Matiusu 6
6
O Yesusu wadotoko onangika abe ma titi hokokia yaduhunu o huha ma nyawaika
1De o Yesusu wogila-gilali wadotoko o nyawa manga ngoeika wato, “Ngini kiani duru nimahidodiai ma titi nia wowango ma datoro ma rorahaiino. Abe hoka ma oraha ngini niahidoa-doaka la niaduhunu o hu-huha ma nyawaika. Angamoi nako ngini nidiai ma rorahai gea la niato o higiriiri niamake o nyawaino, gea nia hininga ma dumutu duru irehenoka de ko niamakeua ma utumu nia Babaino abe naga o Horogaka.”
2“Ho nako ngini nioigo o hu-huha ma nyawa niaduhunu, gea ko idadiua nimaaduru abe hoka ona utu yomadokangeluku dika ma titi manga gogao Ma Jouika. Abe ona gea yopoa-poaka o ngekomoka eko nia dodotoko ma tau-tauoka de yomahingahu o nyawa mata-mataika ma titi manga hidoaka gea abe o huha ma nyawaika yahidoaka. De gea yopoaka o nyawa manga hima-himangoka la ato mata-mata yahioriki manga datoro ma rahai hiadono yahigiriiri onangika. De gea Ngohi tagou-goungu tinihingahu abe to ona manga hadia manga datorino, gea o nyawaino dika manga higiriiri. Angamoi nako Ma Jouoka de aino duru ko yamakeua o higiriiri eko o hidoaka mangale ma titi to ona manga hininga la yomagorakiye.”
3“Ho ngini ma oraha abe niahidoaka o duduhunu o nyawaika de koaho ngaro ufa nimahingahu o nyawaika abe ma titi nia hidoaka gea. 4De ahao ngaro o nyawa utu duru ko inihiorikua ma titi nia duduhunu gea abe niahidoakoka, masara ti ngini nia Baba Una gea ka idadi winihioriki, angamoi moioo ma ko iwa abe Una ko wamakeua. Ho Una gea ahao wamake de gea winihibalaha de nia hidoaka nginika ma titi nia datoro ma rorahai gea.”
O Yesusu wadotoko onangika abe ma titi hokokia yomaniata
Lukasa 11:2-4
5De o Yesusu wogila-gilali wadotoko onangika wato, “De naa Ngohi tinidotoko nginika abe ma titi hokokia nimaniata Ma Jouiye. De nia niniata ma goronaka ufa nimaaduru abe hoka onangoli yomadokangeluku dika ma titi manga gogao Unangika. Abe ona gea duru yoigo la yomaniata o ngekomo ma amoko ma marihapongoka eko nia dodotoko ma tau-tauoka la ato o nyawa duru ko manga ngoe ka idadi yamake ona abe ma oraha yomaniata Unangiye. De naa Ngohi tagou-goungu tinihingahu abe to ona gea manga utumu manga niniatoka, gea o nyawaino dika manga higiriiri. Angamoi nako Ma Jouoka de aino duru ko yamakeua o higiriiri eko o utumu mangale ma titi to ona manga hininga la yomagorakiye dika.”
6“Masara abe ngini naa ma oraha nimaniata Unangiye, koaho ngini nimatingaka o nyawa utuino la ngini ka nimatengoka dika de o nyawa utu ko inimakeua. De genangoka ahao nimaniata ti ngini nia Babaiye. De ngaro ngini nimagogonoka la ufa o nyawa inimake masara Unangoka ko iwa o dogogono angamoi Una mata-mataika wamake. Ho Una gea ahao winimake ma oraha nimaniata de ahao wabalaha nginika ma titi nia niniatino gea.”
7“De abe ma oraha nimaniata ufa ka nifeto-feto dika abe de nia demo ma ngoe abe hoka ona ma homoaika yomahijou manga niniata. De ona gea yafikiri abe nako manga niniata ma demo ihigali-galioli de genangino ma titi hiadono ahao yamake ma babaluhu manga niniatino gea. 8De ngini naa ngaro ufa dika nimaaduru abe hoka onangoli manga demo ma ngoeika, angamoi ngaro ma oraha ko nifetonguahi ho ko nimaniatuahi nia Babaiye de winihiorikokau ti ngini homoi-homoi nia perelu.”
9“Ho ngini abe ma oraha nimaniata de nia demo niapake hokonaa, niato,
‘Mia Baba o Horogaka, ngomi duru miagorakiye to Ngona ani romanga ma titi Ngona dika nokokurutiye.
