaputuhu niato kiani to ona gea manga hohowono hokonaa de hokonaa. Angamoi nako ngini nisabaranga dika niahohowono o nyawa utuika, done ahao Ma Jouoli kiani winihohowono nginika. 2Angamoi nako ngone hahohowono o nyawa utuika gea, de ahao Ma Jou Unangoo wonahohowono ngone. De abe ma oraha niatailako de niahohowono o nyawa utuika de nia hininga ma duduga o kia dika ngini niapake la niato ka idadi niahohowono ona gea, duru nia hininga ma duduga ena gea abe Una ma oraha nginika winitailako de wapake winihohowono.”
3-4“De nako naga nia dodiawo yahowonoka, gea irahai ngini ko niaduhunuahi de ti ngini ma hirete nia wowango nimatailakohi, angamoi boteua ka ti nginiohi nia howono ilamoko de to ona. Ho nako ka ti nginiohi nia howono ilamoko, gea ko idadiua ngini niaduhunu onangika ma titi to ona manga howono gea. De gea tohiketero ti ngini nia howono gea abe hoka o gota moi abe naga nia lako ma goronaka. Ho gea tohiketero tato nako ti ngini nia lako ma goronaka de naga o gota ma belaka ma ago-agomo, de nako nagali nia dodiawo iwiwaleika abe naga o gota ma belaka ma eteteke dika to una ai lako ma goronaka gea. Ho tanu gea ngini ko idadiuahi niwiduhunu nia dodiawoika gea abe ma titi nihihupu o gota ma wale-wale ai lakoino, angamoi ma gota ma belaka ma ago-agomo nagahi ti ngini nia lakoka ho ka yatatokokahi nia lako ho ko nimahimakeokaua. Ho done sarakia de ngini nitemo nia dodiawoika niato, ‘Abeika nainohi la ma gota ma belaka ma eteteke gea tohihupuohi ani lakoino.’ Ho gea mode ko nimahiorikua abe ma gota ma belaka ma ago-agomo gea ti ngini ma hirete naga nia lakoka?”
5“De nako ti ngini nia hininga la ti ngini ma hirete nia howo-howono ko niolegaikaua masara nioigo nihidaere nia dodiawo manga howono, gea ngini duru nimadokangeluku dika! Ho kiani ihira niahihupuokahi nia howono abe hoka ma gota ma belaka ma ago-agomo naga ti ngini nia lakoka, de gea ipahaino ahao ka idadi nimahioriki itararonokali la nia dodiawo onangikali niaduhunu abe manga gota ma belaka ma eteteke dika gea nihihupu to ona manga lakoino, abe niaduhunu ma titi manga howono gea.”
O Yesusu wadotoko onangika abe wato ngaro ufa Ma Jou ai Demo-demo yadotoko o nyawaika nako o nyawa gea yahohedu dika enangika
6De o Yesusu ka wadotokohi wato, “Nako ngini niadotoko Ma Jou ai Demo-demo o nyawaika, masara ona gea ko yodafongua de ka yahohedu dika enangika, gea ngini ibootohi niahingahu onangika gea. Angamoi ai Demo-demo gea duru de ma medebinoka Ma Jou ai himangoka, ho ufa niahidoaka onangika gea abe ka yaoluku dika. Angamoi ona gea tahiketero abe hoka o fuhuku ma kaho eko abe hoka o ode. Abe ngaro o inomo ma rorahai hohitoofo o fuhuku ma kahoika ma yaoluku ho ko yaolomua, de hongoli ka idadiohi ma kaho inaorutu ngone. De ngaro naga o biagaro ma hakaru moi abe ena gea duru de ma ijaka la gea hato hohidoaka o odeika. Masara abe ma hali-hali gea ma ode ka yaoluku ho adoko-doko dika o pesekoka. Ho ngini nako niadotoko o nyawaika to Una ai Demo-demoino abe duru ikurutiye masara ona ka yoluku dika, gea ibootohi de niadotoko onangika.”
O Yesusu wadotoko onangika abe ma titi hokokia yomagahoko Ma Jouika
Lukasa 11:9-13
7De o Yesusu wogila-gilali wadotoko onangika wato, “Nako naga moi nia perelu niongano-nganono nia hiningaka, de ngini kiani ka ihikaika nimagahoko Ma Jouika ma titi ena gea la de ahao Una winihingodumu nia gogahokoka gea. De gea imaketero abe hoka ngini ka ihikaika niolingiri moi hiadono niamake, eko hoka niaho-ahoko nia dodiawo manga tauoka hiadono ona yoboa initutumu. Ho ngini kiani ka ihikaika nimagahoko Unangiye ma titi nia perelu hiadono Una winihidoaka nginika. 8Angamoi onagona dika ka ihikaika yomatobagahoko moi, gea ahao ma bahauku de yodafongo. De onagona dika ka ihikaika yolingiri gea ika-ika ahao yamake. De onagona dika yaho-ahoko manga dodiawo abe manga ngorana ma bionoka, manga dodiawo gea ahao woboaino de wabelenga ma ngorana de watutumu. Ho hokogenangoo imaketero de nia gogahoko Ma Jouika ahao niamake Unangino iti ka ihikaika nimagahoko.”
