مارکوس 14

حضرت عیسیٰ سی اویکا ٹیجیم چانّی مارناگ لوگس۔

1جاگما نییسّی ستینگنے پیساگ تانگ سکیور میدکھانّی تاگی توسچھین لیبچیس اینپین یانگ اِمام کُنی چھونمو گون تانگ شریعتی عالِم گونّی سانگوے تھوگنے حضرت عیسیٰ مسیح زومستے سادچیسّی سکابس ژالّادپین۔ 2اِین نانگ کھونگونی زیرس، ”پیساگی توسچھینّی توسلا میزوم چیازیرنا میتشوگسلا ثو یونگستے ہیلینگس پھینگچیس اینوگ“

3حضرت عیسیٰ سی بَیت عَنِیّاؔہ ڈونگسیبّا دزینادنے پھانکھان شمعُوؔن ی کھانگپے نانّگا چوگتسیکا ستینتے یودتوس، کایولّی نود ٹیجیم ّی مار کوسپو سکانگستے کھورکھانّی بوموجیگ یونگس، یانگ اوت پو چاگستے ٹیجیمبو کھونگی اویکا لوگس۔

4تیکا یودکھان کھاچیگّا ثو یونگستے چیگ تانگ چیگّا زیرس، ”چیا یتسوگسّی ٹیجیم رینچانبو گودلا تانگستے اینوگ؟ 5چیازیرنا ای ٹیجیم پو پینےسُمگیا سانگ مانگمو رینلا نیالباچانگونلا تانگ نیانچیس یودپین۔“ کھونگونی بوموبوا ماثانٹے کھاسکییس۔

6اِین نانگ حضرت عیسیٰ سی کھونگونلا مولس، ”بورّانگ، کھوا چیا کھا سکییاد؟ کھوے نگے پھیا لاس زانگپو چوستے اینوگ۔ 7نیالباچانگون توسگیون کھیوجا نیامپو لوسین، یانگ کھیوجاگونّی نام چوین سامنانگ کھونگونلا روگس چونیانین۔ اِین نانگ نگا کھیوجا نیامپو توسگیون میلوس۔ 8کھوے کھورانّگا چونیانچیسپو چوستے اینوگ، کھوے توسّی سانگ سنگونلا نگے زوگسپوا ٹیجیم لوگستے نگے زوگسپو قبرستان کھیرچیسّی پھیا ڈالڈیگ چوستے اینوگ۔ 9نگے کھیوجا لدینبا زیرّاد، دُنیا گانگپوے نانّگا کارُو گاموےناتسُول شادنانگ ای بوموبوے نگا چوسکھانبوانگ شادتے کھو ایدتو چوین۔“

یودے حضرت عیسیٰ نگولوگ چوچیسلا کھاچھامس۔

10تینے لوبٹوگس چوگنییسّی نانگنے چیگ، اِسکریوت یہُوداؔہ اِمام کُنی چھونمو گون یودسا سونگتے حضرت عیسیٰ مسیح نگولوگ چوستے کھونگونی لاگا ستادچیسلا تھابسلدینگس۔ 11تیبو تشورتے کھونگون ماثانٹے تھاد، یانگ کھوا پینے تانگچیسّی کھاچھاد چوس۔ تینے کھوے حضرت عیسیٰ سی ستادچیسّی سکابس ژالچیس گوزوگس۔

