Málɩ́kɩ 3
3
Zozíi yalɩma bhlɛ́kanyɔ nyɔbhleyru kʋ́
(Matíe 12.9‑14; Lúkɩ 6.6‑11)
1Zozíi yi sɔ́kʋ́ zúfʋcɛcɩwlʋ a mnɩ́. Ɔ́ yi a, glɔ̀gbàpʋ bhlanyɔ kʋ mɔ̀ɔ. 2Falizɩ́ɛnyʋaá kʋ̀ ʋ́ a, á mányɩ lɛ Zozíi a nɩnɩgbɩ, ɔ nɩ yi nyɔ yalɩma nyɔbhleyruó kʋ́ a, a kɩ́ɩ́ yɛ́ lé a kɔ́ɔ́ gbʋ́ nyɛ́ɛ̀. 3Lé Zozíi srʋ bhlɛ́kanyɔɔ́, ɔ́ anɩ́: «Soglù lé nynʋ́vʋ̀ kʋ́ nyʋaá fɩ́ɛ́ a klʋ́ jɩ̀!»
4Lé Zozíi yrá jrèè, ɔ́ anɩ́: «Mà, nyɔbhleyruó kʋ́, námasa nyɔ nɩ nɩɩ? Mà nyumosa ɔ nɩ nɩɩ? Nyɔ, ɔ́ɔ nɩ pʋ́a ɔ liyʋʋ? Mà, ɔ dʋdʋ̀ ɔ yɩ́ lé ɔ kúu?» Mà ɔ́ yrá á lɛ́ saá, á lɔ̀fɩ́ɛ́ dìdiniii! Nyɔ a múó nɩ́ kɔtɔɔ̀. 5Ɔ́ bie jrèè gɔ̀ yɩ́ lé ɔ́ dʋdʋ̀, ɔ́ duo sie. Nyʋaá à kʋ̀ la ʋ́ a, á ka la mɔ́ dɩ kʋ́, a mɔ́nyùmòè a zà. Lé ɔ́ srʋ bhlɛ́kanyɔɔ́, ɔ́ anɩ́: «Gbáa nà sɔɔ́ mʋ́!» Nyɔɔ́ gbáa ɔ́ sɔɔ́ mʋ́ a, ɔ́ yalɩma.
6Falizɩ́ɛnyʋaá wlʋ́ Lagɔ̀wlʋ̀ɔ̀ a mnɩ́ a, á kʋ dáamúó lé a yà Elódʋ a nyʋa sɔ́ yɛ́yɛ lé cémʋ́ á na ká Zozíi mʋ́ bhlábhla a, a kɩ́ɩ́ bhobhoò.
Nyʋa kɔ́kɔ́mnɩ́ yì Zozíi
(Matíe 10.1‑15; Lúkɩ 6.12‑19; Nɩnɩgbɩ 1.13)
7Tányɩ kʋ sɔ́kʋ́ ʋ́ lé Zozíi yà ɔ́ kʋjɩ̀nyʋ̀àà sɔ́ mʋ Galilée nyíplʋɔ́ gɔ̀, nyʋa kɔ́kɔ́mnɩ́ jɩ́ ɔ́ wá kʋ́. Àna wlʋ́ Galilée lé Zudée. 8Wɔlíɛ́ Zozíi nɩ lé nyʋa nú a, ɩ́zà, nyʋa kɔ́kɔ́mnɩ́ gbɛlɔɔ́ jɩ̀. Nyʋa àna wlʋ́ Zelízalɛ́mʋ lé àna wlʋ́ Iduméebhlɩ kʋ́ lé Zrʋdɛ́ɛnyié a bɩ́. Àna wlʋ́ Tílɩ lé Sidɔ́ɔ. 9Ɩ́ ka ŋnɩ́ a Zozíi srʋ ɔ́ kʋjɩ̀nyʋ̀àà mà a mʋ́mɔ gɔ́lʋ́ ɔ ká pla, nyʋa nɩ kɔɔ́ bhúbhuò. 10Cémʋ́ ɔ́ yalɩma lɛ nyʋa kɔ́kɔ́mnɩ́ a, nyʋaá fɩ́ɛ́ gú bhlá a, á yrá lé a kɔ́ɔ́ gbɔ́. 11Nyʋaá nyumozìzi kʋ jɩ̀ a, á yɛ́ kɔ́ɔ̀kʋ́ Zozíi a, á bhliloó drɩ̀. Nyumozìzìè pá wɔlɩ́ lé ɩ́ cíé, ɩ́ nie, «Mɔ̀, Lagɔ a Yuwliyʋ ɩ̀ ŋwɔ́ɔ!» 12Bhʋ́ Zozíi srʋ nyumozìzìè mà, ɩ bhli né kʋ́, nyʋa nɩ kɔɔ́ yɩbhlɩ.