9“De ngini o dimo-dimono, tinileha moi nginika. Abe ma oraha nia ngofaka yoboa nginika de yomagahoko o roti, sarakia, ngini niahidoaka o hakaru onangika? Koua! 10Eko moioli nako ona yoboa yomagahoko o nawoko, sarakia, gea de niahidoaka o dodiha onangika? Duru hokogenangua abe niahidoaka! 11Ho nako ngini o howo-howono ma nyawa de ka idadi o hidoaka ma rahai niahidoaka ti ngini nia ngofa-ngofakika, ho hongoli nia Baba o Horogaka ka idadi winihidailako abe duru ma rorahai la winibaluhu abe ti ngini nia gogahoko Unangika. Angamoi Una gea duru ko iwa ai howono eko ai dorou, ho nako ngini de Una ma ka Unangohi abe ka idadi winibaluhu de ma rorahai nginika.”
O Yesusu wadotoko onangika abe ma titi hokokia yomakao irahai
12De o Yesusu wogila-gilali wadotoko onangika wato, “De nako ngini nioigo la o nyawa iniao irahai nginika, gea kiani ngini nihira niao irahai onangika. De nako ngini duru niao irahai o nyawa mata-mataika, gea o Musa ai Pareta moioo de ko niatilakurua. De ngaro Ma Jou ai uru ma dodofanga ma dodihiraino manga demo ma enangoo moioo de ko niatilakurua. Angamoi nako hiadono o nyawa niao irahai de tanu Ma Jou ai Demo-demo mata-mata nianiikoka, angamoi ahi demoino gea de ihidotoomuino ka ma moi de to Una ai demo mata-mataika.”
O Yesusu wadotoko onangika abe ma titi nanga wowango ma ngekomo naga hinooto
Lukasa 13:24
13-14De o Yesusu ka wadotokohi onangika gea de o hiketero moi ma ade-ade wato, “De ngini naa nia ngiriki naga hinooto abe ma titi nia wowango ma ngekomo o kiaika nianiiki. Abe naga moi ma ngekomo ma ngoa-ngoata de to enangoo ma ngorana iwoata, ho hatoli igapanga hanii-niiki ma ngekomo gea. Masara to ena ma dumutu gea o bobinaahaika. De naga o nyawa ko manga ngoe abe ma ngekomo gea yanii-niikika. De naga ma ngekomo moioli ma eteteke de to enangoo ma ngorana ieteke, de ma ngekomo gea hatoli naga de ma kangelaka ma oraha ngone hoboa ma ngekomika gea. Masara ma ngekomo gea ma dumutu o wowango ma ngangoika, de ko yowoeua o nyawa abe yamake de aniiki enangika. Ho Ngohi duru tinihigaro la ngini niwohama ma ngorana ma etetekika gea de ma ngekomo gea nianiiki la ka idadi nimahiadono o wowangoika.”
O Yesusu wahitiari onangika abe ma titi ona o ngelu-ngeluku yotobadotoko
Lukasa 6:43-44
15De o Yesusu ka wadotokohi wato, “De ngini kiani nimahidodiai angamoi naga o nyawa utu de ahao yomahingahu nginika ato Ma Jou ai uru ma dodofanga masara ona gea tanu inieluku dika nginika. De ona gea manga hininga ma dumutu la ihibinaaha ti ngini nia ngongaku ma titi manga ngeluku ma demoino. De nako ngini ko nihidodiaiua niatailako manga wowango, gea ona ka idadi inibudi angamoi yomadokangeluku abe hoka o nyawa abe manga hininga ma dodipokouku ho gea manga demoka de yabole-bole o nyawaika. De ona gea ka idadi tahiketero abe ona hoka o fuhuku ma kaho duru itotualono abe imahipahitaakauku hoka o domba ma rupa la ato yabudi o nyawaika. Angamoi o domba gea ko itualonua de ko ingamoua o aewani utuika, masara nako o fuhuku ma kaho gea ma dumutu la ihibinaaha de imadoma o domba-domba gea.”
16“De ngini ka idadi niahioriki ona gea ma titi to ona manga wowango ma datorino, abe imaketero hoka ngini ka idadi nihikohowono o gota ma titi to ena ma hofokino. Abe ngini nihiorikoka nako o take gea ko idadiua ihihofoko o angguru ma hofoko, ho ko idadiua o angguru nimadofi o takeino. De moioli ko hamakeua o lukama abe o ngabauino. Ho nako hiadono ngini niamakeoka to ona manga wowango ma hofoko de gea ngini niahiorikoka to ona manga hininga.”
