Málɩ́kɩ 4
4
Lɛglɩ̀nyɔ a núnúó
(Matíe 13.1‑23; Lúkɩ 8.1‑15)
1Zozíi mʋ sɔ́kʋ́ Galilée nyie gɔ̀ cɩ́a ka. Mà cémʋ́ nyʋa kɔ́kɔ́mnɩ́ glalɔɔ́ klʋ́ a, ɔ́ pla gɔ́lʋ́ a mnɩ́ lé ɔ́ bɔ́ɔ sá. Ɔ kʋ nyíé klʋ́ gɔ́lʋ́ɔ́ a mnɩ́, bhè nyʋaá kʋ nyígbʋ̀gbʋ́ jɩ̀. 2Lé ɔ́ bhá yɩ́ níní kɔ́kɔ́mnɩ́ lé ɔ́ cɩ́alaá, ɔ́ nie: 3«A pʋ nyúkwlí! Nyɔ a múó mʋ lɛ glɩ̀ kà. 4Ɔ́ kʋ glɩ da, lé lɩ́ɛ́ ɔ́ glɩ a, ànɩ bhli nyúzɔ kʋ́ lé nimni lií. 5Lɩ́ ànɩ bhli cɔ́kwɩ dʋ̀dʋ a mnɩ́, dɛ́ɛ́ kɛ̀ dʋ̀dʋ ʋ̀ nɩ́ mʋ́ trʋ̀ a, cémʋ́ ʋ nɩ́ zù a, lɩ́ɛ́ ɔ́ glɩ a, ɩ́ wlʋ́ sɩsɔɔ́. 6Mà yrʋ́ tɛ́ma mʋ́ a, cémʋ́ ɩ́ sikplié nɩ́ glù pla a, ɩ́ si kʋ́. 7Ànɩ bhli nyníci a mnɩ́. Tányɩɛ́ mʋ́ ɩ́ wlʋ́ a, nynícié gbíí wlú lé ɩ nɩ́ trʋ. 8Lé dré àna bhli náma dʋ̀dʋ a mnɩ́. Ɩ̀ bhli lɛ́ náma dʋ̀dʋ̀ɔ̀ mnɩ́ a, ɩ́ wlʋ́ ʋ́ neé lé ɩ́ trʋ. Ví ànɩ trʋ yúi glʋ̀ lé kʋ́gbá, sɔ́ anɩ trʋ gwlɩ̀ ta, lé yígàdà anɩ trʋ gwlɩ̀ gbɩ́.» 9Bhʋ́ Zozíi srʋ á, ɔ́ anɩ́: «Ɔ̀ nɩ̀ ka nyúkwlí lé ɔ̀ ká nú a, ɔ nú!»
Zozíi sa mɔ̀ɔ lɛglɩ̀nyɔ a núnúó a gba
(Matíe 13.10‑17; Lúkɩ 8.9‑10)
10Ɔ́ wlʋ́ʋ jrèè gwá a, nyʋaá à gla la mɔ́ klʋ́ a lé ɔ́ kʋjɩ̀nyʋ̀àà kʋ́gbá sɔ́ɔ́ sɔ́ yrálɔɔ́ níní a gba kʋ́. 11Lé ɔ́ srʋ á, ɔ́ anɩ́: «Amɔ Lagɔ pápa lɛ́ ɔ Léyibhlɩɛ́ a nɩnɩgbɩ a gba, mà ànàà lɩ̀à, níní á pálaá gɔ̀.
12 Lé á yi dʋdʋ̀ àààn,
A nɩ ka lɛ́ yɛ́,
Á yi nyúkwlí pʋ àààn,
A nɩ ka nú.
Á nɩ nú la a á yi la Lagɔ klʋ́ gà,
Lé á nyumoé yi á la cieloò. # 4.12 A zɛlɩɩ sáà Eza 6.9‑10. »
13Lé ɔ́ srʋ á sɔ́kʋ́, ɔ́ anɩ́: «A nɩ nɩ́ núnúó lɩ̀à gba nú a, cégbá mʋ́ a yi ànɩ̀ɛ̀ a gba nú a?