Zozíi gbázɩ̀ ɔ cíecíenyʋaá a kʋ́gbá sɔ́ mʋ́
(Matíe 10.1‑4; Lúkɩ 6.12‑16)
13Zozíi mʋ kíké wlú, lé nyʋaá ɔ́ wà a ɔ́ pá á wɔlɩ́ lé á yio gɔ̀. 14Lé ɔ́ gbázɩ̀ nyʋa kʋ́gbá sɔ́ mʋ́, ámá à ŋwɔ́ɔ ɔ cíecíenyʋa. Mà ámá ɔ yàsɔ́ na ká kʋ́ námnɩ̀ lé ɔ ká á cíè. A ká Lagɔ a Námadìè nyʋa sa à. 15Ɔ ká á pɔ́wa nyɛ́ lé a ká nyumozìzi jɩ́ɩ̀. 16Áa kʋ́gbá sɔ́ɔ́ a ŋnɩ́ lɛ̀ɛ̀: Simɔ́ɔ ɔ́mɔ́ Zozíi ŋwʋ́ Pɩ́ɛ́lɩ ŋnɩ, 17Zebedée a yúó, Zákɩ yà Záan sɔ́, ámá ɔ́ ŋwʋ́ Bɔanɛgɛsɩ ŋnɩ́. Ɩ́ gba ŋwɔ́ɔ mà, ɔ́ gbúgblule Lagɔ bhísakʋ́. 18Ɔ́ wle Adrée, Filípʋ lé Batelemíi. Ɔ́ wle sáà Matíe lé Tomáa yà Afée a yʋ́ɔ́ Zákɩ sɔ́. Ɔ́ wle Tadée lé bhlɩ́ɛ́ a kʋbhlanyɔ Simɔ́ɔ. 19Ɔ́ wlee sáà Zudáa Sɩkalɩ́ɔ́tʋ. Zudáa Sɩkalɩ́ɔ́tʋ ɔ́mɔ́ sà lɛ́ Zozíi lé á bhlɔ́ɔ́.
Á ŋáta Zozíi
(Matíe 12.22‑37; Lúkɩ 11.14‑23)
20Lé Zozíi ya ɔ́ kʋjɩ̀nyʋ̀àà sɔ́ yi gbó. Mà cémʋ́ nyʋa zù kpanyɩ ʋ́ a, a nɩ́ cásɩ yɛ́ lé a ká li. 21Zozíi a lɔ́lɔ́kpa nú cémʋ́ ɔ́ nié a, á anɩ́: «Ɔ wlú ya ŋátɔ̀.» Ɩ́ ka ŋnɩ́ a, á anɩ́ a kɔ́ɔ́ bhá ka yi.
22Lɔ̀ a másɛnyʋaá à wlʋ́ Zelízalɛ́mʋ a, á anɩ́: «Nyumo zùzùò ʋ̀ kámalɛ nyumozìzìè fɩ́ɛ́ lé á wlele Bezebúlʋ a, ʋ́mʋ́ kʋ̀ ɔ̀ mʋ́. Ʋ́mʋ́ nyɛ́ ɔ́ pɔ́wa lé ɔ́ jɩ́lɛ nyumozìzi.»