10 De ngomi migahoko la Ngona nagorakiye ani kuaha kohaamoko la nomulaenge o dunia duru nahipareta.
Abe mioigo o nyawa mata-mataika o duniaka naa la yaniiki to Ngona ani mauika dika abe imaketero hoka daku o Horogaka de mata-mata duru inihingounu Ngonaika.
11 De ngomi mimagahoko la Ngona o wange naa nomihidailako to ngomi mia inomo abe ka idadi imiwedono.
12 De abe ma titi to ngomi mia howo-howono Ngonaika, gea ngomi mimagahoko la Ngona naofi mia howono abe imaketero hoka ngomioo miaofi o nyawa utu manga howono abe yodiaioka ngomino.
13 De ngomi mimagahoko la ma oraha imihitaili de o dorou de Ngona ufa nohigunoa la miruba o howonuku, masara duru mioigo la nomiduhunu de nomihirehene abe ena o Tobadorou ma kuahaino la done imihikala ngomino.
[De ngomi mimaniata ka Ngonaika dika angamoi Ngona dika naga de ani kuahaka la mata-mataika nohipareta. De ma titi ani medebini ma dararono ikokurutiye, ho duru itiai abe ka Ngona dika namake nanga higiriiri naa de ka hiado-adonika. Amin.]’”
De ahao o Yesusu wotemo wato, “Hokogea ma demo abe ngini ka idadi nianiiki abe ma oraha nimaniata nia Babaiye.”
14De o Yesusu wogila-gilali wadotoko onangika wato, “De naa tohidogohi ahi demoika kangano abe ma titi o nyawa manga howono nginika niapongo. Abe nako o nyawa yahowono nginika de ngini niapongo to ona manga howono, de gea ahao nia Baba o Horogaka gea Unangoo ahao winiapongo ti ngini nia howo-howono abe Unangika. 15Masara nako ngini nioluku niapongo o nyawa manga howono nginika, gea ahao ti ngini nia Baba Unangoo ko waofiua abe ti nginioo nia howono gea.”
O Yesusu wadotoko onangika abe ma titi hokokia yopuaha
16De o Yesusu wogila-gilali wadotoko ona manga ngoeika wato, “De ma moi ma moi ngini ka idadi nipuaha la ti ngini nia hininga ma dumutu duru Ma Jouika dika, de gea nia datoro irahai. Masara abe ma oraha ngini nipuaha, de ufa nimaaduru abe hoka onangoli yomadokangeluku dika ma titi manga gogao Unangika. Abe ona gea manga himanga itafukuoka o nyawa manga hima-himangoka la ihioriki abe ona yomatongohono abe ma titi ko yaolomua o inomo. De gea manga rupa yodiai la duru ingaliokali hiadono ka de o nyawa yamake de yotemo ato, ‘Abeika ona gea yopuaha!’ Ho ona gea yoigo yamake o higiriiri o nyawaino ma titi ona yopuaha. De naa Ngohi tagou-goungu tinihingahu abe to ona manga utumu manga puahaino gea o nyawaka dika de aino manga higiriiri. Angamoi nako Ma Jouoka de aino duru ko yamakeua o higiriiri eko o utumu mangale ma titi to ona manga hininga la yomagorakiye dika.”
17“Ho nako ngini nipuaha koaho nia tadauru niawuhiokahi la itiai de nia himangoo nimamomahauokahi la nia rupaoo itiai abe hoka nia biaha o wange-wangeiye nidiai. 18De gea nako nia biaha ka nianiikohi, de ahao o nyawa ko inihiorikua abe ngini nipuaha. De gea ahao ka nia Baba dika winihioriki, angamoi Una gea o datoro o kia dika mata-mataika wamake, abe ngaro nimatohi-tohiki de nidiai eko koua. Ho Una gea ahao winimake ma oraha nipuaha de ahao winihidoaka nia balaha ma utumu nginika abe ma titi nia datorino gea.”