14Lɛglɩ̀nyɔ̀ɔ̀ lɩ́ɛ́ ɔ́ glɩɛ lɛ́ a ɩ́mɩ́ ɩ̀ ŋwɔ́ɔ Lagɔ a niwɔlɩɛ́. 15Tagà anɩ bhlii nyúzɔ kʋ́. Nyúzɔ̀ɔ̀ kʋ́ ɔ́, ʋ́mʋ́ ʋ̀ ŋwɔ́ɔ nyʋa ànàà à nú kɔ́ɔ̀kʋ́ Lagɔ̀wɔ̀lɩ̀ɛ̀, lé Dɩ́blʋ̀ɔ̀ sa à mɩ́ duo kʋ́ a. 16Sɔ́ anɩ bhli cɔ̀kwɩ dʋ̀dʋ a mnɩ́. Cɔ̀kwɩ dʋ̀dʋ̀ɔ̀, ʋ́mʋ́ ʋ̀ ŋwɔ́ɔ nyʋa ànàà à nú Lagɔ̀wɔ̀lɩ̀ɛ̀ lé à bhlilɩɩ́ lɔlɔsa kʋ́ a. 17Mà bhʋ́anɩ nyʋaá, a nɩ́ cíe Lagɔ̀wɔ̀lɩ̀ɛ̀ sá lé ɩ ká sikpli ŋwʋ́. Lé á cɩ́cɩ lɛ sɩsɔɔ́ bhobhoé. A nɩ yɛ́ kalɩmɛ ya nyakalɩ sɔ́ Lagɔ̀wɔ̀lɩ̀ɛ̀ a mnɩ́ a, á wlʋ́ lɛ sɩsɔɔ́ Lagɔ gwá. 18Ànɩ bhli nyníci a mnɩ́: Nynícié, ɩ́mɩ́ ɩ̀ ŋwɔ́ɔ nyʋaá à nú Lagɔ̀wɔ̀lɩ̀ɛ̀ a, 19mà pɩ́pɩ́ kʋ́ a bhobhoé, lé mɔ̀ɔ a kpɔkplá leyrié, ɩ́zà mɔ̀ɔ a mɛ́nɩmɛɛ́, ɩ́ lɔ̀fɩ́ɛ́ lɩ̀à gbíé Lagɔ̀wɔ̀lɩ̀ɛ̀ wlú, lé ɩ nɩ́ ŋnɩ dá. 20Ànɩ bhli náma dʋ̀dʋʋ́, lé ɩ́ trʋ. Náma dʋ̀dʋ̀ɔ̀, ʋ́mʋ́ ʋ̀ ŋwɔ́ɔ nyʋaá à nú Lagɔ̀wɔ̀lɩ̀ɛ̀ lé à ŋwnʋ́ʋlɩɩ kʋ́ a. Bhʋ́anɩ nyʋaá, á wlʋ́ mà, cémʋ́ lɛɛ̀vo trʋ lɛ́ a, à na trʋ yúi glʋ̀ lé kʋ́gbá, sɔ́ a na trʋ gwlɩ̀ ta lé yígàdà ana trʋ gwlɩ̀ gbɩ́.»
Nápɛ a núnúó
(Lúkɩ 8.16‑18)
21Lé Zozíi srʋ á sɔ́kʋ́, ɔ́ anɩ́: «A nɩ ŋwʋ́ nápɛ klʋ́ lé a nɩ lɛɛ́ a, a nɩ́ gbié pápá wlú. A nɩ́ ŋwʋ́ɛ́ sáà bɔ̀gɩ zɔ̀, mà zɩkpa kʋ́ á bubuoleé lé ɛ́ ŋana dááfíɛ́. Ɛ̀ nɩ́ saá ŋwɔ́ɔ? 22Bhʋ́ a tányɩɛ́, lɩ́ɛ́ fɩ́ɛ́ ɩ̀ zúzùò laa, ɩ́ yɛ́lɔ yɩ́. Lé wɔlɩ́ɛ́ ɩ̀ nilo la koti kʋ́ a, ɩ́ yi zɩkpa kʋ́ flʋ. 23Ɔ̀ nɩ ka nyúkwlí ɔ̀ ká nú a, ɔ nú!»
24Zozíi srʋ á, ɔ́ anɩ́: «Wɔlíɛ́ fɩ́ɛ́ a pʋ lɛ́ nyúkwlí a, a ná sɩɩ́ duo gɔ̀! Lɛ́ a bhá lé a mɩ́zɩɛ a ɛ, ɛ́mɛ́ Lagɔ na ká bhá lé ɔ ká sáà amɔ mɩ́zɩ̀. Fɩ́ɛ́, lé ɔ ká a nɩ dɛ́ɛ́ kʋ́ ŋwʋ́ʋ. 25Ɩ́ zà ɔ̀ nɩ̀ ka a, á yi ɔ́ nɩ dɛ́ɛ́ kʋ́ ŋwʋ́ʋ, mà ɔ̀ nɩ́ ka a, dɛ́ɛ́ ɔ́ ka a, á yio ʋ́ gɔ̀ bhá.»
Glɩglɩlɩ a núnúó
(Matíe 13.31,32; Lúkɩ 13.18,19)
26Lé Zozíi srʋ á sɔ́kʋ́ mà: «Ká Lagɔ a Léyibhlɩɛ́ pápa a, ɛ́ wlʋ́ mà, cémʋ́ nyɔ glɩ lɛ́ ɔ lágbaá siyʋ a. 27Lé ɔ́ pʋ́ sá lé ɔ́ ŋwɔ́ɔ lé ɔ́ wlʋ́ yrá lé yrʋ́ bhli lé zrɩ̀ɩ zɩ lé siyʋɔ́ ɔ́ glɩ a, ʋ́ pá kwálɩ́ lé ʋ́ wlʋ́ a, mà cémʋ́ ʋ́ nɩ lé ʋ́ wlʋ́ a, ɔ nɩ́ saá yɩbhlɩɩ̀. 28Dʋ̀dʋ mɔ̀glʋ̀ nie lé glɩglɩlɩ ŋnile lé ɩ́ wlʋ́ɛ́ ʋ́ neé. Ʋ́ nie lé siyʋɔ́ nie vó, lé vóó trʋɛ yʋ́, lé yʋ́ɔ́ ŋwʋ́ɛ́ mʋ́. 29Ʋ́ nɩ glɛ̀ lé ʋ nɩ zalɩmà a, á fa yɩ́ mʋ́ bàka mnɩ́, ʋ́ ya yɩ́ fa da ŋnɩ.»