ستینگجوگی گونگزان۔

12سکیور میدکھانّی تاگی توسچھینّی گومے جاگ، نام پیساگی لوگپو قُربانلا پھولّاد، حضرت عیسیٰ مسیح لوبٹوگسگونّی کھونّگا ٹیس، ”نگاجا سونگتے نیرانگ دونچیسّی پھیا پیساگی دونتانگ کارُو ڈالڈیگ چولے؟“ 13تینے حضرت عیسیٰ سی کھونگرانگی لوبٹوگس نیس یروشالیمّا لامچوگا زادِین مولس، ”گیالسے نانّگا سونگ، تیرو چھوکار کھورکھانّی میجیگ کھیوجاگونلا تھوگچین، کھوے ستینگرانگنے سونگ۔ 14کھو جُوگستے چھاسی کھانگپے کھانگداگپوا زیر ’لوبپونّی ٹیاراگ، ڈونپو جوگسے نانگبو کانے یود، تیرو نگے نگارانگی لوبٹوگسگون نیامپو پیساگی زان زا نیا نین؟‘ 15کھوے کھیوجا ستانگتھوگّا ڈالڈیگ چوسکھانّی نانگ چھینموجیگ ستانچین، نگاتانگونّی پھیا تیرو دونتانگی ڈالڈیگ چوس۔“ 16لوبٹوگسگون گیالسے نانّگا سونگ، یانگ چیتشانگما حضرت عیسیٰ سی مولکھان نانگجین تھونگ۔ کھونگونی تیرو پیساگی دونتانگ ڈالڈیگ چوس۔

17پھیتوگ چھاچیگ حضرت عیسیٰ سی لوبٹوگس چوگنییس نیامپو تیرو لیب۔ 18کھونگون چوگتسیکا دونتانگ دونین یودتوس حضرت عیسیٰ سی مولس، ”نگے کھیوجا لدینبا زیرّاد، ایکا نگا نیامپو زین یودکھانگونّی نانگنے چیگ چیگی نگا نگولوگ چوین۔“

19کھونگون ماثانٹے تشیرتے کھونگونی تشیرلا چیگی ستینگنے چیگی ٹیس، ”تانتان نگاتا مانڈو؟“

20کھونگی لانسالس، ”نگا نیامپو دابین چیگی نانگنے زاکھان کھیوجا چوگنییسپوے نانگنے چیگ این۔ 21ہلژخمہ شوقبُو بوے نانّگا ڈِیازادتے یودکھان نانگجین اِبنِ آدم شیگوس، اِین نانگ اِبنِ آدم ڈاو لاگا ستادکھانّی میبوا تسامشیگی جیگسپا مییونگ۔ تے سانگتا کھو ماسکییسپینّا کھوے پھیا گیالّا یودڈو۔“

22کھونگون دونتانگ دونین یودتوس، حضرت عیسیٰ سی تاگی نامستے خُدا شُکر جْوس تے چاگّا زادس یانگ لوبٹوگس گونلا سالین مولس، ”یبو نگے زوگسپو این، لینتے زو۔“

23تینے دونسکیوگپو نامس یانگ خُدا شُکر جْوس تے کھونگونلا سالس یانگ کھونگ تشانگمے تینانگنے تھونگس۔ 24کھونگی کھونگونلا مولس، ”یبو نگے ٹھاق این کابوے خُدے تانگ کھونگی میگونّی پارلا وعدہ بو تانتان زادّانوگ، یانگ می مانگپوے پھیا قُربانّی تشولّا پھوس۔ 25نگے کھیوجا لدینبا زیرّاد، ای رگونچھانگبو نگے یانگسکیار میتُھونگ نامتشوگپا خُدے گیالثیدّی نانّگا ایبوا سوما تونتاگ میسال۔“

26کھونگونی خُدا ستودپے لو پھول تشارّاچیگ، کھونگون ذیتونی ریا سکیودس۔

حضرت پطرؔس سی حضرت عیسیٰ سی میشیسزون تانگچیسپو لونگستان زادس۔

27تینے حضرت عیسیٰ مسیح لوبٹوگس گونلا مولس، ”کھیوجا تشانگمے نگا پھانگستے چھین، چیازیرنا ہلژخمہ شوقبُو بوے نانّگا خُدے مولّا زادتے دوگ،

’نگے لُوگ زی بو سادچوگاین

یانگ لوگّون یانتے چھین۔‘“ #14‏:27 حضرت زکریے شوقبُوئ 13‏۔ 7

28”اینّانگ سونتیا لانّگا زادتے ستینگنے نگا کھیوجے سانگ سنگونلا گلِیلی یولجونگسلا چھین۔“