17“De nako o gota ma rorahai, gea to enangoo ma hofoko ma rahai. Masara o gota ma dorou gea ihihofoko o hofoko ma dorou dika. 18De nako o gota ma rahai gea ko idadiua ihihofoko de ma hofoko ma dorou, de nako o gota ma dorou gea ko idadiua ihihofoko de ma rorahai. 19De o gota o kia dika ko ihihofokua ma rorahai, ma gota ma dutu gea watolanga de waumo o ukuika gea la youkuoka dika. 20Ho abe imaketero hoka ngini ka idadi nihioriki nako o gota moi ma dorou eko ma rahai ma titi to ena ma hofokino niatailako, hokogenangoo de ona abe yomahingahu ato Ma Jou ai uru ma dodofanga. Abe nako niatailako to ona manga wowango ma hofoko de ma dorou niamake, gea niahiorikoka abe ona yoelu-eluku dika de ko to Una ai uru ma dodofanga ma gou-goungua.”
O Yesusu wahitiari onangika abe ma titi o nyawa ko yagou-goungua iwiniiki Ma Jouika
Lukasa 13:25-27
21De o Yesusu wogila-gilali wadotoko onangika wato, “Naga o nyawa manga ngoe yomahibaluhu Ngohino ho ihiahoko Ngohino ato, ‘Ahi Baluhu.’ Masara ko ma titiua o nyawa manga demoino hiadono Ma Jou wadafongo abe ma oraha wahikoano ai nyawa. De naa tinihingahu abe naga o nyawa utu abe ngaro Ngohino ihibaluhu masara ona dokena nanga himangika de Ma Jou ko wadafongua angamoi ko iwa manga hingounu. Ho ona dika abe yatobahingounu de yatobaniiki ahi Baba o Horogaka ai mau, ona gea dika abe Una ka idadi wadafongo. 22Ho nako ma wange adonoka gea abe o nyawa mata-mata manga wowango ma datoro atailako, de genangoka o nyawa manga ngoe ahao yomagahoko Ngohino la tadafongo ma titi manga datoro yodiaioka. Abe ona gea ahao yomademo ato, ‘Ahi Baluhu, nohidafongo ngohi naa ma titi ma dihiraino de ngohi tahingahu-ngahu ani Demo-demo o nyawaika. De abe yakitokata ona gea taduhunu abe ma tokata tohititoko onangoka de aino, de naga utuohi o heheranga todiai. De gea mata-mata tapake to Ngona ani romanga la todiai, ho kiani nohidafongo ngohi!’ 23Masara Ngohi ahao tahiree-reeika tapaluhu onangika tato, ‘Ngohi ko idadiua tinidafongo, angamoi ngaro ma dihirainohi ma duru ko tinihiorikua! Ngini nihinoaka dika angamoi ti ngini nia datoro gea ma dorou dika abe nitobadiai.’ Hokogea ahao ahi demo onangika ma oraha gea. Ho ngini kiani nimahidodiai abe ma titi ona gea abe ko yagou-goungua ihiniiki Ngohi.”
O Yesusu wadotoko onangika abe ma titi hokokia yodafongo ai dodotoko ma demoika
Lukasa 6:47-49
24De o Yesusu wogila-gilali wadotoko ona manga ngoeika wato, “De ngini naa abe nitoihene ahi dodotokino, kiani nagaoo nia hingounu ahi demoika gea. Abe ngini onagona dika nitoihene de nihingounu ahi demoika, de gea ngini duru nisosawaro. De mangale ma titi nia sosawaro gea ho Ngohi tinihiketero abe hoka naga o nyawa womatengo womaatau o hakaru ma dengeoti ma lokuoka la duru ibitumu ai tau. 25De gea ahao naga o awana koharikimi, de yonguihi, de ma rato kohabuturungu italoko. De ngaro mata-mata gea yadaene de yawuwu ai tauika masara ko itoropahua angamoi wohigoko o hakaruoka. De hokogea ona abe naga manga hingounu ahi demoika.”
26“Ma nako ngini abe ahi dodotoko ma demo ka niihenino dika de ko nidiaiua, gea ngini nibodo abe nimaketero hoka womatengoli naga womaatau o dowongi ma lokuoka dika abe genangoka ma gapanga ikelu-kelu. 27De to una ai tau gea nako ma awana ma rikimi de ma nguihi de ma rato ma buturungu yadaene enangika, gea ahao duru ikokitoropahoka. De hokogea ona abe ko ihingounua ahi demoika gea.”
28De hokogea o Yesusu ai demo wohibobaha abe wadotoko manga ngoe-ngoeika o loku ma geleforino gea. De ona ko manga ngoe abe yotoihene ai dodotokika, ona duru yoheranga ai demoika gea. 29Angamoi to Una ai dodotoko ma demo duru ko imakadaenua abe hoka onangoli yotobadotoko o Musa ai Paretaino manga dodotoko ma tau-tauoka. Abe ma oraha o Yesusu wadotoko onangika de ka idadi iwihioriki abe to Una naga ai kuaha ma gou-goungu, ho duru yomakohowono Una de o nyawa utu abe yotobadoto-dotoko, angamoi duru ka Unangohi naga de ai kuahaka.
Markert nå:
Matiusu 7: MJDD
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Gereja Firman Allah, Yayasan Misi Masyarakat di Pedalaman