Siyue a núnúó
(Matíe 13.31‑32,34; Lúkɩ 13.18‑19)
30Lé Zozíi cí sɔ́kʋ́ mà: «Lɛ́ gbá à yi bhá lé à yi Lagɔ a Léyibhlɩɛ́ pápa a? Níní cegbá à yi bhá lé à yie pápa a? 31Ɔ́ anɩ́, nɩ̀ yɛ́ɛ́ a, nànɩ́ suvàà á wlele mutádɩ, a yúe. Mutádɩ̀yie, ɛ́ ŋwɔ́ɔ zɩkpa zɔ̀ a siyʋ á nyièdɩ á siyue tòtòyilɛ̀. 32Mà a nɩ glɩɛ́ a, ɛ́ nynile lé ɛ́ zie lágba a mnɩ́ a glɩglɩlɩɛ́ fɩ́ɛ́ kʋ́. Ɛ́ nie lábhɩ kádɩ, lé lábhɩɛ́ a mnɩ́ nimni pálɛ mɔ̀ɔ níní.» 33Sɩ́tɛ̀ mʋ́ Zozíi bhá wá níní lé ɔ́ cɩ́a wá, lé nyʋa pʋ ɔ wá nyúkwlí. Cémʋ́ ɔ́ yi cí lé á yi nú a, sɩ́tɛ̀ ɔ́ srʋ á. 34Ɔ nɩ cɩ́a a, ɔ́ɔ pápalɛ lé ɔ́ cɩ́a. Mà ɔ yà ɔ́ kʋjɩ̀nyʋ̀àà sɔ́ nɩ kʋ a, ɔ́ srʋɛ á wɔlɩ́ɛ́ fɩ́ɛ́ a gba.
Vʋ̀vɔ̀lʋ yà nyíé sɔ́ ŋwʋ́ Zozíi kpá
(Matíe 8.18‑27; Lúkɩ 8.22‑25)
35Bhʋ́ a yruú a múó a kosúgbòsa, Zozíi srʋ ɔ́ kʋjɩ̀nyʋ̀àà mà: «A yi à ka nyíé a bɩ́ díi.» 36Á tɩ ʋ́ fákùè kʋ̀ la ʋ́ a, lé á pla gɔ́lʋ́ɔ́ mnɩ́ Zozíi kʋ a, lé a yɔ̀sɔ́ mʋ. Gɔ́lɩ́ ànɩ jɩ́ á kʋ́. 37Mà á kʋ nyíé klʋ́ lé lúlúó dúo bhlí lé nyíéé bhá lákwɩ kʋ́. Ɩ́ nɩ lé gɔ́lʋ́ɔ́ bhá nyú. 38Bhʋ́ a tanyɩɛ́ Zozíi pʋ́ gɔ́lʋ́ a gbada. Ɔ́ tɩ́ɩ pína wlú ɔ́ ŋwɔ́mɛ. Lé ɔ́ kʋjɩ̀nyʋ̀àà yi lé á galɔɔ́: «Másɛɛ̀, à kúé bhè ɩ̀ ŋwɔ́mɛɛ, lé duo nɩ́ gbláa mɔ̀ nyúú?» 39Zozíi wlʋ́ yrá a, ɔ́ gáa vʋ̀vɔ̀lʋ̀ɔ̀ kʋ́ lé ɔ́ srʋ nyíé mà: «Nyíè! Kʋ yɩ́ diin!» Ɔ́ cí sɩ́tɛ̀ a, vʋ̀vɔ̀lʋ̀ɔ̀ dúò, lé nyíé plɩ́ dìdinii. 40Lé ɔ́ srʋ ɔ́ kʋjɩ̀nyʋ̀àà mà: «Ɛ̀kʋ̀ʋ̀ lé a ŋa saá? A nɩ́ àyɩ Lagɔ a fádùò ka a?» 41Mà ŋanɩmɛ kɔ́kɔ́mnɩ́ɛ́ yilaá kʋ́ a, ɛ́ nɩ á lé á pʋpʋ́ a nyièdɩ, á cí mà: «Nyɩ́kpɔcegbá lɛ̀ bhè vʋ̀vɔ̀lʋ yà nyíé sɔ́ ŋwʋ́ɛ́ ʋ́ à?»
Markert nå:
Málɩ́kɩ 4: NEY
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© (Active), Wycliffe Bible Translators, Inc. All rights reserved.