29حضرت پطرؔس سی زیرس، ”تشانگمے نیرانگ پھانّگا نانگ، نگے مانے میپھانگ۔“

30حضرت عیسیٰ سی لانسالس، ”نگے کھیورانّگا لدینبا زیرّاد، اینّا ژانلا چاپوے چاسکاد لان نیس تانگی سانگ سنگونلا، کھیرانگی نگا لان سوم میشیسزون تانگین۔“

31حضرت پطرؔس سی وتسوگ تانگستے زیرس، ”نگا نیرانگ نیامپو شیگوسنانگ، نگے نیرانگ میشیسزون مانے می تانگ۔“ تینّا ژوگس جان تشانگمیانگ زیرس۔

گتسمنی تشاسّی نانّگا حضرت عیسیٰ سی دُعا جْوس ۔

32کھونگون گتسمنی زیرسے ناسّا سکیودس، یانگ حضرت عیسیٰ مسیح کھونگرانگی لوبٹوگس گونلا مولس، ”نگا سونگتے دُعا ژو زانے کھیوجاگون ایکا دوگ۔“

33کھونگی حضرت پطرؔس ، حضرت یعقُوبؔ تانگ حضرت یُوؔحنّا ٰ گُون کھونگرانگ نیامپو کھیرّا زادس، یانگ حضرت عیسیٰ سی تھوگستشیر سکیودتے کھونگ تشابسا زادس۔ 34حضرت عیسیٰ سی کھونگونلا مولس، ”نگے سیمسلا تشیرکھا ماثانٹے شیچیس ژوگس راگ۔ شان چوستے ایکا دوگ۔“

35کھونگ ژاپیگشیگ تھاگرینّگا سکیودس یانگ سیکا گییلتے، کالتیس نیانّا کھونگی کانے ای ردوگنگالّی توسپو تھینّا زاد مولین دُعا جوا زادس۔ 36کھونگی مولس، ”ابا، نگے یابلے، نیرانّگا چیتشانگما زاد نیانّانوگ۔ شزدے زادتے ای ردوگنگالّی کوریبو نگے کانے تھینّا زادّانگ، اِین نانگ نگے دودپا نانگجین مانپا، نیرانگی تھوگّونگس نانگجین چوا زاد۔“

37تینے حضرت عیسیٰ سی لوگستے سکیودس یانگ کھونگ تشانگکو نیدلا سونگتے زِیگس۔ کھونگی حضرت پطرؔس لا مولس، ” شمعُوؔن کھیرانگ نیدلا سونگتے اینّا؟ چھوتشود چیگّانگ نگا نیامپو نیید ماتانّگا دوگمانیانّا؟ 38کھیوجا دِیگپے نانّگا میگییلچیسّی پھیا نیید ماتانّگا دُعا چوس۔ رُوحانی دودپا دِیگپے نانّگا میگییلچیسّی یودنانگ زوگسپو اُتھوکس یودتے اینوگ۔“

39یانگسکیار ژاپیگ تھاگرینّگا سکیودتے حضرت عیسیٰ سی تینّا ژوگس دُعا جوا زادس۔ 40کھونگ لوگستے سکیودّاچیگ، یانگسکیار لوبٹوگس تشانگکو نیدلا سونگتے زِیگس چیازیرنا کھونگون ثانٹے نگالتے یودپین، یانگ ٹھیلتے کھونگونی حضرت عیسیٰ سی چانگ زیر مانیان۔

41حضرت عیسیٰ سی لان سومپا لوگستے سکیودّاچیگ، کھونگی مولس، ”تارُوانگ کھیوجا نیید تانگین آرام چوا؟ تا ڈیگ۔ ستوس، اِبنِ آدم نگولوگ چوستے دِیگپاچان گُونی لاگا ستادچیسّی توستش اوت پو لیب تشار۔ 42لونگس، نگاتانگون چھین۔ ستوس، نگا نگولوگ چوکھانبو یونّگالا۔“