O Yesusu wadotoko onangika abe ma titi Ma Jou ai hidailako ngoneino
Lukasa 12:22-34
19De o Yesusu ka wogila-gilahi wadotoko onangika wato, “Ngini ufa nia kiahonanga de nia kaya nimadoomuino o duniaka naa la itou-touniye. Angamoi nenangoka nia kiahonanga ko itongohonua ma titi o goguhu naga abe ka idadi yaolomo de o kiahonanga utu ka yomooko, de nagali o nyawa yotobatohi-tohiki abe yongohama nia tau ma goronaika de inidohiki nia kiahonanga gea. 20Ho koaho ngini nimamomagawe nianii-niiki Ma Jou dika ai mauika, de gea ahao ti ngini nia utumu ka idadi itou-touniye o Horogaka angamoi Una de ahao wabalaha nia datoro ma rorahai gea de nia utumu nginika. De nako nia utumu gea dakenangoka, ngaro ufa nihawana abe niato ko itongohonua, angamoi o Horogaka gea ko idadiua o goguhu yaolomo de ko idadiua yomooko, de ko iwa yotobatohi-tohiki abe inidohiki nia utumu gea, ho duru itongohono ka hiado-adonika.”
21“Angamoi nako ti ngini nia hininga duru itagi o duniaka dika ma kiahonanga de ma kayaika la niato nimahitingini ma kayaika gea, gea ka ihikaika nia hininga yongano-nganono abe o duniaika dika. Masara nako nia hininga ka ihikaika itagi ti ngini nia utumu abe ahao o Horogaka Ma Jou winihidoaka nginika, gea nia hininga duru itagi o Horoga ma kayaika ho o Horoga ma hininga ngini nianiikoka.”
22“De nia hininga gea tanu ihiaturu ti ngini nia badanga ma datoro. Abe ma titi nako nia hininga irahai la hiadono niolega o nyawa manga pereluika, gea de ahao nia badanga ma datoro enangoo duru irahai nia wowangoka.”
23“Masara nako nia hininga itorou abe nioluku niolega o nyawa utu manga pereluika, gea de ahao nia hininga ifufutuoka de duru ko iwa nia badanga ma datoro ma owa nia wowangoka.”
“De gea ho Ngohi tato nako o nyawa manga hininga ko itagiua o nyawa utuika, gea imaketero manga hiningaka duru ihidofufutuoka angamoi ko iwa Ma Jou ai dararono gea ma goronaka.”
24“De naa moioli ka idadi o hiketero todiai la ahi demo abe ma titi o duniaka ma kiahonanga de o kaya la ka idadi ngini niataoko itararono. De nako naga o gilaongo womatengo, gea una ko idadiua waleleani ai baluhu yahinootoika. Abe nako ai baluhu yahinooto, gea kiani ma gilaongo widora de wileleani womatengoika dika de widohata abe womatengo. Ekola ai baluhu womatengoika ai hininga duru itagi unangika masara abe moiikali gea wiemono. Ho ngini naa nimaketero de ma gilaongo gea. Abe nginioo kiani nimangiriki nia baluhu o wani o kia de ahao nialeleani nia wowangoka. Ho ka idadi nimahibaluhu Ma Jouika ekola o dunia ma kiahonangika nimahibaluhu. Masara duru ko idadiua niwileleani Ma Jouika nako nia hininga itagi ilamoko o tiwika. Duru ko idadiua nialeleani ma baluhu hinootoika gea ka ma moi.”
25“Ho naa Ngohi tinihigaro nginika abe nako niwiniiki ka Unangika dika, gea ngaro ufa dika de nihawana de nihuha abe niato nia wowango ma perelu o duniaka naa marai ko iniwedonua. Abe ngaro ti ngini nia inomo, nia ngokere, eko nia baju, ma ufa nihuha enangika. Angamoi gea mata-mata Una ka idadi winihidailako ngini. Masara ufa hiadono nia hiningaka de niato nia wowangoka naa de duru nihitihira abe nimaino-inomo, hiadono nia datoro de nia hininga utu ko kia-kiaua adaene. Angamoi nia inomo gea tanu ko kia-kiaua Ma Jou ai himangoka.”
“De hokogenangoo, ufa hiadono ngini nia hiningaka de nihitihira gea abe nimahinoa-noauku hiadono niato ena gea nia badanga ma perelu abe duru ikurutiye. Angamoi tanu nia kiahonanga abe nimahinoa-noauku gea ko kia-kiaua Ma Jou ai himangoka.”