23Ɩ́ ka ŋnɩ́ a, Zozíi wle á lé ɔ́ pá á dɔ̀. Ɔ́ srʋ á mà: «Cégbá mʋ́ Dɩ́blʋ yi míi lé ɔ́ yi ɔ́ nyoku jɩ́ɩ a? 24Léyibhlɩ a múó a mnɩ́ a nyʋa nɩ dúlo mʋ́, lé a nɩ vʋ a, bhʋ́anɩ léyibhlɩ́ɛ́ nɩ́ námà. 25Lɔ́lɔ́kpa a múó a mnɩ́ a nyʋa nɩ dúlo mʋ́ a, bhʋ́anɩ lɔ́lɔ́kpaá áa bhɩa. 26Naa, Dɩ́blʋ nɩ ka ɔ nyoku tʋ́ la a, ɔ nɩ la ɔ nyoku tʋ́ a, ɔ pɔ́waá nɩ́ kla dʋ́, áa tuo.
27Nyɔ nɩ́ ka míi lé ɔ liyʋɔ́ kà fɩ́ a, ɔ ká ɔ́ wlʋɔ́ a mnɩ́ pla lé ɔ ká ɔ́ kakalɩ fa. Ɔ kɩ́ɩ́ fa a, ɔ́ɔ yio fɩ́ɛ́ gʋa bhʋ́ ɔ́ yi míi lé ɔ́ yi ɔ́ wlʋɔ́ a mnɩ́ pla lé ɔ́ yi ɔ́ kakalɩ fa. 28Mà nyɔ yi nyumoé a céàna nɩ, cícíwɔlɩ yà nɩnɩgbɩ sɔ́ a mnɩ́, ɔ nɩ bhibhie Lagɔ a ɔ́ cieloó. 29Mà ɛ́ nɩ ŋwɔ́ɔ Blɔ̀blɔ̀zùzùò ʋ́mʋ́ ɔ nɩ nyumò kʋ́ a, bhʋ́anɩ nyɔɔ́, ɔ nɩ́ cieleé ka kɔ́ lé kɔ́.» 30Á anɩ́: «Ɔ yà nyumozùzu sɔ́ zrɩlɛ kʋ́ a ɩ́ zà ɔ́ srʋɛ àyɩ sɩ́tɛ̀.»
Zozíi a lɔ́lɔ́kpa
(Matíe 12.46‑50; Lúkɩ 8.19‑21)
31Bhʋ́ a tányɩɛ́ a múó a mnɩ́, Zozíi ɔ níayúó yà ɔ nɛ́ sɔ́ yi. Á yi a, á nynʋ́vʋ̀ jrùkʋ́ lé á nɩ lé á wleó. 32Nyʋa kɔ́kɔ́mnɩ́ bɔ́ɔ Zozíi gɔ̀ á glalɔɔ́ klʋ́. Lé á srʋ ɔ́, á anɩ́: «Ɩ̀ nɛ́ lé ɩ̀ níayúó sɔ́ nynʋ́vʋ̀ ɔ̀ jrùkʋ́ á yrá nà zà.» 33Zozíi anɩ́: «Ɔ̀ ŋwɔ́ɔ ɩ nɛ́ yà ɩ níayúó sɔ́ a?» 34Ɔ́ pláa yɩ́ lé ɔ́ dʋdʋ̀ nyʋaá à glalɔɔ́ klʋ́ a jɩ̀ lé ɔ́ srʋ á, ɔ́ anɩ́: «A dʋdʋ̀ nyʋaá lɩ̀à, ámá à ŋwɔ́ɔ ɩ nɛ́ lé ɩ́ níayúó. 35Nyɔɔ́ ɔ̀ nie wɔlɩ́ɛ́ Lagɔ wà a, ɔ́mɔ́ ɔ̀ ŋwɔ́ɔ ɩ nɩ́ayʋ́, yà ɩ nɛ́ sɔ́.»
Markert nå:
Málɩ́kɩ 3: NEY
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© (Active), Wycliffe Bible Translators, Inc. All rights reserved.