حضرت عیسیٰ سی زومس۔

43حضرت عیسیٰ مسیح جالتا سالین یود زانے لوبٹوگس چوگنییسپوے نانگنے یہُوداؔہ تیکا لیب، کھو نیامپو اِمام کُنی چھونمو گون، شریعتی عالِم گون تانگ یہُودی پے اُسکیونگونی کالکھانّی میتشوگس، رایَ تانگ بیرگا رومپو کھورتے یونگس۔ 44نگولوگ چوکھانبوے کھونگونلا حضرت عیسیٰ سی زومّالا ستاگس شیگ چوین زیرس، ”نگے پوگ تانگکھانّی میبو کھیوجے زومستے ستانپو چوستے ٹھیدتے کھیر۔“ 45تینّامالّا یہُوداؔہ حضرت عیسیٰ سی یودسا سونگتے، ”رابّی“ زیرتے پوگ تانگس۔

46تینے جانماگونّی حضرت عیسیٰ سی زومستے لچاگتھاگ نیامپو تاگس۔ 47اِین نانگ حضرت عیسیٰ سی لدُونلا یودکھان چیگی، رایَ پھینگستے اِمامِ اعظمی یوگپوا گیابستے کھوے نامچھوگپو چادتانگس۔

48حضرت عیسیٰ سی کھونگونلا مولس، ”رایَ تانگ بیرگا کھورتے نگا زومّا یونگستے چی نگا ستانشیگ اینّوگا؟ 49بیت المقدِس سی نانّگا جاگدانگ نگے لابجا تانگ زانے کھیوجے نگا چیا مازومسپین؟ اِین نانگ ہلژخمہ شوقبُو بوے نانّگا ڈِیا زادکھانبو ڈانڈا ڈوبگوس۔“

50تینے حضرت عیسیٰ سی پھانگستے لوبٹوگس تشانگما شور۔ 51کوسپو راسّی کوس چیگپو گونکھانّی کھیوگتونگجیگ کھونگی گیابنے یونّگادپین، میتشوگسّی کھو زُومچیس چوسپا، 52کوسپو پھانگستے کھو لجیرنیالّا شورتے سونگ۔

حضرت عیسیٰ سی یہُودی پے ژوکسپے لدُونلا کھیرس۔

53کھونگونی حضرت عیسیٰ سی اِمامِ اعظم یودسا کھیرس، کارُو اِمام کُنی چھونمو تشانگما، یہُودی پے اُسکیونگون تانگ شریعتی عالِم گون دزومستے یودپین۔ 54حضرت پطرؔس اِمامِ اعظمی پھوڈانگی گیانگسکورّی نانگکوگ تشوگپا تھاگرینگجیگنے کھونگی گیابنے یونگس۔ تیرو کھو ثونگکھانگون نیامپو میا ثواین دُوگس۔

55اِمام کُنی چھونمو تانگ یہُودی پے ژوکسپے تھوسمی تشانگمے، حضرت عیسیٰ سی سادنیانچیسّی گواہ سالس، اِین نانگ کھونگونلا سوانگ ماتھوب۔ 56کھونگی گیابگالّا می مانگپوے زوسمے گواہ تانگس، اِین نانگ کھونگونی گواہ تانگکھانگون زوبس مازوبس۔ 57ستینگجوگا کھاچیگ لانگستے حضرت عیسیٰ سی گیابگالّا زوسمے گواہ تانگین زیرس، 58”کھوے زیرّاراگپین ’نگے، ای بیت المقدِس میی لاگپانے سیگکھانبو شیگستے جاگ سومی نانّگا میی لاگپانے ماسیگکھان ژانیانگجیگ سیگاین‘۔“ 59اِین نانگ کھونگونی گواہ تانگکھانگونّانگ زوبس مازوبس۔