26“De gea tanu ngini nimaketero dika abe hoka o totaleo daku ma hoanino. Abe ma totaleo gea ngaro ufa dika ma inomo imadatomo de ngaro ufa yodamaa hiadono o gugutuku ma oraha. De gea ena ngaro ufa imadoomu ma inomo abe to ena ma ngioka la ahao naga to ena ma inomo. Angamoi ti ngini nia Baba o Horogaka Una gea ahao wohidailako to ena ma inomo ma totaleoika. De nako ngini naa de ma totaleo, gea duru ka nginiohi nikurutiye Ma Jou ai himangoka. Ho mangale ma titi Una wohidailako enangika to ena ma inomo, ho hongoli ngini ka idadi nihioriki abe ti nginioo nia inomo ahao winihidailako nginika.”
27“De nako hoka nia hiningaka de nihuha eko nihawana abe ma titi nia hidailako, gea nia huha de nia hawana duru ka parahaja dika ho ko idadiua iniduhunu nia hiningaka. Ho mode ngini niato bote nia hininga ma huhaino de ka idadi nia wowango utuohi niumuru? Duru hokogenangua! Ho ufa ngini nihuha nia hiningaka ma titi ti ngini nia inomo.”
28“De hokogenangoo abe ma titi ti ngini nia baju. Angamoi ngaro nihuha ma titi nia baju nimahinoa-noauku, masara gea ko idadiua iniduhunu nginika. Ho naa moi tinihigaro la ufa ngini nihuha nia hiningaka. Angamoi abeika nimalega o bunga-bungaika gea abe ena ma hirete iwangoiye o dolaka de abe duru ma hohailoa. De nionganonohi abe ma titi hokokia idadi hiadono naga to ena ma hohailoa. Angamoi ena gea ko ikarajaangua de ko imadiaiua ma baju, masara abeika duru ihohailoa.”
29“De ngaro ma bunga-bunga gea ka iwangoiye dika, masara nako hohidotelega to ena ma hohailoa de abe ma dihiraino to nanga koano o Saloomo ai baju ma hailoa, ma ka o bunga-bungahi duru ihohailoa. De gea o Saloomo ai tiwi duru ilamoko ho ai baju duru ma rorahai, masara ma bunga-bunga naa ihikala ai bajuika ma titi ma hohailoaino.”
30“De naa moi ka idadi nimafikirohi. Abe Ma Jou Una gea duru wapaliara irahai ma bunga-bunga naa abe ka jai-jai dika de ipahaka, abe o wange naa nagahi ma hohailoa masara de ma dawangeino de imaaioka de marai o nyawa yaleino de ahao ihidaulu. De mangale ma titi Una wapaliara irahai enangika abe jai-jai dika iwangoiye, ho hongoli ngini winipaliara duru irahai de winihidailako nia wowango ma perelu. Masara nako ngini ko nimahinganonua Unangika ma titi nia wowango ma hidailako, gea nimahitaanoka abe ti ngini nia ngongaku duru ko ibaluhuahi Unangika.”
31“Ho ngini naa ufa nihuha nia hiningaka de ufa nimatemo niato, ‘Naa bootino o kia haolomo? De o kia ngone haokere? De itebini done ahao o kia homahinoauku?’ 32Abe ngini ufa nia hiningaka itagi imaketero hoka o nyawa abe ko iwihiorikua Ma Jouika manga hininga. Angamoi ti ngini nia Baba o Horogaka Una wohiorikoka abe ma titi ngini homoi-homoi nia perelu mata-mataika, ho ngini ngaro ufa nihuha nia wowango ma hidailakoika.”
33“Masara koaho ngini nia wowangoka de nihitihira de to Ma Jou dika ai mau de nimaribuutu la nianiiki to Una ai totiaiika. Ho nako ti ngini nia hininga hokogea ka hiadono Una niwihitihira, de gea Una ahao ka ihikaika winihidailako ti ngini nia perelu.”
34“Ho ngini duru nihioriki abe Una ka ihikaika wonahidailako nanga perelu ngoneino, ho mangale ma titi gea Ngohi tato ngaro ufa dika de ngini nihuha abe ahao ma oraha o kangela inidaene. Abe to ngone nanga kangela o wange naa inawedonoka, ho done ma titi o kia hiadono ngone hoigo la homahidogoli abe hafikiri ma titi ma kangela abe ko idadiuahi? Angamoi gea imaketero hoka homahidogo dika nanga huha. Gea ngaro ufa dika de nanga hininga itagi enangika, masara ka idadi homahinganono Ma Jouika dika ma titi nanga wowango ma hidailako o duniaka naa.”
Markert nå:
Matiusu 6: MJDD
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Gereja Firman Allah, Yayasan Misi Masyarakat di Pedalaman