60تینے تشانگمے لدُونلا اِمامِ اعظم لانگستے حضرت عیسیٰ سی ٹیس، ” کھیرانگی گیابگالّا گواہ تانگکھانگونلا لانتانّگا میدّا؟ رانگ سکیوبچیسّی پھیا کھیورانّگا زیرچیس میدّا؟“ 61اِین نانگ حضرت عیسیٰ سی لان ماسالا چوبچادتے ژوگس۔ تینے اِمامِ اعظمی کھونّگا یانگسکیار ٹیس، ” کھیرانگ لدامّا زادکھانّی مسیحا، خُدےبوژا اینّا؟“

62حضرت عیسیٰ سی مولس، ”نگا این، یانگ اِبنِ آدم کھیود چان خُدے چھاگ یاسپے ٹھیسّیکا دُوگستے، یانگ نامکھے ثینّیکا ژونتے یونّگا کھیوجے تھونگین ۔“

63تینے اِمامِ اعظم لانگستے کھورانگی کوسپو شاگس یانگ زیرس، ”نگاتانّگا ای سانگ مانّگا گواہ چی گوسین؟ 64کھوے تتلوکچوکھانبو کھیوجے تشورتے اینوگ۔ کھیوجے چی تھاگچادّاد؟“

کھونگ تشانگمے کھو سادگوشیسّی اوسپا اینوگ زیرتے تھاگچادس۔ 65تینے کھونگ کھاچیگی حضرت عیسیٰ سی تھو گیابچیس گوزوگس یانگ کھونگی میگ، لاگپھیس نیامپو کابستے کھونّگا مولتھوگ چوستے ردونگین ہابگود تانگین زیرس، ”لونگستان شودّانگ کھیورانّگا ردونگکھانبو سو اینوگ؟“ یانگ ثونگکھانگونّیانگ کھیرتے کھونّگا ردونگس۔

حضرت پطرؔس سی حضرت عیسیٰ سی میشیسزون تانگس۔

66حضرت پطرؔس پھوڈانگی گیانگسکورّی نانّگا یود زانے اِمامِ اعظمی یوگموجیگ یونگس۔ 67حضرت پطرؔس میا ثواین دُوگستے تھونّگاچیگ یوگموبوے کھوا ژیبچا چوستے ستاس یانگ زیرس، ”کھیورانّگانگ ناصرة پا حضرت عیسیٰ سی نیامپو دوگپین۔“

68اِین نانگ حضرت پطرؔس سی میشیسزون تانگستے زیرس، ” کھیرانگی چی زیرتے این نگا ہاگوا میراگ یا نگے کھو شیسّامید۔“ کھو گیانگسکورّی گھوے لدُونلا سونگتے دُوگس، تینے چاپوے سکاد تانگس۔

69یوگموبوے حضرت پطرؔس تیکا تھونّگاچیگ، کھوے تیکا یودکھان جانماگونلا یانگسکیار زیرس، ”کھونگونی ٹونے چیگ ای میبوانگ اینوگ۔“

70اِین نانگ حضرت پطرؔس سی یانگسکیار میشیسزون تانگس۔

ژاپیگشیگی ستینگنے تیکا لانگستے یودکھان جانیانگ کھاچیگی حضرت پطرؔس لا زیرس، ”تانتان کھیرانگ کھوے ٹوپاگونّی نانگنے چیگ اینوگ، چیازیرنا کھیورانّگانگ گلِیل پا اینوگ۔“

71حضرت پطرؔس سی کھوا نگان پھوگشیگ زیرین ناسکیالتے زیرس، ” کھیرانگونّی سپیرا تانگکھانّی میبو نگے شیسّامید۔“ 72تینّامالّا لان نیسپا چاپوے سکاد تانگس۔

تینے حضرت پطرؔس لا حضرت عیسیٰ، ”چاپوے چاسکاد نیسپا تانگی سانگ سنگونلا، کھیرانگی نگا لان سوم میشیسزون تانگین“ مولکھانبو ایدتو یونگس، یانگ کھوے سیمس چھاگستے کھو نگوس۔

Markert nå:

مارکوس 14: LBJNT

Marker

Del

Kopier